“E Akavaitata Atu ki te Atua, e Nana e Akavaitata Mai kia Kotou”

I Mua e i Muri Ake​—Kua Taui Takiri Tona Oraanga

MEI teaa te tau kore e te puapinga kore i te oraanga o Matsepang! E tamaine mapu aia i Retoto, e enua i rotopu tikai ia Aperika Apatonga. Kua tupu mai a Matsepang ei Katorika. Inara, koi kore ei i tauturuia kia akavaitata atu ki te Atua, no tetai au mataiti kua takinokinoia aia e te au vaine paretenia tei taangaanga i te moni ei akakeu iaia kia rave i te au angaanga tau kore.

Tei tupu mai, kua manako oripu ua a Matsepang no runga i te akonoanga e kare e irinaki ana i Tei Anga aroa ua mai te manako tikai maira no tana au mea anga te tangata ra. No te manako kore e te takinokino tei tupu kiaia, kua tupu te manako ngakau oonu e te manako puapinga kore kia Matsepang. Kua maata mai aia ma te tu takinokino e te riririri. Kua arataki atu teia ki te tu rave i te kino.

I te openga ra kua riro mai a Matsepang ko tetai i roto i te pupu tei keia i te au tangata i runga i te au rerue. Kua opuia aia e kua tukunaia ki roto i te are auri i Aperika Apatonga. I muri maira, kua apainaia atu aia ki tona enua kainga, ki Retoto, i reira kua rave ua atu aia i te oraanga rave kino, te kona kava, te ta ua, e te tu akono tau kore.

I roto i te turanga kino o tona oraanga, kua pure taitaia ua atu a Matsepang ki te Atua no te tauturu. Kua taputou aia, “E te Atua, me ora au, ka rave au i tei rauka iaku i te tavini ia koe.”

Kare i roa ana, kua araveiia a Matsepang e nga mitinari e Au Kite o Iehova. Kua oronga atu raua i te apii i te Pipiria kiaia. Mei tana apii, kua kite mai aia e kare te Atua e manako papaki tai ana e te manako kore. Ko te tika, kua kite mai aia e ko Satani, te “metua oki no te pikikaa,” te taangaanga ra i te au ravenga kikite e te akavare anga no te akamaata i roto i etai i te manako ngakau e kare ratou e puapinga ana e kia akariro ia ratou kia irinaki e kare rava a Iehova e inangaro ia ratou.​—Ioane 8:44; Ephesia 6:11.

Ei tuke anga, mei teaa te pumaana kia Matsepang i te kite mai anga aia e ka rauka ia tatou te tu ngateitei tau tikai me tataraara tatou no to tatou tu ara ua i topa, te kimi anga i to te Atua tu tataraara, e te tauta anga i te akamareka iaia! Kua tauturuia aia kia marama e e “maata te Atua i to tatou ngakau,” e te manako maira ia tatou na roto i tetai tu penei te tuke ra mei ta tatou manako anga ia tatou uaorai.​—1 Ioane 3:19, 20.

Kua rekareka tikai a Matsepang i te tatau anga i teia au tuatua a te tata taramo ko Davida: “Te vaitata nei a Iehova i te aronga ngakau paruparu ra; e te akaora nei aia i te aronga ngakau taitaia.” (Salamo 34:18) E ko tetai o te aronga “ngakau paruparu,” kua kite mai aia e kare a Iehova e akaruke ana i tona au tavini, noatu me kua tupu te tu taitaia ki etai ia ratou me kare  te manako puapinga kore ra. Kua akapumaana te reira i tona ngakau i te kite anga e te manako maira te Atua i tana au pipi katoatoa e te akaora ra ia ratou na roto i te au tuatau ngata. (Salamo 55:22; 1 Petero 5:6, 7) Kua akakeu maataia aia e te au tuatua: “E akavaitata atu ki te Atua, e nana e akavaitata mai kia kotou na.”​—Iakobo 4:8.

Te mana o te Tuatua a te Atua, te Pipiria, kare i roa ana kua kiteaia i roto i to Matsepang tu oraanga. Kua akamata aia i te aere putuputu ki te au uipaanga Kerititiano e kua akaruke i tana au raveanga kare i tau ki te irava. Tei tupu mai? Kare aia e manako puapinga kore akaou ana no to te Atua aroa e te tu ariki. Mei tona papetitoanga e ko tetai o te Au Kite o Iehova, kua akapou ana aia e au tauatini ua atu au ora i roto i te angaanga orometua ei vaine akakite aere i te tuatua meitaki o te Patireia. Noatu te au mamae mei te tuatau i topa, te akono nei a Matsepang i tetai oraanga mataora e te puapinga maata i teianei. Mei teaa tetai akatutuanga o te mana o te Pipiria kia akameitaki mai i te oraanga!​—Ebera 4:12.

[Tataanga i te kapi 9]

“E te Atua, me ora au, ka rave au i tei rauka iaku i te tavini ia koe”

[Pia i te kapi 9]

Au Kaveinga Pipiria e Angaanga Ra

Te au kaveinga Pipiria tei akapumaana i te au tangata takinokinoia te kapiti maira i te ka aru mai:

“I rotopu i toku nei manako mirimiri-ngata i roto iaku nei, na to [te Atua] akapumaana e akarekareka mai i toku vaerua.” (Salamo 94:19) Te “akapumaana” o Iehova te kitea ra i roto i tana Tuatua e tumu anga akapumaana maata ia. Te akamanakoanga no runga i te reira i te tuatau tamanakoanga e te pure ka tauturu i te akamaru i te au manako manamanata e ka akatupu i te tu irinaki i roto i te Atua ei Oa marama ua.

“Kua rapakau aia [a Iehova] i te aronga ngakau paruparu ra, e kua tākai i to ratou au puta.” (Salamo 147:3) Me ariki tatou i to Iehova tu akaaroa e tana ravenga no te tapoki i ta tatou au ara na roto i te atinga oko o Iesu, ka rauka ia tatou i te aere atu ki te Atua ma te papu tikai ma te kore e manako akaapa ua o te ngakau. Ka akatupu mai teia i te pumaana e te au o te manako.

“Kare te tangata e tae mai kiaku [kia Iesu Karaiti] nei, mari ra kia akatae mai te Metua ko tei tono mai iaku nei iaia; e naku aia e akatu akaou kia tae ki te rā openga ra.” (Ioane 6:44) Na roto i tona vaerua tapu e na roto i te angaanga tutuanga i te Patireia, te akavaitata maira a Iehova ia tatou uaorai ki tana Tamaiti e te oronga maira i te manakonakoanga o te ora mutu kore kia tatou.