Eaa ra Ratou i Aere ei ki te Pure

“KUA vaitata rai i teianei e e maata atu i te a taime te au Perepitero e manganui i te Repapuriki o Korea i to Marike ra.” Penei ua ake kua tapoitirere taua tuatua i roto i te makatini Newsweek i te aronga tatau e manganui, no te mea te manako ra te maata anga o te au tangata ia Korea e e taiate Confucius me kare e akonoanga Buddha. I teia tuatau, ka kitea e tetai tangata matakitaki te au are pure “Kerititiano” meitaki e manganui i reira, te maata anga o te taime te akaariia maira e te au koroti mori muramura. I te au Tapati, e mea matauia i te kite atu i te au tangata e aere tataki rua e tataki toru ki te pure, ma te au Pipiria i roto i te rima. Kia tau ki tetai tareanga i te 1998, vaitata rai e e 30 patene o te au tangata Korea te aere ra ki te pure Katorika me kare ki te Porotetani, e maata atu i to te aronga tei karanga e e aronga akonoanga Buddha.

I teianei tuatau, kare i te mea matau i te kite atu i taua patene teitei o te au tangata i tetai ua atu ngai e aere putuputu ra ki te pure. Noatu rai, kare te reira e tupu anake ua i Korea mari ra i roto katoa i tetai au enua ke i Asia, pera katoa i Aperika e i Marike Ratini. Eaa ra te manganui i akatutu irinaki ua atu ei i te Atua i te mea e te akatotoaia ra i te enua nei te manako kore e te tuke anga ki te akonoanga? Eaa ra ratou i aere ei ki te pure?

Kua akaari mai te tareanga Gallup e e maata atu mei te apa o te aronga te aere ra ki te pure i Korea te kimi ra i te manako no te au; mei te tai toru te manakonako ra i tetai oraanga mutu kore i muri ake i te matenga; e 1 i roto i te 10 te akara atura ki te oraanga meitaki, te au apinganui, e te puapinga anga.

E manganui te au tangata i Tinito te akaputu ra ki te au are pure i te manakonakoanga e ka kitea mai tetai mea ei akaki i te ngere anga pae vaerua tei tupu mai ei au manakonako anga kapitara tei akaatea marie atu i te au manako Komuniti. I te au mataiti ravarai, e mirioni ua atu te au kopi o te Pipiria kua neneiia e kua tuaia i Tinito, i te akaraanga kua tatau te au tangata i te reira mei ta ratou rai i rave ana ki ta Mao puka muramura meangiti ra.

Ko etai au Katorika i Paratiri, te aronga no te uki mapu tikai, kare e mareka ana i te taputou anga no te tu mataora i roto i te oraanga te aere maira​—te inangaro ra ratou i te akatupuanga i teianei. Te karanga ra te  makatini nuti Tudo e: “Me na te apii akamatara anga i akakeu i te ngakau e te manako i te 1970, na te apii anga no te puapinga anga te reira i teia tuatau.” Kua ui tetai tareanga i Peritane ki te aronga te aere ra ki te pure i te reira ngai e kia akakite mai e tai ua apinga ta ratou e reka ra no runga i ta ratou pure. Ko tei akakite mua ia mai ko te taokotai anga.

Te akaari pouroa maira teia e i te mea e te irinaki ra rai te manganui o te au tangata i te Atua, te manako maata ra te maata anga no runga i te ka rauka mai ia ratou i teianei i te ka aere mai​—me kare no runga i te Atua uaorai ra. Eaa toou manako te tumu tikai no te irinaki anga i te Atua? Eaa ta te Pipiria e karanga ra no runga i te tumu? Ka kite koe i te pau anga i roto i te atikara e aru mai nei.