“E Akavaitata Atu ki te Atua, e Nana e Akavaitata Mai kia Kotou”

I Mua e i Muri Ake—Tuatau Marikonga Kore i Topa, Tuatau Meitaki ki Mua

“E MEA ora oki te tuatua a te Atua, e te ririnui, e kokoi maata oki to te reira i to te koke matarua ra . . . e te akara matariki oki i te manako e te vananga o te ngakau ra.” (Ebera 4:12) I tuatua ei te apotetoro ko Paulo no runga i te mana ko oonu o te tuatua a te Atua. Te rauka anga i te reira i te itae i te ngakau kua kiteaia i te anere mataiti mua T.N. Noatu te tu tau kore o taua tuatau, ko te aronga tei riro mai ei au Kerititiano kua rauka i te akatangata ou.​—Roma 1:28, 29; Kolosa 3:8-10.

Te mana akataui anga o te tuatua a te Atua, tei tataia i roto i te Pipiria, te kitea katoaia ra i teia tuatau. Ei akaraanga, ka akamanako ana i te turanga o tetai tangata roaroa e te maroiroi ko Richard tona ingoa. No te viviki ua i te akaririia, ka ta ua a Richard me akatupuia tetai manga pekapeka. Kua ta kinoia tona oraanga e te raveanga ta ua. Kua piri katoa atu a Richard ki roto i tetai karapu moto. Kua tereni pakari aia e kua riro mai ei tumutoa kite i te moto o Westphalia, i Tiamani. Kua inu maata katoa a Richard e e putuputu te taime kua o atu ki roto i te au taanga. I tetai atianga, kua tamateia tetai tangata, vaitata rai a Richard i te aere atu ki roto i te are auri.

Ka akapeea to Richard akaipoipo? “I mua ake ka apii ei maua ko Heike i te Pipiria,” i maara ei a Richard, “kua akono maua i te oraanga takake. Kua akapou a Heike i te maata anga o tona taime ma tona au oa vaine, iaku e rekareka ra i taku au angaanga​—te mea mua te moto, te tupaorooro, e te ruku.”

I te akamata anga a Richard raua ko Heike i te apii i te Pipiria ma te Au Kite o Iehova, kua manako puapinga kore a Richard e me ka rauka rai i te rave i te au tauianga i te akaraanga e kare e rauka i te akatanotano atu i tona oraanga ki te au kaveinga teitei tei akanooia ki roto i te Tuatua a te Atua. Inara, i te kite meitaki anga mai aia i te Atua ko Iehova, kua akatupu a Richard i te inangaro pakari no te akamareka iaia. Kua kite mai a Richard e kare te Atua e mareka ana i te aronga inangaro i te ta ua me kore te aronga e taangaanga ra i te reira ei tarekarekaanga. “Kareka te tangata kino, e tei inangaro i te takinga-kino, ka riri roa [a Iehova],” i kite mai ei a Richard.​—Salamo 11:5.

Pera katoa, te manakonakoanga no te ora anga e tuatau ua atu ki roto i te parataito i te enua nei kua rekaia e Richard raua ko Heike. Kua inangaro raua e ko raua kapipiti tetai i reira! (Isaia 65:21-23) Te patianga “e akavaitata atu ki te Atua, e nana e akavaitata mai kia kotou na” kua akakeu oonuia ia Richard. (Iakobo 4:8) Kua kite atu aia i te puapinga no te akarongo anga i teia akoanga akauruia: “Auraka koe e vareae i te tangata takinga-kino, e auraka e aere na tona katoa ra au arataa. E mea viivii oki na Iehova te aronga māro ra, tei te aronga tuatua-tika ra tana muna.”​—Maseli 3:31, 32.

Noatu kua rauka te anoano maata kia taui i tona arataa, kua kite mai a Richard e kare e rauka iaia i te irinaki ki runga i tona uaorai maroiroi. Kua kite mai aia i te puapinga i te kimi i to te Atua tauturu na roto i te pure. Kua rave i reira aia ma te rotai ki ta Iesu au tuatua ki Tana au apotetoro: “E pure oki kia kore kotou e rokoia e te timataanga: kua tika oki i te vaerua, te parukaua nei ra te kopapa.”​—Mataio 26:41.

I muri mai i te kiteanga i to te Atua manako no te ta ua e te riri, kare a Richard i ekoko ana e e tarekarekaanga ariki koreia te moto anga. Ma te tauturu mei ia Iehova e te akamaroiroianga mei te aronga  tei apii i te Pipiria kiaia, kua akaruke a Richard i te ta ua. Kua akaruke aia i te moto e te akatupu pekapeka e kua iki i te akameitaki atu i tona oraanga ngutuare tangata. “I te apiianga i te tuatua mou mei te Pipiria kua tauturu mai iaku kia tapu e kia akamanako i mua ake ka rave ei i te angaanga,” i na Richard ei, e akaaere maru aia i teianei i roto i tetai putuputuanga o te Au Kite o Iehova. Kua tuatua mai aia: “Ko nga kaveinga o te aroa e te akangateitei te arataki nei iaku i roto i toku pirianga ma taku vaine e te tamariki. Tei tupu, kua piri vaitata to matou ngutuare tangata.”

Kua akaapa ana etai aronga kare i akakite meitakiia i te Au Kite o Iehova no te akatakake i te au ngutuare tangata. Inara, te patoi ra te au akaraanga o te au tangata tataki tai mei ia Richard rai i taua akaapa anga. Ko te tika, ka akatupu te tuatua mou Pipiria i te tu tinamou e te tuatau meitaki ki mua no te aronga e tuatau marikonga kore to ratou i te tuatau i topa.​—Ieremia 29:11.

[Tataanga i te kapi 9]

“Kua oronga mai te manakonakoanga no te enua parataito i te akakeuanga kiaku kia taui”

[Pia i te kapi 9]

Au Kaveinga Pipiria e Angaanga Ra

Ka rauka i te Pipiria i te akatupu i te akakeu anga ririnui ki runga i te au oraanga o te tangata. Ko teia etai au kaveinga Tuatua Tapu tei tauturu i te au tangata tu ta ua kia taui:

“Tei kore e rapurapu i te riri ra, e meitaki maata tona i to te aronga ririnui; e tei vi tona uaorai vaerua, i tei pou iaia te oire.” (Maseli 16:32) E akairo paruparu te riri kare i akatereia, kare i te maroiroi.

“Na te akono o te tangata i kore ei i riri vave.” (Maseli 19:11) Te kite karape e te marama anga i tetai turanga ka tauturu i tetai kia akara tikai i te au tumu i tupu ei te taumaroanga e ka tauturu kia kore te riri e tupu mai.

‘Auraka e akataunga atu ki te tangata rotoriri ko te apii katoa aea koe i tona aerenga.’ (Maseli 22:24, 25) Ka kopae te au Kerititiano ma te pakari i te kapiti atu ki te aronga riri viviki.