‘Auraka e Kapitiia ma te Tau Kore’
‘Auraka e Kapitiia ma te Tau Kore’
MEI taau e kite nei i konei, ko te kamera e te puakatoro e arote kapipiti nei e akaraanga tau koreia ra. Te amo e pau kapipiti ra ia raua—tei akakoroia no nga manu aiteite te maatamaata e te maroiroi—te akariro ra e kia mamae nga manu. Te manako ra no runga i te oraanga o nga manu, kua akakite atu te Atua ki to Iseraela: “Auraka koe e kapiti i te puakatoro e te asini kia arote ra.” (Deuteronomi 22:10) Ka tau rai taua kaveinga ki tetai puakatoro e tetai kamera.
Tei matauia, kare tetai tangata pama e tuku i taua tu ngata ki runga i tana au manu. Inara me kare ana nga puakatoro, penei ka kapiti aia i nga manu e rua tei rauka iaia. I te akaraanga, ko teia ta tetai tangata pama o te 19 anere mataiti i roto i te akatutuanga i iki i te rave. No te tuke i to raua maatamaata e te teiaa, ka tauta pakari te manu paruparu i te akono atu i te tu viviki o tetai, e ka maata atu te teiaa ka akonoia i tei maroiroi ra.
Kua taiku te apotetoro ko Paulo i te reira akatutuanga o tetai amo kare i tau te aiteite kia apii mai i tetai apiianga puapinga kia tatou. “Auraka kotou e kapitiia ma te tau kore i te aronga akarongo kore ra,” i tata ei aia. “Eaa to te tuatua-tika tau anga i te tuatua-tika kore? e eaa to te mārama tau anga i te poiri?” (2 Korinetia 6:14) Ka akapeea tetai Kerititiano i te kapitiia anga ma te tau kore?
Ko tetai mataara koia oki me iki tetai Kerititiano i tetai tokorua akaipoipo kare i mou i tona au irinakianga. Ka riro te reira kapitianga ei mea tau kore no nga tangata, te patoianga nga tokorua i te au maroanga puapinga.
I te akanoo anga a Iehova i te akaipoipoanga, kua oronga mai aia ki te vaine te tuanga angaanga ei “tauturu tau,” me kore ei “tokorua tau.” (Genese 2:18) Pera katoa, na roto i te peroveta ko Malaki, kua tuatua te Atua no runga i tetai vaine ei “tokorua.” (Malaki 2:14) Te inangaro ra Tei Anga i te au tokorua kia angaanga ma te rotai i roto i te akonoanga i te pae vaerua, te tua anga i te au mea teiaa e te kokoti anga i te au mea puapinga ma te aiteite.
Na te akaipoipoanga “kia tau ra i te Atu,” te akaari ra tetai Kerititiano i te tu ngateitei no te ako a to tatou Metua i te rangi. (1 Korinetia 7:39) Te akatumu mai nei teia i te tango no tetai akaipoipoanga taokotaiia, te ka apai mai i te akapaapaaanga e te akangateiteianga ki te Atua i nga tokorua e tavini kapipiti ra iaia ei “oa rave angaanga” i roto i tetai tu tuke roa.—Philipi 4:3.
[Akameitakianga no te Tutu i te kapi 32]
Camel and ox: From the book La Tierra Santa, Volume 1, 1830