E Tai Ua Rai ‘Ekaretia Mou’?

“MEI te mea e e tai ua rai Karaiti, no reira te vaira rai okotai kopapa o Karaiti, okotai rai Vaine Akaipoipo na Karaiti: ‘okotai Katorika e e Ekaretia no te apotetoro.’”​—Dominus Iesus.

I na tetai katinara Katorika Roma, ko Joseph Ratzinger ei, i te akakite mai anga i tana apii anga ekaretia e te vaira e tai ua ekaretia mou. Ko taua ekaretia, i nana ai, ko “te Ekaretia okotai a Karaiti, tei akamata mai mei roto i te Ekaretia Katorika.”

“Kare Ei Au Ekaretia i Roto i te Manako Anga Tau”

Noatu e kua maro a Pope John Paul II e ko to roto i te pepa Dominus Iesus “kare e akanengonengo atu, me kare i akangateitei kore, i tetai ua atu au akonoanga,” kua ariu pakari mai ra te au arataki o te ekaretia Porotetani i te reira. Ei akaraanga, i te Akaputuputuanga Tianara Akonoanga Perepitero i Belfast, i Airerani Apatokerau, i roto ia Tiunu 2001, kua tuatua tetai orometua e ko taua pepa ra e angaangaia na “tetai tuanga mana ririnui i roto i te Ekaretia Katorika Roma . . . kua mataku tikai no te manako tuera atea tei orongaia mai e te Vatican II.”

Kua karanga a Robin Eames, te Epitikopo Maata no te Ekaretia o Airerani, ka “taitaia tikai” aia me kua “akamataia mai [te pepa ra] i mua ua ake i te Vatican II.” I te tuatua anga no runga i ta te Vatican tuatua anga e ko te au ekaretia tei kopae ke i tetai ua atu au apiianga a te Katorika “kare ei au Ekaretia i roto i te manako anga tau,” i na Eames ei: “Kiaku nei e akakino anga te reira.”

Na teaa i akamata i te Dominus Iesus? I te akaraanga kua manata te Ekaretia Katorika Roma i tei kapikiia e ko te apiianga akonoanga tuangaia. Kia tau ki The Irish Times, “te mama mai anga tetai apiianga pluralism​—te tuatua anga e e aiteite ua tetai akonoanga ki tetai . . . kua tamanamanata maata atu i te Katinara ko Ratzinger ra.” I te akara anga na teia tumu manako nei i akamata mai i tana au tuatua e e tai rai ekaretia mou.

E Puapinga Maata Ainei e ko Teea Ekaretia Taau ka Piri Atu?

E tika, ki etai pae, ko “te apiianga akonoanga tuangaia” me kare te “apiianga pluralism” e mea tau e e manea i tetai ua atu akakiteanga e te vaira e tai ua rai ekaretia mou. Kia ratou, ka tau ei tumu ikianga na ratou uaorai te akonoanga. ‘I te openga,’ i na ratou ei, ‘kare e puapinga maata ana e ko teea ekaretia taau ka piri atu.’

Penei i te akara anga ko te manako ariki maata ia​—noatu e kua tupu mai tetai akapueu anga o te akonoanga i roto i te au akonoanga tuke ke e manganui ra. ‘Ko taua tu akatakake anga i roto i te akonoanga,’ i na te manganui ei, ‘e au akakiteanga tau no te tu rangatira tataki tai.’ Inara,  kia tau ki te tangata tata ko Steve Bruce, ko te tika anga tikai o taua “akakoromakianga akonoanga ra” te “tu tuke tikai i te akonoanga.”​—A House Divided: Protestantism, Schism, and Secularization.

Eaa i reira, te manako anga tika? E tai ua rai ekaretia mou? No roto ua te reira i te Ekaretia Katorika Roma? Kua arikiia ainei tetai atu au ekaretia e te Atua? I te mea e te o maira to tatou pirianga ki teia au uianga i Tei Anga ia tatou, e puapinga maata i reira kia rauka mai tona au manako no runga i taua tumu ra. Ka akapeea e rauka ai ia tatou te rave i te reira? Na te akara anga ki roto i te Tuatua akauru anga a te Atua, i te Pipiria. (Angaanga 17:11; 2 Timoteo 3:16, 17) E akamanako tatou e eaa ta te reira ka akakite mai no runga i teia tumu manako e e tai ekaretia mou.