E Akamaroiroi Anga te Au Tuatua i te Pae Vaerua

“Auraka ei tuatua viivii e mama mai no roto i to kotou vaa, ei tuatua meitaki ra e tupu ei te meitaki tika ra, e meitaki ei te aronga e akarongo ra.”​—EPHESIA 4:29.

1, 2. (a) Mei teaa te puapinga te tuatua a te au tangata? (e) Ka akapeea te au tavini o Iehova te inangaro ra i te taangaanga i to ratou arero?

“TE TUATUA a te tangata e mea munaia; e e apinga oronga tu-Atua ia mai, e e temeio.” I tata mai ei te tangata tata tikitinari ko Ludwig Koehler. Penei kare tatou i akono ana i teia apinga aroa akaperepere a te Atua. (Iakobo 1:17) Inara e akamanako ana te ngaro ke anga tetai mea akaperepereia me tupu mai tetai maki akamate ki tei akaperepereia ra te kore anga e rauka i te tuatua i tetai tuatua te marama ia ra. “E pirianga umere to maua no te komunikeiti,” i akataka mai ei a Joan, kua tuia tana tane e te maki akamate. “Te mii nei rai au no ta maua au tuatua!”

² Ka rauka i te au tuatua i te kapiti mai i te au pirianga oa, te tauturu i te au manako tarevake, akamaroiroi i te aronga tei paruparu te ngakau, akaketaketa i te akarongo, e te akapuapinga anga i te oraanga​—inara kare teia au tupu anga i rauka ana. Kua kite te ariki pakari ko Solomona e: “Te tangata vaa karea ua ra, e tau ïa ki te koputaputa koke ra: ko te arero ra o te aronga pakari ra, mei te vairakau ïa.” (Maseli 12:18) Ei au tavini no Iehova, ka inangaro tatou i ta tatou au tuatua ei akaora anga e ei meitaki kare ei tamamae anga e te opara atu ki raro. Te anoano katoa ra tatou i te taangaanga i to tatou arero kia akapaapaa ia Iehova, i roto i ta tatou nga angaanga orometua i te ngai tangata e i roto i te au tuatua muna a tatou. Kua imene te tata taramo e: “Tei te Atua to matou nei akatietie anga e po ua atu te rā, e toou te ingoa ta matou e akapaapaa kare e vata.”​—Salamo 44:8.

3, 4. (a) Eaa te manamanata ta tatou katoatoa ka aro atu no runga i ta tatou tuatua? (e) Eaa ra kia tau ei ta tatou tuatua?

³ “Kareka te arero nei,” ta te pipi ko Iakobo i akamatakite mai, “kare ua e tangata e vi ei te reira.” Kua akamaara mai aia kia tatou e: “Te apa anake nei tatou i te au mea katoa e manganui. E kia kore tetai tangata e apa i te tuatua ra, e tangata meitaki rava aia, e tika iaia kia tapeka i te kopapa katoa ra.” (Iakobo 3:2, 8) Kare tetai i o tatou i te apa kore. No reira, noatu te au akakoroanga meitaki a tatou, kare ta tatou tuatua e akamaroiroi ana i tetai me kare i oronga ana i te akapaapaa anga ki Tei Anga mai ia tatou. No reira, e mea tau ia tatou i te apii kia matakite i ta tatou tuatua. Pera katoa, kua karanga a Iesu e: “E akavaia te tangata i te au tuatua puapinga kore katoa ta ratou e tuatua ra, kia tae ki te rā akavaanga ra. E akatikaia koe i taau tuatua, e akaapaia koe i taau tuatua.” (Mataio 12:36, 37) Ae, te mou nei te Atua mou ia tatou no ta tatou au tuatua.

⁴ Ko tetai mataara meitaki atu kia kopae ke i te tuatua kino koia oki kia akatupu i te peu te piri anga ki roto i te au tuatua pae vaerua. Ka uriuri manako teia atikara e akapeea e rauka mai ei ia tatou te reira, eaa te au tumu tau te ka rauka ia tatou i te uriuri, e eaa te au mea puapinga ka rauka ia tatou mei te tuatua akamaroiroi anga.

Matakite i te Ngakau

5. Akapeea ra te ngakau i riro mai ei ei tuanga maata i te akamata anga i te au tuatua akamaroiroi anga?

⁵ I te tatanu anga i te peu kia piri atu ki roto i te au tuatua akamaroiroi anga, e mea tau kia kite tatou na mua e te akaata ra ta tatou tuatua i to roto  i to tatou ngakau. Kua karanga a Iesu e: “No te ki oki o te ngakau ra e tuatuaʼi te vaa.” (Mataio 12:34) Kia tuatua uaia, e reka ana tatou i te tuatua no runga i te au mea te puapinga ra kia tatou. No reira, ka inangaroia tatou, kia ui kia tatou uaorai e: ‘Eaa taku au tuatua e akaari ra no runga i te turanga o toku ngakau? Me piri atu au ki toku ngutuare tangata me kare ki te au taeake irinaki, tei runga ua ainei taku tuatua i te au apinga no te pae vaerua me kare te oki putuputu ra te reira ki runga i te au tarekareka anga, te au kakau, te au teata, te kai, taku apinga ou i oko mai, me kare ki tetai au mea puapinga kore ua?’ Penei kare i manakoia ana, ka oki ua to tatou au oraanga e to tatou au manako ki runga i te au tumu e rua. Te akatanotano anga i ta tatou au apinga mua e akamako mai ei i ta tatou au tuatua pera katoa to tatou au oraanga.​—Philipi 1:10.

6. Eaa ra ta te akamanakoanga tuanga ka rave i roto i ta tatou au tuatua?

⁶ Ko te manako akakoroanga tetai atu mataara kia akamako mai i te tu e eaa ta tatou ka tuatua atu. Me tauta pakari tatou i te manako i te au tumu i te pae vaerua, ka kite tatou e ka aere natura ua mai te tuatua pae vaerua. Kua kite te Ariki ko Davida i teia pirianga. Kua imene aia e: “Kia tikaia mai te tuatua a toku vaa, e te manako o toku ngakau, i mua i to aroaro, e Iehova.” (Salamo 19:14) E kua tuatua te tata taramo ko Asapha e: “Ka akamaaraara rai au i taau ra au angaanga katoa, ka tuatua rai au i taau i rave ra.” (Salamo 77:12) Te ngakau e te manako tei manako oonu ra ki runga i te au tuatua mou no te Tuatua a te Atua ka ki natura ua i te tuatua akapaapaaia. Kare i rauka ia Ieremia i te tapu i te tuatua no runga i te au mea ta Iehova i apii ana kiaia. (Ieremia 20:9) No reira ka rauka ia tatou te reira me manako putuputu tatou i te au tumu i te pae vaerua.​—1 Timoteo 4:15.

7, 8. Eaa te au tumu tau te meitaki ra no te au tuatua akamaroiroi anga?

⁷ Te akono anga i tetai ravenga meitaki i te pae vaerua oronga mai kia tatou i te au tumu tau e manganui no te au tuatua akamaroiroi anga. (Philipi 3:16) Te au akaputuputuanga, te au uruoaanga, te au uipaanga putuputuanga, te au puka ou, e te irava tuatua tapu no te au ra e te au tuatua neneiia pouroa te oronga maira kia tatou i te au poe i te pae vaerua te ka rauka ia tatou i te tua atu. (Mataio 13:52) E mei teaa ra te akakeukeu anga i te pae vaerua te au tupuanga no roto mai i te angaanga orometua Kerititiano a tatou!

⁸ Kua umere te Ariki ko Solomona no te maata i te tu o te au rakau, te au animara, te au manu, e te ika tana i kite i Iseraela. (1 Ariki 4:33) Reka aia i te tuatua no runga i ta te Atua au angaanga i anga. Ka rauka ia tatou i te rave i te reira. E rekareka ana te au tavini o Iehova i te tuatua no runga i tetai tu o te au tumu tuatua, inara ko te au tumu tau i te pae vaerua te mea maata no te au tuatua a te au tangata te manako ra i te pae vaerua.​—1 Korinetia 2:13.

“E Tamou ua atu ra i te Akamanako i Teia Au Mea”

9. Eaa te akoanga ta Paulo i oronga atu ki to Philipi?

⁹ Noatu e eaa te au tumu tau, ka akamaroiroi ta tatou au tuatua i tetai me aru te reira ki te akoanga a te apotetoro ko Paulo ki te putuputuanga i Philipi. Kua tata aia e: “Eaa ua atu te au mea mou ra, eaa ua atu te au mea manako maataia ra, eaa ua atu te au mea tuatua tika ra, eaa ua atu te au mea viivii kore ra, eaa ua atu te au mea inangaroia ra, eaa ua atu te au mea tuatua meitakiia ra, eaa ua atu te tu tika meitaki ra e eaa ua atu tetai mea akapaapaaia e vaira, e tamou ua atu ra i te akamanako i teia au mea.” (Philipi 4:8, NW) Te au mea ta Paulo i taiku mai e puapinga tikai ia e kua tuatua mai aia e “e tamou ua atu ra i te akamanako i teia au mea.” Ka tau kia akaki tatou i to tatou au manako e te ngakau ki te reira. No reira ka akara ana tatou e ka akapeea te akamanako anga i te au mea taki tai e varu ta Paulo i akakite mai i te tauturuanga ia tatou i ta tatou au tuatua.

10. Akapeea e rauka ai i ta tatou au tuatua i te akapiri mai i te au mea mou ra?

¹⁰ Ko te mou e maata atu te kapiti maira i to te akakiteanga e e tika e kare i te tarevake. Te taiku maira te reira ki tetai apinga e tu tika e te tau kia irinakiia, mei te tuatua mou no te Tuatua a te Atua. No reira, me tuatua tatou ki tetai no runga i te au tuatua mou Pipiria ta tatou e mareka ra, te au ako me kare te au tuatua te akamaroiroi ra ia tatou, me kare te ako Tuatua Tapu tei tauturu ia tatou, te akamaara ra tatou i te au mea mou. I tetai tua, ka kopae ke tatou i te “tapikipikiia e e kite,” te oronga ua maira i tetai akaraanga e e tika. (1 Timoteo 6:20) E kia kopae ke tatou i te ripiti ua anga i te  urutoe me kare te akakite anga i te au tupuanga pikikaa kare i akatakaia mai.

11. Eaa te au mea manako maataia te ka rauka kia kapitiia mai ki roto i ta tatou au tuatua?

¹¹ Te au mea manako maataia e au tumu tuatua no te tu tapu e te puapinga, kare ei mea rikiriki me kare e meangiti ua. Te kapiti maira te reira i te au mea puapinga no runga i ta tatou angaanga orometua Kerititiano, te noo nei tatou i te au tuatau kino, e to tatou anoano kia tamou i te tu meitaki. Me uriuri manako tatou i taua au mea maata, te akaketaketa ra tatou i to tatou manako pakari kia ara ua i te pae vaerua, te mou tiratiratu anga tatou, e te rave ua atu anga i te tutu anga i te tuatua meitaki. E tikai, te au tupuanga reka i roto i ta tatou angaanga orometua e te au tupuanga i tupu ua ake nei te akamaara maira ia tatou e te noo nei tatou i roto i te au ra openga te oronga maira i te tumu manako tukeke no te au tuatua akakeukeu anga.​—Angaanga 14:27; 2 Timoteo 3:1-5.

12. Te akamaara anga i ta Paulo akoanga kia akamanako i te au mea tuatua tika e te viivii kore, eaa te ka tau kia kopae keia?

¹² Te aiteanga o te tuatua e tuatua tika koia oki ko tei tika i nga mata o te Atua​—kia tau ki tana au turanga. Te akakite maira te viivii kore i te manako  no te tu ma i roto i te manako e te akono tau. Ko te akakino, te au tuatua takatakata viivii, me kare te au tuatua no te ainga kare e tau i roto i ta tatou au tuatua. (Ephesia 5:3; Kolosa 3:8) I roto i te ngai angaanga me kare i te apii, ka akaatea mai te au Kerititiano ma te pakari me kapitiia mai teia au tuatua.

13. E oronga mai i te au akaraanga no te au tuatua te oki ua ra ki runga i te au mea inangaroia e te tuatua meitaki ra.

¹³ I ta Paulo oronga mai anga kia akamanako i te au mea inangaroia, te taiku ra aia ki te au mea te marekaia ra e te akatikaia ra me kare te akakeu ra i te aroa, kare mei te aronga tei akatupu i te makitakita, te riri, me kare te taemoemoanga. Te au mea tuatua meitaki te taikuia ra ki te akakiteanga meitaki me kare ki te ripoti meitaki. Te kapiti maira taua au ripoti meitaki i te au tua oraanga o te au tungane e te au tuaine akarongo, tei mama putuputu mai i roto i te au makatini o te Punanga Tiaki e te Awake! Eaa ka kore ei e akakite atu ki tetai i toou au manako i muri ake i te tatau anga koe i teia au atikara akaketaketa anga i te akarongo? E mei teaa ra te akamaroiroi anga te reira i te akarongoanga i te au angaanga pae vaerua o tetai ra! Ka akamaroiroi taua au tuatua i te aroa e te taokotaianga i roto i te putuputuanga.

14. (a) Te akaari anga i te tu tika meitaki eaa te umuumuia maira no tatou? (e) Akapeea ta tatou tuatua i te kapiti mai anga i te au mea akapaapaaia?

¹⁴ Kua tuatua a Paulo e “eaa ua atu te tu tika meitaki.” Te taikuia ra te tu tika meitaki ki te meitaki me kare ki te tu akono tau meitaki rava atu. Kia matakite ra tatou e te aratakiia ra to tatou au ngutu e te au kaveinga Tuatua Tapu e kare te reira e ariu ke atu mei te tuatua tika, te viivii kore, e te tu tika meitaki ra. Te aiteanga no te akapaapaaia e “akameitakiia.” Me akarongo koe i tetai tuatua meitaki me kare kua kite i tetai akaraanga tiratiratu i roto i te putuputuanga, e tuatua atu no runga i te reira​—ki taua tangata e ki tetai atu. Kua akapaapaa putuputu te apotetoro ko Paulo i te au tu memeitaki o tona au taeake akamori. (Roma 16:12; Philipi 2:19-22; Philemona 4-7) Ae, ko te au mea angaia e Tei Anga ia tatou ra ei akapaapaa anga tikai ia. I roto i reira ka kite tatou i te au tumu manako maata no te au tuatua akamaroiroi anga.​—Maseli 6:6-8; 20:12; 26:2.

Pirianga ki Roto i te Au Tuatua Akamaroiroi Anga

15. Eaa te akauenga Tuatua Tapu tei akaue maira kia rave te au metua i tetai au tuatua puapinga ki ta ratou tamariki?

¹⁵ Te karanga ra a Deuteronomi 6:6, 7 e: “E teianei au tuatua taku e akaue atu kia koe i teianei rā, ei roto i toou ngakau vai ei; E ka apii tamou tikai koe i te reira ki taau au tamariki, ko taau ïa e tuatua kia noo ua koe i roto i to are, e kia aere ua koe na te arataa ra, e kia akāvai koe ra, e kia tu koe ki runga ra.” Te taka meitaki ra e, te umuumu maira teia akauenga e kia rave te au metua i te au tuatua puapinga i te pae vaerua ki ta ratou tamariki.

16, 17. Eaa ta te au metua Kerititiano ka kite mei te au akaraanga o Iehova raua ko Aberahama?

¹⁶ Ka rauka ia tatou i te akamanako i te au tuatua roroa ta Iesu raua ko tona Metua i te rangi i tuatua ana i te manakoanga raua i tana angaanga i te enua nei. “Na te Metua ra i tono mai iaku nei, i akaue mai iaku i te tuatua, kia tuatua au e kia apii au,” ta Iesu ia i akakite ki tana au pipi. (Ioane 12:49; Deuteronomi 18:18) Kua akapou te pateriareka ko Aberahama i te au ora e manganui i te tuatua anga ki tana tamaiti ko Isaaka no runga i ta Iehova akameitaki anga ia ratou e to ratou ai tupuna. Papu e kua tauturu taua au tuatua ia Iesu raua ko Isaaka i te kauraro akaaka ki to te Atua ra anoano.​—Genese 22:7-9; Mataio 26:39.

 ¹⁷ Te inangaro katoa ra ta tatou tamariki i te au tuatua akamaroiroi anga. E mea tau kia kimi te au metua i te tuatau i roto i ta ratou papaanga angaanga i te tuatua ki ta ratou tamariki. Me ka rauka, eaa ka kore ei e akapapa i te kai kapipiti anga ei ngutuare tangata e tai taime i te ra? I taua taime e a muri ake i taua tuatau kaikai anga, te vai ra te au tuatau no te au uriurianga akamaroiroi te ka riro mai ei mea puapinga no te oraanga pae vaerua o te ngutuare tangata.

18. E akakite mai i tetai tupuanga te akaari maira i te au mea puapinga no te komunikeiti meitaki i rotopu i te au metua e te tamariki.

¹⁸ Ko Alejandro, e painia tei roto i tona 20 mataiti, te maara ra iaia te mou anga i te au manako ekoko i te mataiti 14. Kua akakite mai aia e: “No te akakeu anga a te au oa apii e te au puapii, kare i papu ana iaku no runga i te vai anga o te Atua e te tika anga o te Pipiria. Kua akapou toku nga metua i te au ora e manganui i te akamarama marie mai kiaku. Kua tauturu teia au tuatua iaku kare e kia autu ua i toku au manako ekoko i teia au tuatau ngata mari katoa ra te rave anga i te au ikianga meitaki i roto i toku oraanga.” E akapeea ra i teianei? Kua tuatua a Alejandro: “Te noo nei rai au i te kainga. Inara no te maata i te angaanga a to matou akapapaanga kua riro te reira ei mea ngata no maua e toku metua tane i te tuatua ko maua ua. No reira ka kai kapiti maua okotai taime i te epetoma i ko i tana ngai angaanga. Te akaperepere tikai nei au i teia au tuatua.”

19. Eaa ra tatou katoatoa i anoano ei i te au tuatua i te pae vaerua?

¹⁹ Kare ainei tatou e akaperepere katoa ana i te au tuatau kia rekareka i te au tuatua pae vaerua meitaki ra ma to tatou au taeake irinaki ra? Te oronga maira teianei au tuatau ia ratou uaorai i te au uipaanga, i roto i te angaanga orometua koro, e i te au akaputuanga tamataora e e te aaere anga. Kua akara atu a Paulo ki te tuatau ki mua i te tuatua anga ki te au Kerititiano i Roma. “E anoano maata toku kia kite atu ia kotou,” tana ia i tata atu kia ratou, “kia pumaana oki au e kotou katoa i to tatou akarongo, i to kotou e i toku katoa oki.” (Roma 1:11, 12) “Te au tuatua pae vaerua ma te au taeake Kerititiano te akaki ra i tetai anoano maata,” i akakite mai ei a Johannes, ko tetai tangata pakari Kerititiano. “Te akapumaana ra ratou i te ngakau e te akamama maira i te au apainga i te au ra ravarai. E ui putuputu ana au ki te aronga ruaine kia akakite mai kiaku no runga i to ratou au oraanga e eaa tei tauturu ana ia ratou kia vai tiratiratu ua. Kua tere atu te au mataiti, kua tuatua ana au ki te manganui, kua oronga taki tai mai ratou i te pakari me kare te akamaramaanga tei akapuapinga ra i toku oraanga.”

20. Eaa ta tatou ka rauka i te rave me aravei atu tatou i tetai tangata tei akama ra?

²⁰ Ka akapeea ra me kare tetai tangata e akarongo mai me tuatua koe i tetai tumu manako i te pae vaerua? Auraka e akaruke ua. Penei ka rauka ia koe i te kite i tetai tuatau a muri mai. “Mei te [“au apara,” NW] auro i roto i te vairanga ario ra, ko te tuatua ïa me tuatuaia i te tuatau tikai ra,” ta Solomona i akakite mai. (Maseli 25:11) E akaari i te marama anga ki te aronga tei akama ra. “Te manako i roto i te ngakau tangata, mei te moana ïa; e rauka maira taua manako ra i te tangata kite.” * (Maseli 20:5) Tei maata atu, auraka rava e tuku i te au tu o tetai kia tapupu ia koe i te tuatua atu no runga i te au mea te akatukia ra i toou ngakau.

E Tutaki Anga Meitaki te Au Tuatua i te Pae Vaerua

21, 22. Eaa te au mea puapinga ka rauka ia tatou no te piri atu anga ki roto i te au tuatua i te pae vaerua?

²¹ “Auraka ei tuatua viivii e mama mai no roto i to kotou vaa,” i ako mai ei a Paulo, “ei tuatua meitaki ra e tupu ei te meitaki tika ra, e meitaki ei te  aronga e akarongo ra.” (Ephesia 4:29; Roma 10:10) Penei e tauta anga pakari tetai kia arataki atu i te au tuatua ki te mataara tika, inara e manganui te au tutakianga meitaki. Te tauturu maira te au tuatua i te pae vaerua ia tatou kia oronga atu i to tatou akarongo ki tetai ke e kia akamaroiroi atu i to tatou taeake taokotaianga.

²² Kia taangaanga, i reira, tatou i te apinga aroa o te tuatua kia akamaroiroi i tetai e te akapaapaa i te Atua. Ka riro taua au tuatua ei tumu merengoanga kia tatou e ei akamaroiroianga ki tetai ke. Tei maata atu, ka akarekareka ratou i to Iehova ngakau no te mea te akarongo maira aia ki ta tatou au tuatua e te rekareka ra aia me taangaanga tatou i to tatou arero i roto i te mataara tika. (Salamo 139:4; Maseli 27:11) Me te tuatua ra tatou i te pae vaerua, te papu ra ia tatou e kare a Iehova e akangaropoina ia tatou. Te taikuanga i te aronga te tavini ra ia Iehova i to tatou tuatau, te akakite maira te Pipiria e: “I reira te aronga i mataku ia Iehova i te tuatua putuputu anga ki tetai ki tetai: e kua akarongo mairā Iehova, e kua kite e kua tataia iora tetai buka manakoanga ki mua iaia, no te aronga e mataku ia Iehova, e tei manako i tona ra ingoa.” (Malaki 3:16; 4:5) Mei teaa ra te puapinga e kia riro ta tatou au tuatua ei akamaroiroi anga i te pae vaerua!

[Tataanga Rikiriki i Raro]

Akapeea Koe me Pau?

• Eaa ta tatou au tuatua e akaari maira no runga ia tatou?

• Eaa ra te au mea akamaroiroi anga ka rauka ia tatou i te tuatua?

• Eaa ra te tuanga puapinga maata ta te au tuatua ka rave i roto i te ngutuare tangata e i roto i te putuputuanga Kerititiano?

• Eaa ra te au mea puapinga ta te au tuatua akamaroiroi anga ka apai mai?

[Au Uianga Apii]

[Au Tutu i te kapi 12]

Te au tuatua akamaroiroi anga tei runga i te . . .

“eaa ua atu te au mea mou”

“eaa ua atu te au mea manako maataia”

“eaa ua atu te au mea akapaapaaia”

“eaa ua atu te au mea tuatua meitakiia”

[Akameitakianga]

Video cover, Stalin: U.S. Army photo; Creator book cover, Eagle Nebula: J. Hester and P. Scowen (AZ State Univ.), NASA

[Tutu i te kapi 13]

Te oronga maira te tuatau kaikai anga i te au tuatau meitaki kia piri atu ki roto i te au tuatua i te pae vaerua