Ripoti a te Aronga Tutu Patireia

Kua Taki Atu Tetai Tivi Porokaramu Iaia i te Akakaka i te Atua

KUA karanga te apotetoro ko Paulo e “E vareae to tetai pae e te māro, i tuatuaʼi i ta te Mesia nei; e tetai pae oki, no te anoano mou ïa.” (Philipi 1:15) I tetai atianga, noatu te aronga tei tauta i te akakino i te au tangata o Iehova kua rave akakoro kore i te akakeu i te aronga ngakau tika kia ariu mai ki te tuatua mou.

I roto ia Noema 1998, kua akaariia tetai au tataanga tutu o te Betela i runga i te tivi Varani pa enua no te au are manga o te Au Kite o Iehova i Louviers. Noatu te au ariuanga tuketuke tei rauka mei reira mai, kua tupu akera te au tupu anga meitaki i te au mataara kare i manakoia ana.

I roto i taua aronga ra tei akara i te porokaramu ko Anna-Paula, tei noo e 60 kiro mita mei te Betela. Te kimi angaanga ra a Anna-Paula, e metua vaine kopaeia e rua tamariki. No reira i tera mai popongi, kua ringi atu aia i te Betela i te ui no te kimianga angaanga i reira. “Kua manako mai au e ei ngai tau e te angaanga te raveia ra i reira e mea meitaki,” kua tuatua aia. Mei teaa rai te poitirere iaia i te kiteanga e pouroa te aronga tei tavini ra i Betela e au orometua tei oronga ua i to ratou taime! I muri ake i tetai uriurianga poto ua no runga i te au angaanga a te Au Kite o Iehova, kua ariki aia kia aere atu tetai Kite i te atoro atu iaia.

Ia Lena i te atoro atu anga, e orometua tamou i roto i te putuputuanga i reira, kua tupu tetai tuatua anga roa, e kua ariki a Anna-Paula i te puka Te Kite te ka Arataki ki te Ora Mutu Kore. * I tera mai atoroanga, kua tatau a Anna-Paula i te puka mei tera kapi ki tera kapi ma te au uianga e manganui. Kua ariki viviki ua aia i tetai apii Pipiria. I na Anna-Paula ei: “Iaku rai, ko teia te tuatau tau kia kite i te Tuatua a te Atua. Kare roa au i mou ana i tetai Pipiria i roto i toku rima i mua ana.”

I roto ia Tianuare 1999, kua atoro atu a Anna-Paula i te Betela, e i tera mai epetoma kua aere atu aia ki tana uipaanga Kerititiano mua. I muri poto mai, kua akamata aia i te apii i te Pipiria ma tana tamariki e i te akakitekite aere ki tona au oa. “Kare e rauka ana iaku i te tapu i taku i tamou mai,” kua tuatua aia. “Kua inangaro au i te tua atu i te au tuatua mou Pipiria ki te au tangata e kia akapumaana ia ratou.” I muri ake i te taumaroanga kia autu te au manamanata uaorai e manganui, kua akamata a Anna-Paula i te aere putuputu ki te au uipaanga. Kua tere viviki atu aia ki mua e kua papetitoia ia Me 5, 2002.

E pera katoa, i te tupuanga o te akaraanga meitaki e te tutuanga maroiroi o Anna-Paula, kua akamata akera tona metua vaine i te apii i te Pipiria e kare i roa ana kua papetitoia. “Kare e rauka i te au tuatua i te akakite i toku mataora e taku e manako nei,” i na Anna-Paula ei. “E akameitaki ua na au ia Iehova i te au ra ravarai i te aere mai anga ki roto i toku oraanga e no te au akameitakianga pouroa tana i oronga mai kiaku.”

[Tataanga Rikiriki i Raro]

[Au Tutu i te kapi 8]

I runga akenei: Anna-Paula

I raro ake: Te ngai tomoanga ki te opati manga i Varani