Kia Autu te Re, e Taangaanga i te Akatere-Uoarai!
Kia Autu te Re, e Taangaanga i te Akatere-Uoarai!
“Te tangata ravarai e manono kia riro iaia te re ra, e [taangaanga ia i te akatere-uaorai] i te au mea katoa nei.”—1 KORINETIA 9:25, akaaite ia NW.
1. Kia tau ki ta Ephesia 4:22-24, i akapeea te au mirioni ua atu i te tuatua anga e ae kia Iehova?
ME KUA papetitoia koe e ko tetai o te Au Kite o Iehova, te akakite ra koe ki te katoatoa e te inangaro ra koe kia o atu ki roto i tetai taemoemo anga e ora mutu kore te re no te reira. Kua tuatua koe e ae i te rave anga i to Iehova ra anoano. I mua ake ka raveia ai tetai akatapuanga kia Iehova, ko te maata anga ia tatou kua rave i te au tauianga puapinga kia riro mai ta tatou akatapuanga ei mea puapinga, arikiia mai e te Atua ra. Kua aru tatou i te ako anga a te apotetoro ko Paulo ki te au Kerititiano e: “Kia kopae kotou i ta kotou tuatua i muatangana ra, i te tangata taito, i tei kino i te anoano pikikaa; . . . Kia akatangata ou oki ko tei angaia kia tau i te Atua ra, i te tuatua-tika e te tapu mou.” (Ephesia 4:22-24) I tetai tu, i mua ake ka tuatua ai e ae i te akatapuanga ki te Atua ra, ka tuatua tatou e kare ki tetai tu oraanga ariki koreia o mua ana.
2, 3. I akapeea a 1 Korinetia 6:9-12 i te akakite mai anga e e rua tu taui anga ka tau kia raveia e rauka ai te marekaanga o te Atua ra?
2 Ko tetai au tu no te tangata taito ka tau te Au Kite tau o Iehova ra kia akaruke atu ko tei akaapa tika ia mai e te Tuatua a te Atua. Kua taiku mai a Paulo i etai ra i roto i tana reta ki to Korinetia, i te na ko anga e: “Kare te kanga, e te akamori idolo, e te akaturi, e te akavaine, e te aronga sodoma, E te keia, e te noinoi apinga, e te konā kava, e te akakino, e te āru, kare anake ïa e noo i te basileia o te Atua.” Kua akaari mai aia i reira e kua rave te au Kerititiano o te anere mataiti mua i te au taui anga tu tangata tau ra, na te tuatua katoa anga e: “Mei te reira oki tetai papaki o kotou na.” E akara ana e mei te reira oki ratou, inara kua taui ratou.—1 Korinetia 6:9-11.
3 Kua akakite mai a Paulo e penei te anoano katoaia ra tetai ua atu au tauianga, no te mea kua tuatua mai aia e: “E tika iaku te au mea ravarai nei, kare ra te au mea katoa e tau.” (1 Korinetia 6:12) No reira, e manganui i teia tuatau te inangaro ra kia riro mai ei Au Kite o Iehova te kite ra i te anoano i te tuatua anga e kare ki te au mea noatu e kua tureia kare oki e tau ana me kare e meangiti ua te puapinga. Penei ka kaimoumou teia au mea nei i te taime e te ariu ke atu anga ia ratou i te aruaru anga i te au mea puapinga maata ra.
4. Eaa ta te au Kerititiano akatapuia ra e akatika ra ki ta Paulo?
Philipi 3:8) Kua rekareka a Paulo i te tuatua e kare ki te au mea e meangiti ua te puapinga kia rauka oki iaia i te tuatua e ae ki te Atua.
4 Ka rave puareinga uaia te akatapuanga ki te Atua, kare ma te reka kore, mei te mea rai e kua kapitiia maataia mai tetai atinga anga. Te akatika ra te au Kerititiano akatapuia i ta Paulo, tei karanga mai i muri ake i tona riro mai anga ei pipi na Karaiti e: “[No Iesu] i akaruke ei au i te au mea katoa ra, e kua riro ïa ei teita iaku, kia rauka iaku te Mesia.” (5. I roto i teea tu oroanga ta Paulo i piri autu ana, e akapeea e rauka ai kia pera rai tatou?
5 Kua taangaanga a Paulo i te akatere-uaorai i te oro anga i tana oroanga pae vaerua e kua rauka i te openga ra i te tuatua e: “I kukumi ana au i te kukumianga meitaki, kua oti toku oro anga, i mou marie na au i te akarongo: E teianei te vaioia nei te korona o te tuatua-tika noku, ta te Atu, ta te akava tuatua-tika ra, e oronga mai noku kia tae ki taua rā ra; e kare ra oki ko toku anake ra, ko to te aronga katoa ra i inangaro i taua mama anga mai nona ra.” (2 Timoteo 4:7, 8) Ka rauka ainei ia tatou i tetai ra i te rave i tetai tuatuaanga mei te reira rai? Ka rauka ia tatou na roto i te akarongo me te taangaanga ra tatou i te akatere-uaorai ia tatou e oro ra i ta tatou oroanga Kerititiano ma te kore e akamutu e tae ua atu ki te openga.
Akatere-Uaorai kia Rave i te Meitaki
6. Eaa ra te akatere-uaorai, e eaa te nga tu e rua ka tau kia taangaanga tatou i te reira?
6 Te au tuatua Epera e te Ereni tei uriia ra e “akatere-uaorai” i roto i te Pipiria te akataka tikai maira e tei runga i tetai tangata te mana me kore te akatere iaia uaorai. Te akakite putuputu maira te reira i te manako no te tamou marie anga i tetai uaorai i te rave anga i te kino. Inara te kiteaia ra te reira e te umuumu katoaia ra tetai mataara tau no te akatere-uaorai me ka taangaanga tatou i to tatou au kopapa i te rave anga i te au angaanga meitaki ra. Te manako matauia no te au tangata ara ra koia oki te rave anga i te tarevake, no reira e rua a tatou putoto anga. (Koheleta 7:29; 8:11) Na te akakoreanga i te rave i te kino ra, ka tau katoa tatou kia akakeu ia tatou uaorai kia rave i te meitaki. Te tika, te akatere anga i to tatou kopapa e rauka ai i te rave i te meitaki ko tetai ia au tu meitaki roa atu i te kopae ke anga i te rave anga i te kino.
7. (a) No teaa tatou ka tau ei kia pure, mei ia Davida rai? (e) Te manakonako anga i teaa te ka tauturu ia tatou kia taangaanga meitaki i te akatere-uaorai?
7 Te taka meitaki ra, e mea puapinga te akatere-uaorai me akatupu tatou i ta tatou akatapuanga ki te Atua. Te anoanoia ra tatou kia pure mei ia Davida rai: “E anga ana koe i te ngakau mā i roto iaku nei, e taku Atua, e akaou ana oki koe i te vaerua tika tikai i roto iaku nei.” (Salamo 51:10) Ka rauka ia tatou i te akamanako i te au akameitaki anga i te kopae ke anga i te au mea tei tarevake ra i te tu akono tau me kare te akaapikepike ra i te pae kopapa. E akamanako ana i te au mea kino no te kore i kopae keia taua au mea ra: te au manamanata tikai o te oraanga, te au pirianga taitaia, e te mate vave katoa anga. I tetai tua, e akamanako ana i te au mea puapinga e manganui i te mou anga ki te tu oraanga ta Iehova e akakite maira. Inara, kia papu tikai, auraka rava e ngaropoina ia tatou e e ngakau pikikaa to tatou. (Ieremia 17:9) Ka tau kia ngaueue kore tatou i te patoi anga i ta te reira au timata anga i te akameangiti mai anga i te pakari tikai no te mou anga i te au turanga o Iehova ra.
8. Eaa te tika anga tikai ta te tupuanga e apii maira kia tatou? E akatutu mai.
8 Ko te maata anga ia tatou kua kite e te tauta putuputu ra te kopapa kare e puareinga ana i te akaparuparu i te maroiroi o tetai vaerua puareinga ua. Ei akaraanga, no runga i te tutu aere anga i te Patireia. Te mareka ra a Iehova i te tu puareinga ua o te au tangata te o maira ki roto i teia angaanga oronga anga i te ora. (Salamo 110:3; Mataio 24:14) Ko te maata anga o tatou, te apii anga kia tutu aere i te ngai tangata kare i te mea ngoie ua. Kua umuumuia—e penei ua ake te umuumuia ra rai—e kia akatere tatou i to tatou kopapa, e “moto” i te reira e “kia vi,” kare e akatika i te reira kia akataka i te mataara ngoie no te patoianga ra.—1 Korinetia 9:16, 27; 1 Tesalonia 2:2.
“I te Au Mea Katoa Nei”?
9, 10. Eaa te kapitiia maira i te taangaanga anga i te “[“akatere-uaorai,” NW] i te au mea katoa nei”?
9 Te ako anga a te Pipiria kia taangaanga i te “[“akatere-uaorai,” NW] i te au mea katoa nei” te akakite maira e e maata atu te kapitiia maira i te akatere ua anga i to tatou riri e te kopae ke anga mei te tu akono tau kore ra. Penei te manako ra tatou e kua rauka ia tatou te akatere-uaorai i roto i teia au ngai nei, e me koia ia, e mea mareka tikai no tatou. Inara, akapeea ra tetai ua atu au ngai o te oraanga penei e kare e kiteaia te anoano anga no te akatere-uaorai? Kia akatutu, penei ua ake te noo nei tatou i tetai enua puapinga tikai ma te turanga teitei o te oraanga. Kare ainei ei mea pakari kia apiiia kia tuatua atu e kare ki te akapou anga anoano kore ra? E mea meitaki kia apii te au metua i ta ratou tamariki e auraka e oko mai i tetai ua atu apinga ta ratou e kite ra no te mea e te vai ua ra, e e manea, me kare te rauka ra ia ratou i te oko mai. E tika, me ka riro mai taua ikuikuanga ra ei mea tau, ka tau kia akanoo te au metua i te akaraanga meitaki.—Luka 10:38-42.
10 Te apiiia anga kia kore e inangaro atu i tetai atu au mea ra ka rauka i te akaketaketa i to tatou mana maroiroi. Ka rauka katoa i te reira i te akameitaki mai i te arikianga i te au mea materia tei rauka ia tatou e ka akariro ia tatou kia akaari i te tu tangi ki te aronga kare i rauka ana etai au mea nei, kare na te ikianga, mari ra no te anoano ra. E tika, te patoi ra te mataara tau i taua au tu tei matauia e “kia meitaki kia koe uaorai” me kare “ka tau ia koe te meitaki maata.” Te akamaroiroi ra te pitiniti akakitekite o te ao i te anoano no te akamerengoanga viviki, inara kua raveia te reira no tona uaorai puapinga okookoanga ra. Penei ka arai teia turanga nei i ta tatou au tautaanga i te akaari anga i te akatere-uaorai. Kua akakite mai tetai makatini no tetai enua Europa puapinga maata e: “Me te umuumuia ra tetai putoto anga i roto roa kia akatereia te au manakoanga reka kore o te aronga te noo ra i raro ake i te au turanga mamae no te putaua tikai, mei teaa ra te tika anga tikai o te reira ki te aronga te noo ra i roto i te enua te vai ua ra te u e te meri i roto i te taiate puapinga tikai o teia tuatau nei!”
11. Eaa ra ei mea puapinga kia apiiia e kia kore e inangaro atu i te au mea, inara eaa teia i riro mai e ei mea ngata?
11 Me kua ngata ia tatou i te akataka i ta tatou e inangaro ra e ta tatou e anoano tikai ra, penei e mea meitaki i te rave i te au takainga kia akapapuia e kare tatou e rave ra i te tu tau kore. Ei akaraanga, me te inangaro ra tatou kia akakore atu i tetai manako te aere atura ki te akapouanga kare e rauka i te akatereia, penei ka inangaro tatou kia iki tikai e auraka e oko ma te kaiou, me kare te okooko aere anga, kia apai ua tatou i te moni tei akanooia no te oko anga. E akamaara i te tuatua a Paulo e “kareka te akono i te Atua e te mareka ua ra,” e “ko te apinga maata ïa.” Kua tuatua aia e: “Kare ua oki a tatou apinga i apai mai ki teianei ao; e kua kitea tikaia e kare takiri e apinga e tika kia apai katoa kia aere ke tatou nei. E teianei, e kai ta tatou, e te kakau, kia mareka tatou i te reira.” (1 Timoteo 6:6-8) Te mareka ua ra ainei tatou? Te apii anga kia akono i tetai oraanga ngoie ua, tei matara mai i te au mea anoano koreia no te akanavenave-uaorai—i tetai ua atu tu—te anoanoia ra te mana maroiroi e te akatere-uaorai. Inara, e apiianga te tau ra kia apiiia.
12, 13. (a) Na roto i teea au mataara i kapitiia mai ei te au uipaanga Kerititiano ki te akatere-uaorai? (e) Eaa ua atu etai au ngai te anoanoia ra kia tatanu tatou i te akatere-uaorai?
Maseli 1:5) Penei te umuumuia ra te akatere-uaorai kia kore oki e tamanamanata atu i tetai ke na te koumuumu anga ki te tangata i te pae mai ia tatou e kare i oronga atu ana i to tatou manako katoa ki te vaa tuatua. Na te akatikatika anga i ta tatou akapapaanga kia tae vave mai tatou penei te umuumuia ra te akatere-uaorai. Pera katoa, penei te anoanoia ra te akatere-uaorai kia akanoo i te tuatau kia akapapa no te au uipaanga e i reira kia piri atu ki roto i te reira.
12 Te aere anga ki te au uipaanga Kerititiano, te au akaputuputuanga, e te au uruoaanga te kapiti katoa maira i tetai akakiteanga tikai no te akatere-uaorai. Ei akatauanga, te tau ua ra taua tu me te tuku ra tatou i to tatou manako kia aere ke i te tuatau o te porokaramu. (13 Te taangaanga anga i te akatere-uaorai i roto i te au mea rikiriki te akaketaketa ra i te ka rauka ia tatou i te rave i roto i te au mea maata ra. (Luka 16:10) No reira, mei teaa ra te meitaki kia ako atu ia tatou uaorai kia tatau putuputu i te Tuatua a te Atua e te au puka Pipiria, i te apii anga i te reira e te manakonako anga i ta tatou e kite ra! Mei teaa ra te pakari kia ako atu ia tatou uaorai no runga i te au angaanga kare e tau ana, te au pirianga oa, te au tu, e te au peu uaorai me kare kia ako ia tatou uaorai kia tuatua e kare ra ki te au angaanga te ka akangere i to tatou au tuatau puapinga no te angaanga a te Atua ra! Te vai angaanga maroiroi anga i roto i te angaanga a Iehova ko te paruruanga meitaki tikaiia i te au mea te ka ariu ke atu ia tatou mei te parataito pae vaerua o ta Iehova ra putuputuanga i te ao katoa nei.
Kia Riro Mai te Kite ra na Roto i te Akatere-Uaorai
14. (a) Akapeea te au tamariki i te apii anga i te taangaanga anga i te akatere-uaorai? (e) Eaa te au puapinga te ka rauka mai me apiiia taua au apii anga ra ki te au tamariki i te akamata anga o te oraanga?
14 Te pepe tei anau ouia ra kare i kiteaia te akatere-uaorai. Te akataka maira tetai aenga pepa na tetai aronga karape te apii ra i te tu o te tamariki e: “Kare te akatere-uaorai i tupu ua mai e kare i viviki mai ana. Te anoano ra te au pepe e te au tamariki rikiriki i te aratakianga e te turu anga a te metua kia akamata i te ravenga no te apii anga i te akatere-uaorai. . . . Ma te nga metua e arataki ra i te ravenga, ka maata mai te akatere-uaorai i te au mataiti i te apii.” Kua akaari mai tetai apii anga no te au tamariki e a mataiti ra e ko te aronga tei apiiia kia taangaanga i tetai mataara no te akatere-uaorai “tei matauia kua maata mai ei au mapu tei akatikatika meitakiia, mareka maataia, ravenga kimikimi, manako papu e tei irinakiia.” Te aronga kare i akamata ake i te apii i teia apiianga “ka riro mai ei maromaroa, ka apiapi ngoie ua e te marokiakia. Ka o atu ratou ki raro ake i te taitaia e ka kopae ke i te au akaaoanga.” Tei kitea, kia riro mai
ei tangata akatikatika meitakiia ra, ka tau kia apiiia te tamariki kia taangaanga i te akatere-uaorai.15. Eaa te ngere anga i te akatere-uaorai e akakite maira, ei tuke anga eaa ra te akakoroanga tei akanooia i roto i te Pipiria?
15 Pera katoa, me ka riro mai tatou ei au Kerititiano kite ra, ka tau kia apii tatou i te akakite i te akatere-uaorai. Te ngere anga i te reira te akakite ra e te vai nei rai tatou mei te tamariki i te pae vaerua. Te ako maira te Pipiria ia tatou kia “kite ra, ei tangata pakari ïa kotou.” (1 Korinetia 14:20) To tatou akakoroanga koia oki kia riro “ei tangata pakari, i te akarongo okotai, e te kite i te Tamaiti a te Atua ra, kia taea te aite ra i te ki o te Mesia i te maata.” No teaa ra? “Kia kore tatou e tauriuriia, e akapeke aereia e te matangi ra, i tera tuatua i tera tuatua, mei te tamariki ra, i te ravenga a te tangata nei, e te pakari i te ravenga tini o te pikikaa ra.” (Ephesia 4:13, 14) Te taka meitaki ra, te apii anga kia taangaanga i te akatere-uaorai e puapinga ia ki to tatou tu i te pae vaerua.
Tatanu Anga i te Akatere-Uaorai
16. Akapeea a Iehova i te oronga mai anga i te tauturu?
16 Kia tatanu i te akatere-uaorai, te anoano ra tatou i te tauturu tu-Atua, e te vai ua nei rai te reira. Ko te Tuatua a te Atua, mei te io apa kore rai, te akaari maira kia tatou e eaa te ngai ka inangaroia kia rave tatou i te au tauianga, e te oronga maira te reira i te ako anga e akapeea me raveia te reira. (Iakobo 1:22-25) Ko tetai akataeake anga aroa te puareinga ua nei i te oronga katoa mai anga i te tauturu. Te akaari maira te aronga pakari Kerititiano i te kite na te oronga mai anga i te tauturu. Na Iehova uaorai i oronga rangatira ua mai i tona vaerua tapu me pati atu tatou i te reira na roto i te pure. (Luka 11:13; Roma 8:26) No reira, kia rekareka tatou i te taangaanga i teia au mea tei orongaia mai. Penei na te au akakiteanga i roto i te pia i te kapi 21 e tauturu mai.
17. Eaa te akamaroiroianga ta Maseli 24:16 e oronga maira kia tatou?
17 Mei teaa ra te pumaana te kite anga e te manako akaperepere maira a Iehova i ta tatou au tauta anga me tauta tatou i te akamareka iaia ra! Na teia e akakeu ia tatou kia rave ua atu i te aruaru maata anga i te akatere-uaorai. Noatu e mei teaa te putuputu i to tatou turori anga, auraka rava tatou e tuku ua i ta tatou au tauta anga. “Kia taki itu ua atu te inga anga o te tangata tuatua-tika, e tu akaou mai aia.” (Maseli 24:16) I te tuatau taki tai ia tatou e autu ra, e tumu anga to tatou kia mareka ia tatou uaorai. Ka rauka katoa ia tatou te akapapu anga e te mareka maira a Iehova ia tatou. Kua tuatua mai tetai Kite e i mua ake ka akatapu ei i tona oraanga kia Iehova, i te au tuatau taki tai te autu ra iaia i te patoi anga i te kai avaava i etai epetoma ra, ka akameitaki aia iaia uaorai na te oko anga i tetai apinga tau ma te moni tana i akaputu ana no te akatere-uaorai.
18. (a) Eaa te kapitiia maira ki roto i ta tatou tamakianga no te akatere-uaorai? (e) Eaa te akapapu anga ta Iehova i oronga mai?
18 Tei runga atu, kia maara ia tatou e te kapiti atura te akatere-uaorai ki te manako e te manako ngakau. Te kite ra tatou i teia mei te au tuatua a Iesu e: “Ko tei akara ua atu i te vaine ei akatupu i te inangaro, kua akaturi takere ïa aia i taua vaine ra i tona uaorai ngakau.” (Mataio 5:28; Iakobo 1:14, 15) Koia oki tei apii kia akatere i tona manako e te au manako ngakau ka kite ngoie ua i te akatere i tona kopapa katoa. No reira kia akaketaketa akaou tatou i to tatou manako papu kare anake ua i te kopae ke anga i te tarevake mari ra te manako anga no runga i te reira. Me tupu mai te au manako tarevake, e kopae viviki atu i te reira. Ka rauka ia tatou i te rere ke atu mei te timataanga na te pure tamou anga tatou ia Iesu. (1 Timoteo 6:11; 2 Timoteo 2:22; Ebera 4:15, 16) Ia tatou e rave ra i te meitaki te ka rauka ia tatou, te aru ra tatou i te ako anga ia Salamo 55:22 e: “E tuku koe i taau apainga kia Iehova ra, e nana koe e tauturu mai; kare rava aia e vaoo ua atu i te tangata tuatua-tika kia akangaueueia ra.”
Maara Ainei ia Koe?
• I roto i teea nga tu e rua ka tau kia taangaanga tatou i te akatere-uaorai?
• Eaa te aiteanga e kia taangaanga i te “[“akatere-uaorai,” NW] i te au mea katoa nei”?
• Eaa te au tuatua tau no te tatanu anga i te akatere-uaorai taau i akara meitaki ana i te tuatau o ta tatou apii anga?
• Ka akamata mai te akatere-uaorai iea?
[Au Uianga Apii]
[Pia/Tutu i te kapi 21]
Akapeea te Akaketaketaanga i te Akatere-Uaorai
• E tatanu i te reira i roto i te au mea meangiti ra
• Manakonakoanga i te au akameitakianga i teia tuatau e i te tuatau ki mua
• E mono i ta te Atua e ture ra ki te au mea tana e akamaroiroi maira
• E kopae viviki i te au manako tau kore
• E akaki i toou manako ki te au manako akamaroiroi anga i te pae vaerua
• E ariki i te tauturu te ka orongaia mai e te au taeake Kerititiano pakari ra
• E kopae ke i te au turanga timataanga
• E pure no ta te Atua ra tauturu i roto i te au tuatau timataanga
[Au Tutu i te kapi 18, 19]
Te akakeu ra te akatere-uaorai kia rave tatou i te meitaki