Martin Luther​—Te Tangata e Tana Koreromotu

“KUA karangaia e e maata ua atu te au puka tei tataia no runga ia [Martin Luther] i tetai ua atu tangata i roto i te tuatua enua, mari ra tona uaorai pu, ko Iesu Karaiti.” I akakite mai ei te makatini Time. Kua tauturu te au tuatua e te au angaanga a Luther i te akamata mai i te Tauianga​—ko tetai akaaerenga akonoanga tei akatakaia mai e ko “te tauianga puapinga maata roa atu i roto i te tuatua enua o te au tangata.” I tauturu ei aia i te taui i te turanga o te akonoanga i Europa e te akavaitata mai anga i te au tuatau taito ki taua enua maatamaata ra. Kua akanoo katoa a Luther i te tumu no tetai tata anga akaturangaia o te reo Tiamani. Te vai ua nei rai tana urianga no te Pipiria e mea rongonui roa atu i roto i te reo Tiamani.

Eaa to Martin Luther tu tangata? I akapeea aia i riro mai ei ei akakeu anga ki runga i te au mea i Europa?

Kua Riro a Luther ei Tangata Apii

Kua anauia a Martin Luther i Eisleben, i Tiamani, ia Noema 1483. Noatu e tangata angaanga i roto i te maina veo, kua rauka i tona metua tane i te angaanga kia rava ua te moni ei tutaki i tetai apii meitaki na Martin. I te 1501, kua riro mai a Martin ei tangata apiipii i te Apii Teitei o Erfurt. I roto i tana vairanga puka, ko te taime mua te reira i tona tatau anga i te Pipiria. “Kua mareka tikai au i te puka,” i nana ai, “e kua inangaro au e ka tau i te akameitaki anga kia rauka mai taua puka ra a tetai ra.”

I te mataiti 22, kua tomo atu a Luther ki roto i te mongoka Augustine i Erfurt. I muri mai kua aere atu aia ki te Apii Teitei o Wittenberg, kua rauka mai tetai pepa i roto i te apii akonoanga. Kua manako a Luther e kare aia e tau ana i to te Atua ra akaperepereanga e i tetai au taime kua taitaia no te akava ngakau apa ua. Inara na te apii Pipiria, te pure, e te manakoanga i tauturu iaia kia rauka tetai marama anga meitaki e eaa to te Atua manako ra i te aronga ara. Kua kite a Luther e kare ta te Atua akaperepereanga e oko ia. Mari ra, kua orongaia mai te reira na roto i te aroa ua ki te aronga te akono ra i te akarongo.​—Roma 1:16; 3:23, 24, 28.

I akapeea a Luther i te akamanakoanga e te tano ra tona marama ou? Kua tata a Kurt Aland, e poropeta no te tuatua enua o te ekaretia mua e te kimikimi anga i te tata anga Koreromotu Ou, e: “Kua manakonako aia no runga i te katoa anga o te Pipiria i roto i tona manako e rauka ai i te akataka mai e me ka rauka i teia kite ou i te tu atea ua me akaaiteia atu ki tetai au tuatua Pipiria, e kua kitea mai e ia e kua arikiia aia i te au ngai ravarai.” Te apiianga no te tu tika tikai, me kare te ora, na roto i  te akarongo e kare na roto i te au angaanga, me kare te taakaaka, te vai ua nei rai ei turu anga maata no ta Luther au apiianga.

Kua Riri no te Au Aakianga

To Luther marama anga e i akapeea to te Atua manako ra i te aronga ara kua apai mai iaia ki roto i te taumaroanga ma te Ekaretia Katorika Roma. Kua irinaki ateaia i te reira taime e i muri ake i te matenga, ka na roto atu te aronga ara ra i te utungaanga no tetai tuatau. Inara, kua karangaia e ko teia tuatau nei ka rauka i te tapotoia mai e te au aakianga tei akatikaia mai e te mana o te pope te ka tutakiia ki te moni. Te aronga okooko mei ia Johann Tetzel, tei angaanga ei rima rave na te Epitikopo Maata ko Albert o Mainz, kua rave ua atu i tetai okooko anga tere ki mua no te oko anga i te au aakianga ki te au tangata noa ua. E manganui te tamanako ra i te au aakianga e ei tutakianga no te au ara i te tuatau ki mua.

Kua riri a Luther no runga i te oko anga o te au aakianga. Kua kite aia e kare e rauka i te au tangata i te oko mai mei te Atua. I te tuatau pururu anga rau o te 1517, kua tata aia i tana au tataanga rongonui e 95, i te akaapa anga i te ekaretia no te kino i te pae moni, te apiianga e te akonoanga. Te inangaro anga i te akamaroiroi i tetai tauianga, kare ra i tetai meameaau anga, kua tuku atu a Luther i te au kopi o tana au tataanga ki te Epitikopo Maata ko Albert o Mainz e ki tetai aronga apii e manganui. E manganui te aronga tuatua enua tei tou atu ki te 1517 me kare te vaitata ra ki te reira tuatau e ko te akamata mai angaia no te Tauianga.

I te mii anga i te au ravenga tarevake a te ekaretia, kare e ko Luther anake ua. E tai anere mataiti i muri mai, kua akaapa te tangata taui akonoanga o Tieki ko Jan Hus i te oko anga o te au aakianga. E i mua ake ia Hus, kua akakite mai a John Wycliffe o Engarani e ko etai au peu te mou ra te ekaretia kare no te Tuatua Tapu mai. Kua raurau rai te au tangata o to Luther tuatau mei ia Erasmus o Rotterdam e Tyndale o Engarani i te taui anga. Inara i te akameitaki anga i te apinga i angaia e Johannes Gutenberg i Tiamani ko te matini nenei anga ma te taipe reta neke aere, kua rongo maataia te reo o Luther i te ngai mamao i to te au reo o tetai ua atu au tangata taui ra.

Kua angaanga ta Gutenberg matini nenei anga i Mainz i te 1455. I te akamata anga o te anere mataiti, te vaira e 60 matini nenei i roto i te au taoni o Tiamani e e 12 i tetai au enua i Europa. No te tuatau mua i roto i te tuatua enua, ka akakite vivikiia atu ki te katoatoa no runga i te au mea te manakoia ra. Penei e kare ma tana akatika anga, kua neneiia e kua tuaia ta Luther au tataanga e 95. Te maroanga no te taui anga ekaretia kare i riro akaou mai ei maroanga i te reira ngai. Kua riro mai te reira ei maroanga akatotoaia, e kare i roa ana kua riro mai a Martin Luther ei tangata rongonui roa atu i Tiamani.

Kua Ariu Mai te “Ra e te Marama”

No te au anere mataiti, tei roto a Europa i nga rima e rua o te au akaaerenga ririnui roa atu: te Patireia Roma Tapu e te Ekaretia Katorika Roma. “Te kapipiti taokotai ra te emepera e te pope mei te ra e te marama rai,” ta Hanns Lilje i akataka mai, e peretiteni no te Lutheran World Federation o mua ana. Inara, kua tupu maata mai te manako anga papu kore e koai te ra e koai te marama. Te tae anga ki te 16 anere mataiti, ko nga akaaerenga ra kua taeria te take no to raua mana. Te vaitata maira tetai tieni anga.

Kua ariu mai a Pope Leo X ki te au tataanga e 95 na te tamataku anga ia Luther ma te akaateaanga  ki vao me kare aia e tuku i te au. Ma te marokiakia, kua tutungiia e Luther te pepa tei roto te tamataku anga a te pope e kua nenei i tetai ua atu au tataanga te akamaroiroi ra i te au tangata katoatoa kia tauiia te ekaretia noatu e kare te pope e akatika mai ana. I te 1521, kua akaateaia a Luther ki vao e te Pope Leo X. Te patoianga a Luther e kua akaapaia aia kare i tetai akava anga tau, kua kapiki atu te Emepera ko Charles V i te tangata taui ra kia aere mai ki mua i te akaputuputu ariki, me kare te uipaanga, i Worms. E 15 ra to Luther tere mei ia Wittenberg ki Worms i roto ia Aperira 1521 mei tetai tomoanga autu rai. Tei tona tua te manako o te katoatoa, e kua inangaro te au tangata i te au ngai ravarai i te kite iaia.

I Worms, kua tu atu a Luther ki mua i te emepera, te ui ariki, e te aronga rima rave o te pope. Kua aro ana rai a Jan Hus i taua akava anga i Constance i te 1415 e kua tutungiia ki runga i te rakau. Ma te au mata o te ekaretia e te patireia tei runga iaia ra, kua patoi atu a Luther i te tuku i te au me kare e rauka i te aronga patoi ra i te akapapu mai kiaia ra mei roto i te Pipiria e kua tarevake aia. Inara kare i rauka kia aite tetai ua atu ra ki tona maara anga i te au Tuatua Tapu. Te pepa tei kapikiia e ko te Akauenga o Worms i oronga mai i tei tupu ki te akava anga. Kua akakite mai te reira e e tangata aati ture a Luther e kua araiia tana au tataanga. Kua akaateaia e te pope e kua tureia e te emepera, tei roto aia i teianei i te turanga kino.

Kua tupu mai ra tetai au tupuanga taka meitaki kare i tapapaia ana. I tona oki anga ki Wittenberg, kua riro mai a Luther e ko tetai tangata keia akatutuia tei akapapaia e Frederick meitaki tikai ra o Saxony. Kua apai mamao ia atu a Luther mei tona au enemi. Kua apai ngaro ia mai a Luther ki roto i te punanga uunaia o Wartburg, te ngai i akatupu ei aia i tetai uruuru vaa e kua riro mai ei tangata ke​—ko tetai tumu toa tei kapikiia ko Junker Jörg.

Te Pipiria Tepetema Kua Umuumu Maataia

Te ngauru marama i aru mai, kua noo a Luther ki roto i te punanga Wartburg ei tuitarere mei te emepera e te pope. Kua akataka mai te puka Welterbe Wartburg e ko “te tuatau i Wartburg ra e au tuatau puapinga e te anga anga maata roa atuia i roto i tona oraanga.” Ko tetai o tana au angaanga maata roa atu, ko te urianga i te tataanga a Erasmus no te au Tuatua Tapu Ereni ki roto i te Tiamani, kua oti te reira. Kua neneiia i roto ia Tepetema 1522 kare i akatakaia mai a Luther ko te tangata uri, kua kitea teia tata anga e ko te Pipiria Tepetema. Te moni e 1 1/2 guilders​—aite ki te moni tutaki i te mataiti a tetai tamaine tavini i roto i te ngutuare. Noatu rai, e maata tikai te umuumu anga i te Pipiria Tepetema. I roto i te 12 marama, e 6,000 kopi tei neneiia i roto i te au tataanga e 2, te maata anga e 69 tataanga tei aru mai i te 12 mataiti i muri maira.

I te 1525, kua akaipoipo a Martin Luther ia Katharina von Bora, ko tetai paretenia i mua ana. E meitaki a Katharina i te akono anga i te au mea o te ngutuare e kua aite katoa ki te au umuumuanga i te au tu meitaki a tana tane. Kua kapitiia mai i roto i to Luther ngutuare kare anake e ko tana vaine te tamariki e ono mari katoa ra te au oa, te aronga apii, e te aronga oro-kimiora. Te mataiti i muri mai kua rekareka a Luther i te akameitakianga ei tangata ako e ko te aronga apii tei aere mai ki tona kainga ei manuiri kua akapapa ratou ia ratou uaorai ma te peni e te pepa i te tata i  tona au manako. Kua tuku kapitiia teia au tataanga ki roto i tetai papaanga te ingoa Luthers Tischreden (Ta Luther Au Tuatua). No tetai ua atu taime, kua reka te reira i tetai tuaanga i roto i te reo Tiamani te rua ki te Pipiria.

E Tangata Uri Karape e e Tangata Tata Meitaki Rava

I te tae anga ki te 1534, kua oti ia Luther tana urianga no te Au Tuatua Tapu Epera. E kite tikai tona i te akatau i te tu, te tangi, e te tuatua. Ko tei tupu e Pipiria te maramaia ra e te au tangata noa ua. Te tuatua anga no runga i tana ravenga no te urianga, kua tata a Luther: “Ka tau kia tuatua atu tatou ki te au metua vaine i roto i to ratou kainga, ki te tamariki i runga i te mataara e te tangata noa ua i te makete, e oti ka akara atu i to ratou au vaa kia kite e akapeea ratou i te tuatua anga e oti ka uri atura ma te tau ua.” Kua tauturu ta Luther Pipiria i te akanoo i te tumu no tetai reo akaturanga tataia tei arikiia i roto ia Tiamani katoa ra.

To Luther karape ei tangata uri kua kapitiia mai te kite ei tangata tata. Kua tuatuaia e kua tata aia i tetai tataanga e rua epetoma katoa ra i roto i tona oraanga angaanga. Ko etai o teia au tataanga e tu maroanga mei to ratou rai tangata tata ra. Me e pakari te tu o tana au tataanga mua, kare te mataiti ruaine i tamaru mai i te keokeo o ta Luther peni. Kua pakari tikai mai tana au tataanga i muri mai. Kia tau ki te Lexikon für Theologie und Kirche, te akaari maira ta Luther tataanga i te “maata tikai o tona riri” e “te ngere anga i te tu akaaka e te aroa,” e pera katoa tetai “manako akakeuanga teitei no te angaanga.”

Te akamata anga te Tamaki a te Aronga Putaua kua kiia te au ngai tutara anga ariki i te toto, kua uiia atu kia Luther eaa tona manako no runga i te meameaau. E tika anga tau ainei to te aronga putaua kia taumaro atu i to ratou au atu akaaere ture ra? Kare a Luther e tauta ana i te rave mai i te turuanga rongonui na te oronga anga i tetai pauanga reka anga ki te maataanga. Kua irinaki aia e e mea tau kia akarongo atu te au tavini a te Atua ki te aronga mana taoonga. (Roma 13:1) I roto i tetai manakoanga tika, kua tuatua a Luther e kia akamutuia te meameaau ma te mana ririnui. “E tuku i tetai ua atu te ka rauka ra, i te ko, rutu, ta,” i nana ai. Kua akakite mai a Hanns Lilje e no teia pauanga ra kua ngere ia Luther “tona tu rongonui roa atu i rotopu i te au tangata.” Pera katoa, te au tataanga a Luther no runga i taua ngati Iuda tei patoi kia taui ki roto i te Akonoanga Kerititiano, tera tikai On the Jews and Their Lies, kua akariro i te manganui kia akataka i te tangata tata ra ei Temite patoi.

Ta Luther Koreromotu

Te Tauianga, kua akakeuia e te au tangata mei ia Luther, Calvin, e Zwingli, tei taki atu ki te akamataanga i tetai akaaere anga ou ki te akonoanga tei kapikiia e ko te Akonoanga Porotetani. Ta Luther koreromotu maata ki te apii Porotetani ko tana apiianga maata no te tu tika tikai e te akarongo. Kua turu atu te ngai tutara ariki Tiamani tataki tai ra ia ratou uaorai ki te akarongo Porotetani me kare ki te Katorika. Kua akatotoaia te apiianga Porotetani e kua rauka mai te turuanga rongonui i Kanatinavia, Tuiterani, Engarani, e te Neterani. I teia tuatau e anere e mirioni ua atu te aronga tei aru.

Te manganui kare e piri ana ki te au irinaki katoatoa a Luther te manako ra rai  iaia i te turanga teitei. Te Repapuriki Temokaratiki Tiamani o mua ana, tei ariki ia Eisleben, Erfurt, Wittenberg, e ia Wartburg i roto i to te reira au kotinga, i te 1983 kua akono i te ra akamaaraanga e 500 o to Luther anauanga. Kua ariki teia Au-Enua Totiariti iaia ei tangata maata roa atu i roto i te tuatua enua e te peu o Tiamani. Pera katoa, kua tuatua tapoto mai tetai tangata apii akonoanga Katorika o te mataiti 1980 i ta Luther akakeuanga e kua na ko maira e: “Kare tetai ua atu tangata tei aru mai i muri ake ia Luther e aite kiaia.” Kua tata te Poropeta ko Aland e: “I te au mataiti ravarai vaitata rai e 500 puka ou no runga ia Martin Luther e te Tauianga​—e vaitata rai te reira tei roto i te au reo maata ravarai o te ao.”

Ko Martin Luther ra e kite tikai, maramaanga takake, e kikite i te au tuatua, e te angaanga maroiroi tikai. Kare ona tu akakoromaki anga e tu taumaro ra, e kua ariu pakari mai aia i tana e manako ra e e tu pikikaa. Iaia i runga i tona roi mate i Eisleben ia Peperuare 1546, kua ui atu te au oa kia Luther me kua vai tiratiratu ana aia no runga i te au irinaki anga tana i apii ana ki tetai ke. “Ae,” i pau mai ei aia. Mate atura a Luther, inara e manganui te mou ua ra rai ki taua au irinakianga.

[Tutu i te kapi 27]

Kua patoi a Luther i te oko anga o te au aakianga

[Akameitakianga]

Mit freundlicher Genehmigung: Wartburg-Stiftung

[Tutu i te kapi 28]

Kua patoi a Luther i te tuku i te au me ka rauka i te aronga patoi i te akapapu mai kiaia mei roto i te Pipiria e kua tarevake aia

[Akameitakianga]

From the book The Story of Liberty, 1878

[Au Tutu i te kapi 29]

To Luther pia i te Are Punanga Wartburg, te ngai i uri ei aia i te Pipiria

[Akameitakianga]

Both images: Mit freundlicher Genehmigung: Wartburg-Stiftung

[Akameitakianga no te Tutu i te kapi 26]

From the book Martin Luther The Reformer, 3rd Edition, published by Toronto Willard Tract Depository, Toronto, Ontario

[Akameitakianga no te Tutu i te kapi 30]

From the book The History of Protestantism (Vol. I)