Au Uianga a te Aronga Tatau

Eaa te aiteanga o te rauka anga te ‘ora i roto iaia uaorai’?

Te akakite maira te Pipiria no runga ia Iesu Karaiti e kua rauka te ‘ora i roto iaia uaorai’ e no tana au pipi kua rauka te ‘ora i roto ia ratou uaorai.’ (Ioane 5:26; 6:53) Inara, kare e aiteite ana te aiteanga o teia nga irava.

“Mei te Metua ra e ora tona tei roto iaia uaorai,” i akakite ei a Iesu, “kua oronga mai oki aia i to te Tamaiti, ei ora katoa tona i roto iaia uaorai.” I mua atu ka tuatua ei i teia, kua karanga a Iesu: “Tika, tika tikai taku e karanga atu kia kotou, Ko te kite i taku tuatua, e kua akarongo iaia i tei tono mai iaku nei, e ora mutu kore tona . . . Kua vaitata, e teianei rai, te ora, e akarongo ei tei mate i te reo o te Tamaiti a te Atua: e tei akarongo ra, ka ora ïa.” I konei te tuatua ra a Iesu no runga i tetai mana tuke ua ake tei tukunaia mai kiaia e tona Metua​—te rauka anga i te oronga ki te au tangata te turanga meitaki ki mua i te Atua. Pera katoa, kua rauka ia Iesu i te akatu i te aronga e moe ra i roto i te mate e te oronga i te ora kia ratou. No Iesu, te rauka anga te ‘ora i roto iaia uaorai’ ko te aiteanga kua tukunaia mai teia au mana kiaia. Mei te Metua rai, kua rauka katoa i te Tamaiti te ‘ora i roto iaia uaorai.’ (Ioane 5:24-26) Ka akapeea tana au pipi?

I tetai mataiti i muri mai, kua tuatua atu a Iesu ki tana aronga e akarongo atura, te na ko anga: “Tika, tika tikai taku e karanga atu kia kotou, Kia kore kotou e kai i te kopapa o te Tamaiti a te tangata nei, e kia kore oki kotou e inu i tona toto, kare ïa e ora i roto ia kotou. Ko te kai i toku kopapa, e te inu i toku nei toto, e ora mutu kore tona; e naku aia e akatu akaou kia tae ki te rā openga ra.” (Ioane 6:53, 54) I konei te akaaite ra a Iesu i te rauka anga te “ora i roto ia kotou” ki te rauka anga te “ora mutu kore.” Ko te au tuatua ma te aiteite te akanoonooanga o te karama te urianga te “ora i roto ia kotou” te kitea ra i tetai ngai ke o te au Tuatua Tapu Ereni. Ko nga akaraanga e rua, “Kia vai mairai te tai i roto ia kotou” e te “rauka anga te tutaki i roto ia ratou.” (Mareko 9:50; Roma 1:27) I roto i teia nga akatauanga, te takiota tuatua kare e te akakite maira i te mana kia tuku i te tai ki runga i tetai ke me kore kia tutaki i tetai ke.  Mari ra, te oti anga pu tikai, me kore ki anga, te akakiteia maira. No reira, ko te tuatua te “ora i roto ia kotou” tei taangaangaia ia Ioane 6:53 te aiteanga ko te tomo anga ki roto i te ki anga o te oraanga.

No tana au pipi e kua rauka te ora i roto ia ratou uaorai, kua taiku a Iesu i tona kopapa e tona toto. I muri mai, i te akanoo anga i te Kaikaianga Aiai a te Atu, kua tuatua akaou a Iesu no runga i tona kopapa e tona toto e kua akaue atu i tana au pipi te ka kapitiia atu ki roto i te koreromotu ou kia kai i te au oroa o te varaoa opue kore e te uaina. Ko te aiteanga ainei e ko te au Kerititiano akatainuia anake, roto i te koreromotu ou ma te Atua ko Iehova, ka tomo atu ki roto i te ki anga o te oraanga? Kare. E rua mataiti i takake i nga atianga. Ko te aronga i akarongo i ta Iesu tuatua tei tataia ia Ioane 6:53, 54 kare ratou i kite i te akamaaraanga mataiti ma te au oroa e akatutu maira i to Karaiti kopapa e te toto.

Kia tau kia Ioane pene 6, te mea mua kua akaaite a Iesu i tona kopapa ki te mana, te na ko anga: “I kai ana to kotou ui metua i te māna i te medebara ra, e mate atura. Ko te kai teia no te rangi mai, kia kaikai ua te tangata i te reira, e kia kore rava e mate. Ko au te kai ora, ko tei eke mai mei te rangi: ko te ka kai i teianei kai, ka tika ïa i te ora anga e tuatau ua atu.” To Iesu kopapa, kapiti mai i tona toto, kua maata atu i te mana tikai. Akapeea ra? Kua orongaia tona kopapa no te “ora no to te ao,” te akariro anga e kia rauka te ora mutu kore. * No reira, te tuatua kua rauka te “ora i roto ia kotou” ia Ioane 6:53 te tau ra ki te katoatoa te ka rauka te ora mutu kore​—i te rangi me i te enua nei.​—Ioane 6:48-51.

Aea e rauka ei i te au pipi a Karaiti te ora i roto ia ratou uaorai, me kore te tomo ki roto i te ki anga o te ora? No te aronga akatainuia o te rangi ra, ka tupu teia me akatuia ratou ki te oraanga i te rangi ra ei au vaerua mate kore. (1 Korinetia 15:52, 53; 1 Ioane 3:2) Ko ta Iesu “mamoe ke atu” ka kite atu i te tomo ki roto i te ki anga o te oraanga i muri mai i te openga o te Tutaraanga Tauatini Mataiti. A taua taime ra, ka timataia ratou, kua kitea ei aronga tiratiratu, e kua akakiteia ei aronga tuatua tika no te ora mutu kore i roto i te enua Parataito.​—Ioane 10:16; Apokalupo 20:5, 7-10.

[Tataanga Rikiriki i Raro]

[Au Tutu i te kapi 31]

Ka rauka i te au Kerititiano mou ravarai i te ‘ora i roto ia ratou uaorai’