Te Akangateitei ra Ainei Koe i te Au Taeake Ruaine Akarongo?

I TE tuatau tei roto te au tangata o Iseraela taito ra i tetai pirianga koreromotu ma te Atua ra, kua akaueia atu ratou e: “E tu koe ki runga ki mua i te aroaro o te upoko inaina, e akangateitei koe i te tangata metua; E e mataku oki koe i toou Atua.” (Levitiku 19:32) No reira, te akangateitei anga i te aronga ruaine ra e angaanga tapu ia, kua kapitiia ia i te kauraroanga ki te Atua. Noatu e kare te au Kerititiano i teia tuatau i raro ake i te Ture a Mose, te akamaara maira te reira kia tatou e te akara ra a Iehova i te aronga ruaine te tavini ra iaia ei au tangata puapinga e te akaperepere. (Maseli 16:31; Ebera 7:18) Te akaata ainei ra tatou i te manako o Iehova? Te akaperepere ainei ra tatou i to tatou au taeake e te au tuaine ruaine Kerititiano?

Kua Akaperepere Aia i Tona Taeake Ruaine

E tai papaanga Pipiria tei akakite mai e tei akaari mai i te akangateitei anga i te aronga ruaine ka kiteaia i roto i te puka Rua a te au Ariki. Te vaira i roto i reira tetai akatakaanga e i akapeea i te komono angaia te peroveta ko Elia e te peroveta mapu ko Elisaia. E akamanako ana oki e eaa tei tupu i te ra openga o Elia ei peroveta i roto i te patireia tai ngauru kopu o Iseraela.

I taua ra ra, na Iehova i akaue i te peroveta ruaine kia aere atu mei Gilagala ki Betela, mei Betela ki Ieriko, e mei Ieriko ki te Kauvai o Ioridana. (2 Ariki 2:1, 2, 4, 6) I te tuatau no taua tere ra vaitata rai i te 50 kiro mita ra, e toru taime i to Elia raurau anga atu ia Elisaia kia akamutu i te aru mai iaia. Inara, mei ia Ruta mapu rai i te au anere mataiti i mua atu i te patoi ngaueue kore anga i te akaruke ia Naomi, kua patoi rai a Elisaia i te akaruke i te peroveta ruaine. (Ruta 1:16, 17) E toru taime i to Elisaia akakite anga e: “Te ora rā Iehova, e te ora katoa ra koe uaorai, kare au e akaruke ia koe.” (2 Ariki 2:2, 4, 6) I taua taime rai, kua tauturu takere ana a Elisaia ia Elia no etai ono mataiti. Inara, kua inangaro aia kia roa atu i te tavini anga kia Elia. Ko te tika, kua akakite mai te papaanga e: “Te aere ua ra raua, karangaranga uaʼi, e i na, . . . riro aturā Elia.” (Irava 11) Te tuatua ua ra a Elia raua ko Elisaia e tae ua atu ki te openga tikai o ta Elia angaanga orometua i Iseraela. I te akaraanga te anoano ra te peroveta mapu i te opu mai i te au tuatua e manganui no te ikuikuanga e te akamaroiroianga tei rauka mai no ko mai i te peroveta ruaine kite maata ra. Te taka meitaki ra, kua akaperepere aia i tona taeake ruaine.

‘Mei te Metua e te Metua Vaine’

Kare e ngata ana i te kite e eaa a Elisaia i aroa ai i te peroveta ruaine ei oa​—mei te metua i te pae  vaerua rai. (2 Ariki 2:12) I mua ua ake ka akaoti ei ta Elia angaanga i Iseraela, kua tuatua atu aia kia Elisaia: “E pati mai e akapeea atu au ia koe, ka rave keia atu ei au ra.” (Irava 9) No reira tae roa ki te openga tikai, kua akaari a Elia i te manako anga no te oraanga i te pae vaerua ko tei mono iaia ra e no te rave ua atu anga i te angaanga a te Atua.

I teia tuatau, e ngakau pumaana tikai i te kite i taua manako anga no te metua tane e te metua vaine i roto i to tatou au taeake e te au tuaine ruaine Kerititiano ia ratou e oronga puareinga ua ra i to ratou kite e te pakari ki te aronga mapu. Ei akaraanga, te angaanga ra te aronga tauturu kua roa te tavini anga i te au opati manga o te Au Kite o Iehova kua oronga puareinga ua i te tauturu anga i te au mema ou o te pamiri Betela kia rauka te au tu karape te anoanoia ra e ratou i te akono anga i ta ratou angaanga. Pera katoa, te au akaaere tutaka e ta ratou au vaine tei atoro ana i te au putuputuanga no te au mataiti e manganui kua oronga mataora atu i to ratou kite tikai ki te aronga te tereniia ra kia tavini ei au orometua tutaka. Pera katoa, i roto i te au putuputuanga a te Au Kite o Iehova takapini i te ao, te vai ua ra te au taeake e te au tuaine ruaine tei tavini tiratiratu ana ia Iehova no te ngauru mataiti e tei oronga rekareka atu i to ratou pakari tau e te kite ki te au mema ou o te putuputuanga.​—Maseli 2:7; Philipi 3:17; Tito 2:3-5.

Ko te manako ngakau tae tei akaariia e teia au Kerititiano ruaine akaperepereia i akariro ei i te akaari anga i te akangateitei anga ki taua aronga ruaine ra ei mea reka tikai. No reira, ka inangaro tatou i te aru i te akaraanga o Elisaia i te ariki oonu anga i te au taeake ruaine akarongo ra. Mei ta te apotetoro ko Paulo i akamaara mai kia tatou, kia rave ua atu tatou i te akono “i te tangata pakari . . . mei te mea e metua” e te “au vaine pakari ra, mei te metua vaine.” (1 Timoteo 5:1, 2) Na te raveanga i te reira, ka tauturu maata atu tatou i te angaanga meitaki anga e te tere anga ki mua o te putuputuanga Kerititiano takapini i te ao katoa.

[Tutu i te kapi 30]

Kua inangaro a Elisaia kia roa atu i te tavini ma Elia

[Au Tutu i te kapi 31]

Te puapinga maata ra te au mapu mei te au Kerititiano ruaine