“Kia Mataora Oki Koe ia Iehova”

“Kia mataora oki koe ia Iehova; e nana e oronga mai i ta to ngakau e anoano ra.”​—SALAMO 37:4.

1, 2. Koai te Tumu no te mataora mou, e akapeea te Ariki ko Davida i te akakite mai anga i teia tika anga?

“E MATAORA to te aronga tei manako i to ratou anoano i te pae vaerua, . . . e mataora te aronga aroa, . . . e mataora te aronga ponuiaau.” Tei kapitiia mai ki tetai au akatakaanga toko ono o te aronga tei mataora, te akatupu ra teia au tuatua i te akamata anga umere ki ta Iesu Tuatua rongonui i te Maunga, tei tataia e te tangata tata Evangeria ko Mataio. (Mataio 5:3-11, NW) Te oronga maira ta Iesu au tuatua i te akapapu anga e ka rauka ia tatou te mataora.

² Kua akakite mai tetai imene anga tapu tei tataia e te Ariki ko Davida o Iseraela taito e ko te Tumu no te mataora mou, ko Iehova. “Kia mataora oki koe ia Iehova,” i na Davida ai, “e nana e oronga mai i ta to ngakau e anoano ra.” (Salamo 37:4) Inara eaa te ka akariro i te kite anga ia Iehova e te kite anga i te au tu e manganui o tona tu ei “mataora oki”? Ka akapeea ra te akamanako anga i tana i rave ana e ka rave i te akatupu anga i tana ra akakoroanga e oronga mai ei kia koe te manakonakoanga kia rauka mai “ta to ngakau e anoano ra?” Na te akara meitaki anga ia Salamo 37, irava 1 ki te 11, e oronga mai ei i te au pauanga.

“Auraka e Vareae”

3, 4. Mei tei tataia ia Salamo 37:1, eaa te ako anga ta Davida i oronga mai, e no teaa ra i tau ei kia akarongo atu ki te reira i teia tuatau?

³ Te noo nei tatou i roto i te “kino maata,” e te maata ua atura te ravenga kino. Kua kite ke ana tatou e kua tika te au tuatua a te apotetoro ko Paulo e: “Ko te au tangata kikino e te aronga pikikaa ra, e tupu rai to ratou kino, e e maata atu, i te pikikaa ua anga atu, e te pikikaa angaia mai.” (2 Timoteo 3:1, 13) Mei teaa ra te ngoie o te reira e kua akakeuia e te autu akara anga ua e te tu puapinga o te au tangata kino ra! Pouroa te reira ka tamanata ia tatou, i te akatupu anga kia aveave ta tatou akara anga pae vaerua. E akara ana e akapeea te au tuatua akamata anga a Salamo 37 i te akamatakite mai anga ia tatou ki teia kino tikai: “Auraka koe e kinokino i te aronga tuatua kino; auraka e vareae i tei rave i te ara ra.”

⁴ I te au ra ravarai e tuku ua mai ana te akakitekite anga o teianei ao kia tatou i tetai papaanga no te au tu tau kore. Kare te au tangata pitiniti tiratiratu kore e opuia ana no te akavare pikikaa. Kua taangaanga te aronga rave kino i tei paruparu ra. Kare e kiteaia te aronga ta me kore kare e akautungaia. Pouroa taua au akaraanga no te taruri ke anga i te tuatua tau ka akamata i te riri e te tamanamanata i to tatou manako no te au. Te autu akara anga ua o te aronga tuatua kino ra penei ka akamata i te au manako no te vareae. Inara ka akatikatika ainei to tatou tu riri i te turanga? Te vareae no te au puapinga akara anga ua ta te aronga kino e rekareka ra ka taui ainei i te tupu  anga no ratou? Kare rava! E kare e anoano tikai ia tatou kia “kinokino.” No teaa ra?

5. Eaa te aronga tuatua kino i akaaiteia ai ki te ngangaere?

⁵ Te pau maira te tata taramo e: “Kare oki e roa kua motu mei te ngangaere ra, e mae atura m[e]i te rakau rikiriki ruperupe ra.” (Salamo 37:2) Penei e akaraanga manea te rakau rikiriki ruperupe, inara ka viviki ua te rau i te mae e te mate. Pera katoa ki te aronga tuatua kino. Kare to ratou tu puapinga akara anga ua e tinamou. Me mate ratou, kare e rauka i ta ratou au apinga i te tauturu akaou atu ia ratou. Ka orongaia mai i te openga ra te tuatua tau ki te katoatoa. “E utunga te mate no te ara,” ta Paulo ia i tata. (Roma 6:23) Te aronga tuatua kino e te katoatoa tei tuatua tika kore ra ka orongaia mai i te openga ra ta ratou “utunga” e ka kore atu. E mataara puapinga kore tikai teia no te ora!​—Salamo 37:35, 36; 49:16, 17.

6. Eaa te apiianga ka rauka ia tatou i te rave mai mei ia Salamo 37:1, 2?

⁶ Ka akatika ainei tatou, i reira, i te tu puapinga e tuatau poto ua a te aronga tuatua kino ra kia tamanata ia tatou? Ko teia te apiianga mei te nga irava akamata anga e rua o Salamo 37 e: Auraka e tuku i to ratou autu anga kia akariro i te anga ke atu ia koe mei te mataara i ikiia e koe i te tavini anga ia Iehova. Kareka ra, kia mou i taau akara anga ki runga i te au akameitaki anga e te au akakoroanga.​—Maseli 23:17.

“E Irinaki kia Iehova, ka Rave ei i te Meitaki”

7. Eaa ka tau ei e kia irinaki tatou ia Iehova?

⁷ “E irinaki kia Iehova, ka rave ei i te meitaki,” i raurau mai ei te tata taramo kia tatou. (Salamo 37:3a) Me ka rokoia tatou e te au apiapi me kare te au ekokoanga, te anoanoia ra kia tuku ngaueue koreia to tatou irinaki anga ki roto ia Iehova. Koia Tei oronga ki katoa mai i te tinamou i te pae vaerua. “Ko tei noo i raro ake i te tapoki o Tei Teitei ra,” i tata mai ei a Mose, “ka moe aia i raro ake i te Mana katoatoa ra.” (Salamo 91:1) Me ka tamanamanataia no te maata o te ravenga kino i roto i teia akatere anga o te au mea nei, te anoano maataia ra tatou kia irinaki atu ki runga ia Iehova. Me ngaoi tatou i tetai paupauanga vaevae, ka reka tatou i te rima o tetai oa ei turu anga. Pera katoa rai, me tauta tatou i te aaere ma te tiratiratu, te anoanoia ra e tatou to Iehova turu anga.​—Isaia 50:10.

8. Akapeea te pirianga i roto i te angaanga orometua Kerititiano i te tauturu anga ia tatou kia kopae ke kia kore e tamanamanata maataia mai e te tu puapinga a te aronga kino ra?

⁸ Okotai pauanga e kore ei e tamanamanataia mai e te tu puapinga o te kino koia oki te kimi putuputu anga e te tauturu anga i te aronga tu mamoe kia kite tika tikai i to Iehova ra akakoroanga. Noatu e e maata te ravenga kino, te inangaroia ra tatou kia maata tikai i te angaanga i te tauturu anga i tetai ke. “Te takinga-meitaki e te oronga, eiaa rava ïa e akatopaia,” i na te apotetoro ko Paulo ei, e “te pereperekavana ra oki te Atua i te reira atinga.” Te “meitaki” maata roa atu ka rauka ia tatou i te rave koia oki te tua anga i te tuatua meitaki kaka no te Patireia o te Atua ki tetai ke. Ta tatou tutu anga i te ngai tangata e ‘atinga akameitaki’ tika tikai.​—Ebera 13:15, 16; Galatia 6:10.

9. E akamarama mai i ta Davida akamaroiroianga e e “noo koe i te enua i reira.”

⁹ “E noo koe i te enua i reira,” te na ko maira a Davida, “[“e te akono anga ma te akarongo ra,” NW].” (Salamo 37:3e) Ko “te enua” i to Davida tuatau ra ko te ngai ta Iehova i oronga atu kia Iseraela, ko te Enua Taputouia ra. I te tuatau o to Solomona tutara anga kua itae atu tona au kotinga mei ia Dana i te tua i tokerau kia Bere-seba i te tua i tonga. E kainga teia no Iseraela. (1 Ariki 4:25) I teia tuatau, noatu teiea tatou e noo ra i te enua nei, te akara nei tatou ki mua i te tuatau me  riro mai te paraneta katoa ei parataito i roto i te ao ou no te tuatua tika ra. I teianei, te noo nei tatou i roto i te tinamou i te pae vaerua.​—Isaia 65:13, 14.

10. Eaa te tupu anga me ‘akono [tatou] ma te akarongo’ ra?

¹⁰ Eaa ra te tupu anga me ‘akono [tatou] ma te akarongo’? Te akamaara maira te materi akauruia kia tatou e: “Ko te tangata pikikaa kore ra, te maata ra tona meitaki.” (Maseli 28:20) To tatou akakoromaki anga ma te akarongo i roto i te tutu anga i te tuatua meitaki noatu teiea te ngai e noo ra tatou e ki tetai te rauka ra ia tatou te oronga papu tikai maira i te au tutaki anga no ko mai ia Iehova. Ei akaraanga, kua rave a Frank raua ko tana vaine, ko Rose, i te tukuanga angaanga painia e 40 mataiti i topa i roto i tetai taoni i te tua tokerau ia Tekotia. Te tokoiti ua tei akaari mai ana i te inangaro ki te tuatua mou i reira kua aere ke atu. Kare i akaparuparuia, kua akamata teia nga tokorua painia i te angaanga no te tutu anga e te akariro anga i te au tangata ei pipi. I teianei te vaira i reira tetai putuputuanga tupu ruperupe i roto i taua taoni. Kua rauka tika tikai i teia nga tokorua akarongo ra i ta Iehova akameitaki anga. “Te akameitaki anga maata roa atu,” i akamarama akaaka mai ei a Frank, “koia oki te vai nei rai maua i roto i te tuatua mou e e puapinga ua nei kia Iehova.” Ae, me ‘akono [tatou] ma te akarongo,’ ka rauka e ka ariki tatou i te au akameitaki anga e manganui.

“Kia Mataora Oki Koe ia Iehova”

11, 12. (a) Akapeea e rauka ai “kia mataora oki [tatou] ia Iehova”? (e) Eaa te akakoroanga ka rauka ia koe i te akanoo no runga i te apii naau uaorai, e eaa te tupu anga te ka rauka mai?

¹¹ Kia akaketaketa i to tatou pirianga kia Iehova e kia tamou ua atu i to tatou irinaki anga ki roto iaia, e mea tau “kia mataora oki [tatou] ia Iehova.” (Salamo 37:4a) Akapeea tatou i te rave anga i te reira? Kia kore e varenga maata ua ki to tatou uaorai turanga, noatu e te ngata ra te reira, ka akariro tatou e ko Iehova ta tatou e manako ra. Okotai mataara ka rave ei i teia koia oki te rave anga i te tuatau kia tatau i tana Tuatua. (Salamo 1:1, 2) Te oronga maira ainei taau tatau anga Pipiria i te mataora kia koe? Ka rauka te reira me tatau koe ma te akakoroanga kia maata atu i te kite no runga ia Iehova. Eaa ka kore ei e tapu i muri ake i te tatau anga i tetai turanga e e ui kia koe uaorai e, ‘Eaa ta teia irava e apii maira kiaku no runga ia Iehova?’ Penei ka kitea e koe te reira ei tauturu anga kia rave mai i tetai puka tata me kore i etai pepa i te pae ua mai me tatau koe i te Pipiria. I te au taime taki tai ia koe e tapupu ra i te akamanako anga no runga i te aite anga o taau e tatau ra, e tata i tetai takiota tuatua te akamaara maira kia koe i tetai o to te Atua ra au tu akaperepere. I roto i tetai taramo, kua imene a Davida e: “Kia tikaia mai te tuatua a toku vaa, e te manako o toku ngakau, i mua i to aroaro, e Iehova, e toku mato, e toku akaora.” (Salamo 19:14) Ko teia manako anga no te tamou anga i te Tuatua a te Atua no to tatou tuanga ra e “marekaanga” ia kia Iehova​—e e rekareka anga kia tatou.

¹² Akapeea e rauka mai ei ia tatou te mataora mei ta tatou apiianga e te manakonakoanga? Ka rauka ia tatou i te akariro i te reira ei akakoroanga na tatou kia maata atu te kite ka rauka ia tatou no runga ia Iehova e tona au aerenga. E maata ta taua au puka mei Te Tangata Maata Rava Atu Tei Ora Ana e te Akavaitata Atu kia Iehova * ka oronga mai kia tatou te ka rauka ia tatou i te akamanako ma te marekaanga. Aru mai, te akapapu maira a Davida ki te aronga tuatua tika, e ka “oronga mai [a Iehova] i ta to ngakau e anoano ra.” (Salamo 37:4e) Ko teia te tu no te akapapu anga tei akakeu i te apotetoro ko Ioane kia tata i te au tuatua e: “Teia taua taitaia kore no tatou i rauka iaia ra, kia pati ua atu tatou i te au mea ravarai i tau iaia ra, te akarongo maira aia ia tatou: E te kite nei tatou e te akarongo maira aia ia tatou i te au mea ta tatou i  pati atu, kua kite tatou e e rauka ia tatou i ta tatou i pati atu iaia ra.”​—1 Ioane 5:14, 15.

13. I te au mataiti i topa, eaa te akamaata anga no te angaanga tutu anga Patireia tei kitea i roto i te au enua e manganui?

¹³ Ei aronga akono tiratiratu, to tatou rekareka maata rava atu koia oki kia kite i te akatikaanga o to Iehova ngateitei. (Maseli 27:11) Kare ainei to tatou ngakau e ki maringiringi ana ma te rekareka i to tatou kite anga i te angaanga tutu anga maata ra e raveia ra e to tatou au taeake i te au enua tei raro ake i te tutaraanga mana akatere poritiki me kare te mana akatere maroanga a te tangata ra? Te akara rekareka nei tatou ki te tuatau ki mua i te kite anga i tetai akarangatira anga te ka tupu mai i mua ake ka ope ei teia akatereanga. E manganui te au tavini o Iehova te noo ra i te au enua opunga te piri maroiroi ra ki roto i te tutu anga ki te aronga apiipii, te aronga oro-kimiora, e tetai ua atu tei noo poto ua mai i te opunga e te rekareka ra i te akamorianga rangatira. To tatou ia anoano ngakau tae e me oki atu teia aronga tataki tai ki to ratou enua, e rave ua atu ratou i te tuku i te marama o te tuatua mou kia iti ua atu i roto i te poiri akara anga marama kore ra.​—Mataio 5:14-16.

“E Uri Atu i to Aerenga ki Runga ia Iehova”

14. Eaa te akapapuanga te vaira e ka rauka ia tatou i te irinaki ki runga ia Iehova?

¹⁴ Mei teaa ra te pumaana i te kite e ko to tatou au manamanata ta tatou e manako ra e au apainga taitaia ka rauka i te apai keia! Ka akapeea ra? “E uri atu i to aerenga ki runga ia Iehova; e irinaki iaia,” i na Davida ai, i te tuatua anga, “e nana e akatupu i te reira.” (Salamo 37:5) I roto i to tatou au putuputuanga, e maata ta tatou akapapu anga e ko Iehova te turu anga tau. (Salamo 55:22) Ko te aronga i roto i te angaanga orometua tamou, noatu ei au painia, e au akaaere tutaka, e au mitinari, me kare e aronga tauturu i te angaanga anga i Betela, ka rauka katoatoa i te akakite mai i to Iehova manako anga irinaki tau. Eaa ka kore ei e tuatua atu ki te aronga taau i kite e e ui atu e i akapeea a Iehova i te tauturu anga ia ratou? Kare e ekokoanga e ka akarongo atu koe i te au kiteanga e manganui i te akaari mai anga e noatu te au tuatau ngata, kare rava e kore ana te rima tauturu o Iehova. E oronga ua mai ana aia i te au anoano no te oraanga.​—Salamo 37:25; Mataio 6:25-34.

15. I akapeea te tuatua tika o te au tangata o te Atua i te iti mai anga?

¹⁵ Me akariro tatou ia Iehova to tatou akapapu anga e te irinaki tikai anga iaia ra, ka kite tatou i tetai atu au tuatua a te tata taramo e: “Nana e apai mai i to tuatua-tika mei te mārama, e taau tuatua-tau mei te avatea.” (Salamo 37:6) Ei Au Kite o Iehova, te kite putuputu ra tatou ia tatou uaorai i te tuatua pikikaa angaia. Inara te akatuera ra a Iehova  i te au mata o te aronga ngakau tika i te tauturu ia ratou kia kite e ko ta tatou angaanga orometua i te ngai tangata ra te akakeuia ra e te aroa no Iehova e no te tangata tupu. I taua taime rai, to tatou tu tika, noatu e kua tuatua pikikaaia e te manganui, kare e rauka i te uunaia. Na Iehova e tauturu ia tatou i roto i te au tu katoatoa o te patoianga e te takinokinoanga. Tei tupu mai, te tuatua tika a te au tangata o te Atua te iti maira mei te ra i te avatea.​—1 Petero 2:12.

“E Akatupua ua . . . Tiaki Marie Atu”

16, 17. E rotai ei kia Salamo 37:7, eaa ainei teia tuatau, e no teaa ra?

¹⁶ Te au tuatua a te tata taramo e aru maira e: “E akatupua ua ia Iehova, ma te tiaki marie atu iaia; aua koe e kinokino i te tangata i manuiaʼi tona aerenga, i te tangata i akatupu i te akakoroanga kino ra.” (Salamo 37:7) I konei te akakite maira a Davida i te anoano no tatou kia tiaki marie atu no Iehova ra kia rave angaanga. Noatu e kare i tae mai ake te openga o teia akatereanga nei, kare teia i te tumu no te kopekope. Kare ainei tatou i kite ana e e maata ua atu to Iehova aroa e te akakoromaki i ta tatou i manako ana i mua ana? Ka rauka ainei ia tatou i teianei i te akaari e te tiaki marie katoa ra tatou ia tatou e angaanga maata ra i te tutu aere anga i te tuatua meitaki i mua ake ka tae mai ei te openga? (Mareko 13:10) Ko teia te tuatau i teianei i te kopae atu i te au angaanga viviki ua te ka keia mai mei ia tatou ra to tatou rekareka e te tinamou i te pae vaerua. Ko teia te tuatau kia patoi maata atu ma te pakari i te akamana anga kino i to Satani ao. E ko teia te tuatau kia akono tamou ma te ma e kia kore rava e akakinoia to tatou turanga tuatua tika ra kia Iehova. Kia rave ua atu tatou i te akaatea ke atu i te au manako tau kore e kia kopae ke atu i te au angaanga tau kore ki te aronga me e tane me kare me e vaine.​—Kolosa 3:5.

¹⁷ “Akapakia te makitakita, e akaruke i te riri otooto,” ta Davida ako angaia kia tatou. “Auraka toou ra kinokino kia tae roa ki te rave i te mea kino. Ka riro oki te aronga i rave i te kino ra i te tipu keia; ko te aronga ra i tapapa ia Iehova ra, ko ratou te ka noo i te enua.” (Salamo 37:8, 9) Ae, ka rauka ia tatou i te akara papu tikai ki mua ki te tuatau​—te vaitata maira i teianei​—me takore atu a Iehova mei te enua nei i te kino katoatoa e te aronga tei apa no te reira.

“E Roa Poto Ake”

18, 19. Eaa te akamaroiroi anga i rauka mai ia koe mei ia Salamo 37:10?

¹⁸ “E roa poto ake, e kare ua te tangata kino ra, koia tika rai, ka akara koe i tona ngai, e kare ua!” (Salamo 37:10) Mei teaa ra te akamaroiroi anga o taua au tuatua ra kia tatou ia tatou e aere vaitata atura ki te openga o teia akatereanga e te tupuanga no te akatakake anga kino mei Iehova ra! Noatu e eaa te tu o te kavamani me kare te mana taoonga tei akanooia e te tangata ra kua topa kinoia ki raro. E i teianei te vaitata atura tatou ki te tuatau no te oki akaou atu ki te tutara anga a te Atua, te tutara teokaratiki mou, to Iehova ra Patireia i roto i nga rima o Iesu Karaiti. Na te reira e akatere ki katoa i te au mea o te ao e te akaatea anga i te aronga katoatoa te patoi ra i te Patireia o te Atua.​—Daniela 2:44.

¹⁹ I roto i te ao ou i raro ake i te Patireia o te Atua, penei ka kimi koe, kare e rauka ia koe i te kite i tetai “tangata kino ra.” E tikai, ko tetai ua atu te ka meameaau ia Iehova ka akaatea vivikiia atu. Kare tetai tangata tei tamaki atu i tona tu ngateitei me kore tei patoi i te kauraro atu ki te mana taoonga tu akono i te Atua ra e vai ki reira. Pouroa toou au tangata tupu ra ka aiteite rai te manako i to ratou inangaro anga kia akamareka atu ia Iehova. Mei teaa ra te tinamou ta te reira ka apai mai​—kare te au roka, kare te au arai anga, kare tetai apinga e akakino i te irinaki anga katoa e te mataora!​—Isaia 65:20; Mika 4:4; 2 Petero 3:13.

20, 21. (a) Koai ma te “maru” o Salamo 37:11, e ka kitea e ratou te “maata o te au ra” i ea? (e) Eaa te au akameitaki anga te ka rauka ia tatou me aru tatou ia Davida Maata ra?

²⁰ I reira, “te aronga maru ra, ka noo ïa i te enua.” (Salamo 37:11a) Inara koai ma teia “aronga maru ra”? Te tuatua i uriia no te “maru” no roto  mai ia i te tumu no te tuatua ko te aite anga e e “takinga kino, akaaka, taakama.” Ae, “te aronga maru ra” ko te aronga tei tiaki akaaka ia Iehova kia akatika i te au tuatua tau kore katoatoa ra tei tukunaia atu ki runga ia ratou. “E ka rekareka ratou i te maata o te au ra.” (Salamo 37:11e) I teia tuatau nei rai te kite ra tatou i te maata o te au i roto i te parataito pae vaerua kua kapitiia atu ki te putuputuanga Kerititiano mou.

²¹ Noatu e kare i akaoraia ake mei te au takinga kino, te turu ra tatou i tetai e tetai e te akapumaana anga i te aronga tei taitaia. Tei tupu mai, kua akamaataia te marekaanga mou i roto roa i to Iehova ra au tangata. Te au taeake tei ikiia ei tiaki te manako aroa maira i to tatou au anoano pae vaerua​—e i tetai atu au taime ra to te kopapa ra​—i te tauturu anga ia tatou kia akakoromaki i te takinga kino no te tuatua tika ra. (1 Tesalonia 2:7, 11; 1 Petero 5:2, 3) Mei teaa ra te puapinga maata tikai i teia au! Tei ia tatou katoa te manakonako anga no te ora mutu kore i roto i te Parataito ponuiaau te vaitata maira. No reira, kia aru tatou ia Davida Maata, ia Iesu Karaiti, e no tona maroiroi ra kua akakeuia aia kia tavini tiratiratu ia Iehova e tae ua atu ki te openga. (1 Petero 2:21) Na te rave anga i teia, ka mataora ua atu tatou, i te akapaapaa anga i ta tatou i mataora ana oki, to tatou Atua, ko Iehova.

[Tataanga Rikiriki i Raro]

Ka Rauka Ainei ia Koe te Pau?

• Eaa te au apiianga taau i kite mei ia Salamo 37:1, 2?

• Akapeea e rauka ai “kia mataora oki koe ia Iehova”?

• Eaa te akapapuanga te vaira e ka rauka ia tatou i te irinaki ki runga ia Iehova?

[Au Uianga Apii]

[Tutu i te kapi 9]

Ko te au Kerititiano “auraka e vareae i tei rave ra i te ara”

[Tutu i te kapi 10]

“E irinaki kia Iehova, ka rave ei i te meitaki”

[Tutu i te kapi 11]

E kia mataora oki ia Iehova e apii maata ua atu koe no runga iaia

[Tutu i te kapi 12]

“Te aronga maru ra, ka noo ïa i te enua”