“Kia mareka Oki Kotou”

“Te au o [“Karaiti,” NW], ei mana ïa i roto i to kotou ngakau . . . e kia mareka oki kotou.”​—KOLOSA 3:15.

1. Eaa te tuke anga ta tatou e kite ra i rotopu i te putuputuanga Kerititiano e te ao i raro ake i ta Satani akatereanga?

I ROTO i te 94,600 putuputuanga o te Au Kite o Iehova takapini i te ao, te kite nei tatou i te vaerua mareka anga. Ka akamata e ka taopenga te uipaanga tataki tai ma tetai pure te kapiti maira i te au tuatua no te au akameitaki anga kia Iehova. E akarongo putuputu ana tatou i te tuatua “meitaki maata,” “kare e manata,” me kare ra te au tuatua mei te reira rai te tu e tuatuaia ra e te mapu e te ruaine pera katoa te au Kite ou e tei roa te tavini anga i to ratou piri mai anga ki roto i te akamori anga e te taokotai anga mataora. (Salamo 133:1) Mei teaa ra te tuke i teia ki te tu karapii te autu ra i rotopu i te manganui ‘kare i kite ia Iehova e tei kore i akarongo i te evangelia’! (2 Tesalonia 1:8) Te noo nei tatou i roto i te ao mareka anga kore. No reira rai e me tamanako ana tatou e koai oki te atua o teia ao​—ko Satani te Tiaporo ra, te tiamupeni maata roa atu no te manako iaia uaorai, te koropini ra tona tu akaparau e te vaerua meameaau i te taiate o te tangata nei!​—Ioane 8:44; 2 Korinetia 4:4; 1 Ioane 5:19.

2. Eaa te akamatakite anga te anoanoia ra tatou kia akarongo, e eaa te au uianga ka akamanako tatou?

² Te koropiniia nei tatou e to Satani ao, te anoanoia ra tatou kia matakite e kia kore e akakinoia e tona au tu. I te anere mataiti mua, kua akamaara te apotetoro ko Paulo i te au Kerititiano Ephesia e: “Ko to kotou ïa aerenga i muatangana ra ta to teianei ao ra, ta te ariki mana o te reva ua nei, te vaerua e angaanga ririnui nei i roto i te aronga akarongo kore; Ko tatou katoa oki te kapiti katoa anga i roto ia ratou i muatangana i te anoano o te kopapa nei, i te akatupu anga i ta te kopapa e ta te ngakau i inangaro ra; e mei te tangata ravarai nei oki, i anau mai ei tamariki ririia.” (Ephesia 2:2, 3) E tika katoa te reira no te manganui i teia tuatau. Akapeea, i reira, e rauka ai ia tatou i te tamou i tetai vaerua mareka anga? Eaa te tauturu ta Iehova e oronga maira? Na roto i teea au mataara  tau e rauka ai ia tatou i te akaari e te mareka tikai ra tatou?

Te Au Tumu no te Mareka Anga

3. No teaa ra ka mareka atu ei oki tatou ia Iehova?

³ Te kaiou ra tatou i to tatou mareka anga, kia Iehova te Atua, ko Tei Anga ia tatou e Tei Oronga i te Ora, ia tatou e manako tikai ra i etai o te au mea memeitaki maata tana i tuku mai ki runga ia tatou. (Iakobo 1:17) I te au ra ravarai, ka akameitaki tatou ia Iehova no te mea te ora nei tatou. (Salamo 36:9) Takapini ia tatou, te kite nei tatou i te akapapu anga maata no ta Iehova angaanga, mei te ra, te marama, e te au etu. To tatou paraneta e are vairanga maata no te au minera ora, te reva meitaki tei kairo tau ia no te au kati puapinga, e te au aerenga ngata natura te akakite katoatoa maira i te kaiou ta tatou e kaiou ra ki to tatou Metua aroa i te rangi. “E manganui, e taku Atua, e Iehova, te au angaanga taka ke i raveia e koe ra, e toou ra manako ia matou nei: kare e tika kia tatau ua atu ki mua ia koe na; e akakite au, e tuatua oki au i te reira; kare ra e tika kia tatau atu i te maata.”​—Salamo 40:5.

4. Eaa ra ka akameitaki ei tatou ia Iehova no te taokotaianga mataora ta tatou e rekareka ra i roto i to tatou au putuputuanga ra?

⁴ Noatu e kare e noo ra i roto i tetai parataito tika tikai, te rekareka nei te au tavini o Iehova i teia tuatau i te noo i roto i tetai parataito pae vaerua. I roto i to tatou au Are Uipaanga Patireia e ta tatou au uruoaanga e te au akaputuputuanga, te kite nei tatou i te ua o te vaerua o te Atua i te angaanga anga i roto i to tatou au taeake irinaki. E tikai, me tutu aere atu ki te au tangata taki tai ua me kore kare a ratou akonoanga, e taiku ana etai au Kite ki ta Paulo i akataka mai i roto i tana reta ki to Galatia. Te akakite ra ratou na mua ki te “au angaanga a te kopapa” e ka ui atu ki te aronga te akarongo maira kia ratou e eaa ta ratou e kite ra. (Galatia 5:19-23) Ka akatika viviki mai te maata anga e te akataka maira teia i te taiate o te tangata i teia tuatau. Me akaariia atu te akatakaanga no te ua o te vaerua o te Atua e te patiia anga ki te Are Uipaanga o te reira ngai kia kite ratou uaorai i te akapapu anga no teia nei, e manganui te ka akakite viviki mai e: “Tei rotopu tikai te Atua ia kotou.” (1 Korinetia 14:25) E kare e kotinga uaia teia ki te Are Uipaanga Patireia o te reira ngai. I te au ngai ka aere koe, me aravei koe i tetai ua atu o te ono mirioni o te Au Kite o Iehova, ka kite koe i taua vaerua mataora e te rekareka. E tika tikai, ko teia taokotaianga akamaroiroi anga e tumu anga no te oronga anga i te akameitaki anga kia Iehova, tei oronga mai i tona vaerua kia rauka oki te reira.​—Zephania 3:9; Ephesia 3:20, 21.

5, 6. Akapeea tatou i te akaari anga i te mareka anga no te mea memeitaki maata roa atu a te Atua ra, te oko ra?

 ⁵ Te mea memeitaki maata roa atu, te apinga tiama maata atu ta Iehova i oronga mai, koia oki ko tana Tamaiti, ko Iesu, nona oki i orongaia mai ei te atinga oko. “I pera te Atua i te aroa anga mai ia tatou nei,” i tata mai ei te apotetoro ko Ioane, “kia aroa katoa tatou ia tatou uaorai e tikaʼi.” (1 Ioane 4:11) Ae, ka akaari tatou e te mareka ra tatou uaorai no te oko kare i te akakite anake ua i te aroa e te mareka anga kia Iehova mari ra na te akono katoa anga i to tatou au oraanga na roto i tetai mataara te akakite ra i te aroa no tetai ke.​—Mataio 22:37-39.

⁶ Ka rauka ia tatou kia maata atu i te kite no te akaari anga i te mareka anga na te akamanako anga i te mataara i te akono anga a Iehova i to Iseraela i taito ra. Na roto i te Ture, tana i oronga atu ki te iti tangata na roto ia Mose, kua apii atura a Iehova i te au tangata i te au apiianga e manganui. Na roto i “te tu o te kite, e te tuatua-mou i roto i te ture ra,” ka maata ta tatou ka kite i te tauturu anga ia tatou kia aru i te ako anga a Paulo e: “Kia mareka oki kotou.”​—Roma 2:20; Kolosa 3:15.

Te Au Apiianga e Toru mei te Ture a Mose

7. Akapeea te akanoonooanga no te tuanga ngauru i te oronga anga i te tuatau ki te au Iseraela kia akaari i to ratou marekaanga kia Iehova?

⁷ I roto i te Ture a Mose, kua oronga a Iehova e toru mataara ka rauka i te au Iseraela i te akaari i to ratou arikianga tikai no tona tu meitaki. Te mea mua, te tuanga ngauru. Te ngauru o te kai o te enua ra, kapiti mai ma tetai “tuanga ngauru no te puakatoro, e no te mamoe ra,” kua riro ia ei ‘tapu na Iehova.’ (Levitiku 27:30-32) Me akarongo te au Iseraela, kua akameitaki maata atu a Iehova ia ratou. “Ka apai mai na kotou i te ngauruanga o te au apinga ravarai ki roto i te are vairanga, kia mangaia taku are nei, ei timata anga te reira iaku nei i tenana, te tuatua mairā Iehova Sabaota ra; i te kore anga au i te kiriti anga i te au māramārama o te rangi ra, ka riringi atu ei i te apinga maata ua atu, kare e ngai e o ei, ei meitaki no kotou.”​—Malaki 3:10.

8. Eaa te akataka ra i te au atinga akaputuanga mei te tuanga ngauru ra?

⁸ Te rua, kapiti katoa ki te umuumuanga tuanga ngauru ra, kua akapapa a Iehova i to Iseraela kia rave i te au akaputuanga oronga ua. Kua akaue atura aia ia Mose kia akakite ki to Iseraela e: “Kia tae kotou ki runga i te enua taku e arataki ia kotou nei, Kia kai ra kotou i te kai o taua enua ra, ei reira kotou e apai ei i te atinga apaiia ki runga na Iehova.” Ko etai o te popo mua o ta ratou ‘areto e te faraoa oi muatangana ra’ kia orongaia ei ‘atinga apaiia na Iehova’ na roto ua atu i to ratou au uki ra. Kia akara ra e kare e umuumuia tikai te numero no teia au popo mua. (Numero 15:18-21) Inara te oake anga te au Iseraela i tetai atinga akameitaki anga ra, kua akapapuia mai kia ratou tetai akameitaki no ko mai ia Iehova. Te kiteaia ra tetai akanoonooanga mei te reira rai i te kapiti anga atu ki te iero i roto i te orama a Ezekiela. Ka tatau tatou e: “E ko mua o te au popo kai katoatoa ra, e te au atinga ravarai a te tangata katoa, na te  kau taunga ïa: e na kotou e oronga atu i ta kotou faraoa muatangana i oiia ra na te taunga, kia akairi mai aia i te ora ki runga i toou ra are.”​—Ezekiela 44:30.

9. Eaa ta Iehova i apii na roto i te akanoonooanga no te koi anga?

⁹ Te toru, kua akapapa a Iehova i te angaanga no te koi anga. “Kia kokoti kotou i te mou o to kotou enua na,” i akaue ei te Atua, “auraka kotou e kokoti akapou takiri rava i te poo o ta kotou koro, e auraka oki kotou e koi i te toenga kai akaū na kotou na. Auraka oki koe e koi i te toenga i to kainga vine ra, auraka oki koe e koi i te vine i topa i to kainga vine ra; ka vaoo koe i te reira na te putaua, e na te uarere: ko au to kotou Atua ra ko Iehova.” (Levitiku 19:9, 10) Tei tupu akaou, kare e umuumu tikai ia te numero. Tei runga i te Iseraela taki tai i te iki e eaa te ka vaooia mai na te aronga e anoano ra. Kua akataka meitaki mai te Ariki pakari ko Solomona e: “Ko tei akakite i te aroa ki te tangata rikiriki ra te oronga apinga ra aia na Iehova, e ko tana akono anga Nana e tutaki iaia.” (Maseli 19:17, NW) No reira kua apii a Iehova i te tangi aroa e te manakoanga no te aronga tei puapinga kore ra.

10. Eaa te au tupuanga no te au tangata o Iseraela i te akaari kore anga ratou i to ratou uaorai mareka anga?

¹⁰ Kua akameitaki a Iehova i te au Iseraela me apai mai ratou ma te akarongo ra i te tuanga ngauru, i te au akaputuanga oronga ua, e te akanoonooanga i te apinga na te putaua. Inara me kare oki e rauka i te au tangata o Iseraela i te akaari i te mareka anga ia ratou uaorai, kua ngere ia ratou to Iehova mareka anga. Te taki atura teia ki te tumatetenga e i te openga iora te tuikaa anga. (2 Paraleipomeno 36:17-21) Eaa, i reira, te apiianga no tatou?

Ta Tatou Au Tuatua no te Marekaanga

11. Eaa te mataara maata ka rauka ia tatou i te akaari i to tatou marekaanga kia Iehova?

¹¹ Te mataara maata roa atu ka rauka ia tatou i te oronga i te akapaapaa kia Iehova e te akakite anga i to tatou marekaanga te piri katoa maira rai tetai “oronga anga.” E tika tikai, ei au Kerititiano ra, kare tatou i raro ake i te Ture a Mose, i te umuumuia anga kia oronga i te au atinga manu me kare te au kai. (Kolosa 2:14) Noatu rai, kua raurau mai te apotetoro ko Paulo i te au Kerititiano Epera e: ‘E apai tatou i te atinga ra, i te akameitaki i te Atua, eiaa e tivata, koia oki ta te vaa nei, i te akapaatu anga i tona ingoa.’ (Ebera 13:15) Na te taangaanga anga i to tatou tu e te au apinga kia oronga i tetai atinga no te akapaapaa anga ia Iehova, me i roto i te angaanga orometua i te ngai tangata me kare i roto “i te au uipa anga ra” o te au taeake Kerititiano, ka rauka ia tatou i te akakite i te akameitaki anga ngakau tae ki to tatou Metua aroa i te rangi ra, ki te Atua ra ko Iehova. (Salamo 26:12) Na te rave anga i te reira, eaa ta tatou ka kite mai mei te au mataara ta te au Iseraela i akakite i to ratou marekaanga kia Iehova ra?

12. No ta tatou apainga Kerititiano e manakoia ra, eaa ta tatou ka apiiia mai mei te akanoonooanga tuanga ngauru ra?

¹² Te mea mua, mei ta tatou i kite ana, kare te akanoonooanga tuanga ngauru ei mea ikiia; na te Iseraela taki tai teianei apainga. Ei au Kerititiano, tei runga ia tatou te apainga kia piri atu ki roto i te angaanga orometua e te aere anga ki te au uipaanga Kerititiano. Kare teia au angaanga nei ei mea iki uaia. I roto i tana totou maata rava no runga i te openga o te tuatau, kua akakite tika mai a Iesu e: “E tutu aereia te evangelia o te basileia nei, e kako rava ake te ao katoa nei; ei kite no te pa enua ravarai; ko te openga iora ïa i reira ra.” (Mataio 24:14; 28:19, 20) No runga i te au uipaanga Kerititiano, kua akauruia te apotetoro ko Paulo kia tata e: “E akono marie rai tatou tetai ki tetai, ka akamaroiroi atu ei kia maata te aroa, e i te angaanga memeitaki ra: Auraka e akaruke i to tatou akaputuputu anga mei ta tetai aronga, ka akamaroiroi ra, e kia maata atu rai te maroiroi, no te mea te akara na kotou i taua rā ra i te vaitata anga mai.” (Ebera 10:24, 25) Ka akaari tatou i to tatou marekaanga kia Iehova me ariki rekareka tatou i ta tatou apainga kia tutu aere e kia apii e pera katoa kia taokotai putuputu atu ma to tatou au taeake i te au uipaanga putuputuanga, i te akara anga i te reira ei akameitaki anga e ei akangateitei anga.

13. Eaa te apiianga tei aere mai mei te au akanoonooanga no te akaputuanga oronga ua e te koi anga?

¹³ Kapiti mai, ka puapingaia tatou i te akamanako anga i tetai nga ravenga e rua tei rauka i te au Iseraela i te akaari i to ratou arikianga​—te au  akaputuanga oronga ua e te koi anga. Ei tuke anga ki te tuanga ngauru, e umuumuangaia ma tetai koreromotu akataka maramaia, te akanoonooanga no te au akaputuanga oronga ua e te koi anga kare e umuumuia tetai numero tikai. Kareka ra, kua akatika te reira no te ariki oonu anga ta tetai tavini o Iehova i rave i roto i tona ngakau kia akakeu iaia kia rave angaanga. Na roto i te tu aiteite, noatu e te ariki ra tatou i taua pirianga ki roto i te angaanga orometua e te aere anga ki te au uipaanga Kerititiano e apainga maataia na te au tavini ravarai a Iehova, te piri ra ainei tatou ma te ngakau tae katoa ki roto i te reira e ma te vaerua puareinga ua? Te akara ra ainei tatou i te reira ei tuatau kia akakite i to tatou arikianga ngakau tae no te au mea katoatoa ta Iehova i rave ana no tatou? Te piri tikai ra ainei tatou ki roto i teia au angaanga, i te maata anga e ka akatikaia e to tatou au turanga tataki tai ra? Me kare te akara pouroa ra ainei tatou i teia ei apainga ua e mea tau kia akaruke atu tatou? E tikai, ko teia au uianga e mea tau e na tatou uaorai e pau atu. Kua akakite mai te apotetoro ko Paulo na teia tu e: “Ka timata te tangata ravarai i tana uaorai angaanga, ei reira aia e rekarekaʼi iaia uaorai, eiaa i tetai ke.”​—Galatia 6:4.

14. Eaa ta Iehova e tapapa maira no tatou i roto i ta tatou angaanga kiaia ra?

¹⁴ Kua kite meitaki a Iehova i to tatou au turanga. Kua kite rai aia i to tatou au kotinga. Te akaperepere ra aia i te au atinga, te mea maata me kare te meangiti, ta tona au tavini e oronga puareinga ua ra. Kare aia e tapapa mai ana e ka oronga katoatoa atu tatou i taua numero, kare katoa rai e rauka ana ia tatou. I te uriuri anga no te oronga anga i te apinga, kua akakite te apotetoro ko Paulo ki te au Kerititiano i Korinetia e: “Te vai ra oki te tika i te ngakau, e ārikiia ïa ta te tangata i rauka ra, kare i tei kore i rauka iaia ra.” (2 Korinetia 8:12) Te tau meitaki ra ma te aiteite teia kaveinga ki ta tatou angaanga ki te Atua. Ko te ka akariro i ta tatou angaanga kia arikiia mai e Iehova ra kua akatakaia, kare na roto i te numero ta tatou e rave ra, mari ra na roto i te mataara i rave ei tatou i te reira​—ma te rekareka e te ngakau katoa.​—Salamo 100:1-5; Kolosa 3:23.

E Akatupu e e Tamou Ua Atu i te Tu Painia

15, 16. (a) Eaa te pirianga i rotopu i te angaanga orometua painia e te marekaanga? (e) Akapeea te aronga kare e rauka i te painia i te akaari anga i tetai tu painia?

¹⁵ Ko tetai mataara tutakiia kia akaari tatou i te marekaanga kia Iehova koia oki kia tomo atu ki roto i te angaanga orometua tamou. Akakeuia e  te aroa no Iehova e te marekaanga no tona takinga meitaki, kua rave te manganui o te au tavini akatapuia i te au tauianga maata i roto i to ratou au oraanga na te tuku maata anga i te au taime i te tavini ia Iehova. Kua rauka i etai i te tavini ei au painia tamou, i te akapou anga i tetai avereti e 70 ora i te au marama ravarai i te tutu anga i te tuatua meitaki e te apii anga i te au tangata i te tuatua mou. Ko tetai papaki, penei e no te kotinga o te au turanga tukeke, mei tetai taime ki tetai taime ka akapapa i te akapou atu e 50 ora i tetai marama i te tutu aere anga ei au painia tauturu.

¹⁶ Inara akapeea ra te au tavini e manganui o Iehova kare e rauka i te tavini ei au painia tamou me kore ra ei au painia tauturu? Ka rauka ia ratou i te akaari i te marekaanga na te akatupu anga e te tamou anga i te tu painia. Akapeea ra? Na te akamaroiroi anga i te aronga te rauka ra i te painia, na te tuku anga ki roto i ta ratou tamariki i te anoano kia aruaru i tetai angaanga i roto i te angaanga tamou, e na te piri anga tau ki roto i te tutu aere anga te tau ra ki to ratou au turanga. Ta tatou e oronga ra i roto i ta tatou angaanga orometua te vai ua ra te maata anga ki runga i to tatou ngakau i te ariki oonu anga i ta Iehova i rave, e e rave nei, e ka rave no tatou.

Akaari Anga i te Marekaanga ma ta Tatou “Au Apinga”

17, 18. (a) Akapeea e rauka ai ia tatou i te akaari i te marekaanga ma ta tatou “au apinga”? (e) Eaa te akarakara anga ta Iesu i akakite mai no ta te vaine takaua i oronga, e no teaa ra?

¹⁷ “E akangateitei atu ia Iehova i taau ra au apinga,” i karanga mai ei a Maseli 3:9, “e te mataiā o taau katoa ra apinga kia tupu.” Kare te au tavini o Iehova e anoano akaouia kia rave i te tuanga ngauru. Kareka ra, kua tata a Paulo ki te putuputuanga i Korinetia e: “E oronga te tangata ravarai i tana i akakoro i roto i tona ngakau; eiaa ma te noinoi, e mei te mea e no te umuumu: ko te tangata oronga ma te rekareka ta te Atua e inangaro.” (2 Korinetia 9:7) Te rave anga i te au akaputuanga oronga ua kia turu i te angaanga tutu Patireia i te ao katoa te akaari katoa ra i to tatou marekaanga. Te akakeu ra te ariki anga ma te ngakau tae ia tatou kia rave putuputu i teia, penei te akapae anga i tetai apinga i te au epetoma ravarai, mei ta te au Kerititiano mua i rave ana.​—1 Korinetia 16:1, 2.

¹⁸ Kare ko te maata anga ta tatou ka oronga atu te akaata ra i to tatou mareka anga kia Iehova. Mari ra, ko te tu te ka rauka ia tatou i te oronga. Ko teia ta Iesu i kite i te akara anga i te au tangata i te tuku anga i ta ratou au apinga oronga i roto i te au pia apinga i te iero. I to Iesu kite anga i tetai vaine takaua apinga kore i te tuku anga “i nga lepeta e rua ki roto,” kua karanga atura aia: “E tuatua-mou teia taku e karanga atu kia kotou na, E maata ta te vaine takaua apinga kore nei i tuku ki roto, i ta ratou ravarai: No roto oki i te toenga i to ratou apinga maata ta ratou i tuku maira ki roto i te apinga a te Atua: kareka aia nei, kua ope rava tona apinga rikiriki i te tukuia e ia ki roto.”​—Luka 21:1-4.

19. Eaa ra ei mea meitaki i te akara matatio akaou i te au mataara te ka akaari tatou i to tatou mareka anga?

¹⁹ Kia akakeu teia akara akaou anga ia tatou e akapeea tatou i te akaari anga i to tatou uaorai mareka anga kia akara matatio akaou i te au mataara e rauka ai ia tatou i te akaari i to tatou marekaanga. Ka rauka ainei ia tatou i te akamaata mai i ta tatou atinga akapaapaa ia Iehova e pera katoa ta tatou turu anga i te angaanga i te ao katoa i roto i tetai mataara no te apinga ra? Tae roa atu e kia rave tatou i te reira, te papu ra ia tatou e te mareka maira to tatou Metua oronga aroa, ko Iehova, e te akaari ra tatou i to tatou uaorai mareka anga.

Maara Ainei ia Koe?

• No teea au tumu ka tau ei kia mareka oki tatou kia Iehova?

• Eaa te au apiianga ta tatou i kite mei te tuanga ngauru, te au akaputuanga oronga ua, e te koi anga?

• Akapeea tatou i te tatanu anga i te tu painia?

• Akapeea e rauka ai ia tatou i te taangaanga i ta tatou “au apinga” kia akameitaki ia Iehova?

[Au Uianga Apii]

[Au Tutu i te kapi 15]

“Te au mea memeitaki i o maiia ra, e te au mea tika ravarai, no runga ïa”

[Au Tutu i te kapi 16]

Eaa te au apiianga e toru mei te Ture te akaariia ra i konei?

[Au Tutu i te kapi 18]

Eaa te au atinga ka rauka ia tatou i te rave?