‘E Akono Meitaki i te Tuatua a te Atua’
‘E Akono Meitaki i te Tuatua a te Atua’
“E akamaroiroi kia vai meitaki rai koe ki mua i te aroaro o te Atua, ei rave angaanga kare e akama anga, e te [akono meitaki anga] i te tuatua-mou ra.”—2 TIMOTEO 2:15, akaaite ia NW.
1, 2. (a) Eaa ra te aronga angaanga ka anoano ei i te au apinga angaanga? (e) I roto i teea angaanga ka piri atu ei te au Kerititiano, e akapeea ratou i te akaari anga e te kimi ra ratou na mua i te Patireia?
TE INANGARO ra te aronga rave angaanga i te au apinga angaanga e tauturu ei ia ratou kia oti ta ratou au angaanga. Kare e rava ana e me kua rauka mai tetai ua atu apinga angaanga ra. Te anoano ra tetai tangata angaanga i te apinga angaanga tau, e e mea tau kia taangaanga aia i te reira na roto i te mataara tau. Ei akaraanga, me te akatu ra i tetai kapakapa are, te inangaro ra koe i te tamou kapipiti e rua nga rakau, kare e ko te amara e te au naero taau ka inangaro ua. Ka inangaro koe i te kite e akapeea i te patia anga i te naero ki roto i te rakau kia kore oki e amingiia te naero. I te tauta anga kia patiaia i tetai naero ki roto i te rakau ma te kore e kite e e akapeea i te taangaangaanga i tetai amara e mea ngata tikai ia, e te taitaia. Inara ko te au apinga angaanga tei akono meitakiia te tauturu ra ia tatou kia akaoti i te au angaanga ma te au tupu anga merengo anga.
2 Ei au Kerititiano, e angaanga ta tatou ka rave. E angaanga puapinga maata roa atu ia. Kua raurau a Iesu Karaiti i tana au pipi kia ‘na mua i te kimi i te basileia.’ (Mataio 6:33) Akapeea e rauka ai ia tatou i te rave i te reira? Okotai mataara koia oki na te rave maroiroi anga i te tutu anga i te Patireia e te akariro anga i te au tangata ei pipi. Te akatumu ngaueue kore anga i ta tatou angaanga orometua ki roto i te Tuatua a te Atua ko tetai mataara ia. Ko te tu meitaki ra te toru o te mataara. (Mataio 24:14; 28:19, 20; Angaanga 8:25; 1 Petero 2:12) Kia riro te tu tau e te mataora i roto i teia tukuanga angaanga Kerititiano nei, ka inangaro tatou i te au apinga angaanga tau e te kite tikai e akapeea i te akono meitaki anga i te reira. I roto i teia manako, kua akanoo te apotetoro ko Paulo i tetai akaraanga meitaki ei tangata angaanga Kerititiano, e kua akamaroiroi aia i te au taeake irinaki kia aru iaia. (1 Korinetia 11:1; 15:10) No reira, eaa i reira, ta tatou ka kite mei ko mai ia Paulo, to tatou taeake angaanga ra?
Paulo—Tetai Tangata Tutu Patireia Maroiroi
3. Eaa ka karangaia ai e e tangata angaanga maroiroi te apotetoro ko Paulo no te Patireia?
3 E tu tangata angaanga aa a Paulo? E tangata maroiroi tikai aia. Kua tuku maroiroi a Paulo iaia uaorai, i te akatotoa anga i te tuatua meitaki i te ngai atea takapini i te Metiterenia. Te oronga anga i tetai tumu no tana akakitekiteanga maroiroi no te 1 Korinetia 9:16) Te inangaro ra ainei a Paulo i te akaora ua i tona uaorai oraanga? Kare. Kare aia i te tangata karapii. Kareka ra, kua inangaro aia kia puapinga katoaia tetai ke mei te tuatua meitaki ra. Kua tata aia e: “No te evangelia i peraʼi au, kia rauka katoa iaku i ta te evangelia ra.”—1 Korinetia 9:23.
Patireia, kua karanga teia apotetoro roiroi kore e: “Tuatua ua rai au i te evangelia, kare oku e akatietie anga: kare oki au e tika kia kore: e ae oki toku kia kore au e tutu i te evangelia!” (4. Eaa te apinga angaanga ta te aronga angaanga Kerititiano e akaperepere maata ra?
4 E tangata angaanga akono tau te apotetoro ko Paulo tei kite e kare e rauka iaia i te irinaki anake ua ki runga i tona uaorai au kite karape. Mei tetai kamuta rai te inangaro ra i tetai amara, kua inangaro ra a Paulo i te apinga angaanga tau kia tuku i te tuatua mou a te Atua ki roto i te au ngakau o tona aronga akarongo ra. Eaa te apinga angaanga tana i taangaanga maata ana? Ko te Tuatua a te Atua, te au Tuatua Tapu. Mei te reira katoa, te katoa anga o te Pipiria te apinga angaanga maata ka taangaanga tatou ei tauturu ia tatou kia akariro i te au tangata ei pipi.
5. Kia riro ei au orometua meitaki, eaa ta tatou e anoano ra i te rave i te kapiti atu anga i te taiku anga i te au irava?
5 Kua kite a Paulo e te akono meitaki anga i te Tuatua a te Atua e maata atu te piri maira i te taiku anga mei roto mai i te reira. Kua taangaanga aia i te “akakeuanga.” (Angaanga 28:23, NW) Akapeea ra? Kua taangaanga meitaki tikai a Paulo i ta te Atua Tuatua i tataia kia akapapu ki te manganui kia ariki i te tuatua mou o te Patireia. Kua uriuri manako aia kia ratou. E toru marama i roto i tetai tunako i Ephesia, i to Paulo “oronga anga i te au tuatua e te taangaanga anga i te akakeuanga no runga i te patireia o te Atua ra.” Kua ‘akapaetaeta etai ia ratou uaorai e kare i irinaki mai ana,’ ko tetai ke kua akarongo mai. Tei tupu mai no ta Paulo angaanga orometua i Ephesia, “kua tupu ua atu e kua autu ua atu te tuatua a Iehova ra.”—Angaanga 19:8, 9, 20, NW.
6, 7. Akapeea a Paulo i te akakaka anga i tana angaanga orometua, e akapeea e rauka ai ia tatou i te rave i te reira?
6 Ei tangata tutu maroiroi i te Patireia, kua ‘akakaka [a Paulo] i tana angaanga orometua.’ (Roma 11:13, NW) Akapeea ra? Kare aia i inangaro ana i te akamaata atu iaia uaorai; kare katoa aia e akama ana kia kitea mai i te ngai tangata ra e koia tetai o te au oa rave angaanga no te Atua. Kareka ra, kua manakonako ra aia i tana angaanga orometua ei ravenga ngateitei maata roa atu. Kua akono a Paulo i te Tuatua a te Atua ma te kite karape e te meitaki. Kua oronga mai tana angaanga uua i te akakeu anga no tetai ke, i te tauturu anga kia akakeu ia ratou kia akaoti ki katoa anga i ta ratou angaanga orometua. Na roto katoa i teia mataara nei, kua akakakaia tana angaanga orometua.
7 Mei ia Paulo rai, ka rauka ia tatou i te akakaka i ta tatou angaanga ei au orometua na te rave putuputu anga e te taangaanga meitaki anga i te Tuatua a te Atua. I roto i te au mea pouroa o ta tatou angaanga orometua koro ra, to tatou akakoro anga kia oronga atu i tetai mea mei roto mai i te au Tuatua Tapu ki te au tangata e manganui te rauka ra. Akapeea e rauka ai ia tatou i te rave i teia ma te akakeuanga? E tamanako ana i te au mataara puapinga maata e toru: (1) E arataki atu i te manako ki te Tuatua a te Atua na roto i tetai mataara te akatupu ra i te akangateitei anga no te reira. (2) E akamarama tau tikai e te akono anga i ta te Pipiria e karanga ra. (3) E uriuri manako mei te au Tuatua Tapu na roto i tetai mataara akapapu anga.
8. Eaa te au apinga angaanga tutu anga Patireia tei rauka ia tatou i teia tuatau, e akapeea koe i te taangaanga anga i te reira?
8 E au apinga angaanga ta te aronga tutu Patireia o teia tuatau kare i rauka ana ia Paulo i te tuatau o tana angaanga orometua. Te kapiti maira teia i te au puka, te au makatini, te au poroutia, te au pepa akakite, te au aenga pepa, e te au rekoti tepe e te vitio. I te anere mataiti i topa akenei, kua taangaanga katoaia te au kati akakitekite, te au ponikarapu, te au motoka no te tuatua anga, e te au akakiteanga ratio. E tikai, ta tatou apinga angaanga meitaki roa atu koia oki te Pipiria, e te anoanoia ra tatou kia rave e kia taangaanga meitaki i teia apinga angaanga akakoreia.
Ta Tatou Angaanga Orometua ka Tau Kia Akatumuia ki Roto i te Tuatua a te Atua
9, 10. No runga i te taangaangaanga i te Tuatua a te Atua, eaa ta tatou ka kite mei ta Paulo ako anga ia Timoteo?
9 Akapeea e rauka ai ia tatou i te taangaanga anga 2 Timoteo 2:15) Eaa te piri atura ki te “[“akono meitaki anga,” NW] i te tuatua-mou ra”?
i te Tuatua a te Atua ei apinga angaanga meitaki ra? Na te akarongo anga ki teia au tuatua a Paulo tei orongaia atu ki tona oa angaanga ko Timoteo e: “E akamaroiroi kia vai meitaki rai koe ki mua i te aroaro o te Atua, ei rave angaanga kare e akama anga, e te [“akono meitaki anga,” NW] i te tuatua-mou ra.” (10 Te tuatua Ereni tei uriia ‘kia akono meitaki ra’ te aiteanga tikai kia “pakoti tikatika” me kare “kia pakoti i tetai ara i roto i tetai aerenga tika.” I roto ua i ta Paulo ako anga kia Timoteo i taangaangaia ai taua tuatua i roto i te au Tuatua Tapu Ereni Kerititiano. Ka rauka taua tuatua ra kia taangaangaia i te akataka anga mai i te arote anga tika i tetai ngai tanutanu. Ko tetai pa ipa ka riro mai ei taakama anga i te tangata kite i te tanutanu. Kia riro ei “rave angaanga kare e akama anga,” kua akamaaraia atu kia Timoteo e kare e akatikaia te anga ke atu mei te au apiianga mou no te Tuatua a te Atua. Auraka a Timoteo e akatika atu i tona uaorai au manako kia akakeu i tana apii anga. E akatumu tikai aia i tana tutu anga e te apii anga ki runga i te au Tuatua Tapu. (2 Timoteo 4:2-4) Na roto i teia mataara, ka aratakiia atu te aronga ngakau tika kia rave mai i to Iehova ra manako no runga i te au tumu, e auraka e ariki i te apii anga manako o teianei ao. (Kolosa 2:4, 8) Te tika ra te reira ki teia tuatau.
To Tatou Tu Meitaki e Mea Tau kia Meitaki
11, 12. Eaa te tupu anga no te tu meitaki ta tatou ka rave ki runga i te akono meitaki anga tatou i te Tuatua a te Atua ra?
11 E maata atu ta tatou ka rave i te akono tika anga tikai i te Tuatua a te Atua na te akakitekite anga i te au tuatua mou o te reira. E mea tau kia akatano i to tatou tu meitaki ki te reira. ‘E oa rave angaanga oki tatou no te Atua,’ no reira kare e tau kia riro tatou ei aronga angaanga pikikaa. (1 Korinetia 3:9) Te karanga ra te Tuatua a te Atua e: “Ko koe oki ko tei apii atu i tetai ke ra, kare koe e apii ia koe uaorai? ko koe oki tei ako ua e, auraka e keia, te keia na oki koe? Ko koe oki ko tei karanga e, auraka e akaturi, te akaturi na oki koe? ko koe oki ko tei akaviivii i te idolo ra, te keia na oki koe i ta te iero?” (Roma 2:21, 22) No reira, ei aronga angaanga no te Atua i teia tuatau, e tai mataara kia akono meitaki tatou i te Tuatua a te Atua koia oki na te akarongo anga ki teia akoanga: “E irinaki kia Iehova ma to ngakau katoa ra; auraka ra e irinaki ki toou uaorai kite. Auraka e akangaropoina iaia i toou katoa ra au aerenga; e nana e akakite kia koe i toou ra arataa.”—Maseli 3:5, 6.
12 Eaa te au tupuanga ka tapapa atu tatou i te akono meitaki anga i te Tuatua a te Atua ra? E akamanako ana i te mana ka rauka i te Tuatua tataia a te Atua ki runga i te au oraanga o te aronga ngakau tiratiratu.
Te Tuatua a te Atua e Mana Taui Anga
13. Eaa te ka tupu mai i roto i tetai tangata me taangaangaia te Tuatua a te Atua?
13 Me arikiia ei mana anga, te akamaroiroi ra te karere o te Tuatua a te Atua i tetai akakeu anga ririnui te tauturu anga i te au tangata kia rave i te au taui anga meitaki i roto i to ratou au oraanga. Kua kite takere ana a Paulo i te angaanga anga te tuatua a te Atua e kua kite i te tupu anga meitaki o te reira ki runga i te aronga tei riro mai ei au Kerititiano i Tesalonia taito. Kua akakite atura aia i reira kia ratou e: “E te akameitaki katoa nei matou i te Atua kare e tivata, i te mea, ka āriki mai ei kotou i te tuatua a te Atua ta kotou i kite ia matou nei, kare kotou i āriki ei tuatua na te tangata, ei tuatua ra na te Atua, e koia tika rai oki, ko tei angaanga maroiroi i roto ia kotou i tei akarongo ra.” (1 Tesalonia 2:13) No taua au Kerititiano—e tikai, no te au pipi mou katoatoa a Karaiti—kare te manako meangiti ua o te tangata e aite atu ki te pakari ngateitei o te Atua. (Isaia 55:9) Kua ‘āriki oki [to Tesalonia] i te tuatua ma te mate maata, ma te rekareka a te vaerua tapu’ e kua riro mai ei au akaraanga ki tetai tei irinaki mai.—1 Tesalonia 1:5-7.
14, 15. Mei teaa te ririnui te karere no te Tuatua a te Atua, e no teaa ra?
14 E ririnui te Tuatua a te Atua, ko tona Tumu ra, ko Iehova. Mei ko mai te reira “i te Atua ora,” ko tei tuatua mai e “i oti ei te au rangi,” e ko taua tuatua ra ‘e manuia [ua ana] oki te mea i akaue atu ra.’ (Ebera 3:12; Salamo 33:6; Isaia 55:11) Kua tuatua mai tetai tangata apii Pipiria e: “Kare te Atua i akatakake mai iaia uaorai mei tana Tuatua. Kare aia i akaruke i te reira mei te mea rai e e apinga tuke ia kiaia. . . . No reira kare rava te reira ei mea mate, kare e marokiakia mai ana e eaa tei raveia ki te reira; no te mea ko te tatua taokotai anga ia ma te Atua ora.”
15 Mei teaa te ririnui i te karere te aere maira mei roto mai i te Tuatua a te Atua? E mana ririnui to te reira. Ma te tau, kua tata a Paulo e: “E mea ora oki te tuatua a te Atua, e te ririnui, e kokoi maata oki to te reira i to te koke matarua ra, e te koputa mama takiri anga oki e taka ke ua atu te vaerua e te ngakau, e te paunga e te uo ivi ra; e te akara matariki oki i te manako e te vananga o te ngakau ra.”—Ebera 4:12.
16. Mei teaa tikai e rauka ai i te Tuatua a te Atua i te taui anga i tetai tangata ra?
16 Te karere i roto i te Tuatua tataia a te Atua e “kokoi maata oki to te reira i to te koke matarua ra.” No reira, e ririnui te mana ko o te reira e maata atu te reira i te apinga me kare i te apinga angaanga a tetai ua atu tangata. Te koputa ra te Tuatua a te Atua i te au tuanga o roto roa o tetai tangata e ka rauka i te taui iaia mei roto mai, i te akakeu anga e akapeea aia i te manako anga e eaa tana e inangaro ra, i te akariro anga iaia ei tangata angaanga arikiia e te tu akono i te Atua ra. E apinga mana ririnui ia!
17. E akamarama mai i te mana taui anga no ta te Atua ra Tuatua.
17 Te akaari maira te Tuatua a te Atua e eaa to roto tikai i te tangata mei tei akaaiteia ki tana e manako ra me kare tana e akatika ra kia kitea mai e tetai ke. (1 Samuela 16:7) Pera tetai tangata kino ka rauka i tetai taime i te uuna i to roto iaia uaorai ma tetai tapoki anga no te takinga meitaki me kare i te tu akonoanga. Ka tuku mai te aronga kino i te angaanga pikikaa no te au tumu kino ra. Ka akameamea ua te au tangata akaparau ma te tu akaaka akatutu ua ia ratou e anoano ra kia akarongoia atu te akameitaki anga a te tangata. Inara, na te akaari mai anga e eaa tikai to roto i te ngakau, ka rauka i te Tuatua a te Atua i te akakeu ma te mana ririnui i tetai tangata akaaka kia akaruke i te tangata taito e “kia akatangata ou oki ko tei angaia kia tau i te Atua ra, i te tuatua-tika e te tapu mou.” (Ephesia 4:22-24) Ka rauka katoa i te au apii anga no te Tuatua a te Atua i te taui i te ngakau akaaka ki roto i te Au Kite mataku kore o Iehova e ei aronga tutu maroiroi i te Patireia.—Ieremia 1:6-9.
18, 19. Akatumuia ki runga i teia au parakarapa me kare i te kiteanga no te tavini anga koro, e akaari mai e akapeea te tuatua mou no te Tuatua Tapu ra i te taui anga i te tu manako o tetai tangata.
18 E tupu anga meitaki te mana taui anga o te Tuatua a te Atua ki runga i te au tangata i te ngai katoatoa. Ei akaraanga, te aronga tutu Patireia i Phnom Penh, Kamupotia, kua tutu aere i roto i te oire o Kompong Cham e rua taime i te marama. I muri ake i te akarongo anga ki tetai ke o te orometua i te tuatua akakino anga i te Au Kite o Iehova, kua akapapa tetai orometua o te reira ngai kia araveiia atu te Au Kite me atoro akaou mai ratou i te oire. Kua uiui putuputu atu aia i te au uianga kia ratou no runga i te akono anga i te au orote e kua akarongo marie atu ia ratou e uriuri manako ra kiaia ra mei roto mai i te au Tuatua Tapu. E oti kua tuatua atura aia e: “Kua kite au i teianei e ko te au mea ta toku au taeake orometua e karanga ra no runga ia kotou kare e tika ana! Kua akaapa ratou e kare kotou e taangaanga ana i te Pipiria, inara i teia popongi ko ta kotou ia e taangaanga ra!”
19 Kua rave ua atu teia vaine i tana au uriurianga Pipiria ma te Au Kite e kare i akatika ana i te au akakoko anga no te ka akaateaia mai ki vao ei orometua ra kia tapu iaia. Kua akakite atu aia i tana au uriurianga Tuatua Tapu ki tetai oa, e oti kua akamata te reira vaine i te apii i te Pipiria ma te Au Kite. Kua maroiroi tikai te oa i tana e apii ra e i roto i tetai au akamori anga i te ekaretia tana e aere ra, kua akakeuia aia kia karanga e, “E aere mai, e apii i te Pipiria ma te Au Kite o Iehova!” Kare i roa ana i muri mai, te orometua o mua ana, e tetai ua atu kua akamata i te apii i te Pipiria ma te Au Kite o Iehova.
20. I akapeea te kiteanga o tetai vaine i Kaana i te akatutu mai anga i te mana o te Tuatua a te Atua?
20 Kua akatutu katoaia mai te mana o te Tuatua a te Atua i roto i te turanga o Paulina, e vaine i Kaana. Kua rave tetai tangata tutu Patireia tamou i tetai apii Pipiria kiaia i roto i te puka Te Kite te ka Arataki ki te Ora Mutu Kore. * Tei roto a Paulina i tetai akaipoipo porikami e kua kite atu i te anoano kia rave i te au taui anga, inara kua patoi pakari tana tane e tona kopu tangata katoatoa iaia. Kua tauta tona papa ruau, e akavanui teitei e e tetai tangata pakari o te ekaretia, kia taparuparu iaia na te rave anga i te akakite pikikaa anga ia Mataio 19:4-6. E reo mana anga to te akavanui, inara kua kite viviki a Paulina e kua aite teia ki ta Satani kairoiro anga i te au Tuatua Tapu i te timata anga aia ia Iesu Karaiti. (Mataio 4:5-7) Kua maara iaia te tuatua taka meitaki a Iesu no runga i te akaipoipo, i te tuatua anga e kua anga te Atua i te nga tangata ra te tane e te vaine, kare ei tane e ei au vaine, e ko raua ra, kare e tokotoru, kia riro mai ei kopapa okotai. Kua mou ua atu aia i tana ikianga e i te openga iora kua orongaia mai te kopae anga te matauia ra no te akaipoipoanga porikami. Kare i roa ana, kua riro mai aia ei vaine mataora tutu Patireia papetitoia.
E Tamou Ua Atu i te Akono Meitaki Anga i te Tuatua a te Atua
21, 22. (a) Eaa te tautaanga ta tatou e inangaro ra kia riro mai ei aronga tutu i te Patireia? (e) Eaa ta tatou ka akamanako atu i roto i te atikara te aru maira?
21 E apinga angaanga ririnui tikai te Tuatua tataia a te Atua ei taangaanga anga na tatou i te tauturu anga i tetai ke kia rave i te au tauianga i roto i to ratou au oraanga e rauka ai kia piri vaitata atu kia Iehova. (Iakobo 4:8) Mei te tangata angaanga e taangaanga ra i te au apinga angaanga kia rauka te au tupu anga meitaki, kia riro mai te reira ei tautaanga na tatou kia tauta pakari i te taangaanga i te Tuatua a te Atua, te Pipiria, ma te kite karape i roto i ta tatou angaanga orongaia mai e te Atua ei aronga tutu Patireia.
22 Akapeea e rauka ai ia tatou i te akono maata anga ma te meitaki i te au Tuatua Tapu i roto i ta tatou angaanga akariro anga i te tangata ei pipi ra? E tai mataara koia oki na te akanoo anga i to tatou au tu ei au puapii akapapu anga. E taki atu i toou manako ki te atikara te aru maira ine, no te mea te akakite maira te reira i te au mataara kia apii e kia tauturu i tetai ke kia ariki i te karere o te Patireia.
[Tataanga Rikiriki i Raro]
^ para. 20 Neneiia e te Au Kite o Iehova.
Maara Ainei ia Koe?
• Eaa te au apinga angaanga te rauka ra i te aronga tutu i te Patireia?
• Na roto i teea au mataara i riro mai ei a Paulo ei akaraanga e ei tangata angaanga no te Patireia?
• Eaa te piri maira i te akono meitaki anga i te Tuatua a te Atua?
• Mei teaa te ririnui te apinga angaanga te Tuatua tataia a Iehova ra?
[Au Uianga Apii]
[Au Tutu i te kapi 10]
Ko etai o te au apinga angaanga ta te au Kerititiano e taangaanga nei i roto i te angaanga akakitekiteanga i te Patireia