Au Uianga a te Aronga Tatau

Eaa te au turanga i akariro ei kia rave a Iuda i te pirianga ainga ki tetai vaine tana i manako ana e e vaine akaturi, tei akakiteia mai i roto ia Genese 38:15, 16?

Kua rave a Iuda i te pirianga ainga ki tetai vaine tana i manako ana e e vaine akaturi, te tika anga kare aia i te vaine akaturi. Kia tau ki ta Genese pene 38, ko teia tei tupu.

I mua ake ka anau mai ei te tama mua a Iuda i tetai tamariki tamaroa ma tana vaine ra, ko Tamara, kua tamateia aia no te mea ‘e tangata tuatua kino [aia] i mua i te aroaro o Iehova.’ (Genese 38:7) I taua tuatau rai, kua akonoia te peu no te akaipoipoanga taokete. Te umuumuia ra teia me mate tetai tangata kare e uanga, na tona teina e oronga i te tumuanga no tetai uanga ki te vaine takaua. Inara kua patoi te rua o te tamaiti a Iuda, ko Onana, i te akatupu i tana apainga. No reira, kua tamateia aia no te akavaanga tu-Atua. Kua tono ke atura a Iuda i tana unonga tamaine ko Tamara ki te are o tona metua tane e tae ua atu te tuatau e pakari mai ei te toru o ta Iuda tamaiti, ko Sela, kia akaipoipo kiaia. Inara, i te au mataiti e pati ra, kare rai a Iuda i oronga atu ana ia Sela kia akaipoipo kia Tamara. No reira te mate anga ta Iuda vaine, kua rave a Tamara i tetai parani kia rauka tetai uanga no roto ia Iuda, te ngati Iseraela tei riro ana ei metua ongai nona ra. Kua rave aia i teia na te tapoki anga iaia uaorai ei vaine akaturi o te iero e te akanoo anga iaia uaorai i runga i te mataara tana i kite e ka tapae mai a Iuda.

Kare i kite e koai a Tamara, kua piri atu a Iuda kiaia. No te tutaki iaia ra kua rauka mai iaia ma te karape ra te au apinga mei iaia, e na roto i teia au mea nei kua rauka iaia i te akapapu atu i muri mai e kua nui aia nana ra. Te akaariia mai anga te tika anga, kare a Iuda i akaapa ana iaia inara kua tuatua maira ma te akaaka e: “E tuatua-tika tana i taku; ko au kare i oronga atu iaia ki taku tamaiti nei kia Sela.” Ma te tau maata ra, “kare roa aia i kite akaou atu iaia.”​—Genese 38:26.

Kua rave a Iuda i te tarevake i te mea kare aia i oronga ia Tamara ki tana tamaiti kia Sela i tei taputouia ana. Kua piri katoa atu aia ki tetai vaine tana i manako ana e e vaine akaturi o te iero. E tuke teia ki ta te Atua akakoroanga, koia oki kia piri ainga anake ua te tane ra i roto i te akapapaanga akaipoipo. (Genese 2:24) Te tika anga, i reira, kare a Iuda i piri ana ki tetai vaine akaturi. Mari ra, kare i akakoroia ana kia mono aia i te ngai o tana tamaiti ko Sela i te akonoanga i te akaipoipo taokete e no reira kua riro mai ei metua tikai no te uanga.

No Tamara, kare tana ravenga ei ravenga tau kore. Kare tana nga tamaroa maanga e manakoia ana e e nga tamariki no te akaturi. Te rave anga a Boaza o Betelehema ia Ruta ngati Moabi i roto i te akaipoipoanga taokete, kua tuatua akameitakiia e te aronga pakari o Betelehema ta Tamara tamaiti ra ko Phareza, i te tuatua anga kia Boaza e: “E kia riro toou ngutuare mei te ngutuare o Phareza, ta Tamara i anau ia Iuda ra, i te tamariki ta Iehova e oronga mai naau i teianei vaine ou.” (Ruta 4:12) Kua akapapa katoaia mai a Phareza i rotopu i te ui tupuna o Iesu Karaiti.​—Mataio 1:1-3; Luka 3:23-33.