E Tai Akarongo Kerititiano Mou e Mea Tika Tikai

KUA akanoo a Iesu Karaiti e tai rai ekaretia, me kare e putuputuanga. Ko taua putuputuanga e kopapa ia i te pae vaerua, e pamiri i te pae vaerua. Ko te aiteanga na matou ei e akaputu anga te reira i te au tangata tei ikiia e te vaerua tapu o te Atua​—kua kitea pouroaia e te Atua ei “tamariki” oki nana.​—Roma 8:16, 17; Galatia 3:26.

Kua apii a Iesu e tai rai aerenga tei taangaangaia e te Atua kia arataki i te au tangata ki te tuatua mou e ki te ora. Kia akatutu i taua tuatua mou puapinga maata, kua akaaite a Iesu i te aerenga ora mutu kore ki tetai mataara. Kua tuatua aia: “E tomo kotou na te ngutupa o iti; te atea maata nei te ngutupa, e te pararauare nei te [mataara], e tae atu ei ki te mate; e manganui te na reira i te tomo. Te kokota ua nei te ngutupa, e te piri oki o te [mataara], e tae atu ei ki te ora, e tokoia ua ake tei kite atu i te reira.”​—Mataio 7:13, 14, akaaite ia NW; Ioane 14:6; Angaanga 4:11, 12.

Tetai Putuputuanga te Taokotai Ra

Kare e tau ia tatou kia akamanako i taua putuputuanga i te anere mataiti mua ra ei “taiate akapapaia i te ao katoa, e pini ua ake, ta tatou e kite nei i teia tuatau me tuatua tatou no runga i te ekaretia katorika,” i karanga ai The New Dictionary of Theology. No teaa ra? “No te tumu oki,” i na te reira ai, “ko taua taiate akapapaia, e pini ua ake kare i vai ana.”

Kare e rauka i tetai i te patoi tikai i te tika anga e te aite ra te putuputuanga Kerititiano mua ki te au akaaerenga ekaretia tei akanooia ta tatou e kite nei i teia tuatau. Inara kua akapapaia te reira. Kare te au putuputuanga tataki tai i angaanga takake ana mei tetai i tetai. Kua kite pouroa ratou i te mana taoonga o tetai pupu akaaere i Ierusalema. Ko taua pupu​—te vaira te au apotetoro e te aronga pakari o te putuputuanga i Ierusalema​—tei tauturu i te akono taokotaianga i te putuputuanga ei “okotai rai kopapa” o Karaiti.​—Ephesia 4:4, 11-16; Angaanga 15:22-31; 16:4, 5.

 Eaa tei tupu ki taua putuputuanga mou e tai ra? Kua riro ainei te reira ko te Ekaretia Katorika mana katoa ra? Kua tupu ainei te reira mei roto mai i te akatereanga akonoanga, ekaretia Porotetani akapueuia ta tatou e kite nei i teia tuatau? Me kare e apinga ke atu ainei tetai tei tupu?

Te “Sitona” e te “Zizania”

Ei kitea ai te au pauanga, ka akamanako meitaki ana tatou i ta Iesu Karaiti uaorai i karanga e ka tupu mai. Penei ka poitirere koe i te kite e kua tapapa ana a Iesu e ka ngaro ke atu tana putuputuanga mei te manako anga tuatua enua e ka akatika aia i taua turanga mii ra e tae ua atu ki te au anere mataiti.

I te akataka anga i tona putuputuanga ma te “basileia o te [au rangi] ra,” kua na ko maira aia: “E tau te basileia o te [au rangi] ra i tetai kainga i ruruia e te tangata kainga te ua meitaki ki roto ra: Kia moe ra te au tangata, kua aere maira tona enemi, kua ruru iora i te zizania ki roto i te sitona, aere ke atura. E ao atura taua sitona ra, e ua akera, kitea iora te zizania. Kua aere maira te aronga tavini o taua tangata kainga ra, kua tuatua maira kiaia, na ko maira, E te atu, kare ainei e ua meitaki taau i ruru ki roto i toou kainga? noea ra te zizania? Kua na ko atura aia kia ratou, Na te enemi te reira i ruru. Kua na ko maira te au tavini kiaia, E tika aina ia koe kia aere matou e vaere? Kua na ko atura aia, Auraka; ko te peke katoa aea te sitona kia vaere kotou i te zizania. Vaio ua na, kia tupu kapipiti, e kia mou; e kia tae ki te tuatau mou ra, naku ïa e karanga atu ki te aronga e kokoti, E na mua i te akaputuputu i te zizania, e ruru aere no te ai; akaputu ra i te sitona ki roto i taku are vairanga ra.’”​—Mataio 13:24-30.

Kua akamarama a Iesu e koia “tei ruru.” “Te ua meitaki” kua akatutuia mai e ko tana au pipi tika tikai. Tona “enemi” ko Satani te Tiaporo. “Te zizania” ko te au Kerititiano akatutu ua tei riro mai ei tuanga i roto i te putuputuanga Kerititiano mua. Kua tuatua aia e ka tuku aia “i te sitona” e te “zizania” kia tupu kapipiti e tae ua atu ki “te tuatau mou ra,” e tae ua mai ki te “openga o teianei ao.” (Mataio 13:37-43) Eaa ra te aiteanga o teia?

Kua Taviiviiia te Putuputuanga Kerititiano

Kare i roa ana i muri ake te matenga o te au apotetoro, kua akamata te au puapii apoteiti no roto mai i te putuputuanga i te akaaere i te reira. Kua tuatua ratou i te “tuatua mingi, kia aruia ratou e te pipi.” (Angaanga 20:29, 30) Tei tupu, e manganui te au Kerititiano tei ‘akaruke i tei akarongoia.’ ‘E anga atu ei [ratou] ki te tuatua taeke ua.’​—1 Timoteo 4:1-3; 2 Timoteo 4:3, 4.

 E tae ei ki te a anere mataiti T.N., i karanga ai The New Dictionary of Theology, “kua riro mai te tu Kerititiano Katorika ko te akonoanga tikai ia . . . no te Patireia o Roma.” Te vai ua ra “tetai tupu anga kapipiti no te taiate ekaretia e no te tangata ravarai”​—te kapiti mai anga i te Ekaretia e te Au-Enua i te patoi pakari tikai anga i te au irinaki anga a te au Kerititiano mua. (Ioane 17:16; Iakobo 4:4) Kua akakite katoa maira taua tumu manako e kare i roa ana, te katoa anga o te papaanga e te tu no te ekaretia, pera katoa tona irinaki anga puapinga maata e manganui, kua taui takiriia “i raro ake i te mana akakeuanga o tetai kimikimianga manako e te kapiti tika kore anga o te K[oreromotu] T[aito] e te au apii a Plato.” Mei tei totouia e Iesu Karaiti, kua uunaia tana au pipi tika tikai i te tupu mai anga te au Kerititiano akatutu ua.

Kua kite te aronga i akarongo kia Iesu i te tu ngata o te reira i te akatakaanga i te titona tika tikai mei te au titania, mei te ua uruuru poitini ra, i te tuatau tupu anga mei te titona rai te tu. No reira te akatutu maira a Iesu i te reira no tetai manga tuatau, e ka ngata ia i te akataka i te au Kerititiano mou mei te tu akatutu tuke ke ua ra. Kare te aiteanga o teia e kua kore takiri te putuputuanga Kerititiano, no te mea kua taputou mai a Iesu e ka arataki ua atu aia i tona au taeake pae vaerua “e tae ua atu ki te openga o teianei ao.” (Mataio 28:20) Kua tuatua a Iesu e ka tupu ua atu te titona. No te reira, i te au mataiti, te au Kerititiano tika tikai​—me e tataki tai me kare i roto i te au pupu​—kare e ekoko anga kua rave ra ratou i tei rauka kia akarongo atu ki ta Karaiti au apii anga. Inara kare ratou i riro akaou mai ei kopapa akataka meitakiia, i kiteaia, me kare ei akaaerenga. Kare rava ratou i aite ki te akatereanga akonoanga apoteiti kiteaia i roto i te tuatua enua katoa ra tei apai mai i te akama e te akangateitei kore ki te ingoa o Iesu Karaiti.​—2 Petero 2:1, 2.

“E Akakiteia Mai Oki Taua Tangata Ara Ra”

Kua totou te apotetoro ko Paulo i tetai apinga ke te akairo ra i teia akatere akonoanga akatutu ua. Kua tata aia e: “Auraka rava kotou e vavare i tetai tangata; ko te akaruke anga ana te ka tupu na mua, e tae ei ki [te ra o Iehova], e e akakiteia mai oki taua tangata ara ra.” (2 Tesalonia 2:2-4) Ko teia “tangata ara ra” ko te tika e pupu orometua tei akangateitei ia ratou uaorai i roto i tetai turanga tutara anga i runga ake i te putuputuanga “Kerititiano.” *

Kua akamata mai te ravenga apoteiti i te tuatau o te apotetoro ko Paulo. Kua tupu viviki te reira te mate anga te au apotetoro e kua ngaro ke atu to ratou mana tapupu anga. Ka akairoia te reira, i na Paulo ei, na “te ravenga ririnui a Satani ra, ma te mana e te akairo, e te au ravenga pikikaa tu ke ra. E ma te tuatua-tika kore pikikaa katoa ra.” (2 Tesalonia 2:6-12) Mei teaa ra te tano ta te reira akamarama anga i te au angaanga a te au arataki akonoanga e manganui i roto i te tuatua enua katoa ra!

I te turuanga i ta ratou tuatua e ko te Apiianga Katorika Roma te ekaretia mou, kua tuatua te au arataki Katorika e ko to ratou au epitikopo kua “riro mai to ratou taoonga apotetoro no ko mai i te au apotetoro o mua ana na roto i te papaanga mei muatangana mai.” E tika mou ia, ko teia tuatua no te papaanga apotetoro kare e tumu anga tuatua enua ia me kore e Tuatua Tapu ia. Kare e akapapu anga tika tikai e kua tupu mai te akatereanga ekaretia i muri ake i te matenga o ta Iesu au apotetoro e kua aratakiia ana e te vaerua tapu o te Atua.​—Roma 8:9; Galatia 5:19-21.

E akapeea ra tetai ua atu au ekaretia tei tupu viviki mai i muri ake i tei kapikiia ra te Tauianga? Kua oki ainei ratou ki te akaraanga a te putuputuanga Kerititiano mua ra? Kua akaora akaou ainei ratou i te tu ma a te putuputuanga Kerititiano mua ra? E tika rai e i muri ake i te Tauianga, kua orongaia te Pipiria ki te au tangata e manganui i roto i to ratou uaorai reo. Inara, te akaari maira te tuatua enua e ko teia au ekaretia nei te rave ua atu ra rai i te apii i te au apiianga tarevake. *​—Mataio 15:7-9.

Inara, e akara ana i teia. Kua totou tikai mai a Iesu Karaiti e ka akaora akaouia mai tana putuputuanga mou e tai ra i te tuatau tana i kapiki e ko te openga o teianei ao. (Mataio 13:30, 39) Te akatupuanga o te au totou Pipiria te akaari maira e te noo nei tatou i roto i taua tuatau. (Mataio 24:3-35) Me e tika te reira, te anoanoia ra tatou tataki tai kia ui e, ‘Teiea taua ekaretia mou e tai?’ E mea tau kia akataka maramaia mai te reira.

Penei te manako ra koe e kua kitena takere ia e koe taua ekaretia, me kare te putuputuanga. E puapinga maata kia papu koe. No teaa ra? No te mea mei te anere mataiti mua rai, te vaira e tai ua rai ekaretia mou. Kua rave ainei koe i te akapapu meitaki e me te aru vaitata ra taau ekaretia ki te akaraanga tei akanooia mai e te putuputuanga Kerititiano o te anere mataiti mua e te aru tiratiratu ra te reira ki te au apiianga a Iesu Karaiti? Eaa ka kore ei e akarakara meitaki i teia i teianei? Ka mataora te Au Kite o Iehova i te tauturu ia koe kia rave i te reira.​—Angaanga 17:11.

[Au Tataanga Rikiriki i Raro]

[Au Tutu i te kapi 5]

Eaa te akatutuanga a Iesu no te titona e te titania e apii maira kia tatou no runga i te putuputuanga mou?

 [Au Tutu i te kapi 7]

Te akaata ra ainei toou ekaretia i te akaraanga tei akanooia e te au Kerititiano o te anere mataiti mua i te tutu anga e i te apii anga?