Ka Noo Taki Tai ki Raro i Tana Tumu Tuke

TE INANGARO maataia ra te marumaru i te au tuatau vera i te au enua i te Itinga Rotopu. Te rekaia ra tetai tumu rakau marumaru mei te vero o te ra, koia tikai me tupu te reira i te pae i to tetai kainga. Ma tona au rau maatamaata e te au atava totoa aere, te oronga maira te tumu tuke i te marumaru meitaki i tetai atu tumu rakau o taua ngai ra.

I na te puka Plants of the Bible ei, ko te “marumaru [o tetai tumu tuke] te tuatuaia ra e mea oraora atu e te anuanu i tetai atu puakapa.” Kua rauka i te au tumu tuke e tupu ra i te pae i te au tapa o te au aua vine i Iseraela taito i te oronga i tetai ngai akaangaroi anga ki te aronga angaanga i roto i te aua.

I te openga o tetai ra vera e te roa, ka rauka i te au mema ngutuare tangata i te noo ki raro i ta ratou tumu tuke e ka rekareka i tetai kapitianga tau ua. Pera katoa, te akapuapinga ra te tumu tuke i tona pu ma te au ua matutu e te maata oki. No reira, mei te tuatau o te Ariki ko Solomona, te noo anga ki raro i ta tetai uaorai tumu tuke te akatutu maira i te au, te apinganui, e te apinga maata tikai.​—1 Ariki 4:24, 25.

I te au anere mataiti i mua atu, kua akataka te peroveta ko Mose i te Enua Taputouia ei ‘enua suke.’ (Deuteronomi 8:8) Kua akapapu mai nga tangata aroro e 12 i tona meitaki na te apai anga mai i te au tuke e tetai atu ua rakau ke ki te puakapa o Iseraela. (Numero 13:21-23) I te 19 anere mataiti, kua ripoti mai tetai tangata teretere ki te au enua Pipiria e ko te tumu tuke tetai o te au tumu rakau maata tikai i reira. No reira rai te au Tuatua Tapu i taiku putuputu ei i te au ua tuke e te au tumu tuke!

E Tumu Rakau tei Kokotiia e Rua Taime

Ka akatanotano ua te tumu tuke ki te maata anga o te au one, e kua rauka i te maata o tona aka i te tamou marie i te au tuatau maana maro e te roa i te Itinga Rotopu. E tuke tikai te tumu i te mea e te oronga maira te reira i te au ua tuke mua i roto ia Tiunu e te maata anga o te ua mei ia Aukute e aere ua atu. (Isaia 28:4) Kua kai te au  Iseraela i te ua mua ei ua ou. Ka tamaro ratou i te ua ka aru mai te ka taangaangaia i roto i te mataiti. Ka rauka te au tuke maro i te romiromiia ei keke, i tetai taime kua kapitiia atu te au ua tekati ki te reira. E mea tau, matutu, e te reka tikai teia au keke tuke.

Kua oronga te vaine kite pakari ko Abigaila kia Davida e 200 keke tuke romiromiia, kare e ekokoanga e kua tau teia ei kai na te aronga oro ke. (1 Samuela 25:18, 27) Kua rauka katoa te au puapinga i te pae rapakau i roto i te au tuke romiromiia. Kua paraiia tetai tuke maro tei romiromiia ki runga i te ee tei vaitata i te tamate i te Ariki ko Hezekia noatu kua meitaki mai a Hezekia na roto i te tauturu a te Atua. *​—2 Ariki 20:4-7.

I te au tuatau taito, kua ariki maataia te au tuke maro, i roto aere i te au ngai Metiterenia. Kua akaariari te tangata rave angaanga kavamani ko Cato i tetai tuke ei akakeu i te Pupu Konitara o Roma kia akamata i te Tamaki Toru Punic, te patoianga ia Carthage. Kua rauka mai te au tuke tamaro meitakiia i Roma mei Caria, i Asia Minora. No reira, kua riro mai te carica e ko te ingoa Ratino no te au tuke tamaroia. Te akatupu ra rai taua ngai i teia tuatau ko Tureki i te au tuke tamaro meitaki roa.

Kua tanu putuputu ana te aronga pama o Iseraela i te au tumu tuke i te pae i te au aua vine, inara ka tipu ratou i te au tumu kare e uua ana. Kare e rava ana te one meitaki kia kaimoumouia ki runga i te au tumu rakau kare e ua ana. I roto i ta Iesu akatutuanga o tetai tumu tuke kare e ua ana, kua akakite te pama ki tetai tangata akono i te vine: “I na, ko te toru teia o toku mataiti i te aere anga mai e akara i te kai i rungao i teianei suke, e kare rava akenei; e kokoti atu; eaa aia e akakapikapi ei i te kainga?” (Luka 13:6, 7) I te mea e tutakiia ana te tero no te au tumu ua rakau i to Iesu tuatau, ka riro katoa tetai tumu kare e ua ana ei taitaia i te pae moni kare e anoanoia.

E puapinga maata to te au tuke i roto i te kai a to Iseraela. No te reira, ka riro tetai kokotianga tuke kare e meitaki ana​—penei e utunga pakari no ko mai ia Iehova​—ei tumatetenga. (Hosea 2:12; Amosa 4:9) Kua tuatua te peroveta ko Habakuka e: “Kore ua atu rai te pua anga o te suke; kore ua atu te manga i runga i te au vine, kore ua atu rai te olive i te ua mai, e kore ua atu e kai ki runga i te au kainga . . . E rekareka ra au ia Iehova e rere ua au i te rekareka i te Atua o toku nei ora.”​—Habakuka 3:17, 18.

Ei Akatutuanga no Tetai Iti Tangata Akarongo Kore

I tetai taime e taangaanga ana te au Tuatua Tapu i te au tuke me kore te tumu tuke ei akatutuanga. Ei akatauanga, kua akaaite a Ieremia i te aronga tuikaa ngati Iuda akarongo ra ki tetai kete tei ki i te au ua tuke meitaki, te au ua tuke mua te ka kai ou uaia. Inara, kua akaaiteia te aronga tuikaa akarongo kore ki te au ua kino, tei kore e rauka kia kaingaia e ka titiriia.​—Ieremia 24:2, 5, 8, 10.

I roto i tana akatutuanga o tetai tumu tuke kare e ua ana, kua akaari a Iesu i to te Atua tu tamou marie no te iti tangata ngati Iuda. Mei tei akakiteia mai i mua ana, kua tuatua aia no runga i tetai tangata e tumu tuke tana i roto i tana aua  vine. Kare taua tumu rakau i ua ana e toru mataiti, e kua vaitata te pu i te tipu i te reira ki raro. Inara kua tuatua atu te tangata akono vine: “E taku pu, e vaio ua ake na paa, kia okotai ake mataiti toe, e kenu ua atu rai au, e e tuku atu oki i te teita. Peneiake ko te ua ua ake, e kare ra, naau rai e tipu atu a muri ake.”​—Luka 13:8, 9.

I te oronga anga a Iesu i teia akatutuanga, kua oti ke ana iaia i te tutu aere e toru mataiti, te tauta anga i te tatanu i te akarongo i roto i te au mema o te iti tangata ngati Iuda. Kua akamaata a Iesu i tana angaanga, te “tanutanu” anga i te tumu tuke akatutu ua​—te iti tangata ngati Iuda​—e te tukuanga mai i tetai tuatau no te reira kia ua mai i te ua. Inara, i te epetoma i mua ake ka mate ei a Iesu, kua kitea papuia mai e kua kopae taua iti tangata i te Mesia.​—Mataio 23:37, 38.

Kua taangaanga akaou a Iesu i te tumu tuke ei akatutu i te turanga kino i te pae vaerua o te iti tangata. Koi teretere ei mei Betania ki Ierusalema e a ra i mua ake i tona matenga, kua kite atu aia i tetai tumu tuke ma te maata te au rau inara kare e ua. I te mea e ua mai ana te au tuke mua ma te au rau​—i tetai taime i mua ake ka nionio mai ei te au rau​—i te mea kua ngere te ua o te tumu te akaari maira e mea puapinga kore ia.​—Mareko 11:13, 14. *

Mei te tumu tuke uua kore tei akaraanga maroiroi ra, e tu akaraanga akavare i vao ua to te ngati Iuda. Inara kare te reira i akatupu ana i te ua tau i te Atua, e kua kopae te reira i te openga ra i ta Iehova Tamaiti. Kua akakino a Iesu i te tumu tuke kare i ua ana, e i tera mai ra, kua kite atu te au pipi e kua mae te reira. Kua akatutu mai taua tumu maro ra i ta te Atua kopaeanga e aere maira ki te ngati Iuda ei iti tangata ikiia nona.​—Mareko 11:20, 21.

‘Kia Kite i te Suke Nei’

Kua taangaanga katoa a Iesu i te tumu tuke ei apii i tetai apiianga puapinga no tona parutia. Kua tuatua aia: “E teianei kia kite kotou i tetai parabole i te suke nei; kia tupu te kao, e kia puera te rau, te kite ra kotou e, kua vaitata i akaū i reira. Koia katoa kia kite kotou i taua au mea katoa nei, kua vaitata ïa, tei te pae ngutupa, kia kite oki kotou.” (Mataio 24:32, 33) Te kiteaia ra te au rau matie tikai e kare e ekoko anga e akairo ia e te vaitata maira te tuatau maana. Pera katoa, ta Iesu totou maata tei tataia i roto ia Mataio pene 24, Mareko pene 13, e Luka pene 21 te oronga maira i te akakiteanga papu o tona parutia i teianei i te mana o te Patireia i te rangi ra.​—Luka 21:29-31.

I te mea e te noo nei tatou i roto i taua tuatau kino o te tuatua enua, papu tikai ka inangaro tatou i te apii mai mei te tumu tuke. Me rave tatou e ka noo araara ua i te pae vaerua, ka rauka ia tatou te manakonakoanga no te kite anga i te tupuanga o te taputou mekameka: “E noo ra ratou ravarai ki raro ake i tana uaorai vine, e ki raro ake i tana uaorai suke, e kare tetai e akamataku mai; ko te vaa oki o Iehova Sabaota ra, tei tuatua mai.”​—Mika 4:4.

[Au Tataanga Rikiriki i Raro]