Takinokinoanga Akonoanga​—No Teaa Ra?

TE IRINAKI ra ainei koe e ka tika kia takinokinoia te au tangata no ta ratou akonoanga? Penei e kare​—tera ua ra me kare ratou e arairai ana i te au tikaanga o etai ke. Inara, kua roa te takinokinoanga akonoanga e te vai nei rai. Ei akaraanga, e manganui te Au Kite o Iehova i Europa e i tetai atu au tuanga o te ao kua akakore putuputuia to ratou au tikaanga e kua takinokino tikaiia i roto i te 20 anere mataiti.

I taua tuatau ra, kua tupu ki te Au Kite o Iehova te takinokinoanga mamae pakari, tei akakoroia ra, e te roa i raro ake i nga tutaraanga mana akatere poritiki mamaata o Europa. Eaa ta tei tupu kia ratou e apii maira ia tatou no runga i te takinokinoanga akonoanga? E eaa ta tatou ka kite mei to ratou tu i te ariu anga atu ki te tamamaeanga?

“Kare i to Teianei Ao”

Te tauta ra te Au Kite o Iehova kia riro ei au tangata akono i te ture, i te au, e te tu akono tau. Kare ratou e patoi i te au kavamani me kare e kimi atu i te pekapeka kia ratou, kare katoa ratou e titau atu ana i te takinokinoanga no te mea e te inangaro ra ratou kia riro ei aronga taiaia. E turanga neutara to teia au Kerititiano i te pae poritiki. Te au ra teia ki ta Iesu au tuatua e: “Kare [taku au pipi] i to teianei ao, mei iaku nei rai oki, kare i to teianei ao.” (Ioane 17:16) E maata te au kavamani tei akatika i te turanga neutara o te Au Kite. Kareka ra e meangiti ua te akangateitei anga a te aronga tutaraanga mana akatere poritiki no te umuumuanga Pipiria e kare te au Kerititiano i to teianei ao.

Te tumu no teia kua akatakaia mai i te tuatau o tetai uipaanga i te Apii Teitei o Heidelberg, i  Tiamani, i roto ia Noema 2000. Te tumu tuatua no te uipaanga te “Maroanga e te Tikaanga o Tetai: Te Au Kite o Iehova i Raro Ake i te National Socialist e te Au Tutaraanga Komuniti.” Kua akakite mai a Dr. Clemens Vollnhals o te Hannah-Arendt-Institute no te Kimikimianga ki Roto i te Apiianga Mana Akatere Poritiki e: “Kare te au tutaraanga mana akatere poritiki i takotinga i ta ratou au angaanga ki te au poritiki anake ua. Te maro maira ratou i te peretana katoa.”

Kare te au Kerititiano mou e tuku i to ratou “peretana katoa” ki tetai kavamani a te tangata, i te mea e kua tia ratou i te kauraro anga tikai ki te Atua kia Iehova anake ua. Te Au Kite te ora ra i raro ake i te au tutaraanga mana akatere poritiki kua kite i tetai taime e te patoi ra te au maroanga a te Au-Enua i te au umuumuanga o to ratou akarongo. Eaa ta ratou i rave i te aro atu anga i taua au maroanga ra? I roto i te tuatua enua, kua taangaanga te Au Kite o Iehova i roto i to ratou au oraanga i te kaveinga tei akakiteia mai e te au pipi a Iesu Karaiti e: “Ko te Atua ta matou e akarongo e tikaʼi auraka te tangata.”​—Angaanga 5:29.

E tauatini ua atu te Au Kite tei tamou tiratiratu ki to ratou akarongo e kua vai neutara ua i roto i te au mea poritiki, noatu rai te takinokinoanga pakari roa atu. Akapeea ratou i te akakoromaki anga? Noea mai te ngai i rauka mai ei ia ratou te maroiroi kia akapera? E tuku mai na ratou uaorai e pau atu. E kia akara tatou e eaa ta te katoatoa, te Au Kite e te aronga kare i te Au Kite, ka akakite mai mei te au tu tei tupu kia ratou.

[Tataanga i te kapi 4]

Kua tupu ki te Au Kite o Iehova i Tiamani te takinokinoanga mamae pakari e te roa rai i raro ake i nga tutaraanga mana akatere poritiki o te 20 anere mataiti

[Tataanga i te kapi 4]

“Kare te au tutaraanga mana akatere poritiki i takotinga i ta ratou au angaanga ki te au poritiki anake ua. Te maro maira ratou i te peretana katoa.”​—Dr. Clemens Vollnhals

[Tutu i te kapi 4]

Te ngutuare Kusserow kua akangereia to ratou rangatiraanga no te mea kare ratou i akaoko i to ratou akarongo

[Tutu i te kapi 4]

Kua tamateia a Johannes Harms i roto i tetai are auri Nazi no tona au irinakianga