Au Uianga a te Aronga Tatau

I roto i teea tu to Ezekiela riro anga ei “muteki,” (NW) me kare ei “murare,” i te taime i tuikaa ei a Ierusalema e te takore anga ia?

Te tumu maata, ko te aiteanga e kare aia i akamaata atu i tetai apinga ki ta Iehova karere totou i tana i akakite takere mai.

Kua akamata te peroveta ko Ezekiela i tana angaanga ei tangata tiaki akarongo no to Iseraela tei tuikaa i roto ia Babulonia i “te mataiti rima ïa o te tuikaa anga o te ariki ra ko Iehoaikina,” koia oki, i roto i te 613 M.T.N. (Ezekiela 1:2, 3) I roto i te ra tai ngauru o te marama ngauru o te 609 M.T.N., kua akakite ia kiaia na roto i te akauruanga tu-Atua no te akamata anga o te tuikaa no Ierusalema i raro ake ia Babulonia. (Ezekiela 24:1, 2) Eaa te ka tupu mai no te tuikaa anga? Ka ora mai ainei a Ierusalema e tona iti tangata akarongo kore? Ei tangata tiaki, kua akakite takere a Ezekiela i ta Iehova karere akapapu no te tumatetenga, e kare e anoano ia a Ezekiela kia oronga akaou atu i tetai apinga, e kia riro te karere ei akakite papuanga tikai. Kua muteki a Ezekiela no runga i tetai apinga ke atu no runga i te tuikaa o Ierusalema.​—Ezekiela 24:25-27.

Tetai ono marama i muri ake i te takore ia anga a Ierusalema i te 607 M.T.N., kua apai mai tetai tangata tei ora mai i te nuti i te tanea anga o te oire tapu o Ezekiela i roto ia Babulonia. Te aiai i mua ake ka tae mai ei tei ora maira, “e kua kiriti [a Iehova] i te vaa o [Ezekiela] . . . , e kare atura [aia] i [“muteki,” NW].” (Ezekiela 33:22, NW) Ko te openga rai ia o to Ezekiela murare anga.

Kua murare tikai ainei a Ezekiela i te reira taime? E mea papu e kare, no te mea i muri ake i tona “murare anga” tei tupu kiaia, kua tuatua atu aia i te au totou anga ki te au enua tikai i koropini mai tei mataora i te inga anga o Ierusalema. (Ezekiela, pene 25-32) I mua ake i roto i ta Ezekiela angaanga ei peroveta e te tangata tiaki, kua akakite atu a Iehova kiaia: “E naku e topiri i to arero i to tanga i runga ra, e ka riro koe ei murare, kia kore koe i ako atu ia ratou ra; e ngutuare meameaau oki ratou. Kua tuatua atu au kia koe ra, naku e kiriti i to vaa.” (Ezekiela 3:26, 27) Me kare a Iehova karere no Iseraela, kia noo muteki ua a Ezekiela no runga i taua iti tangata ra. Kia tuatua ra a Ezekiela i ta Iehova e anoano ra iaia kia tuatua i te taime i anoano ei a Iehova iaia kia rave i te reira. To Ezekiela murare te akaari maira te reira e kare aia i muteki no runga i te tuatua atu i tetai au tuatua totou pakari ki ta Iseraela e manako ra.

To teia tuatau pupu tiaki, ko te au Kerititiano akatainuia, te akamatakite ra i te akapouanga no Kerititome, tei akatutuia kia Ierusalema. Me akamata ana te “mate maata” ka akapouia a “Babulonia Maata,” te patireia akonoanga pikikaa i te ao, te au pupu Ezekiela akatainuia kare e anoanoia kia tuatua akaou no runga i te takore angaia o Kerititome, tei o mai te tuanga maata o taua patireia ra.​—Mataio 24:21; Apokalupo 17:1, 2, 5.

Ae, ka tae mai te ra e kore ei te toenga o te pupu akatainuia e to ratou au taeake e murare ei, e kare a ratou au manako e oronga atu ki to Kerititome. Ei reira te “nga tara e tai ngauru” e “te puaka taae” e akapou ei ia Babulonia Maata. (Apokalupo 17:16) Inara, kare te aiteanga e ka muteki ua atu rai te au Kerititiano. Mei ta ratou e rave nei, ka akapaapaa ua atu rai ratou ia Iehova e ka tuatua ua atu rai iaia i te au ra katoatoa “e pini rava ake te au uki katoa ra.”​—Salamo 45:17; 145:2.