Au Uianga a te Aronga Tatau

Ka rauka ainei kia raveia atu tetai au mea mei te mea e e ngata no tetai Kerititiano makimaki tei akatainuia i te aere mai ki te akamaaraanga a te putuputuanga no te Kaikai Anga Aiai a te Atu ra?

Ae. Ka rauka e ka tau kia raveia i te akamanakoanga i te turanga o tetai Kerititiano akatainuia tei makimaki ra e peneiake tei runga ua i te roi e no reira kare e rauka i te aere mai me akono te putuputuanga i te Akamaara Anga i te matenga o Karaiti. I taua tu ra, ka rauka i te pupu o te aronga pakari kia akapapa i tetai tangata pakari me kare i tetai tane e Kerititiano pakari i te apai atu i te au tuanga o te varaoa e te uaina oroa ki te taeake irinaki i taua po rai i mua ake i te iti anga te ra.

Tei runga ua i te au turanga, ka rauka i te tangata pakari e atoro ra me kare i tetai atu taeake i te rave i te au tuatua poto ua e te tatau i te au irava tau ra. Ka rauka iaia i te aru i te akaraanga tei akatumuia e Iesu i te akanoo anga Aia i te Kaikai Anga Aiai a te Atu. Ei akatauanga, penei ka tatauia a Mataio 26:26 e ka orongaia te varaoa opue kore i muri ake i te pure. Aru mai, ka rauka i te taeake e atoro ra i te tatau ia Mataio pene 26, te irava 27 e te 28, e te oronga i te uaina i muri ake i tetai pure akaou. Ka rauka kia raveia te au tuatua poto ua no runga i te puapinga o te oroa tataki tai, e ka tau tetai pure openga.

E tika, ka tau kia raveia te tautaanga tau katoa ra kia tae atu ki te akonoanga putuputuanga no te Kaikai Anga Aiai a te Atu. Inara eaa ainei te ka raveia no tetai turanga kino pakari te o maira tetai Kerititiano akatainuia tei rokoia e te maki kino, tei roto i te are maki, me kore kare oki e rauka i te akono i te Akamaara Anga i muri ake i te opunga ra ia Nisana 14? Ka rauka i taua tangata akatainuia ra kia rave aia uaorai mei tei raveia ana i mua ana i roto i te Ture a Mose e te akamaara anga i te reira ko raua anake ua e 30 ra i muri ake.​—Numero 9:9-14.