Eaa Ka Tau ei e Auraka Tatou e Tukutuku i te Pure?
Eaa Ka Tau ei e Auraka Tatou e Tukutuku i te Pure?
“Auraka e tukutuku i te pure. E akameitaki i te Atua i te au mea katoa ra.”—1 Tesalonia 5:17, 18.
1, 2. Akapeea a Daniela i te akaari anga e te akangateitei ra aia i te akameitaki anga o te pure, e eaa te tupuanga ta te reira i rave no runga i tona pirianga ki te Atua?
TE PEU no te pure anga ki te Atua e toru taime i te ra tei te peroveta ra ko Daniela. Kua tuturi aia i mua i te maramarama o tona pia i runga, tei anga atu ki te oire o Ierusalema, e kua oronga atu i tana au patianga. (1 Ariki 8:46-49; Daniela 6:10) Noatu kua tureia e te ture ariki te au patianga a tetai ua atu mari ra kia Dariu, te ariki o Madai, kare rava a Daniela i akaparuparu ana i tetai taime. Me te akakino ra te reira i tona oraanga me kare, kare teia tangata pure i tukutuku ana i te pati anga kia Iehova.
2 Eaa to Iehova manako no Daniela? Te pau mai anga te angera ko Gabriela i tetai pure a Daniela, kua akataka mai aia i te peroveta ra ko tetai tei “akaperepere maataia.” (Daniela 9:20-23) I roto i te totou a Ezekiela, kua taiku a Iehova ia Daniela ei tangata tuatua tika. (Ezekiela 14:14, 20) I te au mataiti e tere atu, i te akara anga kua akatupu te au pure a Daniela i tetai pirianga vaitata ki tona Atua, e tikaanga tei kite katoaia e Dariu.—Daniela 6:16.
3. Tei akaariia mai e te tupuanga o tetai mitinari, akapeea te pure i te tauturu anga ia tatou kia tamou ua atu i te tiratiratu?
3 Ka rauka katoa te pure putuputu i te tauturu ia tatou kia aro atu i te au timata anga pakari. Ei akaraanga, e tamanako ana i te turanga o Harold King, ko tetai mitinari i Tinito tei akautungaia e rima mataiti i roto i te pia koia anake ua. No runga i tona tupuanga, kua tuatua te Taeake ko King: “Kua akaateaia mai au mei toku au taeake, inara kare e rauka i tetai ua atu i te akaatea mai iaku mei te Atua. . . . No reira, ka kitea mai e tetai ua atu penei te pati ua ra i toku pia, ka tuturi au i roto i toku pia e toru taime i te ra e ka pure maata atu, te maara anga ia Daniela, ta te Pipiria i tuatua. . . . I te akaraanga i taua au atianga na te vaerua o te Atua i arataki i toku manako ki te au mea puapinga maata roa atu e kua oronga mai i tetai manako maru kiaku. Mei teaa ra te ketaketa e te pumaana i te pae vaerua ta te pure i apai mai kiaku!”
4. Eaa te au uianga no runga i te pure ka akamanako tatou i roto i teia atikara?
4 Te karanga ra te Pipiria: “Auraka e tukutuku i te pure. E akameitaki i te Atua i te au mea katoa ra.” (1 Tesalonia 5:17, 18) Te manakoanga i teia akoanga, e akamanako ana tatou i te au uianga te aru maira: Eaa tatou ka tau ei kia tamou marie i ta tatou au pure? Eaa ra te au tumu i pure putuputu ei tatou kia Iehova? E eaa ra ta tatou ka tau i te rave me te manako ra tatou e kare e tau ana i te pure ki te Atua me no to tatou tu ara ra?
E Patu i te Pirianga Oa na Roto i te Pure
5. Eaa te pirianga oa umere ta te pure e tauturu maira ia tatou kia rekareka?
5 Ka inangaro ainei koe kia manako mai a Iehova ia koe ei oa nona? Kua tuatua ana aia no te pateriareka ko Aberahama na taua tu. (Isaia 41:8; Iakobo 2:23) Te inangaro maira a Iehova ia tatou kia akatupu i taua tu pirianga kiaia. Te pati maira aia ia tatou kia akavaitata atu kiaia. (Iakobo 4:8) Kare ainei taua patianga ra e maani ia tatou kia manako i te ravenga umere no te pure? Mei teaa ra te ngata i te reira kia rauka mai tetai taime i te tuatua ki tetai opita kavamani puapinga maata, pera katoa te riro mai anga ei oa nona ra! Inara, te akamaroiroi maira Tei Anga i te ao e pini ua ake ia tatou kia tuatua ua atu kiaia na roto i te pure, kia inangaroia e tatou me kare te anoanoia ra. (Salamo 37:5) Te pure tukutuku kore a tatou te tauturu ra ia tatou kia rauka tetai pirianga oa kia Iehova.
6. Eaa te akaraanga o Iesu ka apii mai kia tatou no runga i te anoano kia “pure oki”?
6 Inara, mei teaa ra te ngoie ua, te akangaropoina anga tatou i te pure! Te akono ua anga i te au taomianga no te oraanga i te au ra ravarai ka akapou maata i to tatou manako e kare i rauka ia tatou i te tauta i te tuatua atu ki te Atua. Kua akamaroiroi a Iesu i tana au pipi kia “pure oki,” e kua rave aia uaorai i te reira. (Mataio 26:41) Noatu e kua kite aia iaia uaorai i roto i te angaanga maata mei te popongi mai e tae ua atu ki te po, kua akanoo ra aia i te tuatau i te tuatua atu ki tona Metua i te rangi. I tetai taime, kua tu akera a Iesu i te ‘popongi i te akirata,’ kia rauka oki i te pure. (Mareko 1:35) I tetai atianga, kua aere atu aia ki tetai ngai koia anake ua i te openga o te ra kia tuatua atu kia Iehova. (Mataio 14:23) E akanoo ua ana a Iesu i te tuatau kia pure, e kia pera rai tatou.—1 Petero 2:21.
7. Eaa te au turanga te ka akakeu ia tatou kia tuatua ki to tatou Metua i te rangi i te au ra ravarai?
7 Te au tuatau tau no te pure ko tatou anake ua te oronga maira ratou i te au taime e manganui i te au ra tataki tai ia tatou e aro atura i te au manamanata, te tupu mai anga te au timataanga, e te rave anga i te au ikianga. (Ephesia 6:18) Me kimi tatou i te arataki anga a te Atua i roto katoatoa i te au tu o te oraanga, papu e ka tupu to tatou pirianga oa kiaia. Me ka aro atu nga oa e rua i te au manamanata, kare ainei te pirianga oa i rotopu ia raua e akaketaketaia mai? (Maseli 17:17) E tika rai teia me irinaki tatou ki runga ia Iehova e te kiteanga i tana tauturu.—2 Paraleipomeno 14:11.
8. Mei te au akaraanga o Nehemia, Iesu, e Hana, eaa ta tatou i kite no runga i te roroa o ta tatou au pure?
8 Mei teaa ra to tatou rekareka e kare te Atua i tuku i te kotinga e eaa te roa me kare mei teaa te putuputu me tuatua tatou kiaia na roto i te pure! Kua tuatua viviki a Nehemia i tetai pure muna i mua ake ka rave ei i tetai patianga ki te ariki o Peresia. (Nehemia 2:4, 5) Kua oronga katoa a Iesu i tetai pure poto ua i tona patianga kia oronga mai a Iehova i te mana kiaia kia akatu mai ia Lazaro. (Ioane 11:41, 42) Ko Hana, i tetai tua, kua ‘tamou ua i te pure ki mua i te aroaro o Iehova’ te riringi anga aia i tona ngakau kiaia ra. (1 Samuela 1:12, 15, 16) Ka rauka ta tatou au pure kia tapotoia me kare kia roroa te tau ra ki te anoano e te au turanga.
9. Eaa ka tau ei kia kapitiia mai i roto i ta tatou au pure te akapaapaa e te akameitaki anga no te au mea pouroa ta Iehova i rave no tatou?
9 E manganui te au pure i roto i te Pipiria te akakite maira i te kite ngakau tae no to Iehova turanga ngateitei e tana au angaanga umere. (Exodo 15:1-19; 1 Paraleipomeno 16:7-36; Salamo 145) I roto i tetai orama, kua kite atura te apotetoro ko Ioane i te aronga pakari e 24—te katoaanga o te numero o te au Kerititiano akatainuia i to ratou turanga i te rangi ra—te akapaapaa ra ia Iehova, i te na ko anga e: “E tau te kakā ia koe, e te Atu, e te akangateitei, e te mana: naau oki i anga i te au mea ravarai nei, e no toou inangaro i mou ei e i angaiaʼi ratou.” (Apokalupo 4:10, 11) E tumu anga katoa ta tatou kia akapaapaa putuputu atu i Tei Anga maira. Mei teaa te manako mataora o te au metua me akameitaki ta ratou tamariki ia ratou mei te ngakau no tetai apinga ta ratou i rave ana nona! I te manako arikianga i te au tu takinga meitaki o Iehova e te akakite anga i te akameitaki anga ngakau tae o tatou no te reira ko tetai mataara meitaki roa atu i te akamako mai i te tu o ta tatou au pure.
“Auraka e Tukutuku i te Pure”—No Teaa Ra?
10. Eaa te tuanga ta te pure i rave i te akaketaketa anga i to tatou akarongo?
10 E puapinga maata te pure putuputu ki to tatou akarongo. I muri ake i te akatutu anga i te anoano ‘kia tamou marie i te pure, auraka e maromaroa,’ kua ui a Iesu e: “Kia tae mai te Tamaiti a te tangata nei, e kitea ainei e ia te akarongo i te enua nei?” (Luka 18:1-8) Te patu ra te pure akatenga e te ngakau tae i te akarongo. Te ruaine anga te pateriareka ko Aberahama e kare ake i anau mai i tetai uanga, kua tuatua atu aia ki te Atua no runga i taua tumu ra. Te pauanga, kua pati a Iehova na mua kiaia kia akara ana ki te rangi ra e kia tatau ana i te au etu, me ka rauka iaia ra i te tatau. Kua akapapu atura te Atua i reira kia Aberahama e: “Koia katoa toou na uanga.” Tei tupu? “Kua akarongo atura [a Aberahama kia] Iehova; e kua akono atura aia i te reira ei tuatua-tika nana.” (Genese 15:5, 6) Me akatuera tatou i to tatou ngakau kia Iehova na roto i te pure, ariki i tana au akapapu anga mei roto mai i te Pipiria, e te akarongo anga kiaia, ka akaketaketa aia i to tatou akarongo.
11. Akapeea te pure i te tauturu anga ia tatou kia akono i te au manamanata?
11 Ka rauka katoa i te pure i te tauturu ia tatou kia akono i te au manamanata. E teiaa ainei te au apainga i roto i to tatou oraanga e te kino ua ra ainei te au turanga ta tatou e aro atura? Te akakite maira te Pipiria kia tatou e: “E tuku koe i taau apainga kia Iehova ra, e nana koe e tauturu mai; kare rava aia e vaoo ua atu i te tangata tuatua-tika kia akangaueueia ra.” (Salamo 55:22) Me aro atu tatou i te au ikianga ngata, ka rauka ia tatou i te aru i to Iesu akaraanga. Kua akapou aia e tai po katoa i te pure anga i te ngai muna i mua ake ka iki ei i tana apotetoro e 12. (Luka 6:12-16) E i te po i mua atu ka mate ei aia, kua pure pakari tikai a Iesu “e mei te toto kurukuruatu ra tona ou i te topa anga ki raro i te one.” (Luka 22:44) Tei tupu mai? “E i akarongoia aia i tana i mataku ra.” (Ebera 5:7) Ta tatou au pure akatenga e te tukutuku kore ra ka tauturu ia tatou kia autu i te au turanga taitaia e te au timataanga ngata.
12. Akapeea te ravenga no te pure i te akatutu mai anga e te manako maira a Iehova ia tatou?
12 Ko tetai atu tumu kia akavaitata atu kia Iehova na roto i te au pure koia oki, te akavaitata maira aia kia tatou. (Iakobo 4:8) Me akatuera tatou i to tatou ngakau kia Iehova na roto i te pure, kare ainei tatou i kite e te manako maira aia i to tatou au anoano e te manako tangi maira ia tatou? Ka kite tatou i to te Atua aroa na roto i tetai tu tikai. Kare a Iehova i tuku ki runga i tetai tangata ke atu i te apainga kia akarongo atu ki te au pure tataki tai ta tona au tavini i pure atu kiaia ra ei Metua i te rangi no ratou ra. (Salamo 66:19, 20; Luka 11:2) E te pati maira aia ia tatou kia ‘uri i to tatou tumatetenga katoa ki runga iaia; koia oki te tiaki mai ia tatou.’—1 Petero 5:6, 7.
13, 14. Eaa te au tumu e auraka tatou e tukutuku i te pure?
13 Ka rauka i te pure i te akauru ia tatou ma te maroiroi maata no te angaanga orometua i te ngai tangata e te akaketaketa anga ia tatou me te akariro ra te manako kore me kare te patoianga kia akamutu ua tatou. (Angaanga 4:23-31) Ka paruru katoa te pure ia tatou mei “te ravenga pakari a te diabolo.” (Ephesia 6:11, 17, 18) Me te tauta ra i te akono i te au timataanga i te au ra ravarai, ka rauka ia tatou i te pati putuputu ki te Atua kia akaketaketa mai ia tatou. Te kapiti maira ta Iesu pure i te pati anga kia Iehova ‘e akaora ra ia tatou mei te kino ra,’ ia Satani te Tiaporo ra.—Mataio 6:13.
14 Me rave ua atu tatou i te pure no te tauturu i te akatere anga i to tatou au tu ara, ka kite tatou i te rima tauturu o Iehova. Tei ia tatou teia akapapuanga: “E tuatua-mou ra ta te Atua, e kare aia e vaoo ia kotou kia timataia, mari ra ko te tika ia kotou kia akakoromaki ra; e akatupu katoa aia i te akapuanga i taua timataanga ra, kia tika ia kotou kia akakoromaki.” (1 Korinetia 10:13) Kua kite te apotetoro ko Paulo uaorai i to Iehova manako akaketaketa i roto i tetai au turanga tuke maata. “E tika iaku te au mea ravarai nei [“mei iaia ra,” NW], ko tei akamaroiroi mai iaku nei,” i nana ai.—Philipi 4:13; 2 Korinetia 11:23-29.
Tamou Marie i te Pure Noatu te Au Tu Ara
15. Eaa te ka tupu me kare to tatou tu akono e tau ana ki te au turanga a te Atua?
15 Kia rongo marekaia mai ta tatou au pure, auraka tatou e kopae ke i te ako o te Tuatua a te Atua. “E ta tatou e pati atu iaia ra, e rauka ïa ia tatou,” i tata mai ei te apotetoro ko Ioane, “no te mea te akono nei tatou i tana au akauenga, e te rave nei i te au mea e marekaʼi aia ra.” (1 Ioane 3:22) Inara, eaa te ka tupu, me kare to tatou tu akono e tau ana ki te au turanga a te Atua? Kua pipini a Adamu raua ko Eva ia raua uaorai i muri ake i to raua ara anga i roto i te kainga i Edene. Penei ka manako pipini katoa rai tatou mei ‘te aroaro o Iehova’ e te akamutu anga i te pure. (Genese 3:8) “Ko te takainga mua no te tarevake taku e kite ua ana ta te aronga tei topa ke atu mei ia Iehova e tana akaaerenga koia oki kua akamutu ua ratou i te pure,” ta Klaus ia i tuatua mai, ko tetai akaaere tutaka kite. (Ebera 2:1) Ko teia te tu kia José Ángel. Kua tuatua aia: “Vaitata rai ki te varu mataiti, kare au e pure ana kia Iehova. I toku manako kare au e tau kia tuatua atu kiaia, noatu e te manako nei rai au iaia e ko toku Metua i te rangi.”
16, 17. E oronga mai i te au akaraanga e akapeea te pure putuputu e tauturu mai ei ia tatou kia autu i te tu paruparu i te pae vaerua.
16 Penei ko tetai ia tatou te manako ra e kare e tau kia pure atu no te paruparu i te pae vaerua me kare no te mea kua oki akaou atu tatou ki roto i te ravenga kino. Inara ko teia tikai te tuatau te anoanoia ra kia rave tatou i te ravenga pure. Kua oro ke atu a Iona mei tana angaanga. Inara kua ‘kapiki atura a Iona i tona tumatetenga kia Iehova, e kua akarongo maira Aia iaia; i roto i te kopu o ade to Iona kapiki anga atu, e kua akarongo mai a Iehova i tona reo.’ (Iona 2:2) Kua pure a Iona, kua pau mai a Iehova i tana pure, e kua meitaki mai a Iona i te pae vaerua.
17 Kua pure akatenga katoa a José Ángel no te tauturu. Kua maara iaia e: “Kua akatuera au i toku ngakau e kua pati atu ki te Atua kia akakore mai aia i te ara. E kua tauturu mai aia iaku. Kare au e manako ana e ka oki akaou mai au ki te tuatua mou me kare te tauturu anga o te pure. E pure putuputu ana au i teianei i te au ra ravarai, e te akara nei au ki mua ki teia au taime nei.” Kia manako rangatira ua rai tatou i te tuatua atu ki te Atua no runga i te au tarevake o tatou e kia pati akaaka atu kia akakore mai aia i te ara. Te aaki anga te Ariki ko Davida i tana au ara, kua akakore mai a Iehova i tana au ara. (Salamo 32:3-5) Te inangaro maira a Iehova i te tauturu ia tatou, kare i te akaapa ia tatou. (1 Ioane 3:19, 20) E ka rauka i te au pure a te aronga pakari i roto i te putuputuanga i te tauturu ia tatou i te pae vaerua, no taua au patianga ra e “mea manuia maata ïa.”—Iakobo 5:13-16.
18. Eaa te akapapuanga ka rauka i te au tavini o te Atua noatu eaa te mamao te aere ke anga ratou?
18 Koai ia metua ka kopae ke atu i tetai tamaiti tei anga akaaka mai kiaia no te tauturu e te akoanga i muri ake i te rave anga i tetai tarevake ra? Te akaari maira te parapore o te tamaiti kaimoumou e noatu e eaa te mamao te aere ke anga tatou, ka rekareka to tatou Metua i te rangi ra me oki akaou mai tatou kiaia. (Luka 15:21, 22, 32) Te raurau maira a Iehova i te aronga katoatoa tei rave i te kino kia kapiki kiaia, e “te maata ra oki iaia te akakore i te ara.” (Isaia 55:6, 7) Noatu e kua rave a Davida i te au ara kino e manganui, kua kapiki aia ia Iehova, i te na ko anga e: “E ariu mai i to taringa, e te Atua, i taku pure; auraka kia puroku i to mata i taku i pati nei.” Kua tuatua katoa aia e: “I te aiai, e te popongi, e te avatea, ka pure ei au, ka kapiki nui au, e ka akarongo mai [a Iehova] i toku reo.” (Salamo 55:1, 17) Mei teaa ra te akapapu anga!
19. Eaa tatou i kore ei e tau kia manako e ko te au pure kare i pauia mai e akakite ua angaia e kare te Atua e mareka maira?
19 Akapeea ra me kare e pau vivikiia mai ta tatou patianga? Ka tau i reira kia akapapu tatou e te rotai ra ta tatou pati anga ki to Iehova anoano e te orongaia ra na roto i te ingoa o Iesu. (Ioane 16:23; 1 Ioane 5:14) Te taiku ra te pipi ko Iakobo ki tetai au Kerititiano kare ta ratou au pure i pauia mai no te mea te ‘apa na te pati anga.’ (Iakobo 4:3) I tetai tua, kare tatou e tau kia viviki i te manako ua e ko te au pure kare i pauia mai e akakite ua angaia e kare te Atua e mareka maira. Penei i tetai taime te akatika ra a Iehova i te aronga akamori tiratiratu kia rave ua atu i te pure no runga i tetai tumu no tetai tuatau i mua ake ka kitea mai tana pau anga. “E pati, e e orongaia mai ta kotou,” i na Iesu ei. (Mataio 7:7) No reira, te umuumuia ra tatou kia “tamou marie tikai i te pure.”—Roma 12:12.
E Pure Putuputu
20, 21. (a) Eaa tatou i anoanoia ai e auraka e tukutuku i te pure i teia “tuatau openga”? (e) Eaa te ka rauka mai ia tatou me pure tatou i te au ra ravarai i mua i te terono o te aroa ua e te mataku kore o Iehova?
20 Te maata ua atura te au taomianga e te au manamanata i roto i teia “tuatau openga,” tei akairoia e te “kino maata.” (2 Timoteo 3:1) E ka rauka ngoie ua i te au timataanga i te akaapiapi i to tatou au manako. Inara, auraka e tukutuku i ta tatou au pure, te tauturu ra ia tatou kia tamou ua atu i to tatou au oraanga ki runga i te mataara pae vaerua noatu te au manamanata maata, te au timataanga, e te au akamaroiroi kore. Ta tatou au pure i te au ra ravarai kia Iehova ka rauka i te oronga mai i te turu maata ta tatou e anoano ra.
21 Ko Iehova, “tei akarongo i te pure ra,” kare e pou ana te taime i te akarongo mai kia tatou. (Salamo 65:2) Auraka rava e tapupu i to tatou taime i te tuatua atu kiaia. To tatou pirianga oa ki te Atua ko te mea puapinga maata roa atu ia kia tatou. Auraka rava tatou e rave puapinga kore ua i te reira. “E teianei e akavaitata ua atu tatou i te terono o te aroa ua ma te mataku kore, kia aroaia mai tatou nei, e kia rauka te meitaki ei tauturu mai ia tatou i te tuatau e tau ei ra.”—Ebera 4:16.
Akapeea Koe me Pau?
• Eaa ta tatou i kite mei te peroveta ko Daniela no te puapinga o te pure?
• Akapeea e rauka ai ia tatou i te akaketaketa i to tatou pirianga oa kia Iehova?
• Eaa i kore ei e tau e auraka tatou e tukutuku i te pure?
• Eaa i kore ei e tau te au manako no te tu tau kore e arairai ia tatou mei te pure anga kia Iehova ra?
[Au Uianga Apii]
[Tutu i te kapi 16]
Kua rave a Nehemia i tetai pure poto ua e te muna i mua ake ka tuatua atu ei ki te ariki
[Tutu i te kapi 17]
Ko Hana kua ‘tamou ua i te pure ki mua i te aroaro o Iehova’
[Au Tutu i te kapi 18]
Kua pure a Iesu i te po katoa i mua ake ka iki ei i tana au apotetoro e 12
[Au Tutu i te kapi 20]
Te oronga maira te au tuatau no te pure i te au ra ravarai