Tauturu Tikai no te Putaua

I TO Iesu Karaiti tuatau i runga i te enua nei, e Tamaiti na te Atua, kua akaari aia i te inangaro tika tikai i te tauturu i te putaua. No runga i te angaanga orometua a Iesu, kua kite mata tetai kite e: “Te rauka nei te kite i te matapo, kua aere te pirikoki, kua tamāia te lepera, kua akarongo te taringa turi, kua akatuia tei mate, e kua tuatuaia atu te evangelia ki te tangata [“putaua,” NW].” (Mataio 11:5) Inara, akapeea ra te maata anga o te au tangata putaua e mirioni ua atu i teia tuatau? E tuatua meitaki ainei tetai no ratou? Ae, e tuatua manakonako anga tetai!

Noatu e kua kopae putuputuia e kua akangaropoinaia te au tangata putaua e te ao tei matauia, kua taputou mai te Tuatua a te Atua, te Pipiria e: “Kare oki te tangata [“putaua,” NW] e akangaropoina roaia atu; kare oki te irinaki anga o te tangata ao ra e akangere roaia.” (Salamo 9:18) Ko teia au tuatua akapumaana anga ka rauka to ratou tupuanga me mono te Patireia o te Atua, e kavamani tika tikai i te rangi ra, i te tutara anga a te tangata katoatoa. (Daniela 2:44) Ei Ariki no taua kavamani, ka “akaperepere [a Iesu] i tei apikepike ra e tei putaua, e akaora oki aia i te au vaerua o te aronga [“putaua,” NW] ra. Ka akaora aia i to ratou vaerua i te takinga-kino e te rotoriri ra, e to ratou toto, ka riro ïa ei mea apinga nana.”​—Salamo 72:13, 14.

Eaa ra te au turanga no te oraanga me tutara a Karaiti i runga ake i te enua nei? Te aronga te ora ra i raro ake i te ao ta Karaiti e tutara ra ka rekareka i te au ua o ta ratou angaanga. Te karanga ra te Pipiria ia Mika 4:3, 4: “E noo ra ratou ravarai ki raro ake i tana uaorai vine, e ki raro ake i tana uaorai suke, e kare tetai e akamataku mai; ko te vaa oki o Iehova Sabaota ra, tei tuatua mai.” Na te Patireia o te Atua e akatikatika katoa i te au manamanata o te maki e te mate. (Isaia 25:8) Mei teaa ra te tuke o taua ao ra! Ka rauka ia tatou i te irinaki i teia au taputou a te Pipiria no te mea kua akauruia ratou e te Atua uaorai.

E kapiti atu i te oronga anga i tetai tuatua no te manakonako anga, ka tauturu te Pipiria ia tatou kia autu i te au akaaoanga i te au ra ravarai, mei tera rai akapeea me autu atu i te tu ngere o te tu ngateitei uaorai, penei te akatupuia ra no te putaua. Ka kite tetai Kerititiano tei anoano ra mei tana apii Pipiria e te akaperepereia ra aia i roto i nga mata o te Atua mei tetai Kerititiano apinganui rai. Te akara ra te puka Pipiria no Iobu i te Atua e ‘tei kore e akono mai i te tu o te ui ariki, ko tei kore i maata i te akono i te aronga apinga nui, iti iora te aronga putaua na tona uaorai rima oki i anga ia ratou ravarai.’ (Iobu 34:19) Te aroa ra te Atua i nga mea roa ai.​—Angaanga 10:34, 35.