Au Uianga a te Aronga Tatau
Au Uianga a te Aronga Tatau
Akapeea ra te au Kerititiano i te manako anga i te taangaangaanga i te au toka anau anga?
I roto i tetai au peu, kua kapitiia atu te au toka anau anga ki te marama i anauia ai tetai. Me ka aao tetai Kerititiano i tetai tapea ma tetai poe oko maata ra e tumu iki angaia nana uaorai. (Galatia 6:5) I te rave anga i taua ikianga ra, te vai ra te au tumu anga puapinga maata kia akamanakoia.
Kua akakite mai te Encyclopaedia Britannica e ko te toka anau anga e “poe te piri atura ki te ra i anauia ai tetai, te aao anga i te reira kua manako noa uaia ana e te oronga maira i te manuia meitaki me kare te ora.” Kua akakite katoa mai teia tataanga e: “Ko te au mana ririnui natura i na te aronga akara etu ei e kua roa akera i te kapitiia atu ki tetai atu au poe.”
I te tuatau taito tikai i irinaki ei te manganui e ka apai mai te toka anau anga i te manuia meitaki ki tei aao ra. Ka irinaki ua atu ainei te Kerititiano mou i teia? Kare, no te mea kua kite aia e te akaapa ra a Iehova i te aronga tei akaruke iaia e tei irinaki atu i “te atua o te Manuia Meitaki.”—Isaia 65:11, NW.
I te au Tuatau Rotopu, kua iki te aronga purepure i tetai poe no te marama tataki tai o te mataiti. Kua akamaroiroi atu ratou i te au tangata kia aao i te poe i te marama i anauia ai ratou, i te irinaki anga e ka paruruia mai tei aao ra mei te kino. Inara e mea tarevake ma te Tuatua Tapu no te au Kerititiano kia aru i te arataki anga a te aronga purepure kite no te au tupu anga, no te mea te akaapa ra te Pipiria ia ratou.—Deuteronomi 18:9-12.
Kare katoa e tau no te au Kerititiano kia kapiti atu i te akataka anga takake ki te tika anga e e toka anau anga to te tapea. Kare te Au Kite o Iehova e akono ana i te ra anauanga. No te mea te akara maata ra taua au akonoanga ki runga i te tangata e ko te nga ra anau anga anake ua tei tataia i roto i te Pipiria ra no te nga tutara kare i akamori ana i te Atua.—Genese 40:20; Mataio 14:6-10.
Kua manako etai au tangata e te aao anga i tetai tapea tei akanooia ma tetai toka anau anga e akakeu anga meitakiia ki runga i te tu tangata o tei aao ra. Inara, kare te au Kerititiano mou e irinaki i teia, no te mea kua kite ratou e ko te “akatangata ou” kua tukunaia ki raro ake i te akamana anga o te vaerua tapu o te Atua ra e na te taangaanga anga i te au kaveinga Tuatua Tapu ra.—Ephesia 4:22-24.
Ko tetai tumu anga maata tikai ko te akakoroanga. Te iki anga e me ka aao i tetai tapea ma tetai toka anau anga, penei ka ui tetai Kerititiano kiaia uaorai e, ‘Te inangaro ra ainei au i te aao i teia tapea nei no te mea e manea iaku te poe, noatu rai e kua kapiki katoaia e e toka anau anga? Me kare penei e kua akakeuia au e te au manako anga mataku tau kore ta tetai au tangata i oronga atu ki taua au poe ra?’
Ka tau kia makitoro marie tetai Kerititiano i tona ngakau e rauka ai i te akataka i tona akakoroanga. “I te au mea katoa taau ka tapapa ra, kia maata taau tapapa anga i to ngakau,” i karanga ai te au Tuatua Tapu e, “ko te tumu oki te reira o te ora.” (Maseli 4:23) I te rave anga i tana iki anga no runga i te au toka anau anga, e mea meitaki kia akamanako te Kerititiano tataki tai i tona akakoroanga e te au tupuanga no tana ka rave ki runga iaia uaorai e ki tetai ke.—Roma 14:13.