Me Papu Tikai te Au Taputou

KUA ki te au tuatua enua i te au taputou tei kore i akatupuia ana. E putuputu te taime kua poka te au enua i te akono i te au tuatua akatika kia akakore i te au manamanata tei tainaia, te arataki anga atu i to ratou iti tangata ki roto i te au tamaki anga kino. Kua tuatua ana a Napoleon e: “Ka akono te au kavamani i ta ratou au taputou me maroia ratou kia pera, me kore me ka riro ia ei meitaki no ratou.”

Akapeea te au taputou tei tuatuaia e tetai au tangata tataki tai? Mei teaa ra te maromaroa me kare tetai tangata e akono i tana i tuatua! Te tika ra teia i te mea tikai koia tetai kua kite koe e kua irinaki ra. E tika, penei kare e rauka i tetai au tangata me kore kare e puareinga i te akatupu i ta ratou au taputou.

Mei teaa te tuke o te au taputou a te tangata e te au taputou tu-Atua! Ta te Atua au taputou ka irinaki pu tikai ia e te papu tikai. Ko tetai ua atu taputou tei akatupuia e te Atua ko Iehova kua papu ia. Papu tikai ka tupu te reira. No ta te Atua tuatua kare i poka, te akakite ra a Isaia 55:11 e: “Koia katoa taku tuatua no roto i toku nei vaa; kare e oki puapinga kore ua mai kiaku nei, e tupu ra tei akakoroia e au ra; e manuia oki te mea i akaue atu ei au ra.”

No reira, ka akapeea tatou i te akara anga i ta te Atua au taputou tei tataia i roto i te Pipiria? Papu e ka rauka ia tatou i te irinaki i te reira. Ei akatauanga, kua tata te apotetoro ko Ioane: “I na, tei ko te tangata ra te puakapa o te Atua, e e noo aia ki rotopu ia ratou, e riro ratou ei tangata nona, e e noo te Atua ki rotopu ia ratou, ei Atua no ratou. E nana e orei i te roi-mata katoatoa; e e kore rava te mate, e te aue, e te mii; e te mamae oki, e kore katoa ïa; no te mea kua kore te au mea taito.” (Apokalupo 21:3, 4) Ka rauka ia koe te rekareka i taua au akameitakianga me rave koe ma te rotai ki ta Iesu au tuatua: “Teia oki te ora mutu kore, kia kite ratou ia koe i te Atua mou ra, e ia Iesu i te Mesia, i taau i tono maira.”​—Ioane 17:3.