Te Pipiria ka Tauturu i Toou Akaipoipoanga

AKAIPOIPOANGA​—no tetai, te akamaara maira te tuatua i te au manako rekaia. No tetai ke, te akatupu maira i te mamae ngakau. “Te manako nei au e kua akatakakeia au i te pae o te manako ngakau,” i mii ei tetai vaine. “Te kite nei au i te kopae anga e te maromaroa i te au taime ravarai.”

Na teaa i akakeu i nga tangata e rua tei tia i te inangaro e te akaperepere i tetai e tetai kia kore te inangaro? Ko tetai tumu kua kore te apiianga no runga i tei o mai ki roto i te akaipoipoanga. “Kua rave atu tatou i taua akanoonooanga ma te kore e tereni anga,” i akakite mai ei tetai tata tianara i te pae vairakau.

I te mea e iti ua tei kite tikai te akakiteia maira e te apiipiianga tei raveia e Te Apii o te Akaipoipoanga i te Pa Enua, e apiianga kimikimi marie na te Apii Teitei o Rutgers i New Jersey, U.S.A. “E manganui i roto i teia apii kua maata mai ma te nga metua akaipoipo kare i mataora me kore kua akatakake,” i tata ei te au akaaere o te apii. “Kua kite oki ratou i te akaipoipoanga kare i manuia, inara kare ratou i papu e mei teaa rai te tu o te akaipoipoanga meitaki. Kua rauka ua i etai i te akataka mai i te akaipoipoanga meitaki e ko ‘te tuke anga mei toku nga metua.’”

Kua paruruia ainei te au Kerititiano mei te au manamanata i te pae o te akaipoipoanga? Kare. Ko te tika, kua anoanoia e kia ako tika ia etai au Kerititiano o te anere mataiti mua e “eiaa e kimi i te matara” mei to ratou akaipoipoanga. (1 Korinetia 7:27) Te taka meitaki ra, ka tupu te au manamanata ki tetai ua atu akaipoipoanga o nga tangata apa ua, inara ka rauka ia tatou te tauturu. Ka rauka i te au tane e te au vaine i te akameitaki mai i to ratou pirianga na te taangaanga anga i te au kaveinga Pipiria.

E tika, kare te Pipiria i tetai puka no te akaipoipo anake. Inara, i te mea kua akauruia te reira e Tei akamata i te akanoonooanga o te akaipoipo ka rauka ia tatou i te tapapa e ka tauturu mai tana au kaveinga. Na roto i te peroveta ko Isaia, kua tuatua te Atua ko Iehova: “Ko au toou Atua ra ko Iehova, ko tei akakite ia koe i te mea e puapingaʼi koe na; ko tei arataki ia koe na te arataa e tau ei kia aere koe ra. Angairi koe i akarongo mai ki te au akauenga naku! kua riro ïa toou au mei te vai taʼe ra; e taau tuatua-tika mei te ngaru moana ra.”​—Isaia 48:17, 18.

Kua akamata ainei te inangaro tei vai ana i rotopu ia koe e toou tokorua i te ngaro atu? Te manako ra ainei koe e kua piritia ki roto i tetai akaipoipoanga kare te inangaro? Kua tuatua tetai vaine no tetai 26 mataiti e: “Ko te mamae e kiteaia nei i roto i teia tu pirianga kare e rauka i te akatakaia atu. E tupu putuputu ana e te vai ua ra.” Kare oki e ariki ma te emiemi e kua puapinga kore te akaipoipoanga, eaa ka kore ei e anoano atu i te rave i tetai apinga? Ka akaari mai te atikara e aru mai nei ki te au tane e te au vaine e ka akapeea te au kaveinga Pipiria i te tauturu anga i to ratou akaipoipoanga i roto i tetai ngai tikai​—te koreromotu.