Te Tumu Tikai no te Irinaki Anga
Te Tumu Tikai no te Irinaki Anga
TE AKAKITE papu maira te puka 31 Reasons Why Young People Leave the Church no Korea mai e e manganui tei akamutu i te aere atu ki te pure no te mea kare i kitea mai e ratou te au pauanga mareka anga ki ta ratou au uianga. Ei akatauanga, kua ui ratou e, ‘Eaa ra te au tangata tei irinaki i te Atua i tamamaeia ai?’ e ‘Eaa ra ka tau ei kia ariki tatou i te au mea pouroa ta te au ekaretia e apii maira no te mea e te oripu ua ra e te patoi ra te au apii anga e manganui?’
Kua reka kore no te au pauanga tei orongaia mai e to ratou orometua, e manganui tei taopenga mai e kare e pauanga i roto i te Pipiria. Me oronga tetai orometua i tetai akamaramaanga tei akatumu anake uaia ki runga i tona uaorai manako, ko tei tupu putuputu mai ko te tu marama kore, pera katoa te kopae ke anga, i te Atua e te Pipiria.
Ko to Abel ia kiteanga, tei utuutuia mai ei tangata no te akonoanga Luther i Aperika Tonga. Kua maara iaia e: “Kua apii mai te akonoanga e ko te au tangata katoatoa tei mate kua ‘apainaia’ e te Atua. Inara kare au i marama ana e eaa ra te Atua aroa ka ‘apai ei’ i nga metua ra mei ta raua tamariki. I te ngai i uta i Aperika te ngai i maata mai ei au, kare matou e tamate i tetai moa kia maata mai ra te au punupunua. Me kitea mai e matou e kua nui tetai puakatoro, ka taroaroa matou i te tamate anga i te reira kia anauia mai ra te punua puakatoro e kia akamutu i te ngote te u. Kare au e marama ana e eaa ra te Atua aroa kare e akaari ana i taua manakoanga no te au tangata.”
Ko Aram, e tangata no Kanata, kua aite rai te au manako ekoko. “E 13 rai oku mataiti, kua mate toku metua tane,” i akakite mai ei aia. “I roto i te tuatua tanumanga, kua akamarama mai tetai orometua maata e te inangaro ra te Atua kia mate toku metua tane kia piri vaitata
atu aia ki te Atua i te rangi ra. ‘Te apai ra te Atua i te au tangata meitaki,’ i nana ai, ‘no te mea e aroa to te Atua i te aronga ngakau tika.’ Kare au e marama ana e eaa ra te Atua i riro mai e ei karapii.”I te openga ra, kua araveiia atu a Abel raua ko Aram e te Au Kite o Iehova, kua apii atu i te Pipiria kia ratou e, i te openga ra, kua kitea mai te au pauanga ki ta raua au uianga. Kua akatupu raua i te aroa no te Atua e te akarongo maroiroi ki roto iaia. I te openga ra, kua akatapu raua i to raua oraanga kia Iehova e kua riro mai ei nga tavini tiratiratu nana.
Kite Tika Tikai—Tetai Taviri i te Irinaki Anga i te Atua
Eaa ta tatou ka apiiia mai mei teia nga kiteanga? Te akakite maira raua kia tatou e no te manako irinaki anga i te Atua, e puapinga maata te kite Pipiria tika tikai. Kua akakite te apotetoro ko Paulo ki te au Kerititiano i roto i te oire taito o Philipi e: “Te pure nei au, kia tupu marie rai to kotou inangaro e kia maata atu rai i te [kite tika tikai], e te [kite pakari].” (Philipi 1:9, akaaite ia NW.) I konei te akapiri maira a Paulo i te aroa no te Atua e no te au taeake irinaki ki te kite tika tikai i te Atua e te kite pakari e eaa oki tona anoano.
E mea tau teia, i te mea e ko te umuumuanga mua no te irinaki anga e te manako anga i roto i tetai tangata koia oki te kite anga i taua tangata ra—e maata atu ia e te tika tikai, e meitaki roa atu ia. Mei tei reira katoa, te anoanoia ra te kite tika tikai kia akakeu ia koe kia irinaki i te Atua. “E teianei, ko te akarongo nei, ko te tumu tikai ïa i te au mea i tatariia nei, e te kite ïa i te au mea kare i akaraia nei,” i na Paulo ei. (Ebera 11:1) Te irinaki anga i te Atua me kare oki te kite tika tikai no te Pipiria te aite ra mei tetai are tei maaniia ki te au pere. Na tetai matangi meangiti ua e pupui i te reira ki raro.
I te apii anga i te Pipiria e tauturu ia koe kia kitea mai te au pauanga ki te au uianga mei tei tamanata roa ana ia Abel raua ko Aram, Eaa ra te au tangata i mate ei? Te akataka maira te Pipiria e “no te tangata okotai ra i o mai ei te kino i te ao nei, e no te kino oki te mate; e kua taea katoaia oki te tangata ravarai e te mate, no te mea kua ara katoatoa.” (Roma 5:12) Te ruaine e te mate atura te au tangata, kare e no te mea e kua apai te Atua ia ratou kiaia ra, mari ra no te mea kua ara a Adamu. (Genese 2:16, 17; 3:6, 17-19) Pera katoa, te akaari maira te Pipiria i te manakonakoanga mou ta te Atua ko Iehova i oronga mai. Na roto i tana Tamaiti, ko Iesu Karaiti, kua oronga mai aia i te manakonakoanga no tetai tuakaouanga no te au tangata ara.—Ioane 5:28, 29; Angaanga 24:15.
E tauturu ei ia tatou kia marama i te tuatua mou no runga i te tuakaouanga, te vaira i roto i te tataanga Pipiria te au akaraanga e manganui no te aronga tataki tai ta Iesu i akaora akaou mai ki te ora. (Luka 7:11-17; 8:40-56; Ioane 11:17-45) Ia koe e tatau ra i teia au papaanga Pipiria, e akara i te rekareka e te mataora tei kiteaia e te au oa e te ngutuare tangata o tei akatuakaouia mai. E akara katoa e kua akakeuia ratou kia akapaapaa i te Atua e kia tuku atu i te akarongo ki roto ia Iesu.
Te kite tika tikai no runga i te Atua e tana au akakoroanga ka rauka taua tupu anga ra ki runga i te au tangata i teia tuatau. E manganui tei oripu ua ana, akateiaaia, e kua akaturoriia e te au uianga puapinga maata kare i rauka ana ia ratou i te kite i te au pauanga marekaanga. Inara ia ratou e apii ra i te Pipiria, kua kitea mai e ratou te au pauanga, e kua taui takiri te reira i to ratou oraanga.
Aroa no te Atua—Te Tumu Maata Rava Atu no te Tavini Anga Iaia
E puapingaia ai te kite tika tikai ki te akarongo i te Atua, e maata ua atu te anoanoia ra kia akakeu i tetai kia akarongo e kia tavini iaia. I te uiia anga e eaa te akauenga maata roa atu no ko mai i te Atua, kua karanga atura a Iesu e: “E anoano atu koe i toou Atua ia Iehova ma to ngakau katoa, e ma to vaerua katoa, e ma to manako katoa, e ma to ririnui katoa.” (Mareko 12:30) Me te aroa ra tetai tangata i te Atua na te mataara ta Iesu i akakite mai, ka akarongo puareinga ua tikai aia e te tavini atu Iaia. Te tika ra ainei teia kia koe?
Te oronga maira a Rachel, tei tavini ana ei mitinari i Korea no tetai au mataiti e manganui, i teia tumu no tona akarongo: “E manako ana au i to Iehova tu aroa ki tana au mea ora, i tona akakoreanga i te ara i te akono anga i tona au tangata, e tona anoano no tatou e puapingaia ai tatou uaorai na te akakite mai anga kia tatou e eaa tana e inangaro maira mei ia tatou. No taua au mea
katoatoa ra i akatupu mai ei i toku aroa no te Atua. E te akariro ra taua aroa kia tavini atu au iaia.”Ko Martha, e takaua no Tiamani mai, kua tavini ana ia Iehova e 48 mataiti. Te karanga ra aia e: “Eaa au i tavini ei ia Iehova? No te mea e aroa toku iaia. I te au aiai ravarai e tuatua ana au kia Iehova na roto i te pure e te akakite anga kiaia e mei teaa ra te oonu o toku rekareka no tana au akameitakianga katoatoa, no te atinga oko tikai ra.”
Ae, te aroa no te Atua te akariro ra kia inangaro tatou i te tavini iaia mei te ngakau. Inara akapeea e rauka ai taua aroa i tetai? Te akakeuanga ketaketa roa atu kia tatanu i te aroa no te Atua ra koia oki te ariki oonu anga i te aroa tana i akaari mai ana kia tatou. E akara ana i teia akamaramaanga pumaana mei roto mai i te Pipiria: “Ko tei kore e aroa ra, kare ïa i kite i te Atua; ko te Atua oki te aroa. Kua kitea to te Atua aroa ia tatou nei, koia i tono mai i tana Tamaiti anau tai ki te ao nei, kia ora tatou iaia. Ko te aroa mou teia, kare ïa na tatou i aroa atu i te Atua, koia ra tei aroa mai ia tatou nei, e kua tono mai i tana Tamaiti ei tarangaara i ta tatou nei ara.”—1 Ioane 4:8-10.
Te kite ra ainei koe mei teaa te maata tikai i teia aroa nei? E akamanako ana e te maremoia ra koe i roto i tetai kauvai koko e kua tuku tetai tangata i tona oraanga i te akaora mai ia koe. Ka akangaropoina ainei koe iaia, me kore kare ainei koe e mareka maata atu iaia ra? Kare ainei koe e rave puareinga ua i tetai mea te ka rauka ia koe i te rave nona ra? Te aroa ta te Atua i akaari mai i te oronga mai anga i tana Tamaiti, ia Iesu Karaiti, ei atinga oko kare e rauka i te akaaite maataia atu. (Ioane 3:16; Roma 8:38, 39) Me tukia toou ngakau e te aroa o te Atua, ka akakeuia koe kia aroa atu e kia tavini atu iaia ma te ngakau katoa.
Te Au Akameitaki Anga i Teia Tuatau e i te Tuatau ki Mua
Noatu e e mea tau e ko to tatou aroa no te Atua te tumu maata rava atu no te raveanga i tona ra anoano, e ngakau puamaanaia i te kite e te tutaki maira te Atua i te aronga tei tavini iaia. Te tou maira te apotetoro ko Paulo e: “Kare ra e akarongo ra kare rava aia e mareka: ko te akamori i te Atua ra, kia akarongo aia e, e Atua e tikaʼi, e koia tei tutaki mai i te aronga i kimi tikai iaia.”—Ebera 11:6.
Maseli 23:20, 21; 2 Korinetia 7:1) Te aronga tei taangaanga i te au kaveinga Pipiria no runga i te tu tika e te angaanga maroiroi te irinakiia maira e to ratou au pu angaanga e no reira te rekareka maata ra i te pae puapinga no te tinamou. (Kolosa 3:23) Na te tuku anga i to ratou irinaki kia Iehova, kua akameitakiia te au tavini o te Atua ma te manako o te au noatu e tei raro ake i te au turanga ngata. (Maseli 28:25; Philipi 4:6, 7) Tei runga ravao, te akara manako papu tikai ra ratou ki mua ki te akameitaki anga no te oraanga mutu kore i roto i te Parataito te aere maira i te enua nei.—Salamo 37:11, 29.
Te aronga tei aroa e te akarongo ra ki te Atua ka akameitaki tika tikaiia mai e ia. E manganui tei rekareka i te oraanga meitaki roa atu no te aru anga i te au kaveinga Pipiria. (Akapeea te aronga tei rekareka i taua au akameitaki anga no ko mai ia Iehova i te manako anga no runga iaia ra? Kua akakite mai a Jacqueline, e Kerititiano i Kanata, i tona arikianga i te Atua: “E oronga ua mai ana aia i taua au apinga aroa umere kia matou, e te oronga maira aia i te manakonakoanga papu no te ora mutu kore.” Ko Abel, ta tatou i rongo ana i mua ana, kua akataka mai i tona au manako na teia tu nei: “Te manakonakoanga no te noo anga ki runga i tetai enua parataito e tuatau ua atu e apinga ouia kiaku, e te akara nei au ki mua no te reira. Inara, noatu rai e kare e rauka mai tetai Parataito, e mea mareka anga rai te reira noku i te akaari i toku aroa no te Atua na te tavinianga iaia.”
Ka Rauka Katoa ia Koe te Akarongo Mou
“Ko koe ra, e Iehova Sabaota e, ko tei akava ma te tuatua-tika ra, tei kimi matatio i te manako, e te ngakau,” i karanga ai te Pipiria. (Ieremia 11:20) Ae, te kimi matatio ra a Iehova eaa tei uuna oonuia i roto roa ia tatou te tangata nei. Ka tau kia kimi matatio tataki tai tetai i tona uaorai akakoroanga no te irinaki anga i te Atua. Penei na te au irinaki anga tarevake e te au manako no runga i te Atua ra i arataki ke atu ki te au angaanga tarevake i topa. Inara te kite tika tikai no te Pipiria e rauka ai i te arataki atu ki tetai pirianga tika ma Tei Anga ra, ki te Atua ra ko Iehova.—1 Timoteo 2:3, 4.
Na roto i ta ratou akanoonooanga apii Pipiria i te kainga, te tauturu ra te Au Kite o Iehova i te au tangata kia rauka tetai kite tika tikai i te Atua. (Mataio 28:20) E manganui tei ariki i taua tauturuanga kua aroa mai i te Atua e kua akatupu i te akarongo tika tikai i roto iaia. Na roto i tetai apii i te Pipiria, kua rauka ia ratou te “pakari meitaki e te akono,” tei tauturu ia ratou kia ‘aere uaʼi na te ora’ i roto i teia au tuatau kino nei. (Maseli 3:21-23) Tei runga ravao, te akono ra ratou i teianei i tetai manakonanakoanga “e papu te reira e te ketaketa” no te tuatau ki mua. (Ebera 6:19, NW) Ka rauka katoa rai ia koe te akarongo mou e te rekareka anga i teia au akameitaki anga.
[Pia i te kapi 6]
Te Au Uianga Oripu Ua te Anoanoia ra te Au Pauanga
“Iaku e tereniia ra i roto i te are maki ei tangata apiipii vairakau, kua kite atu au i te au tangata meitaki te ngunguru mamae ra no te mea no te au maki e te au tumatetenga. Me e Atua tetai, eaa ra teia au mea nei i tupu ua ai? E ravenga ua ainei te akonoanga kia rauka mai te manako no te au?”—Na tetai tangata Perepitero i mua ana i Korea.
“E manakonako putuputu ua ana au e me kua aere toku metua tane, e tangata kai kava, ki era me kare ki te rangi. Kua mataku tikai au i tei mate e no te manako no te ai era. Kare au e marama ana e akapeea roa ai tetai Atua aroa i tono ei i tetai tangata kia tamamae mutu koreia i roto ia era.”—Na tetai Katorika i mua ana i Paratiri.
“Eaa ta te tuatau ki mua e oronga maira no te enua e no te au tangata? Akapeea e rauka ai i te au tangata kia ora e tuatau ua atu? Akapeea e rauka ai i te au tangata te ponuiaau mou ra?”—Na tetai Katorika i mua ana i Tiamani.
“Te apii anga no te anau akaouanga kare e manako tau ana kiaku. Kare te au manu e akamori ana, me no tetai tumu ua atu e kua anau akaouia mai koe ki roto i tetai manu i te tutaki i taau au ara, akapeea koe e akatikatika ai i te au tumu ra e kia tupu mai mei taua tu ra?”—Na tetai tangata Hindu i mua ana i Aperika Tonga.
“Kua maata mai au i roto i tetai ngutuare tangata Confucius, e e piri ua ana au ki roto i te akamorianga no te akaangaroianga o to matou ai tupuna. Iaku e piri atura i te akanoonoo anga i te kaingakai akaatinga e te tupou anga ki raro, kua manako au e me ka aere mai te ai tupuna i te kai i te manga e te kite mai anga ia matou e tupou atura kia ratou.”—Na tetai tangata Confucius i mua ana i Korea.
Pouroa teia aronga tataki tai nei kua kitea te au pauanga ki ta ratou au uianga i to ratou apii anga i te Pipiria ma te Au Kite o Iehova.