Taangaanga Meitaki i te Au Turanga Taui Anga

E maata te aiteite ra no Pum, Jan, Dries, e Otto, e aronga pakari Kerititiano e a te noo ra i Netarani. Kua akaipoipo nga tangata toko a e e tamariki ta ratou. Pera katoa, i etai au mataiti i topa atu, kua rauka ia ratou katoatoa tetai angaanga tamou e te au are tau ua. Inara, kua akamutu ratou katoatoa i te angaanga e kua akamata i te akono i to ratou tuatau e te maroiroi no te akatotoaanga i te au anoano o te Patireia. Na teaa i akariro ia ratou kia rave i teia taui anga? Kua taangaanga meitaki te katoatoa i te au turanga taui anga.

I TE openga ra ka tupu te au turanga taui anga ki te maata anga ia tatou. E manganui te au taui anga, mei te akaipoipoanga, te anauanga tamariki, me kare te akonoanga i nga metua ruaine, te akatupu maira i tetai atu au apainga. Inara, te tuku maira etai i te rangatira maata no te akamaata i ta tatou angaanga orometua Kerititiano. (Mataio 9:37, 38) Ei akatauanga, penei ka akaruke ta tatou tamariki mamaata i te kainga, me kare ka akamutu tatou i te angaanga anga.

Pera katoa, koi tika ei e ka taui to tatou au turanga me te inangaro ra tatou me kare ra, kua autu etai au Kerititiano i te akanooanga i te au taui anga i roto i to ratou au turanga tei akatuera i te tuatau no te akamaata i ta ratou tuanga i roto i te angaanga orometua. Ko teia tikai ta Pum, Jan, Dries, e Otto i rave. Akapeea ra?

Me Akaruke te Tamariki i te Kainga

E angaanga ana a Pum ei tangata tare numero i roto i tetai kamupani pharmacy. E tavini ana raua ko tana vaine, ko Anny, i tetai taime ei nga orometua painia tauturu ma ta raua nga tamaine e rua. Kua akanoonoo katoa a Pum raua ko Anny i tetai tuatau oaoaanga ma tetai aronga ke i roto i te angaanga orometua painia. “Kua akatupu teia i te paruruanga mei te au manamanata te ka akatupuia mai e tetai atu au tu oaoaanga,” i akakite mai ei raua. Kua akakeuia e te akaraanga a to raua nga metua, kua riro nga tamaine e rua ei nga painia tamou i te akamutuanga i te apii teitei.

I te akarukeanga ta raua nga tamariki i te kainga, kua kite atu a Pum raua ko Anny e kua tuku maata mai teia turanga taui anga kia raua i te tu rangatira e te au moni te ka rauka ia raua i te akapou i te teretere ki te au ngai umereia me kare kia rekareka i te au tu tarekareka anga. Inara, kua iki nga tokorua i te taangaanga i to raua au turanga taui anga no te akamaata atu i ta raua angaanga orometua Kerititiano. No reira kua pati atu a Pum me ka tika i tona pu angaanga kia akatopa mai e tai ra i te epetoma taki tai kare aia e angaanga. I muri mai, kua rave a Pum i te au akanoonooanga tei akariro iaia kia akamata i te angaanga i te 7:00 a.m. e kia akamutu i te 2:00 p.m. E tika, te angaanga meangiti anga tera te aiteanga ko te akono ua anga i te moni tutaki meangiti. Noatu rai, kua autu raua, e i te 1991, kua piri atu a Pum ki tana vaine i te rave anga i te painia tamou.

Aru mai, kua patiia atu a Pum kia riro ei tangata akono tauturu i te Are Uipaanga Akaputuputuanga o te Au Kite o Iehova. Tera te aiteanga o taua patianga e ka akaruke nga tokorua i to raua kainga ta raua i noo ana no etai 30 mataiti e kia neke atu  ki roto i tetai apatimani i runga i te ngai o te Are Uipaanga Akaputuputuanga. Kua neke atu raua. Kua ngata ainei te reira? Te pau maira a Anny me tupu ana te manako mii i te kainga kiaia, kua ui aia kiaia uaorai, ‘E vaine ainei au na Lota?’ Kua patoi aia i te ‘akara ki muri.’​—Genese 19:26; Luka 17:32.

Te manako ra a Pum raua ko Anny e kua apai mai ta raua ikianga i te au akameitakianga e manganui. Ko tetai o te au apinga e manganui, te rekareka ra raua i ta raua angaanga i te Are Uipaanga Akaputuputuanga, te au angaanga akapapaia no te au uruoaanga tapere, e te aravei anga i te au akaaere kotinga (au orometua tutaka) te oronga ra i ta ratou tuatua i te are uipaanga. E taki tai ua ake taime, kua atoro raua i te au putuputuanga tukeke me tavini a Pum ei akaaere kotinga komono ua.

Eaa tei akariro i nga tokorua kia autu i roto i te akamaata anga i ta raua angaanga? Te karanga maira a Pum: “Me tupu te taui anga maata i roto i toou oraanga, ka anoanoia koe kia rave i tei meitaki no te au tauianga ou.”

Akonoanga i Tetai Oraanga Ngoie Ua

E toru a Jan raua ko tana vaine, ko Woth, tamariki. Mei ia Pum e tona ngutuare tangata, kua taangaanga meitaki a Jan i tona au turanga taui anga. No tetai au mataiti, kua akono a Jan i tetai turanga angaanga meitaki te tutaki i tetai pangika e kua oronga mai i tetai oraanga tau ua no tona ngutuare tangata. Inara, kua tupu tona inangaro no te akamaata i tana angaanga orometua. Te akamarama maira aia: “I roto i toku oraanga, kua akaoonuia toku tu ariki i te tuatua mou, e kua tupu toku inangaro ia Iehova.” No reira i te 1986, kua taui a Jan i tona au turanga. Te karanga maira aia: “Kua rave au i tei meitaki i te tupuanga mai te akatanotanoanga i te akaaerenga i te ngai angaanga e kua akamata i te angaanga ma te ora akameangitiia. Kua tapa toku au taeake i te angaanga iaku e ko Diwodo no te mea te angaanga ra au i te dinsdag [Ruirua], woensdag [Ruitoru], e te donderdag [Paraparau]. Kua topa taku moni tutaki e 40 patene. Kua oko au i to matou kainga, e kua oko atu i tetai poti tau kia nooia e raukai ia matou i te tavini i te ngai te anoano maataia ra te aronga papuritia Patireia. I muri mai, kua rave au i tei meitaki i te akaangaroi vave anga mei te angaanga; kua topa roa atu taku moni tutaki ki te 20 patene, inara i te 1993, kua rauka iaku i te akamata i te tavini ei painia tamou.”

I teia tuatau, e mema a Jan no te Hospital Liaison Committee e kua angaanga tamou ana ei akaaere no te uruoaanga. Noatu kare e meitaki roa ana tona oraanga kopapa, e tavini ana a Woth i tetai taime ei painia tauturu i tetai atianga. Kua  akaipoipo nga tamariki e toru i teianei e, ma to ratou au tokorua, te rave maroiroi ra ei au orometua no te Patireia.

Akapeea a Jan raua ko Woth i te akanoonoo anga kia tau ki tetai turanga oraanga meangiti tei rauka? “I te tuatau i maata ei ta matou au apinganui,” i pau mai ei a Jan, “kua akapapu matou auraka kia piri pu tikai ki te au apinga materia. I teia tuatau penei kare e tau roa ana i te tiaki e raukai tetai apinga, inara na te au akameitakianga i te pae vaerua e te tavini anga takake i rauka ia matou e mono atu i te reira ma te maata atu.”

Mei ia Jan raua ko Woth, kua tuku katoa a Dries raua ko tana vaine, ko Jenny i te iki anga kia akono ngoie ua i to raua oraanga e raukai i te tuku maata i te taime no te au anoano o te Patireia. Te tavini ra a Dries raua ko Jenny ei nga painia e tae roa i te riro anga mai raua ei nga metua. I reira, ei akono i tona ngutuare tangata, kua angaanga a Dries ei akaaere i roto i tetai kamupani maatamaata. Kua ariki meitaki tona au pu i tana angaanga e kua oronga i tetai turanga teitei i te angaanga nana. Inara, kua patoi a Dries i te ariki atu i taua turanga teitei no te mea ko te ariki anga i te reira tera te aiteanga ka meangiti tona taime i roto i te au angaanga Kerititiano.

Te utuutuanga i tetai ngutuare tangata​—e pera katoa te akonoanga i to Jenny metua vaine​—kua umuumu maata i te tuatau e te maroiroi o nga tokorua. Noatu rai, kua rave ua atu raua i te tatanu i te tu painia. Na teaa i tauturu ia raua kia rave i teia? Te akamarama maira a Jenny: “Kua noo mai te au painia kia matou, kua pati i te au painia kia aere mai kia kaikai, e kua oronga i te ngai nooanga no te au akaaere kotinga.” Kua tuatua mai a Dries: “Kua akono ngoie ua maua i to maua oraanga e kua kopae i te akaputu i te au kaiou. Kua tuku maua i te ikianga auraka rava e piri atu ki roto i te au akonoanga pitiniti maatamaata me kare no te oko i tetai kainga, e a te tuatau ki mua kare maua e tapuia e taua au apinga.”

Te ikianga a Dries raua ko Jenny kia akono i te au turanga tei akatika i te taime maata no raua no te au anoano o te Patireia kua oronga mai i te au tupuanga puapinga. Te tavini nei ta raua nga tamaiti ei aronga pakari, e te painia ra tetai ma tana vaine. Te tavini ra a Dries raua ko Jenny ei nga painia takake, e i muri mai kua kapiti atu a Jenny kia Dries i roto i te angaanga kotinga. I teianei e nga tauturu raua i te Betela, i reira te tavini ra a Dries ei mema o te Kumiti Manga.

Ritaea Vave Anga

Tei aiteite kia Dries raua ko Jenny, kua painia a Otto raua ko tana vaine, ko Judy i mua ake ka anau ei i ta raua nga tamaine. I te nui anga a Judy i ta raua tama mua, kua rauka ia Otto tetai angaanga ei puapii.

I te tamariki e tupu maira, kua akono ana a Otto raua ko Judy i te au painia i roto i to raua kainga e raukai i ta raua nga tamaine i te kite i te tu rekareka o te aronga angaanga tamou Kerititiano. Kare i roa ana, kua rave atu ta raua tamaine mua i te angaanga painia. I muri mai, kua aere atu aia ki te Apii  Gileada e, ma tana tane, te tavini ra i teianei ei mitinari i roto i tetai enua i Aperika. Kua akamata ta raua tamaine openga i te painia i te 1987, e kua kapiti atu a Judy kiaia.

Me tuku te au turanga taui anga ia Otto kia angaanga ma te ora meangiti i te apii, kua akapou aia i te toenga o te taime no te painia anga. I te openga ra, kua akaruke aia i tana angaanga. I teia tautau, i roto i te angaanga tutaka aere, te taangaanga ra a Otto i tona kite ei puapii no te akaketaketa i te au putuputuanga i te pae vaerua.

Eaa ta Otto akoanga ki te aronga te ka rave i te ritaea vave anga mei ta ratou angaanga noa ua? “Me ritaea koe, auraka e manako no te akaangaroi no tetai mataiti e te vai atura. Kare e ngata ana i te ‘akaangaroi ua.’ I mua ake ka kite ei koe, kua ngaropoina ia koe te painia anga. Kareka ra, e akamata vave i taau akamaataanga i taau au angaanga orometua.”

Tupuanga Oraanga i te Angaanga

E tika, kare i rauka i nga taeake ko Pum, Jan, Dries, e Otto te maroiroi e te turanga kopapa meitaki tei rauka ia ratou i to ratou mapu anga. Inara kua rauka ia ratou te kite tangata pakari, te tupuanga, e te tu pakari. (Maseli 20:29) Kua kite ratou i te aiteanga no te riroanga ei au metua tane, e mei te angaanga kapitianga ma ta ratou au vaine, kua kite ratou e eaa te o atura i roto i te riroanga ei metua vaine. Ma ta ratou au vaine, kua akono ratou i te au manamanata i te pae ngutuare tangata e kua akanoo i te au akakoroanga teokaratiki no ta ratou tamariki. I na Otto ei: “Me oronga ana au i te akoanga ei akaaere kotinga no runga tikai i te ngutuare tangata, kua tauturu te utuutuanga i te tamariki iaku.” Pera katoa, kua akariro to Dries tupuanga ei metua tane i teianei iaia e kia oronga i te au mea meitaki ki te pamiri Betela, ma te aronga mapu angaanga e manganui.

Ae, te tauturu ra te kite uaorai i taua au taeake kia akono i te au umuumu anga tuketuke i roto i te au putuputuanga. Kua akakoi to ratou tupuanga, mei tera te tu, i te au apinga ta ratou e taangaanga ra, e kua taangaanga ratou i to ratou maroiroi ei meitaki tikai ki te katoatoa. (Koheleta 10:10) Ko te tika, i roto i tetai tuatau akatakaia, kua rauka ia ratou i te akatupu maata i tei rauka i te aronga matutu i te pae kopapa inara kare i rauka te kite pakari.

E au akaraanga meitaki taua au taeake, ma ta ratou au vaine, no te aronga ou i roto i to Iehova iti tangata. Te kite ra te aronga ou e te tupu ra te au akaaoanga e manganui ki te au tokorua e te au akameitakianga te akakiteia maira i roto i te au puka Kerititiano. E akamaroiroianga i te kite atu i te au tane e te au vaine te akaari ra i te tu mei to Kaleba rai, noatu kua ruaine, kua pati i tetai tukuanga angaanga akaaoanga.​—Iosua 14:10-12.

Aru i to Ratou Akarongo

Ka rauka ainei ia koe i te aru i te akarongo e te angaanga a teia au tokorua tei taikuia i roto i teia atikara? E akamaara, kua akariro ratou i te tuatua mou e ko to ratou oraanga ia. Kua akatupu ratou i roto i ta ratou tamariki i te anoano kia painia. Kua rave ratou i te reira, mei ta Jan e tuatua ra, “na te riro anga ei akaraanga no te inangaro ia Iehova e tana akaaerenga, na te akanoonooanga e kia rauka te kapitianga meitaki, e na te apiianga ki te tamariki kia riro ei aronga turu ia ratou uaorai.” Kua angaanga katoa ratou e kua kangakanga ma te kapipiti ei ngutuare tangata. “I te tuatau orote,” i maara ei a Pum, “kua rave te katoa anga o te ngutuare tangata ei peu matauia i te tutu aereanga i te popongi e te rekareka anga i te akaangaroi anga ma te kapiti i te avatea.”

Pera katoa, kua parani teia au Kerititiano no te tuatau ki mua, me taui to ratou au turanga, kua papa ratou no te akono meitaki i te turanga ou. Kua akanoo ratou i te au akakoroanga e kua tuku i te au ikianga akarapurapu e kia rauka ta ratou au akakoroanga. Kua akara ratou i te au mataara kia meangiti mai te raveanga i te angaanga noa ua e kua puareinga ua i te akono merengo ua i te moni meangiti. (Philipi 1:10) Kua turuturu pu tikai te au vaine i ta ratou au tane. Ma te kapiti, kua rauka ia ratou te anoano anga pakari i te tomo atu ki roto i tetai “ngutupa maata te taki atura ki te angaanga” e, tei tupu mai, kua rekareka i te au akameitakianga mei ia Iehova mai.​—1 Korinetia 16:9; Maseli 10:22.

Te anoano akapera ra ainei koe kia akamaata i taau tuanga i roto i te angaanga orometua? Me koia ia, te akariroanga i tei meitaki no te au turanga taui anga penei ka riro ei taviri no te raveanga i te reira.

[Tutu i te kapi 20]

Pum raua ko Anny e akono ra i te Are Uipaanga Akaputuputuanga

[Tutu i te kapi 20]

Jan raua ko Woth e rave ra i te angaanga tutu aerenga

[Tutu i te kapi 21]

Dries raua ko Jenny e tavini ra i te Betela

[Tutu i te kapi 21]

Otto raua ko Judy e akapapa ra no te atoro i te putuputuanga ka aru mai