“E Akatika i te Au Angaanga Memeitaki Ravarai”

“E AKAKITE atu ia ratou e e kauraro marie i te ui ariki e te aronga mana, e akarongo i te aronga akava ra, e akatika i te au angaanga memeitaki ravarai.” (Tito 3:1) Eaa te angaanga memeitaki ta te apotetoro ko Paulo i manako i tona tataanga i taua au tuatua ki tona au taeake irinaki? Kua taiku te tangata apiiia i te Pipiria ko E. F. Scott e okotai rai angaanga memeitaki, te tuatua anga e: “Kare e kia akarongo anake te au Kerititiano i te aronga mana, mari ra ka tau ratou kia akatika i tetai ua atu angaanga memeitaki ra. . . . Me ka anoanoia mai i etai atianga, ka tau ra e ko te au Kerititiano etai i roto i te aronga mua i te akaarianga i te vaerua tauturu i te au tangata. Ka tupu ua atura te ka anga ai, te maki mate, te au tumatetenga tuke tuke, e inangaro ei te au tangata enua meitaki ravarai i te tauturu atu i to ratou tangata tupu.”

Te piri atura te au Kerititiano ki roto i etai au angaanga te manakoia ra e te au tangata me kare oki te au angaanga e maro atu i te au ture a te Atua. (Angaanga 5:29) Ei akaraanga, i te aru anga i te aratakianga a te tipatimani tamate ai o taua ngai, e rave ua ana te opati manga o te Au Kite o Iehova i Tiapani, i roto i te oire i Ebina, i te au mataiti i tetai terenianga no te tamate anga ai. I taua au atianga, kua akaputuputu mai te au mema o te pamiri Betela kia akarongo ki te au ikuikuanga tei orongaia e tetai tangata no te tipatimani tamate ai o taua ngai ra.

Kapiti atura, e tere atu i te ngauru mataiti, kua taokotai atu te opati manga ma te au aronga mana o taua ngai ki tetai akaariarianga tei turu ia ei akamaata i te kite no te kopaeanga i te ai. I te akaariarianga, kua akaari mai te au kamupani o te oire i to ratou karape no te tamate anga ai e te tu o te akaaereanga ai. Kua oronga putuputuia te akameitakianga ki te manga no te au tu karape e te taokotaianga o tona aronga angaanga. I te 2001, kua orongaia atu kia ratou te re mua i roto i te akaariarianga. Kua papa ua ratou no te angaanga memeitaki te ka riro ei akaoraanga penei ua ake e ai tetai.

E Angaanga Puapinga

Inara, ko te Au Kite o Iehova, te inangaro ra i tetai atu tu angaanga memeitaki tei puapinga maata atu, tei riro katoa ei akaoraanga. E atoro putuputu ana ratou i to ratou au tangata tupu kia tua atu i te au tuatua meitaki no te Patireia o te Atua. (Mataio 24:14) Ka akamaroiroi te Au Kite i te au tangata kia kite e kia taangaanga i te au kaveinga Pipiria i roto i to ratou oraanga ei akameitaki mai i to ratou tu oraanga i teianei e kia rauka te manakonakoanga no te oraanga mutu kore i roto i te ao tei reira e autu ei te au tikai e te tinamou.

Penei kare tetai e ariki i te puapinga o te angaanga tei orongaia atu e te Au Kite o Iehova, te manako anga ia ratou e ei manata anga. Inara, e manako tuke to te Akavanui ko Jean Crepeau o te Akavaanga Teitei o Quebec i Kanata. Kua patoi te Au Kite o Iehova o reira i tetai ture o te oire o Blainville, i Quebec, e te umuumuia ra tetai tikaanga no ta ratou au atoroanga mei tera are ki tera are. I roto i te ikianga o te akavaanga, kua akakite te Akavanui ko Crepeau e: “Ko te au atoroanga a te Au Kite o Iehova e angaanga Kerititiano no te au tangata e . . . ko te au puka tei orongaia mai e te Au Kite ki te aronga tei inangaro maira e au puka puapinga  tikai, te akono ra i te au tumu manako mei te akonoanga, te Pipiria, te au apinga akakona, te kai kava, te apiianga i te au mapu, te au manata o te akaipoipoanga e te akatakakeanga.” Kua akakiteia atu te tikaanga e: “Ka rauka ua i te akavaanga kia taopenga e kia akaaiteia atu te Au Kite o Iehova ki te aronga okooko ra e akakino anga te reira, e tau kore, ei mamaeanga, e te pikikaa.”

Te oronga ra te Au Kite o Iehova ki te turanga o te au tangata i te ngai e noo ra ratou na te tauturu anga i te tangata kia autu i te au manamanata i roto i to ratou oraanga i te au ra e te apai mai anga kia ratou i te manakonakoanga no te tuatau ki mua. Te akapapa ra te Pipiria ia ratou kia akatupu i taua angaanga ra. “Te au tuatua tapu katoa i tataia ra, e mea akauruia mai e te Atua, e e mea meitaki ei apiianga, ei akoanga, ei akakiteanga apa, e ei akakite mai i te tuatua-tika ra. Kia apa kore te tangata o te Atua, ma te tau tikai i te au angaanga memeitaki katoa ra.”​—2 Timoteo 3:16, 17.

Ka inangaro ainei koe kia kite e akapeea te Au Kite o Iehova “e akatika i te au angaanga memeitaki ravarai”? Te pati atu nei matou ia kotou kia ariki i ta ratou tauturu kia kite maata atu i te Pipiria ei reira e puapingaia ai koe uaorai no teia angaanga puapinga maata no te au tangata ta ratou e rave ra i roto i toou ngai e noo ra e takapini te ao katoa.

[Au Tutu i te kapi 30, 31]

Te tauta ra te Au Kite o Iehova kia angaanga kapiti atu ma te au mana akaaere

[Tutu i te kapi 31]

Te kiteaia ra te Au Kite no te tauturu anga i to ratou au tangata tupu