“E Akavaitata Atu ki te Atua, e Nana e Akavaitata Mai kia Kotou Na”

I Mua e i Muri Ake​—Akatupu te Au Kaveinga Pipiria i te Tukeanga

EI MAPU, e tu riririri e te vareae to Adrian. Kua akatupu tona tu viviki i te riri i te au tuatua akariri. Kua inu maata aia, kua kai avaava, e kua akono i tetai oraanga tau kore. Kua kiteaia a Adrian e ei punk e kua tatatau iaia i te akaari i tona irinaki i roto i te orureauanga. Te akataka anga mai i taua au mataiti ra, kua tuatua aia: “Kua tipu au i toku rouru na roto i te tu matauia no te punk, kua parai i te reira ki tetai tapou pakari, e i tetai taime kua akatou i te reira kia muramura me kore i tetai kara ke.” Kua koputa katoa a Adrian i tona putangiu.

Kua neke atu a Adrian ki roto i tetai are marikonga kore ma tetai au mapu akarongo kore. I reira kua inu maata ratou e kua kai i te au apinga akakona. “Kua kai au i te speed e kua patia i te reira i te Valium e tetai atu au apinga ka rauka iaku,” i maara ei a Adrian. “Me kare e rauka mai te au apinga akakona me kore te apinga tapou, kua akatae mai au i te penitini mei te au motoka o te tangata e kua konaia e te reira.” Te akono anga i tetai oraanga rave i te kino i runga i te mataara, kua matakuia a Adrian e kua kino tikai. Kare te maata anga o te tangata i inangaro i te kapiti atu kiaia. I tetai taime, kua akavaitata mai tona tu ingoa i te aronga kino.

Ma te marie, kua kite mai a Adrian e kua kapiti ua mai tona “au oa” kiaia no te ka rauka ia ratou. Pera katoa, kua taopenga aia e “kare te riririri e te ta ua i akatupu ana i tetai apinga.” Te manako puapinga kore anga e te taitaia, kua akaruke aia i tona au taeake. I te kitea anga e ia tetai kopi o Te Punanga Tiaki i tetai ngai akatuanga are, kua reka tikai aia i ta te reira tuatua akatumuia ki runga i te Pipiria, e kua arataki atu teia ki tetai apii Pipiria ma te Au Kite o Iehova. Kua ariki ua a Adrian i te patianga: “E akavaitata atu ki te Atua, e nana e akavaitata mai kia kotou na.” (Iakobo 4:8) Tei tupu mai, kua kite a Adrian i te umuumu anga kia akamata i te taangaanga i te au kaveinga e kitea ra i roto i te au Tuatua Tapu.

Kua akatupu te kite tau ua o te Pipiria i te tupuanga meitaki ki runga i to Adrian akava ngakau e kua akatanotano akaou i tona tu oraanga. Kua tauturuia aia kia autu ki rungao i tona tu riri vave ua e kia tatanu i te tu akatere-iaia uaorai. Ma te mana o te Tuatua a te Atua, kua tuke mai to Adrian tu tangata.​—Ebera 4:12.

Akapeea, i reira, i rauka ei i te Pipiria taua tu akakeu anga ra? Te tauturu maira te kite o te au Tuatua Tapu ia tatou kia “akatangata ou.” (Ephesia 4:24) Ae, kua tauiia to tatou tu tangata na te taangaanga anga i te kite tika tikai e kitea ra i roto i te Pipiria. Inara ka akapeea taua kite i te taui anga i te tangata?

Te mea mua, te akataka maira te Pipiria i te au tu tau kore te anoanoia ra kia akarukeia. (Maseli 6:16-19) Te rua, te raurau maira te au Tuatua Tapu ia tatou kia akaari i te au tu tau tei akatupuia e te vaerua tapu o te Atua. Te kapiti mai nei teia i “te inangaro ïa, te rekareka, te au, te akakoromaki, te takinga-meitaki, te meitaki, te pikikaa kore, Te maru, te akono meitaki: kare ua e ture e akakore i te reira.”​—Galatia 5:22, 23.

Kua tauturu te marama oonu anga i ta te Atua au umuumuanga ia Adrian kia akara meitaki iaia uaorai e kia kite i te au tu tangata tana e anoano ra kia  tatanu e te ka tau iaia kia kopae. (Iakobo 1:22-25) Inara ko te akamataanga ua te reira. I te pae mai i te kite, te anoanoia ra te akakoroanga​—tetai apinga te ka akakeu ia Adrian kia inangaro i te taui.

Kua apii mai a Adrian e kua akatanoia te tu akatangata ou kia “tau ki te tu o Tei anga maira i te reira.” (Kolosa 3:10, NW) Kua kite mai aia e kia aite to tetai tangata tu akatangata Kerititiano ki to te Atua uaorai tu. (Ephesia 5:1) Na roto i te apii Pipiria, kua apii mai a Adrian i ta Iehova au akono anga i te tangata ravarai e kua kite atu i to te Atua au tu meitaki, mei tona aroa, te takinga meitaki, te tu meitaki, te aroa, e te tuatua tika. Kua akakeu taua kite ra ia Adrian kia inangaro i te Atua e kia tauta i te akono meitaki i te au tangata e mareka ra a Iehova.​—Mataio 22:37.

Kare i roaia ana e ma te tauturu a te vaerua tapu o te Atua, kua rauka mai ia Adrian i te akatere i tona tu riri kino ta ua. Te rave maroiroi nei aia e tana vaine i te tauturu i tetai ke kia tama i to ratou au oraanga ma te tauturu a te kite o te Pipiria. “Kare mei toku au taeake i mua ana kua mate i teianei, te ora nei au e te rekareka nei i tetai oraanga ngutuare mataora,” i na Adrian ei. E akaraanga papu aia no te mana o te Pipiria i te taui i te au oraanga kia meitaki.

[Tataanga i te kapi 25]

“Kare te riririri e te ta ua i akatupu ana i tetai apinga”

[Pia i te kapi 25]

Au Kaveinga Pipiria e Angaanga Ra

Aru mai ko etai au kaveinga Pipiria tei tauturu i te manganui o te au tangata tu kino e te riririri kia riro mai ei aronga noo au ua:

“Kia noo au ua kotou i roto i te tangata katoa nei. E taku au akaperepere e, auraka e akaoko, tuku ua atura i te riri.” (Roma 12:18, 19) E tuku i te Atua kia akataka e aea e ki runga iaai ma ka raveia ei te tutaki. Ka rauka iaia i te rave i te reira ma te kite pu i te au manako, e ko tetai ua atu utunga no ko mai iaia ka akaata i tona tu tuatua tau apa kore.

“Kia riri kotou ra, auraka kia araia: auraka e topa te rā i to kotou riri anga: Auraka e tuku i ta te diabolo ngai kia o mai.” (Ephesia 4:26, 27) Penei kua tau ua tetai tangata i te riri i tetai atianga. Me tupu ra teia, auraka aia e noo ‘riri ua.’ No teaa ra? No te mea penei ka akakeu teia iaia kia rave i te mea kino, te tuku anga “i ta te diabolo ngai kia o mai,” i te akatupu anga i to te Atua ko Iehova tu mareka kore.

“Akapakia te makitakita, e akaruke i te riri otooto: auraka toou ra kinokino kia tae roa ki te rave i te mea kino.” (Salamo 37:8) Kua arataki te au manako tapu koreia ki te au angaanga akatere koreia. Me tuku ua atu tetai tangata ki te riri, papu e ka tuatua aia me kore ka rave i tetai apinga te ka tamamae i te katoatoa.