E Papaanga Umere Tikai

KUA teretere atu a Richard E. Byrd e tangata kimikimi e rima taime ki te Antarctic mei te 1928 ki te 1956. Na te tataanga i taua tupuanga e te akono anga i tetai puka tata tika tikai, kua rauka iaia e tona pupu i te akataka i te au tu o te matangi, te akapapa i te au mapu, e kua maata te kite tei rauka no te tuanga enua o te Antarctic.

Kua akatutu mai to Byrd teretereanga i te puapinga no te akonoanga i tetai papaanga. I roto i tetai papaanga, me kore i tetai puka tata kua akapapaia te au tuatua tei akataka mai i te teretereanga me kore te rereanga. Ka rauka teia akakiteanga kia akara akaouia no runga i tei tupu me kore kia akara meitaki i te au tuatua te ka riro ei puapinga ki te au terepu a te tuatau ki mua.

Kua oronga mai te au Tuatua Tapu i tetai tataanga meitaki roa no te Tiruvi i to Noa tuatau. Kua vai te Vaipuke i te koropu e tere atu i te mataiti. Te akateateamamaoanga no te Tiruvi, kua akapou a Noa, tana vaine, e ta raua nga tamariki tamaroa e toru e ta ratou au vaine e 50 me kore e 60 mataiti i te akatuanga i te araka​—e pai maatamaata mei te 40,000 koea mita te atea. Tona akakoroanga? Kia akaora i etai au tangata e te au manu na roto i te Vaipuke.​—Genese 7:1-3.

Tera te aiteanga, kua ki te puka Pipiria o Genese i te ka tapaia e ko ta Noa papaanga no runga i tei tupu mei te akamataanga o te Vaipuke e tae ua atu ki tona akaruke anga ma tona ngutuare i te araka. Te vaira ainei tetai apinga puapinga no tatou i teia tuatau?