Kia Maroiroi, e kia Re i te Oroanga no te Ora

ME KA teretere koe na roto i tetai uriia i te moana, eaa te tu o te pai taau ka inangaro? Ka inangaro ainei koe i tetai poti meangiti ua me kare i tetai pai tau, tei maani meitakiia? Kare e ekokoanga ka iki koe i te pai, i te mea e ka rauka te reira i te akatere meitakiia na roto i te au ngaru ririnui.

Ia tatou e aere ra na roto i teia uriia e te akatereanga o te au mea kino, ka aro atu tatou i te au akaaoanga tau kore. Te aronga mapu, ei akatauanga, penei i tetai au taime te manako oripu ra e te tinamou kore i roto i teia ao oripu ua nei te au manako e te au peu. Ko te aronga tataki tai tei akamata ua akenei ki te aerenga Kerititiano penei te manako papu kore ua ra rai. Pera katoa etai aronga tei maroiroi ana i te au mataiti e manganui te angaanga tiratiratu anga ki te Atua penei te tupu ra tetai timata anga no te mea kare i akatupu takiri ake ta ratou au tapapaanga.

Kare taua au manako ra ei mea ou. Te au tavini tiratiratu o Iehova, mei ia Mose, Iobu, e Davida, kua manako oripu ana i tetai au tuatau. (Numero 11:14, 15; Iobu 3:1-4; Salamo 55:4) Inara, kua akairoia to ratou tu oraanga na te akono maroiroi anga kia Iehova. Te akamaroiroi maira to ratou au akaraanga meitaki i te tu maroiroi i ta tatou tuanga, inara te inangaro ra a Satani te Tiaporo i te akauri ke ia tatou mei te oroanga no te ora mutu kore. (Luka 22:31) No reira akapeea e rauka ai ia tatou te maroiroi, “ma te akarongo turori kore” ra? (1 Petero 5:9) E akapeea e rauka ai ia tatou i te akaketaketa i to tatou au taeake irinaki ra?

Inangaro a Iehova Kia Maroiroi Tatou

Me tiratiratu tatou kia Iehova, ka vai rai aia i te tauturu ia tatou kia tamou i to tatou tu ngaueue kore. Kua aro atu te tata taramo ko Davida i te au turanga ngata e manganui, inara kua manakonako aia i roto i te Atua e no reira kua rauka i te imene e: “Kua totō [a Iehova] iaku ki vao i taua vaarua rikarika ra, no roto i te vari piripiri ra; e kua tuku aia i toku vaevae ki runga i te papa, e kua akatinamou oki i toku au aerenga.”​—Salamo 40:2.

Kua akaketaketa a Iehova ia tatou kia tamaki i “te kukumianga meitaki ra i te akarongo” kia rauka ia tatou i te ‘opu i te ora mutu kore.’ (1 Timoteo 6:12) Kua oronga katoa mai aia i te au ravenga no tatou kia maroiroi e kia autu i roto i ta tatou tamakianga pae vaerua. Kua raurau te apotetoro ko Paulo i te au taeake Kerititiano kia ‘maroiroi i te Atu, e i te ririnui o tona mana,’ e kia ‘kakau i te rakei katoa a te Atua ra, kia tika ia ratou kia patoi i te ravenga pakari a te diabolo ra.’ (Ephesia 6:10-17) Inara eaa te ka akaoripu ia tatou? E akapeea e rauka ai ia tatou i te patoi atu i taua au akakeuanga kino ra?

Kia Matakite i te Au Tumu Akangaueue

E mea pakari kia maara i teia tumu anga puapinga: Te au ikianga ta tatou ka rave ka akakeu iora i to tatou maroiroi Kerititiano penei ei mea tau me kare ei mea tau kore. Te aro nei te au mapu i te au ikianga no runga i taua au tumu ra mei te angaanga, te akamaata anga i te apii, e te akaipoipo. Penei ka iki te aronga mamaata e me ka neke atu ki tetai ngai ke me kare ka rave i tetai  ua atu angaanga. E rave ana tatou i te au ikianga i te au ra ravarai no runga i te taangaanga anga i te taime e tetai au tumu ke e manganui. Eaa ra te ka tauturu ia tatou kia rave i te au ikianga pakari te ka oronga mai i te maroiroi kia tatou ei au tavini no te Atua? Te akakite ra tetai Kerititiano kua roa te tavini anga e: “Kua pati au i ta Iehova tauturu me rave i te au ikianga. Kua irinaki au e e puapinga maata i te ariki e te akono i te ako anga tei orongaia mai i roto i te Pipiria, i te au uipaanga Kerititiano, e te aronga pakari, e i roto i te au puka tei akatumuia ki runga i te Pipiria.”

Me rave i te au ikianga, e tau meitaki kia ui tatou kia tatou uaorai e: ‘E rima me kare e tai ngauru mataiti mei teianei atu, ka mataora ainei au i te au ikianga taku i rave i teia ra, me kare ka tataraara ainei au i te reira? Te tauta ra ainei au i te akapapu e kare taku au ikianga e akangaueue iaku i te pae vaerua mari ra ka akamaata atu i toku tere anga ki mua i te pae vaerua?’​—Philipi 3:16.

I te riro anga i te au timataanga me kare te akatika anga ia ratou uaorai i te piri vaitata anga i te aati i te au ture a te Atua kua tupu ki etai aronga tataki tai tei papetitoia kia arataki i tetai oraanga maroiroi kore. E tokoiti ua tei akaateaia mei te putuputuanga no te aruaru tataraara kore anga i tetai aerenga ara kua angaanga pakari kia akaoki akaouia mai, e oti kua akaatea akaouia​—i tetai tuatau poto i muri mai​—no taua ravenga tarevake rai. Kare aina e kare ratou i pure ana i te tauturu tu-Atua kia ‘rikarika i te kino e kia kapiti atu ki te meitaki’? (Roma 12:9; Salamo 97:10) Te anoanoia nei tatou katoatoa kia “akatika ua oki i te ara o to [tatou] vaevae.” (Ebera 12:13) No reira e akamanako ana tatou i etai au tumu te ka tauturu ia tatou kia ngaueue kore i te pae vaerua.

Kia Vai Maroiroi na te Au Angaanga Kerititiano

Okotai mataara kia vai maroiroi i roto i ta tatou oroanga no te ora e kia rave maata ua atu i te angaanga tutu anga i te Patireia. Ae, e puapinga maata ta tatou angaanga orometua Kerititiano i te tauturu anga i to tatou au ngakau e te au manako kia akara tamou i te rave anga i te anoano o te Atua e kia mou piri ki runga i te re no te ora mutu kore. No runga i teia, kua raurau a Paulo i to Korinetia e: “E aku au taeake akaperepere e, kia maroiroi kotou, auraka e ngaueue, kia maata nei te rave anga i te angaanga a te Atu, auraka e tivata, kua kite oki kotou e, kare te mea puapinga kore te angaanga a te Atu, ta kotou e rave na.” (1 Korinetia 15:58) Te aiteanga no te “maroiroi” ‘kia mou piri ki te ngai.’ “Auraka e ngaueue” te akatutu ra ‘i te akatika kore anga i tetai uaorai kia matara mei tona ngai tutau.’ No reira, kia angaanga maata i roto i ta tatou angaanga orometua ka rauka tetai tupu anga ngaueue kore i runga i ta tatou aerenga Kerititiano. Te tauturu anga i te au tangata kia kite ia Iehova te oronga maira to tatou au oraanga i te aiteanga e te apai maira i te mataora kia tatou.​—Angaanga 20:35.

Ko Pauline, ko tetai Kerititiano tei akapou e tere atu i te 30 mataiti ei mitinari i roto i tetai angaanga tutu anga tamou, kua akakite mai e: “E paruruanga te angaanga orometua no te mea te akakitekite anga ki tetai ke te akapapu maira kia aku e tei iaku te tuatua mou.” Te akatupu katoa ra taua akapapuanga no te piri putuputu anga ki roto i tetai atu au angaanga Kerititiano, mei te aere anga ki te au uipaanga no te akamorianga e te rave meitakianga i te apii Pipiria naau uaorai.

Akangaueue Koreia e Tetai Akataeakeanga Aroa

Kia riro ei tuanga no te akaaerenga i te ao katoa o te aronga akamori mou ra ka rauka tetai tu ngaueue kore ririnui ki runga ia tatou. Mei teaa te akameitaki anga kia taokotai ma taua akataeakeanga aroa, i te koropu! (1 Petero 2:17) E ka rauka ia tatou te tu ngaueue kore ki runga i to tatou au taeake irinaki ra.

E akamanako ana i te au angaanga tauturu anga o tetai tangata tuatua tika ra ko Iobu. Noatu rai kua maroia te tangata akapumaana pikikaa ra ko Eliphaza kia akatika e: “Kua turuia tei turori ua ra i taau ra tuatua, e te turi akamārū ua, kua ketaketa ia koe.” (Iobu 4:4) Akapeea tatou i roto i teia tu nei? Tei ia tatou tataki tai te apainga kia tauturu i to tatou au taeake e te au tuaine i te pae vaerua kia akakoromaki i roto i te angaanga a te Atua. I ta tatou akonoanga ma ratou, ka rauka ia tatou i te angaanga na roto i te vaerua o te au tuatua e: “E akaketaketa na kotou i te rima apikepike, e e akapakari kotou i te turi ru ua ra.” (Isaia  35:3) No reira eaa ka kore ei e rave i te reira ei akakoroanga naau kia akaketaketa e kia akamaroiroi e tai me kare e rua nga taeake Kerititiano i te au taime ravarai ia koe e aravei ra ia ratou? (Ebera 10:24, 25) Te au tuatua akamaroiroi anga no te akameitakianga e te tu mareka anga no ta ratou au tauta anga kia akamareka ia Iehova ka tauturu tikai ia ratou kia vai maroiroi ma tetai manako kia re i te oroanga no te ora.

Ka rauka i te aronga pakari kia rave maata i te meitaki na te akamaroiroi anga i te aronga ou. Penei ka rauka teia na te oronga anga i te au manakoanga tauturu e te akoanga meitaki no te Tuatua Tapu e te angaanga anga ma ratou i roto i te angaanga koro. Kua akono te apotetoro ko Paulo i te au tuatau i te akaketaketa i tetai ke. Kua anoano aia i te kite i te au Kerititiano i Roma kia rauka iaia i te tauturu e te akaketaketa ia ratou i te pae vaerua. (Roma 1:11) Kua manako aia i tona au taeake e te au tuaine akaperepere i Philipi kia riro ei ‘rekareka anga e e korona’ nona e kua akamaroiroi atura ia ratou e ‘ei turanga turori kore i te Atu’ ra. (Philipi 4:1) Te akarongo anga no runga i te au tu ngata o tona au taeake i Tesalonia, kua tono atu a Paulo ia Timoteo kia ‘akatinamou ia ratou e ei akapumaana ia ratou, kia kore rava tetai tangata kia ngaueue i teianei au mate.’​—1 Tesalonia 3:1-3.

Ko nga apotetoro ko Paulo raua ko Petero kua akatika e kua ariki i te au tauta anga tiratiratu o to raua au taeake akamori. (Kolosa 2:5; 1 Tesalonia 3:7, 8; 2 Petero 1:12) Ka akara aiteite rai tatou, kare ki runga i te au paruparu o to tatou au taeake, mari ra no runga i to ratou au tu meitaki e te kukumi autu anga ratou kia vai maroiroi e te akangateitei anga ia Iehova.

Me te manako papu kore ra me kare te akaapa ra tatou, penei ka akariro tatou ei mea ngata maata na etai kia tamou piri tikai i roto i te akarongo. Mei teaa ra te tau kia maara e “kua mate [to tatou au taeake] i te roiroi, e kua pueurikiriki keia” i roto i teia akatereanga o te au mea! (Mataio 9:36) I roto i te putuputuanga Kerititiano, te tika ra e ka rauka ia ratou i te kite i te pumaana e te akaangaroianga. No reira, kia rave tatou katoatoa i te meitaki tikai kia akamaroiroi i te au taeake irinaki e te tauturu anga ia ratou kia vai maroiroi.

Penei i tetai taime ka akono tetai ia tatou i roto i tetai tu te ka akameangiti i to tatou maroiroi. Ka akatika ainei tatou i tetai tuatua kino me kare i te angaanga manako kore kia apai ia tatou i te akamarie i ta tatou angaanga kia Iehova? Auraka rava tatou e tuku i tetai kia akaanga ke ia tatou mei to tatou tu maroiroi!​—2 Petero 3:17.

Te Au Taputou a te Atua​—E Akakeuanga Ngaueue Kore

Te taputou a Iehova no tetai tuatau umere ki mua i raro ake i te tutara anga Patireia te oronga maira kia tatou i te manakonako anga te ka tauturu ia tatou kia tamou i to tatou tu maroiroi. (Ebera 6:19) E ko te akapapuanga e ka akatupu ua rai te Atua i tana au taputou te akakeu ra ia tatou kia “matakite; kia mou piri tikai te akarongo.” (1 Korinetia 16:13; Ebera 3:6) Tetai taroaroa anga i roto i te akatupuanga i etai o ta te Atua au taputou penei te timata ra i to tatou akarongo. No reira e puapinga maata i reira ia tatou kia matakite i te akavare angaia e te au apiianga pikikaa e te taruri ke anga mei to tatou manakonako anga.​—Kolosa 1:23; Ebera 13:9.

Te akaraanga kino o te ngati Iseraela tei takoreia no te mea kare o ratou akarongo i roto i te au taputou a Iehova ka tau ei akamatakite anga no tatou. (Salamo 78:37) Kare e aite mei ia ratou, kia vai maroiroi tatou, i te tavini anga i te Atua ma te manako rapurapu i teia au tuatau  openga nei. “Te ora nei au mei te mea e ka tae mai te ra maata o Iehova apopo,” i karanga ei tetai tangata pakari kite ra.​—Ioela 1:15.

Ae, te vaitata maira te ra maata o Iehova. Inara, kare e apinga kia mataku tatou me te noo vaitata ra tatou ki te Atua. Me mou piri tatou ki tana au turanga tuatua tika e kia vai maroiroi, ka autu tatou i te oro i te oroanga no te ora mutu kore!​—Maseli 11:19; 1 Timoteo 6:12, 17-19.

[Tutu i te kapi 23]

Te rave pouroa ra ainei koe te ka rauka ia koe kia tauturu i te au taeake Kerititiano kia vai maroiroi?

[Akameitakianga no te Tataanga i te kapi 21]

The Complete Encyclopedia of Illustration/J. G. Heck