Te Manako Maira te Atua ia Tatou?

TE KITE ra koe ia koe uaorai i te putoto anga i raro i tetai apainga manako ngakau no te au manamanata ma toou ngutuare tangata, te oraanga, te angaanga, me kare i tetai ua atu au apainga teiaa? E manganui te akapera ra. E koai ma i teia tuatau kare e tukiia e te au tika kore, te rave anga kino, e te takino anga? E tikai, mei ta te Pipiria rai i akakite mai: “Kua kite oki tatou e, te ngunguru anake nei te au mea katoa i angaia mei te mamae anau ra e tae rave akenei i teianei rā.” (Roma 8:22) No reira rai te au tangata e manganui i ui ei e: ‘Te manako maira te Atua? Ka tauturu mai ainei aia ia tatou?’

Kua tuatua te ariki pakari ko Solomona ki te Atua na roto i te pure: “Ko koe anake rai oki te kite i te ngakau o te au tamariki a te tangata nei.” Kua irinaki a Solomona e kare ua e kua kite te Atua ia tatou mari katoa ra te manako maira ia tatou tatakitai. Kua rauka iaia i te ui ki te Atua kia “akarongo mai ei i runga i te rangi” e kia pau i te au pure a te au tangata tatakitai te mataku ra i te Atua ko tei akaari ra ki te Atua “i tona uaorai mate, e tona uaorai kino.”​—2 Paraleipomeno 6:29, 30.

I teia tuatau, te manako maira rai te Atua ko Iehova ia tatou e te pati maira ia tatou kia kapiki kiaia na roto i te pure. (Salamo 50:15) Kua taputou mai aia i te ariki i te au pure ngakau tae te rotai ra ki tona anoano. (Salamo 55:16, 22; Luka 11:5-13; 2 Korinetia 4:7) Ae, te akarongo maira a Iehova ki “te au pure katoa e te au patianga e patiia e te au tangata katoa, e [tona] au tangata katoa.” E no reira, me tuku tatou i to tatou irinaki ki te Atua, e pure no tana tauturu, e kia akavaitata atu kiaia, ka kite tatou i tona akonoanga aroa e te aratakianga. (Maseli 3:5, 6) Te akapapu maira te tata Pipiria a Iakobo e: “E akavaitata atu ki te Atua, e nana e akavaitata mai kia kotou na.”​—Iakobo 4:8.