E Maata To Iehova Aroa Tiratiratu
E Maata To Iehova Aroa Tiratiratu
“Iehova . . . te maata o te aroa takinga meitaki.”—SALAMO 145:8, NW.
1. Mei teaa te mamao o to te Atua aroa?
“KO TE Atua oki te aroa.” (1 Ioane 4:8) Te akapapu maira tera takiota tuatua tei akapumaana i te ngakau e kua akanooia ta Iehova mataara no te tutaraanga ki runga i te aroa. Eaa oki, te au tangata katoa atu kare e akarongo kiaia te puapinga ra mei te ra e te ua tana e oronga ua maira ma te aroa! (Mataio 5:44, 45) No te aroa oki o te Atua i te tangata o teianei ao, ka rauka katoa rai i tona au enemi kia tataraara, kia anga kiaia, e kia rauka te ora. (Ioane 3:16) Inara, kare e roa atu, ka takore takiri a Iehova i te aronga kino kia rauka i te au tangata tei inangaro iaia i te rekareka i te oraanga mutu kore i roto i te ao ou tuatua tika.—Salamo 37:9-11, 29; 2 Petero 3:13.
2. Eaa te tuanga takake o te aroa ta Iehova e akaari ra ki te aronga tei roto i tetai pirianga akatapuia kiaia?
2 Te akaari ra a Iehova i te aroa no tana aronga akamori mou na roto i te mataara akaperepere, mutu kore. Te akaaiteia maira ra mai taua tu aroa ra e tetai tuatua Epera tei uriia ei “aroa takinga meitaki,” me kore ei “aroa tiratiratu.” Kua ariki oonu tikai te Ariki ko Davida o Iseraela i taito i to te Atua aroa takinga meitaki. No tana uaorai oki i kite e tana manakonakoanga no runga i ta te Atua au raveanga ki etai ke, kua rauka ia Davida kia imene papu tikai e: e “Iehova . . . te maata o te aroa takinga meitaki [me kore, te “aroa tiratiratu”].”—Salamo 145:8, NW.
Akataka Anga i to te Atua Aronga Tiratiratu
3, 4. (a) Akapeea te Salamo 145 i te tauturu anga ia tatou i te akataka i to Iehova aronga tiratiratu? (e) Akapeea to te Atua aronga tiratiratu me “akameitaki” iaia?
3 No runga i te Atua ko Iehova, kua tuatua a Hana, te mama o te peroveta ko Samuela, e: “Te vaevae o te aronga [“tiratiratu,” NW] nona ra, nana ïa e tiaki.” (1 Samuela 2:9) Koai ma taua “aronga tiratiratu” ra? Te oronga maira te Ariki ko Davida i te pauanga. I muri ake i te akateitei anga i to Iehova au tu umere tikai, kua akakite aia: “E akameitaki oki toou ra aronga tiratiratu ia koe.” (Salamo 145:10, NW) Penei ka umere koe e ka akapeea te au tangata ua nei i te akapaapaa anga i te Atua. Te tumu anga tikai ka rave ratou i te reira na te akapaapaa anga iaia me kore na te tuatua meitaki anga iaia.
4 Ko to Iehova aronga tiratiratu ka rauka kia akatakaia ei aronga te taangaanga ra i to ratou vaa i te tuatua meitaki iaia. I te ngai putuputuanga o te tangata e i te au uipaanga Kerititiano, eaa ra te tumu tuatua matauia no ta ratou au uriurianga? Eaa oki, ko te Patireia o Iehova! Te aiteite ra te au manako o to te Atua au tavini tiratiratu ki to Davida, ko tei imene e: “Ka akakite ratou i te kaka o toou [Iehova] na arikianga, e i toou na ririnui ka tuatua ratou.”—Salamo 145:11, NW.
5. Akapeea tatou e kite ei e te akarongo maira a Iehova me tuatua meitaki tona aronga tiratiratu iaia?
5 Te akarongo maira ainei a Iehova me akapaapaa tona aronga tiratiratu iaia? Ae, te akarongo maira aia ki ta ratou e tuatua ra. I roto i tetai totou tei piri atu ki te akamorianga mou i to tatou nei tuatau, kua tata a Malaki: “I reira te aronga i mataku ia Iehova i te tuatua putuputu anga ki tetai ki tetai: e kua akarongo mairā Iehova, e kua kite e kua tataia iora tetai buka manakoanga ki mua iaia, no te aronga e mataku ia Iehova, e tei manako i tona ra ingoa.” (Malaki 3:16) E rekarekaanga maata tikai kia Iehova me tuatua meitaki tona aronga tiratiratu iaia, e e maara ana aia ia ratou.
6. Eaa te angaanga ka tauturu ia tatou kia akataka i to te Atua aronga tiratiratu?
6 Ka rauka katoa i te akataka i to Iehova aronga tavini tiratiratu na to ratou tu ngakau toa e te inangaro tikai i te tuatua ki te tangata kare i te aronga akamori no te Atua mou. E tika rava e, ko to te Atua aronga tiratiratu te ‘akakite ra ki te tamariki a te tangata nei i tana ra au ravenga ririnui e te mekameka kaka o tona ra arikianga.’ (Salamo 145:12, NW) Te kimi ra ainei koe e te taangaanga pu ra i te au tuatau i te tuatua ki te aronga irinaki kore no runga i to Iehova arikianga? Kare i aite ki te au kavamani tangata ka ngaro ke vave ua, ko tona arikianga ra ka vai e tuatatau ua atu. (1 Timoteo 1:17) E mea rapurapu kia apii te tangata no runga i to Iehova arikianga mutu kore e kia tu ki to ratou turanga ei aronga turuturu. “Ko toou ra arikianga e arikianga e tuatau ua atu,” i imene ei a Davida, “e ko taau ra tutaraanga no te au uki ravarai a muri atu.”—Salamo 145:13, NW.
7, 8. Eaa tei tupu i te 1914, e eaa te akapapuanga e kitea nei e te tutara nei te Atua i teianei na roto i te Patireia o tana Tamaiti?
7 Mei te 1914 mai, e tumu akaou tei kapitiia mai no te tuatua no runga i to Iehova arikianga. I taua mataiti ra, kua akanoo te Atua i te Patireia o te Mesia ma Iesu Karaiti, te Tamaiti a Davida, ei Ariki. Kua akatupu i reira a Iehova i tana koreromotu e ka akatinamouia to Davida arikianga e tuatau ua atu.—2 Samuela 7:12, 13; Luka 1:32, 33.
8 Ko te akapapuanga e te tutara nei a Iehova i teianei na roto i te Patireia o tana Tamaiti, ko Iesu Karaiti, te kiteaia nei i roto i te akatupuanga e aere ua atura o te akairo o to Iesu parutia. Ko te tuanga takake roa atu o taua akairo ra koia oki ko te angaanga ta Iesu i totou no te katoatoa rava o to te Atua aronga tiratiratu i tona tuatua anga e: “E tutu aereia te evangelia o te basileia nei, e kako rava ake te ao katoa nei; ei kite no te pa enua ravarai; ko te openga iora ïa i reira ra.” (Mataio 24:3-14) No te mea oki e te akatupu maroiroi nei to te Atua aronga tiratiratu i taua totou ra, kua tere atu i te ono mirioni au tane, vaine, e te tamariki e piri nei ki teia angaanga puapinga, te ka kore rava e rave akaouia. Kare e roa atu ka tae mai te openga no te katoatoa rava o te aronga patoi i to Iehova Patireia.—Apokalupo 11:15, 18.
Puapingaia mei to Iehova Tu Ngateitei
9, 10. Eaa te tuke i rotopu ia Iehova e te au tutara tangata?
9 Me e au Kerititiano akatapuia tatou, ka apai mai to tatou pirianga ma te Atu Ngateitei ko Iehova i te au puapinga e manganui no tatou. (Salamo 71:5; 116:12) No te mea oki e te mataku ra tatou i te Atua e te akono i te tu tuatua tika, ei akatauanga, te rekareka nei tatou i tana akaperepereanga e te piri vaitata nei kiaia i te pae vaerua. (Angaanga 10:34, 35; Iakobo 4:8) Ko te tuke, e putuputu te au tutara tangata i te kiteaia e te piri atura ki te aronga rongonui, mei te au arataki vaeau te tu, te au tangata pitiniti, me kore te aronga tarekareka e te aronga papa nunui. I na te nuti pepa Aperika ai ko te Sowetan, kua tuatua tetai opita maata o te kavamani no runga i te au ngai putaua i tona enua: “Te marama ua ra au me kare te maataanga ia matou e inangaro ana i te aere ki taua au ngai ra. No te mea te inangaro ra matou i te akangaropoina e te vai ra taua au turanga ra. Te tukia ra oki te reira ki to matou akava ngakau e te akama nei matou i te au apinga akaoro oko maata ta matou e akaoro ra.”
10 E tika e, ko tetai au tutara tangata te manako ngakau tae ra no runga i te oraanga o ta ratou aronga e tutara ra. Inara kare rava tei maata atu i rotopu ia ratou i kite piri vaitata tikai i ta ratou aronga e tutara ra. Te tika anga tikai, penei ka ui tatou e: E tutara ainei tetai e vai nei te manako maata maira i tana aronga katoatoa e tutara ra e ka aere viviki mai aia i te tauturu tataki tai ia ratou i te au taime o te manamanata? Ae, te vai nei. Kua tata a Davida: “Te oronga ra Iehova i te tauturu ki te aronga pouroa e inga ra. E te akatu ra i te aronga pouroa e piko ra ki raro.”—Salamo 145:14, NW.
11. Eaa te au timataanga e tupu nei ki to te Atua aronga tiratiratu, e eaa te tauturu e vai nei no ratou?
11 E manganui te au timataanga e te kino e tupu ra ki to te Atua ko Iehova au aronga tiratiratu no to ratou uaorai tu ara e no te mea te noo nei ratou ki roto i tetai ao e vai ua nei i raro ake i te mana o Satani, “taua vaerua kino ra.” (1 Ioane 5:19; Salamo 34:19) Te kite nei te au Kerititiano i te takinokinoanga. Te mamae nei tetai papaki no te maki kino me kore no te tumatetenga. I tetai au taime, te riro nei te au tarevake o to Iehova aronga tiratiratu i te tuku ia ratou kia ‘piko ki raro’ i roto i te tu akamaroiroianga kore. Noatu eaa te au timataanga ka tupu kia ratou, inara, te papa ua ra a Iehova i te oronga i te akapumaanaanga e te maroiroi i te pae vaerua kia ratou tataki tai. Mei koia katoa to te Ariki ko Iesu Karaiti manako aroa no tana aronga tiratiratu e tutara ra.—Salamo 72:12-14.
Kai Merengo i te Tuatau Tau
12, 13. Mei teaa te meitaki tikai o ta Iehova akonoanga i te au anoano o te “au mea ora ravarai nei”?
12 No tona aroa takinga meitaki maata, te oronga mai nei a Iehova i te au mea pouroa tei anoanoia no tona au tavini. Ka kapiti mai teia i te akamerengo anga ia ratou ki te au kai memeitaki. Kua tata te Ariki ko Davida e: “Te akara pu nei te mata o te katoatoa kia koe [Iehova], e te oronga nei koe i te kai kia ratou i te tuatau tau. Te akatuera nei koe i toou rima e te akamerengo nei i te anoano o te au mea ora ravarai nei.” (Salamo 145:15, 16, NW) I te au taime katoa o te tumatetenga, ka rauka ia Iehova i te akakeu i te au mea anake kia rauka i tona aronga tiratiratu te ‘kai e tau i tera rā.’—Luka 11:3; 12:29, 30.
13 Kua taiku a Davida e ka merengo te “au mea ora ravarai nei.” Te ka kapiti mai i te au manu. Naringa kare te maata o to te enua ua rakau o te one enua e te au rakau o te tai, te au mea angaia o te moana, te au manu, e te au manu o te enua kare i reira e reva ou i te akaea me kore e kai ei kaikai. (Salamo 104:14) Inara, kua akapapu a Iehova e kia akamerengoia to ratou au anoano pouroa.
14, 15. Te akapeea nei te kai vaerua i te oronga angaia mai i teia tuatau?
14 E anoano to te tangata i te pae vaerua, kare i aite ki te manu. (Mataio 5:3) Mei teaa ra te umere o ta Iehova akamerengo anga i te au anoano o tona aronga tiratiratu i te pae vaerua. I mua ake i tona matenga, kua koreromotu a Iesu e ka oronga te “tavini akono meitaki e te pakari” i te “kai i te tuatau tau” na tana au pipi. (Mataio 24:45, NW) Ko te toenga o te 144,000 aronga akatainuia te pupu tavini i teia tuatau nei. Na roto ia ratou, te oronga pu ua mai nei tikai a Iehova i te kai vaerua.
15 Ei akaraanga, te maataanga o to Iehova iti tangata i teianei te puapinga nei mei te urianga ou e te tika tikai o te Pipiria i roto i to ratou uaorai reo. Kua riro te New World Translation of the Holy Scriptures ei akameitakianga umere tikai! Kapiti mai, e mirioni ua atu o te au puka tauturu i te apiianga Pipiria e neneiia nei rai i roto i te au reo tei tere atu i te 300. Kua riro teia au kai vaerua pouroa ei akameitakianga ki te aronga akamori mou takapini i te ao. Koai tei tau i te akameitakianga no teia au mea pouroa? Te Atua ko Iehova. Na roto i tona aroa takinga meitaki maata, kua akatika aia kia oronga te pupu tavini i te “kai i te tuatau tau.” Na roto i taua au orongaanga ra, kua rauka i te akamerengo i “te anoano o te au mea ora ravarai nei” i roto i te parataito vaerua i teia tuatau nei. E mei teaa ra te rekareka o to Iehova au tavini i te manakonakoanga o te kite vave anga i te enua i te taui angaia ki roto i tetai parataito tikai!—Luka 23:42, 43.
16, 17. (a) Eaa te au akaraanga o te kai vaerua tei tae mai i te tuatau tau? (e) Akapeea a Salamo 145 i te akakite anga i te manako ngakau o to te Atua aronga tiratiratu no runga i te itiu maata ta Satani i akatu atu?
16 E akamanako ua ana i te akaraanga takake o te kai vaerua e rauka mai nei i te tuatau tau. I te 1939, kua akamata te Tamaki II o te Ao i Europa. I taua mataiti rai, i roto te itiu o Noema 1 o The Watchtower tetai atikara tei tapaia e “Tu Neutara.” Tei tupu no te akakiteanga taka papu tei orongaia, takapini i te ao kua kite te Au Kite o Iehova i te anoano kia tamou marie pakari ki te tu neutara i roto i te au angaanga a te pa enua e kaitamaki ra. Kua riro teia i te apai mai ki rungao ia ratou te riri o te au kavamani i nga tua e rua o taua ono mataiti ra o te tamakianga. Inara, noatu kua araiia e te takinokinoia, kua tutu atu rai to te Atua aronga tiratiratu i te tuatua meitaki o te Patireia. Mei te1939 ki te 1946, kua akameitakiia ratou ki tetai tupuanga umere o te 157 patene. Kapiti katoa mai, kua riro to ratou rekoti meitaki no te tu apakore i te tuatau o taua tamakianga ra i te tauturu ua tu rai i te tangata kia akataka i te akonoanga mou.—Isaia 2:2-4.
17 Ko te kai vaerua ta Iehova i oronga kare ko te taime anake ua tei tau mari ra kua rauka katoa te merengoanga maata. I te pa enua i roto i te pakarianga i te tamaki i te tuatau o te Tamaki II o te Ao, kua tauturuia ra to Iehova iti tangata kia akara tamou ki runga i tetai apinga puapinga maata roa atu i to ratou uaorai ora. Kua tauturu a Iehova ia ratou kia marama e ko te itiu maata, tei o mai te ao katoa e pini ua ake, te piri atura ki to Iehova tu ngateitei tika. Mei teaa ra te merengo i te kite anga e na roto i to ratou tu tiratiratu kua rauka i te au Kite tataki tai o Iehova tetai tuanga meangiti ua i roto i te akatapuanga i to Iehova tu ngateitei e i te akapapu anga e e pikikaa te Tiaporo! (Maseli 27:11) Kare mei ia Satani rai, ko tei tuatua pikikaa ia Iehova e tana mataara o te tutaraanga, ko to Iehova aronga tiratiratu ra kua rave tamou ua atu rai i te akakite ki te katoatoa rava e: “E tuatua tika ta Iehova i tona au aerenga katoa ra.”—Salamo 145:17, NW.
18. Eaa te akaraanga i rauka ua akenei no te kai vaerua tei tau te tuatau e ko tei ki i te merengoanga maata?
18 Tetai akaraanga ke atu, o te kai vaerua merengo i te tuatau tau koia oki ko te puka Akavaitata Atu kia Iehova, tei tukuia mai ki te au anereanga o te Au Uruoaanga Tapere “Ei Aronga Tutu Maroiroi i te Patireia” tei raveia takapini i te ao i te 2002/03. Ko teia puka nei, tei tukuia mai e te “tavini akono meitaki e te pakari” e tei neneiia e te Au Kite o Iehova, kua akara tamou ki runga i to te Atua ko Iehova au tu umere, kapiti mai te au mea tei taikuia i roto i te Salamo 145. Papu roa e e tuanga puapinga ta teia puka meitaki nei ka rave i roto i te tauturu anga i to te Atua aronga tiratiratu kia akapiri vaitata roa atu kiaia.
E Tuatau no te Akapiri Vaitata Roa Atu kia Iehova
19. Eaa te tuatau puapinga e vaitata roa mai nei, e ka akapeea tatou i te ariu anga ki te reira?
19 Te vaitata roa mai nei tetai tuanga puapinga i roto i te akanoo anga i te itiu no to Iehova tu ngateitei. Mei tei totouia i roto ia Ezekiela pene 38, kare e roa atu ka akaoti a Satani i tana tuanga angaanga ei “Goga i te enua o Magoga.” Ka kapiti mai teia i tetai tamakianga takapini i teia ao ki rungao i to Iehova iti tangata. Ka riro ei titauanga pu ua i to Satani tua i te akaparuparu i te tu apakore o to te Atua aronga tiratiratu. Kare mei tei mua ana, ka anoanoia te aronga akamori ia Iehova kia kapiki akatenga iaia, te aue katoa anga no tetai tauturu. Ka riro ainei to ratou mataku tapunui i te Atua e te aroa iaia ei mea puapinga kore ua? Papu roa, e kare no te mea te karanga ra te Salamo 145 e: “Tei vaitatao rai Iehova i te aronga katoa tei kapiki atu iaia ra, ki te aronga katoa tei kapiki atu iaia ra ma te tuatua tika. Ka akatupu aia i te anoano o te aronga tei mataku iaia. E ka akarongo mai aia i ta ratou aue kia tauturuia, e ka akaora aia ia ratou.Te tiaki ra a Iehova i te aronga katoa tei inangaro iaia ra, ka takore ra aia i te aronga kino katoa ra.”—Salamo145:18-20, NW.
20. Ka akapeea te au tuatua a Salamo 145:18-20, NW, i te tupu tika anga a te tuatau ki mua e vaitata ua maira anga?
20 Mei teaa ra te rekareka i te kite anga i to Iehova vaitataanga mai e tona mana akaora me takore aia i te aronga kino pouroa! A taua taime puapinga tikai ra, e vaitata ua maira i teianei, ka akarongo ua mai a Iehova i te “aronga katoa tei kapiki atu iaia ra ma te tuatua tika.” E mea papu roa e kare aia e akarongo mai ki te aronga pikikaa. Te akaari taka papu ua maira ta te Atua Tuatua e ko te tuku ki te openga roa taangaanga ai te aronga kino i tona ingoa e papu ua ana rai i te puapinga kore.—Maseli 1:28, 29; Mika 3:4; Luka 13:24, 25.
21. Akapeea to Iehova aronga tiratiratu i te akaari anga e te rekareka nei ratou i te taangaanga i te ingoa tu-Atua?
21 I teianei ko tei maata roa atu i to mua ana ko te taime teia no te aronga e mataku ra ia Iehova kia “kapiki atu iaia ra ma te tuatua tika.” E mea rekareka na tona aronga tiratiratu i te taangaanga i tona ingoa i roto i ta ratou au pure e i roto i te au tuatuaanga ta ratou e rave ana i ko i ta ratou au uipaanga. E taangaanga ana ratou i te ingoa tu-Atua i roto i te au pukapukaanga ngaro. E te akakite maroiroi nei ratou i to Iehova ingoa ki te katoatoa rava i roto i ta ratou angaanga orometua.—Roma 10:10, 13-15.
22. Eaa i puapinga ai te patoi ua atu rai i te au tu e te au anoano o teianei ao?
22 Kia puapinga ua atu rai mei to tatou pirianga vaitata ki te Atua ko Iehova, e mea puapinga katoa kia tamou marie atu rai tatou i te patoi anga i te au apinga kino i te pae vaerua mei te noinoi apinga, te tamataoraanga tau kore, te tu vaerua kare inangaro i te akakore i te ara a tetai ke, me kore te tu manako kore atu i te aronga tei ngere. (1 Ioane 2:15-17; 3:15-17) Me kare e akatanoia, ka riro taua au aruaruanga e te au tu i te taopenga ki roto i te rave matau anga i te au ara kino e i te openga ki te ngere i ta Iehova akaperepereanga. (1 Ioane 2:1, 2; 3:6) Ko te aerenga o te pakari koia oki kia akamanako e ka akaari ua mai rai a lehova i te aroa takinga meitaki, me kore i te aroa tiratiratu, kia tatou anake me vai tiratiratu tatou kiaia.—2 Samuela 22:26.
23. Eaa te tuatau mekameka i mua e tiaki maira i te katoatoa rava o to te Atua aronga tiratiratu?
23 No reira kia tamou marie ua atu rai tatou i te akamou i to tatou manako ki runga i te tuatau mekameka i mua e tiaki maira i te katoatoa rava o to Iehova aronga tiratiratu. Na te rave anga i te reira, ka rauka ia tatou te tikaanga umere roa o te kapitiia atu anga ki rotopu i te aronga te ka akateitei, ka akameitaki, e ka akapaapaa ia Iehova “i te ra katoa ra” e “e mutu kore ua atu.” (Salamo 145:1, 2, NW) No reira e ‘tamou tikai i to tatou uaorai inangaro i te Atua e tae ua atu ki te ora mutu kore.’ (Iuda 20, 21) Ia tatou e puapinga ua atura mei te au tu umere tikai o to tatou Metua i te rangi, kapiti mai te aroa takinga meitaki maata tana i akaari mai ki te aronga tei inangaro iaia, kia aite ua rai to tatou au manako mei tei tuatuaia e Davida i roto i te au tuatua openga o Salamo 145: “Ka tuatua toku nei vaa i te akapaapaaanga ia Iehova; e kia akapaapaa te tangata ravarai i tona ra ingoa e tuatau, e e mutu kore ua atu.”
Akapeea Koe me Pau?
• Akapeea te Salamo 145 i te tauturu anga i te akataka i to te Atua aronga tiratiratu?
• Akapeea a Iehova i te ‘akamerengo anga i te anoano o te au mea ora ravarai nei’?
• Eaa tatou ka anoano ei i te akapiri vaitata atu kia Iehova?
[Au Uianga Apii]
[Tutu i te kapi 16]
E mea rekareka na to te Atua aronga tiratiratu i te uriuri anga i tana au angaanga ririnui
[Tutu i te kapi 17]
Te tauturu maroiroi nei to Iehova au tavini i te au aronga ke i te apii no runga i te kaka o tona arikianga
[Au Tutu i te kapi 18]
Te oronga ua maira a Iehova i te kai na te “au mea ora ravarai nei”
[Akameitakianga]
Animals: Parque de la Naturaleza de Cabárceno
[Tutu i te kapi 19]
Te oronga ua maira a Iehova i te maroiroi e te aratakianga ki tona aronga tiratiratu, ko te kimi ra i tana tauturu na roto i te pure