Ka Ope Ainei te Putaua?

“EI NA, te roi-mata o te aronga takinga-kinoia ra, kare ra o ratou e akapumaana: e te mana oki tei te pae takinga-kino ra; kare ra o ratou e akapumaana,” i tuatuai te ariki pakari taito o Iseraela ko Solomona. (Koheleta 4:1) Ma te kore e ekoko anga, ko te maata anga o te aronga takinga kinoia tana e manako ra e aronga putaua katoa.

Kare e rauka kia akataka uaia te turanga putaua i te pae o te moni. Kia tau ki tetai tareanga tei orongaia mai e te World Bank ia Tiunu 2002, “kua tamanakoia i te 1998 e 1.2 pirioni tangata i te ao katoa kua akapou e $1 tara i te ra okotai . . . e 2.8 pirioni tei rauka te $2 i te ra okotai.” Kua kiteaia mai noatu e meangiti ua te numero mei te au tareanga i mua ake, “te vai teitei ra rai ratou no te au tangata e mamae ra.”

Ka ope ainei te putaua? Kua akakite a Iesu Karaiti ki tana au pipi: “Ka noo ua rai oki te putaua ki o kotou nei.” (Ioane 12:8) Inara ko te aiteanga ainei e ka vai ua te putaua e tona au tupuanga kino pakari no tetai tuatau roa? Kare, noatu rai kare a Iesu i taputou ana ki tana au pipi e ka puapinga pouroa ratou i te pae apinga, auraka tatou e taopenga mei tana au tuatua e kare o te aronga putaua manakonakoanga.

Noatu te au tautaanga a te tangata e te tikaanga e kua puapinga kore te au taputou no te akaope i te putaua, te akapapu maira te Tuatua a te Atua, te Pipiria, ia tatou e kare e roa atu ka kore te turanga putaua o te tangata. Ko te tika, kua akakite mai a Iesu “i te evangelia i te tangata [“putaua,” NW ].” (Luka 4:18) Te kapiti mai nei ki teia tuatua meitaki te taputou e ka takoreia atu te putaua. Ka tupu teia me akatuera te Patireia o te Atua i te au turanga tuatua tika ki rungao i te enua nei.

Mei teaa te tuke o taua ao! Ka ‘akaperepere [te Ariki ko Iesu Karaiti i te rangi ra] i tei apikepike ra e tei putaua, e akaora oki aia i te au vaerua o te aronga ao ra.’ E tikai, “ka akaora aia i to ratou vaerua i te takinga-kino e te rotoriri ra.”​—Salamo 72:13, 14.

No taua tuatau, te karanga ra a Mika 4:4: “E noo ra ratou ravarai ki raro ake i tana uaorai vine, e ki raro ake i tana uaorai suke, e kare tetai e akamataku mai; ko te vaa oki o Iehova Sabaota ra, tei tuatua mai.” Ka akatikatika te Patireia o te Atua i te au manamanata katoatoa te takinga kino ra i te au tangata, te takore anga i te maki e te mate. Na te Atua e “akakore rava i te mate e tuatau ua atu; e na te Atu ra na Iehova e orei i te roi-mata i te au mata ravarai.”​—Isaia 25:8.

Ka rauka ia koe i te irinaki i teia au taputou no te mea kua akauruia ratou e te Atua uaorai. Kore i reira e akara matatio i te tupuanga te akapapu maira e kua tau kia irinakiia te au totou Pipiria?

[Akameitakianga no te Tataanga i te kapi 32]

FAO photo/M. Marzot