Akapaapaa ia Iehova “i Roto i te Uipa Anga Ra”

E AKANOONOOANGA te au uipaanga Kerititiano no ko mai ia Iehova ei akaketaketa i tona iti tangata i te pae vaerua. Na te aere putuputu anga ki te au uipaanga, te akaari ra tatou i to tatou tu arikianga no ta Iehova au akanoonooanga. Pera katoa, ka rauka ia tatou i te ‘akamaroiroi atu [i to tatou au taeake] kia maata te aroa, e i te angaanga memeitaki ra,’ e mataara puapinga ia no te akaari anga i to tatou aroa no tetai e tetai. (Ebera 10:24; Ioane 13:35) Inara, ka akapeea tatou i te akamaroiroi anga i to tatou au taeake i te au uipaanga?

Rave i te Akakitekite Anga ki te Katoatoa

Kua tata te Ariki ko Davida no runga iaia uaorai: “E akakite au i to ingoa i toku ra au taeake: e akapaapaa au ia koe i roto i te uipa anga ra. Ko koe taku e akapaapaa i roto i te uipa anga maata ra.” “Ka akapaapaa au ia koe i roto i te uipa anga maata ra i reira; ka akapaatu au ia koe i rotopu i te au tangata ririnui.” “I tuatua ana au i te tuatua-tika i roto i te uipa anga maata; i na! kare rava toku vaa i muteki i te reira.”​—Salamo 22:22, 25; 35:18; 40:9.

I to te apotetoro ko Paulo tuatau, me uipa atu te au Kerititiano no te akamorianga, ma te arite kua rave ratou i te akakitekite i to ratou akarongo ia Iehova e tona kaka. Na teia mataara kua akamatutu ratou i tetai e tetai e kua akamaroiroi i tetai e tetai kia inangaro i te au  angaanga memeitaki. I to tatou tuatau, e manganui te au anere mataiti i muri ake ia Davida raua ko Paulo, te ‘akara ra tatou i taua rā [o Iehova] ra i te vaitata anga mai.’ (Ebera 10:24, 25) Te vaitata ra to Satani akatereanga o te au mea i te takoreia, e te maata ua atu ra te au manamanata. E kare mei mua ana, “ko te akakoromaki ra te tau” ia tatou. (Ebera 10:36) Me kare ko to tatou au taeake, koai ka rauka i te akamaroiroi ia tatou kia akakoromaki?

I teia tuatau, e mei te tuatau i topa, kua akanooia te au akanoonooanga no te au tangata irinaki kia akakitekite i to ratou akarongo “i roto i te uipa anga ra.” Ko tetai tuatau te ka rauka ki te katoatoa koia oki ko te oronga anga i te au pauanga ki te au uianga tei taikuia ki te aronga e akarongo ra i te au uipaanga putuputuanga. Auraka e manako kore i te au mea meitaki ka rauka i teia i te akatupu. Ei akaraanga, ko te au pauanga te akaari maira e ka akapeea me autu me kare me kopae i te au manamanata te akaketaketa ra i to tatou au taeake kia tauta ua atu i te aru i te au kaveinga Pipiria. Ko te au pauanga te akamarama maira i te au irava Pipiria tei ira mai kare ra i taikuia me kore te au manako tei kapitiia atu mei taau uaorai kimikimianga penei ka akamaroiroi i tetai ke kia akatupu i te au tu matau meitaki no te apii.

Te kite anga e ka akapuapinga ia tatou e tetai ke me pau tatou i te au uipaanga ka tau kia akakeu i te katoatoa o te Au Kite o Iehova kia autu i te tu akama me kore te emiemi. E mea puapinga tikai e kia paupau te aronga pakari e te au tavini orometua i te au uipaanga, i te mea kua tapapaia ratou kia akono i te aratakianga i roto i te kapitianga atu ki roto i te uipaanga, e pera katoa i te uipa atu anga. Inara, ka akapeea tetai tangata i te akamako anga mai me kitea e ia teia tuanga o tana angaanga Kerititiano e e akaaoanga?

Au Tuatua Tamataanga no te Akamako Mai

E akamaara e te o maira a Iehova. Te akamarama maira tetai tuaine Kerititiano e noo ra i Tiamani i tona manako no tana au pauanga. “E au pauanga ua rai ratou naku ki ta Satani tautaanga mei te akakore anga i te au iti tangata o te Atua i te akakitekite i to ratou akarongo.” Te karanga ra tetai taeake ou i roto rai i taua putuputuanga e: “No te paupau anga, e pure putuputu ana au.”

E akapapa meitaki. Me kare i rauka ia koe i te apii meitaki i taua tumu apii i mua atu, ka ngata ia koe i te paupau e kare taau au pauanga e meitaki ana. Te au tuatua tamataanga e ka akapeea me paupau i te au uipaanga putuputuanga te orongaia maira i roto i te puka Benefit From Theocratic Ministry School Education, kapi 70. *

E akanoo i tetai akakoroanga no te oronga penei e tai pauanga i te uipaanga tataki tai. Teia te aiteanga ka akapapa ma te maata i te au pauanga, i te mea e ko te maata ia koe e taaki ra i toou rima, ko te maata atu ia o te tuatau ka kapiki mai te taeake e akono ra ia koe. Penei ka rauka ia koe i te akakite atu kiaia i mua e ko teea  au uianga taau i akapapa no te pau. Te riro ra teia ei tauturu me e tangata ou koe. I te mea e penei ka emiemi koe i te taaki i toou rima “i roto i te uipa anga ra,” te kite anga e naau teia parakarapa e ko tei akono ra i te uipaanga ka akara mai i toou rima ka akamaroiroi ia koe kia paupau.

E paupau vave. Kare e mama ua tetai angaanga ngata me ka tukutuku ua koe. Te paupau vave anga i te uipaanga ka riro ei tauturu ua. Ka poitirere koe mei teaa te mama i te paupau i te rua me kore te toru o te taime me autu koe i te kotoeanga mua no te paupau.

E iki i te nooanga tau. Te mama ra i etai i te paupau me noo ratou ki mua i te Are Uipaanga Patireia. E iti ua te au tamanamanata anga, e ko tei akono ra ka kitea uaia ratou. Me tamata koe i teia, e akamaara i te tuatua ma te tau te maata kia akarongoia mai e te katoatoa, koia tikai me kare te putuputuanga e taangaanga ana i te au pu apai aere.

E akarongo marie. Ka tauturu teia ia koe i te kopae i te ripiti ua i ta tetai ke i tuatua. Pera katoa, ko te au pauanga tei tuatuaia e tetai ke penei ka akamaara atu kia koe i tetai irava me kore i tetai tumu manako te ka rauka i te akamaata atu i taua manako e akakiteia ra. E taki tai ua te taime, penei ka akatutu mai tetai tupuanga poto ua i te tumu manako e uriuriia ra. Ka riro taua au pauanga i te tauturu ua.

E pau na roto i taau uaorai tuatua. Te tatau anga i tetai pauanga no roto mai i te apii e uriuriia ra te akakite maira e kua kitea e koe te pauanga tika, e penei e mataara meitaki ia no te akamata anga i te pau. Inara te akamata anga i te paupau na roto i taau uaorai tuatua te akaari maira e kua marama koe i taua manako. Kare e anoanoia kia taikuia te au tuatua i roto i ta tatou au puka. Kare te Au Kite o Iehova e ripiti ua i tei akakiteia e ta ratou au puka.

E tuatua ua i te manako e apiiia ra. Te au pauanga kare i tau ana ki te manako e apiiia ra me kare te akakore ra i te tumu tuatua e akamanakoia ra kare e tau. Teia te aiteanga e kia tau taau pauanga ki te manako e uriuriia ra. I reira e akapuapinga ei te uriurianga akamaroiroi i te pae vaerua o te upoko tuatua e akatakaia ra.

E akakoro i te akamaroiroi. Ko tetai tumu maata no te paupau koia oki kia akamaroiroi i tetai ke, ka tau tatou kia kopae i te tuatua i te au apinga penei ka akamaroiroi kore ia ratou. Pera katoa, auraka e pau pouroa i te parakarapa e e iti ua me kore kare e apinga na tetai ke kia tuatua. Te au pauanga roa e te ngata ka akakore i te aiteanga. Te pauanga poto ua ma tetai manga tuatua e mea tau ia, e ka akamaroiroi te reira i te aronga ou kia oronga i ta ratou au pauanga ma te poto ua.

Te Tuanga a te Aronga e Akono ra i te Au Uipaanga

No te akamaroiroi anga, ko tei akono ra i te uipaanga e apainga teiaa tana. Ka akaari aia i te manako inangaro i te pauanga katoatoa i orongaia maira na te akarongo meitaki anga e te akara ua anga ma te tau ki tei pau maira kare e ka manako ua i tetai apinga ke. Mei teaa te tau kore me kare aia e akarongo meitaki mai e, tei tupu, kua ripiti uaia i tei tuatuaia me kore ka ui i tetai uianga kua pau ke ia!

Ka riro katoa ei akamaroiroi kore me ripiti putuputu ua tei akono ra na roto i tetai au tuatua tuke i tetai pauanga tei orongaia mai, mei te mea atura e kare i tano meitaki te pauanga i  orongaia mai. I tetai tua, mei teaa atura te akamaroiroianga me ka akamaata atu tetai pauanga i te uriurianga i tetai manako maata. ‘Ka akapeea tatou me taangaanga i teia i roto i ta tatou putuputuanga?’ me kore, ‘Ko teea irava i roto i te parakarapa te turu ra i tei tuatuaia?’ ko nga uianga ia te akamaroiroi ra i te au pauanga papu, te akamaata ra i te pau anga meitaki.

E tika, ka tau kia akameitakiia te aronga ou me kore te aronga akama me oronga ratou i ta ratou pauanga. Penei ka raveia teia ki taua tangata ra i muri mai i te apii e rauka ei i te kopae i te tu akama e kia oronga ki te tangata akono te tuatau kia tuatua i te au tuatuaanga tau.

I roto ua i tetai uriurianga, ko tetai tangata e tuatua maata ra i roto i tetai uriurianga te akamaroiroi kore ra i te komunikeitianga. Kare te aronga e akarongo maira iaia e akakite ua i to ratou uaorai manako. Kare ratou e akarongo mai. Penei ka tupu katoa tetai apinga aiteite me tuatua maata tei akono ra i te uriurianga na te tuatua putuputu. Inara, ko tei akono ra i te uipaanga ka rauka i te akakeu i te aronga akarongo e kia akakeukeu i to ratou manako no taua tumu tuatua na roto i tetai atu au uianga. Ka tau taua uianga e kia taangaangaia i tetai taime.

Ko tei akono ra i taua tuanga kare e anoanoia kia kapiki i te tangata mua i taaki i tona rima ki runga. Ka akamaroiroi kore teia i tetai aronga tei anoano maata ra i te taime no te akapapa i to ratou au manako. Na te tiaki poto ua, ka oronga aia i tetai tuatau no tetai kare i pau ake kia pera. Ka akaari katoa aia i te kite karape na te kore e iki i te au tamariki kia pau i te au uianga kare ratou i marama i taua tumu manako.

Akapeea me ka orongaia tetai pauanga tarevake? Ka tau tei akono ra kia kopae i te taakama i te tangata e oronga ra i te pauanga. Te au pauanga, noatu kare i tano, e putuputu te taime te vaira te tuatua mou i roto i te reira. Na te ikianga ma te tau i tetai manga apinga i tano, na te tuatua taui anga i te uianga, me kore na te ui anga i tetai atu, ka rauka i tei akono ra i te akatanotano i taua manako ma te kore te taakamaanga.

Kia akamaroiroi i te paupau anga, ka meitaki tei akono ra kia kopae i te au uianga, mei te, ‘E pauanga ke atu ta tetai ke?’ Te uianga, ‘Koai tei kore i pau ake? Ko teia toou tuatau openga!’ penei te tau ra te akakoroanga, inara kare te reira e akamaroiroi i tetai kia akakite ua i tona uaorai manako. Kare te au taeake e tau kia manako akaapa ia no te kore i pau mua mai no te apii. Mari ra, ka tau ratou kia akamaroiroi ia kia oronga i ta ratou i kite no te mea ko te tuaanga e akakiteanga ia o te aroa. Pera katoa, i muri mai i te kapiki anga tetai tei akono ra i tetai kia oronga i te pauanga, ka meitaki auraka kia tuatua e, “I muri mai iaia, ka akarongo atu tatou i te pauanga a te Taeake ko mea e aru mai ko te Tuaine ko mea.” Ka tau tei akono ra kia akarongo na mua ki te pauanga e oti ka akataka ei me ka anoanoia tetai atu au pauanga ke.

E Akameitakianga Ia te Paupau Anga

E umuumuanga ia i te pae vaerua te aere atu anga ki te au uipaanga Kerititiano; te paupau anga i reira e akameitakianga ia. E tae ua atu ki to tatou piri anga i roto i teia mataara takake tikai o te akapaapaaanga ia Iehova “i roto i te uipa anga ra,” ki taua atianga ra te aru ra tatou i ta Davida akaraanga e te akamanako pakari anga i ta Paulo akoanga. Te akapapu maira ta tatou kapitianga i te au uipaanga e te inangaro ra tatou i to tatou au taeake e e tuanga tatou no ta Iehova putuputuanga maatamaata. Teiea atu taau ngai ka inangaro i te aere ia koe e ‘akara na i taua rā ra i te vaitata anga mai’?​—Ebera 10:25.

[Tataanga Rikiriki i Raro]

[Au Tutu i te kapi 20]

E ngai to te akarongo e te paupau anga i te au uipaanga Kerititiano

[Tutu i te kapi 21]

Akaari tei akono ra i te inangaro tika tikai no te au pauanga ravarai