Tua Oraanga

E Manako Meitaki ua Ana Rai a Iehova ia Maua

AKAKITEIA E ENELESI MZANGA

I te 1972 te reira. E tai ngauru tane, e au mema no to Maraui Youth League, kua tomo mai ki roto i to matou kainga, kua mou mai iaku, e kua kika atu iaku ki roto i te ngai tanu anga to i te pae ua mai. I reira, kua papa ratou iaku e kua akaruke iaku i te manako anga e kua mate au.

E maata te Au Kite o Iehova i Maraui tei mamae kino tikai i te au akakinoanga mei teia rai te tu. Eaa ratou i tamamaeia ai? Eaa tei tauturu ia ratou kia akakoromaki ua? E akatika mai ana iaku ine kia akakite atu i te tua o taku ngutuare tangata.

KUA anauia au ia Titema 31, 1921, i roto i tetai ngutuare akonoanga. E orometua taku metua i roto i te Ekaretia no te Akonoanga Perepitero o Aperika Rotopu. Kua maata mai au i Nkhoma, e taoni meangiti ua i te pae mai ia Lilongwe, te oire maata o Maraui. E 15 rai oku mataiti, kua riro mai au ei vaine na Emmas Mzanga.

I tetai ra kua atoroia mai maua e tetai oa o taku metua, e orometua katoa. Kua kite aia i te Au Kite o Iehova te noo ra i te pae mai i to maua kainga e kua akamatakite mai kia maua e eiaa e piri atu kia ratou. Kua akakite mai aia kia maua e e aronga temoni te Au Kite e me kare maua e matakite, ka riro katoa mai maua ei temoni. Kua tamataku maata mai taua akamatakite anga ra ia maua no reira kua neke atu maua ki tetai vira ke, te ngai i kitea mai e Emmas tetai angaanga ei tangata tiaki toa. Inara kare i roa ana kua kitea mai e maua e i taua kainga ou no maua te noo katoa ra te Au Kite o Iehova i te pae mai!

Inara, kare i roa ana, no to Emmas aroa oonu i te Pipiria i akakeu iaia kia tuatua atu ki tetai o te Au Kite. I muri ake i te rauka anga te au pauanga akapapu anga ki tana au uianga e manganui, kua ariki  a Emmas i te apii i te Pipiria ta te Au Kite i oronga mai kiaia. I te akamataanga kua raveia te apii Pipiria i ko i te are toa te ngai e angaanga ra aia, inara i muri mai kua raveia te apii epetoma i roto i to maua are. I te au taime ravarai me aere mai te Au Kite o Iehova, ka akaruke au i te are no te mea kua mataku au ia ratou. Noatu rai, kua rave ua atu a Emmas i te apii i te Pipiria. Vaitata e ono marama i muri mai i tona akamata anga, kua papetitoia aia, ia Aperira 1951. Inara, kare aia i akakite mai ana kiaku no runga i te reira no te mea kua mataku aia e ka ope to maua akaipoipo no taua nuti ra.

Au Epetoma Ngata

Inara, i tetai ra, kua akakite mai toku oa ko Ellen Kadzalero kiaku e kua papetitoia taku tane ko tetai o te Au Kite o Iehova. Kua riri tikai au! Mei taua ra mai, kare roa au i tuatua atu ana kiaia e kare i akapapa ana i tana kai. Kua akamutu katoa au i te tiki e te tamaanaana i te vai pai anga nona​—e angaanga tei tau ki ta matou au peu e manakoia ana e na te vaine ia angaanga.

I muri mai i te akakoromaki anga i teia ravenga e toru epetoma, kua pati aroa mai a Emmas iaku kia noo maua ki raro, e i reira kua akakite mai aia e eaa aia i iki ei kia riro mai e ko tetai Kite. Kua tatau e kua akamarama mai aia i te au irava e manganui, mei ia 1 Korinetia 9:16. Kua akakeu oonuia au e te manakoanga ka inangaro katoa au kia piri atu ki roto i te tutu anga i te nuti meitaki. No reira kua iki au i te akamata i tetai apii o te Pipiria ma te Au Kite o Iehova. I taua aiai rai, ki te marekaanga o taku tane aroa, kua akapapa au i tetai kai reka nana.

Oronga Anga i te Tuatua Mou ki te Ngutuare Tangata e te Au Oa

Te akarongo anga toku nga metua e kua piri atu maua ma te Au Kite o Iehova, kua patoi pakari ratou ia maua. Kua tata mai toku ngutuare tangata i tetai reta kia maua i te akakite mai anga kia maua e eiaa e atoro akaou atu ia ratou. Kua maromaroa maua no ta ratou ariu anga, inara kua irinaki maua i te taputou a Iesu e ka rauka ia maua te au tungane e te au tuaine i te pae vaerua e manganui e te au metua tane e te au metua vaine.​—Mataio 19:29.

Kua tere viviki au ki mua i roto i taku apii Pipiria e kua papetitoia ia Aukute 1951, e toru e te apa marama i muri ua ake i taku tane. Kua akakeuia au kia oronga atu i te tuatua mou ki taku oa ko Ellen. Ma te mataora, kua ariki mai aia i taku pati anga no tetai apii Pipiria. Ia Me 1952, kua papetitoia a Ellen e kua riro mai ei tuaine noku i te pae vaerua, tei akaketaketa i to maua pirianga oa. I teia ra, te vai nei rai maua e nga oa piri vaitata tikai.

I te 1954, kua ikiia a Emmas ei kotinga akaaere kia atoro i te au putuputuanga. I taua taime, e ono a maua tamariki. I taua au tuatau, ka akapou e tai epetoma tetai akaaere tutaka e ngutuare tangata tona i te atoro i te putuputuanga e ka noo mai i te kainga i tera mai epetoma ma tana vaine e te tamariki. Inara, me te tutaka aere ra a Emmas, ka akapapu ua ana rai aia e naku e rave i ta matou apii Pipiria o te ngutuare. Ka tauta maua i te rave i te apii ma ta maua tamariki ei rekareka anga. Ka tuatua katoa maua ma te irinaki ngakau tae no runga i to maua inangaro ia Iehova e no te tuatua mou mei roto mai i tana Tuatua, e ka piri atu maua ki roto i te angaanga tutu anga ei ngutuare tangata. Kua akamaroiroi teia porokaramu tereni anga pae vaerua i te akarongo o ta maua tamariki e kua riro mai ei teateamamao anga ia ratou no te takinokinoanga ta matou ka aro atu.

Akamata te Takinokinoanga Akonoanga

I te 1964, kua riro mai a Maraui ei enua takake. Te kite anga te au opita poritiki e tutara ra i to matou turanga neutara i roto i te poritiki, kua tauta ratou i te maro ia matou kia oko i te au kati mema poritiki. * No te mea kua patoi maua ko  Emmas i te rave i te reira, kua takoreia e te au mema o te Youth League ta maua ngai tanu anga kaoni​—ta matou kai ia i tera mai mataiti. Te tipupu ra te au mema o te Youth League i te kaoni, te imene ra ratou: “Ko te aronga tei patoi i te oko i te kati a Kamuzu [ko Peretiteni Banda], na te au manumanu termite e kai i ta ratou kaoni matie e ka aue teia au tangata nei no te reira.” Inara, noatu te ngere anga i teia kai, kare matou i taitaia ana. Kua kite matou i to Iehova manako meitaki. Nana i akaketaketa aroa mai ia matou.​—Philipi 4:12, 13.

I tetai po ia Aukute 1964, ko matou e te au tamariki anake ua i te kainga. Te moe ra matou, inara kua akaaraia au e tetai tangitangi anga imene mamao. Ko te Gulewamkulu te reira, e taiate muna mataku no te aronga ura o te iti tangata tei ta i te au tangata e kua akamea ua e ko te au vaerua ui tupuna tei mate ra. Na te Youth League i tono mai i te Gulewamkulu kia ta ia matou. Kua akaara viviki atu au i te tamariki, e i mua ake ka tae mai ei te aronga ta ki to matou are, kua oro ke atu ana matou ki roto i te vao rakau.

I te ngai e pipini ra matou, kua kite atu matou i tetai ai marama. Kua tutungiia e te Gulewamkulu to matou are tapokiia e te ngangaere. Kua tutungiia ki raro, e ta matou au apinga pouroa. Te aere ke atu anga te aronga ta mei te ngai akapueu ngarau o to matou are, kua akarongo atu matou ia ratou i te tuatua anga e, “Kua maani matou i tetai ai manea no taua Kite ra kia tamaanaana iaia uaorai.” Mei teaa ra ta matou akameitakianga kia Iehova e kua ora mai matou! E tika, kua takore ratou i te au apinga pouroa a matou, inara kare ratou i takore ana i to matou manako pakari kia irinaki ki roto ia Iehova kare i te tangata ra.​—Salamo 118:8.

Kua kite matou e kua rave te Gulewamkulu i taua mea kino ki tetai au ngutuare e rima o te Au Kite o Iehova i to matou ngai. Mei teaa ra to matou mataora i te aere mai anga te au taeake o te au putuputuanga i te pae mai i te tauturu ia matou! Kua patu akaou ratou i to matou are e kua oronga mai ratou i te kai no te au epetoma e manganui.

Kua Maata Mai te Takinokinoanga

Ia Tepetema 1967 kua akamataia tetai oroanga kia akaputu katoatoa ia mai te Au Kite o Iehova mei te enua ra. Kia kimi ia matou, ko te au tangata mapu takinga kino e te kino​—e au mema no te Youth League e te Maraui Young Pioneers, ma te matipi maata​—kua kimi aere i te Au Kite mei tera ngutupa ki tera ngutupa. Me kiteaia mai ratou, kua orongaia atu e te au tangata kia oko ratou i te au kati poritiki.

Tae mai anga ki to matou are, kua ui mai ratou e me e kati poritiki rai ta maua. Kua karanga atu au e: “Kare, kare au i oko mai i tetai. Kare au e oko i te reira i teianei, e kare rai au e oko i tetai i te tuatau ki mua.” Kua mouria mai maua ko taku tane e ratou e kua apainaia atu maua ki te ngai akava i reira, i te kore anga e oronga mai kia maua i tetai taime kia rave mai maua i tetai apinga. Te oki mai anga ta maua tamariki ki te kainga mei te apii, kare i kitenaia maua e ratou, e kua manamanata tikai ratou. Ma te manuia ra, ko ta maua tama mua, ko Daniel, kua oki mai ki te kainga i tetai manga ora i muri mai e kua akakite mai te tangata i te pae mai e eaa tei tupu ana. Kare i roa ana, kua apai aia i tona au teina e kua aere mai ki te ngai akava. Kua tae mai ratou te tari ia atura matou e te au akava ki roto i te au toroka e ka apainaia atu matou ki Lilongwe. Kua aru mai rai te au tamariki.

I Lilongwe kua raveia tetai akavaanga tau kore i ko i te opati maata o te akava. Kua ui mai te au opita kia matou e, “Ka vai ua ainei rai kotou ei Au Kite o Iehova?” Kua pau atu matou, “Ae!” noatu rai e ko te aiteanga o teia pauanga e e itu mataiti utunga anga i roto i te are auri. Te aronga tei “akaaere” i te akaaerenga, e 14 mataiti te utunga.

Kua pou ia matou e tai po kare e kai e te akaangaroi, kua apai atu te akava ia matou ki te Are Auri Maula. Kua ki tikai te au pia i reira e kare i rauka ana ia matou i te kimi i tetai ngai kia moe i runga i te taua! E tai ua rai pakete no te are repo i roto i te pia tataki tai tei ki ra. E iti ua te au kai akapaeia e e kino tikai te maaniia anga. E rua epetoma i muri mai, kua kite te au opita o te are auri e e au tangata au matou e kua akatika ia matou kia taangaanga i a vao ake i te are auri ei ngai akamatutuanga. No te maata ia matou, e au tuatau to matou i te au ra ravarai i te akamaroiroi atu i tetai e tetai kia oronga atu i tetai akakiteanga meitaki ki tetai au mouauri. Ki to matou poitirere, vaitata e toru marama i te tavini anga i ta matou utunga i roto i te are auri, kua tukunaia matou kia aere no te mea no te taomianga pa enua tei tukunaia ki runga i te kavamani o Maraui.

 Kua raurau mai te au opita akava kia oki matou ki to matou au kainga, inara kua akakite katoa mai ratou kia matou e kua araiia te Au Kite o Iehova i Maraui. Kua tae roa atu teia arai anga mei ia Okotopa 20, 1967, kia Aukute 12, 1993​—vaitata rai e 26 mataiti. E au tuatau ngata taua au mataiti ra, inara ma ta Iehova tauturu kua rauka ia matou i te akono ua atu i to matou tu neutara tikai.

Kimiia Mei te Au Manu Rai

I roto ia Okotopa 1972, na tetai ture a te kavamani i akamata akaou mai i tetai tuatau takinokinoanga pakari. Kua akakiteia mai te ture e ka akaruke pouroa ia te Au Kite o Iehova mei ta ratou au ngai angaanga e pouroa te Au Kite te noo ra i roto i te au vira ka tuaru keia atu mei to ratou au kainga. Kua kimiia te Au Kite mei te au manu rai.

I taua taime rai, kua aere mai tetai taeake Kerititiano mapu ki to matou kainga ma tetai tuatua rapurapu na Emmas, ‘Te parani ra te Youth League i te tipu i toou upoko, tuku i toou upoko ki runga i tetai poupou, e ka apai atu i te reira ki te au rangatira o reira.’ Kua akaruke viviki a Emmas i te kainga, inara i muri ake i te maani anga i te au akapapa anga no matou kia aru viviki atu iaia. Ma te rapurapu, kua tono ke atu au i te tamariki. I reira, iaku e akaruke ra, kua tae mai e tai ngauru mema o te Youth League, i te kimi ia Emmas. Kua tomo mai ratou ki roto i to matou kainga inara kua kitea mai e kua akaruke takere a Emmas. Ma te riri, kua kikaia atu au e te au tane ki roto i te ngai tanu anga to i te pae ua mai, e kua tue ratou iaku e kua papa iaku ki te au kao o te to. I reira kua akaruke mai ratou iaku kia mate. Te ara mai anga au, kua totoro atu au ki te kainga.

I taua po, i te poiri anga, kua tuku a Emmas i tona oraanga kia oki mai ki to maua kainga i te kimi iaku. I tona kite mai anga iaku e kua papa kinoia, kua tuku maru a Emmas raua ko tetai oa nona te motoka iaku ki roto i te motoka. I reira kua aere atu matou ki te kainga o tetai taeake i Lilongwe, e meitaki marie mai ei au mei te ta e kua akamata a Emmas i te maani i te au parani kia oro ke atu mei te enua nei.

Aronga Oro-Kimiora Kare e Ngai e Aere Atu Ei

E toroka rima tane ta ta maua tamaine ko Dinesi raua ko tana tane. E tangata akaoro toroka ta raua e angaanga ra na raua tei riro ana i tetai ua atu tuatau ei Young Pioneer i Maraui inara kua akaaroa mai i to matou turanga. Kua oronga mai aia i te tauturu kia matou e tetai ua atu Au Kite. No tetai au po ka tiki mai te tangata akaoro toroka i te Au Kite i te au ngai muna tei akapapa takereia. I reira ka kakau aia i tona kakau Young Pioneer o Maraui e ka akaoro atu i te toroka tei akakiia na roto i te au mataara tei araiia e te au akava. Kua tuku maata aia i tona oraanga i te tauturu i te Au Kite e anere ua atu kia aere na te ngai kotinga ki roto ia Tamapia.

E tokoiti ua marama i muri mai, kua akaoki akaouia e te aronga mana taoonga o Tamapia ia matou ki Maraui; inara, kare e rauka ia matou i te  oki akaou atu ki to matou kainga vira. Pouroa te au apinga ta matou i akaruke atu kua keiaia. Pera rai te au vaanga punu tapoki are kua kiritiia mei runga mai i to matou are. Kare e ngai meitaki i te aere atu, kua oro atu matou ki Motamapiki e kua noo i roto i te puakapa oro-kimiora i Mlangeni e rua e te apa mataiti. Inara, i roto ia Tiunu 1975, kua topiri te kavamani ou i Motamapiki i te puakapa e kua maro atu ia matou ki oki atu ki Maraui, kare te au turanga i reira i taui no te au tangata o Iehova. Kare atu a matou iki anga mari ra kia oro atu ki Tamapia no te rua o te taime. Kua aere atu matou ki te puakapa oro-kimiora o Chigumukire.

E rua marama i muri mai kua paka te au toroka vaeau e te au bus i te pae i te mataara nui, e kua tomo mai e anere ua atu au vaeau no Tamapia mai ki roto i te puakapa. Kua akakite mai ratou kia matou e kua akatuia te au are manea no matou e ka oronga mai ratou i te apinga akaoro i te tauturu kia tae matou ki reira. Kua kite matou e kare teia e tika ana. Kua akamata te au vaeau i te opara i te au tangata ki roto i te au toroka e te au bus, e kua tupu mai te manamanata. Kua akamata te au vaeau i te pupui i ta ratou au apinga pupui ki roto i te reva, e tauatini ua atu o to tatou au tungane e te au tuaine tei oro ke atu no te mataku.

I roto i te oripuanga, kua tukia a Emmas ki raro e kua takatakaiia, inara kua tauturu atu tetai taeake iaia kia tu mai ki runga. Kua manako matou e ko te akamata anga teia o te mate maata. Kua oro pouroa akaou atu te aronga oro-kimiora ki Maraui. I reira rai i Tamapia, kua taeria e matou te kauvai, e kua akapupu te au taeake i te raini tangata na te mou rima anga i te tauturu i te katoatoa kia aere meitaki atu ki tetai tua. Inara, i tetai tua ake i te kauvai, kua koropiniia matou e te au vaeau Tamapia e kua akaoki akaouia atu ki Maraui.

Ki Maraui akaou, kare matou i kite e ka aere kiea. Kua rongo ana matou e i te au akapupu anga poritiki e i roto i te au nuti pepa, kua akamatakiteia ki te au tangata kia akarakara i te “au mata ou” tei tae mai ki roto i to ratou au vira, ko te Au Kite o Iehova te taikuia ra. No reira kua iki matou i te aere atu ki te oire maata, te ngai kare matou e kiteaia mai mei te vira rai ra. Kua autu matou i te tarau anga i tetai are meangiti, e kua akamata a Emmas i tana atoro anga muna ki te au putuputuanga ei akaaere tutaka.

Aere Anga ki te Au Uipaanga Putuputuanga

Eaa tei tauturu ia matou kia vai tiratiratu ua? Ko te au uipaanga putuputuanga! I roto i te au puakapa oro-kimiora o Motamapiki e Tamapia, e aere ua ana matou ki te au uipaanga tei raveia i roto i te Au Are Uipaanga Patireia mako ua, e ngangaere te tapoki. Te akaputuputu mai anga no te au uipaanga i Maraui e mea kinoia e te ngata​—inara e tauta anga puapinga tikai. Kia kore e kiteaia mai, e rave ua ana matou i te au uipaanga i te po tikai e i te au ngai mamao. Kia kore e kiteaia mai ta matou akaputuputu anga, kare matou e pokarakara ana i te akaari i to matou mataora no te vaa tuatua inara ka ukiki ua i to matou rima.

E raveia ana te au papetitoanga i te po. Kua papetitoia ta maua tamaiti ko Abiyudi i tetai o taua atianga. I muri mai i te tuatua papetito anga, kua aratakiia atu aia e tetai aronga ka papetitoia na roto i te poiri ki tetai ngai varivari o tetai ngai kua ko ia tetai puta papaku. E i reira, kua papetitoia ratou.

To Matou Kainga Meangiti e Ngai Meitaki

I te au mataiti i muri mai te arairai anga a te kavamani, kua taangaangaia to matou kainga ei are meitaki. Kua apai munaia mai te au mere e te puka no ko mai i te opati manga o Tamapia ki to matou are. Kua aere mai te au taeake tei angaanga ei aronga apai apinga na runga i te patikara takatakai ki to matou kainga i te tiki i te apinga mei Tamapia e ka tari atu i te mere e te puka ki te au tuanga katoa o Maraui. Te au makatini Punanga Tiaki tei tua aere ia e mea angiangi ua te reira no te mea kua neneiia ratou ki runga i te pepa Pipiria. Kua rauka teia i te aronga apai apinga i te tari maata atu i te au makatini naringa e kua neneiia te au makatini ki runga i te pepa i matauia ana. Kua tua katoa atu te aronga apai apinga i te au makatini rikiriki Punanga Tiaki, ko te au atikara apii anake tei tataia. E ngoie ua te makatini rikiriki i te uuna ia i roto i te pute pona no te mea e tai ua rai vaanga pepa.

Kua tuku teia aronga apai apinga i to ratou oraanga e te rangatira i te aere anga ratou na roto i te vao rakau, i tetai taime na roto i te poiri, ma te au pia o te puka araiia tei akapapa teiteiia ki runga i to ratou au patikara takatakai. Noatu te au mataara araiia e te au akava e tetai atu au manamanata, kua  aere ratou e anere ua atu te au maire i roto i te au tu reva katoatoa i te apai i te kai vaerua ki to tatou au taeake. Mei teaa ra te mataku kore o taua aronga apai apinga akaperepere ra!

Te Manako Maira a Iehova i te Au Vaine Takaua

I roto ia Titema 1992, iaia e oronga ra i tetai tuatua i te tuatau o tetai atoro anga kotinga, kua mamae a Emmas i tetai maki akamate. I muri mai, kare e rauka iaia i te tuatua akaou. I tetai tuatau i muri mai kua mamae aia i te rua o te maki akamate, i te akaruke akangoruanga e tai tua o tona kopapa. Noatu e te akakoromaki ra i tona ngere anga i te pae kopapa e mea ngata ia kiaia, te turuanga aroa tei orongaia mai kia maua e to maua putuputuanga kua akakore atu i toku taitaia. Kua rauka iaku i te akono i taku tane i te kainga e mate ua atu aia ia Noema 1994, i te mataiti 76. E 57 mataiti i to maua akaipoipoanga, e kua kite a Emmas i te ope anga te arai anga i mua ake ka mate atu ei aia. Inara te mii ua nei rai au no toku oa tiratiratu i mate ra.

I muri ake i te riro mai anga au ei vaine takaua, kua apai taku tamaiti ongai i te apainga ki runga iaia uaorai i te tauturu mai kare anake ua e ko tana vaine e te tamariki toko rima ra mari ra e au atu rai. Ma te mii, i muri ake i tetai maki poto ua, kua mate aia ia Aukute 2000. Akapeea oki taku tamaine i te kimi anga i te kai e te au ngai nooanga no matou? Kua kite akaou au e te manako maira a Iehova ia matou e koia tikai ‘te metua o te au matiroeroe, e te akava o te au vaine takaua.’ (Salamo 68:5) Na roto i tana au tavini i te enua nei, kua oronga mai a Iehova i tetai are ou ma te manea. Akapeea te reira i te tupu mai anga? Te kite anga te au tungane e te au tuaine i roto i to matou putuputuanga i to matou manamanata, kua akatu ratou i tetai are no matou i roto i te rima ua epetoma! Te au taeake mei tetai au putuputuanga ke ei aronga patu piriki ra kua aere mai i te tauturu. Te aroa e te takinga meitaki tei akaariia e teia Au Kite katoatoa nei kua akamareka maata ia matou no te mea te are ta ratou i patu no matou e meitaki roa atu i to te au are ta te manganui e noo ra. Ko teia aroa tei akaariia e te putuputuanga ra kua oronga atu i tetai akakite anga memeitaki i roto i to matou ngai e noo nei. Iaku e aere ra i te moe i te po, te manako ra au e tei roto au ia Parataito! Ae, kua maaniia to matou are ou ma te manea mei te au piriki e te ngaika, inara mei ta te manganui i kite, e are te reira tei patu tikaiia ma te aroa.​—Galatia 6:10.

Te Manako Ua Maira Rai a Iehova

Noatu e vaitata ra au i tetai au taime te taitaia ra, e meitaki a Iehova kiaku. E itu o taku tamariki e iva te ora nei rai, e toku ngutuare i teianei te numero e 123. Mei teaa ra te mareka anga noku e te maata anga ia ratou te tavini tiratiratu nei ia Iehova!

I teia ra, i te mataiti 82, te ki nei au i te rekareka i toku kite anga e eaa ta te vaerua o te Atua i akatupu i Maraui. I te au mataiti e a i topa, kua kite au i te numero o te Au Are Uipaanga Patireia i te maata mai anga mei te okotai ki te 600 e tere atu. I teianei e opati manga ou katoa to matou i Lilongwe, e te rekareka nei matou i tetai aereanga arai koreia no te kai pae vaerua akamaroiroi ra. I toku manako anga tikai kua kite au i te akatupu anga o ta te Atua taputou tei kitea ia Isaia 54:17, i akapapu ia mai kia tatou e: “Te taoonga ra noou i angaiaʼi ra, kare ïa e manuia.” I muri ake i te tavini anga ia Iehova e tere atu i te 50 mataiti, kua papu iaku e noatu eaa te au timata anga ta tatou ka aro atu, e manako meitaki ua ana rai a Iehova ia tatou.

[Tataanga Rikiriki i Raro]

[Tutu i te kapi 24]

Taku tane, ko Emmas, kua papetitoia ia Aperira 1951

[Tutu i te kapi 26]

Tetai pupu o te aronga apai apinga mataku kore

[Tutu i te kapi 28]

Te are tei patuia ma te aroa