“Mei Teaa te Ririnui Tikai i Ta te Atua Tuatua!”

“E MEA ora oki te tuatua a te Atua, e te ririnui.” (Ebera 4:12) I te akapapu anga mai i te ririnui kare e rauka i te kopae o ta te Atua Tuatua, kua oronga mai te 2003 Calendar of Jehovah’s Witnesses e ono tua tikai o te oraanga mei te ao katoa. I raro ake i te tumu tuatua “Mua Ake e i Muri Mai,” kua akaari mai te karena e i akapeea te angaanga apiianga a te Au Kite o Iehova i te tauturu anga i te au tangata kia akameitaki mai i to ratou tu akono, kia akaruke i te au tu oraanga takinga kino, kia akamatutu i to ratou oraanga ngutuare, e te akatupu anga i tetai pirianga tikai ki te Atua.

Kua tae mai tetai au reta arikianga no runga i te karena 2003. Teia etai o te au tuatua:

“E akakiteanga teia karena no te au Kerititiano mou e te vaira tetai ke mei ia ratou rai tei autu atu i te tamaki anga ngata no te akarongo. Teianei ka rauka ia ratou i te akara i te au tutu ei au akamaaraanga o te au taui anga ta etai i rave.”​—Steven, Marike.

“Kua inangaro tikai au i te tata i teia manga tuatua e rauka ei i te akakite atu kia kotou i te maata o ta te karena 2003 akatukia anga i toku ngakau. Kare atu e karena ke tei akakeu iaku mei teia rai. Ka riro teia au tua oraanga e ko tetai o taku apinga ka apai aere ki roto i taku kete tutu aere e rauka ei i te akaari ki te tangata i te akapapuanga tika tikai e te umere o te mana o te Pipiria ki runga i te au tangata tataki tai.”​—Marc, Peretiumu.

“Kua akakeu puia tikai au e te karena. Kua ki toku ngakau i te tatau anga e te kite anga e i akapeea a Iehova i te taui anga i teia au tangata tataki tai. Tei tupu mai, kua akauruia au kia rave ua atu i te au taui anga i roto i toku oraanga. I teianei e maata atu i to mua ana, te kite nei au iaku e ko tetai o to tatou akataeakeanga takapini i te ao.”​—Mary, Marike.

“Kua akakeu oonuia a Iesu e te tumatetenga i te pae vaerua o te aronga maata. Kia akameitakiia kotou no te aru anga i to Karaiti akaraanga na te oronga anga mai i te au tua oraanga e kiteaia ra i roto i ta tatou karena 2003. Kare roa i mua ana i toku oraanga i akakeu ana tetai karena iaku kia tae te roimata.”​—Cassandra, Marike.

“I toku 11 mataiti, kua akamata au i te kai avaava; i muri mai kua kai i te au apinga akakona. E manako putuputu ana au no te akaope i toku oraanga. I te kite anga mai au ia Iehova, kua tauturuia au kia akaruke i taua au tu. E mea puapinga tikai teia karena kiaku. Te akaraanga o toku au taeake tungane e te au tuaine mei te ao katoa te akamaroiroi maira iaku. Teianei kua kite au e kare au e ko au ua i roto i teia putoto anga e ko te apinga maata koia oki ko te inangaro ia Iehova e te angaanga ngakau katoa kiaia.”​—Margaret, Porani.

“Aue, mei teaa te ririnui tikai i te Tuatua a te Atua! Te rauka anga iaku te karena 2003, kua tauta au auraka e aue. Ko teia au tupuanga, e pera katoa te au tutu, e mea akamaroiroi anga i te pae i te akarongo.”​—Darlene, Marike.

“Te tu oraanga i mua ana o etai o teia au tangata te aiteite vaitata ra ki toku tu oraanga i mua ana. Kua oronga mai a Iehova i te maroiroi kiaku kia akaruke i te au tu kino tei akaraanga e kare e rauka kia autu. Kia akameitaki maataia kotou no teia au tua oraanga tika tikai.”​—William, Marike.