‘Kare te Atua i Noo i Roto i te Nao i Angaia e te Rima Tangata Nei’

KARE ekoko anga e kua matau te apotetoro ko Paulo i te au iero o Atena, no te mea ka kiteaia teia i te au oire maata tana i atoro atu i tona au tere mitinari. Kia tau ki The Encyclopædia Britannica, kua rongonui a Atena ei atua vaine kare no te tamaki ua e te pakari mari katoa “no te au apinga maaniia e te au aruaruanga tu karape noa ua nei i te taime au.”

Ko Patenona te iero rongonui roa atu o Atena, tei akatuia i Atene, te oire tei tapaia i te atua vaine. Ko tei manakoia e ko tetai o te au iero maata roa atu i te ao taito, te vaira i Patenona te tiki auro e te nio erepani o Atena e 12 mita te teitei. Ia Paulo i atoro ei ia Atene, kua riro takere teia iero toka teatea kanapanapa ei ngai puapinga maata i roto i te oire no tetai au 500 mataiti.

Ma te Patenona e kitea atura, kua tutu aere a Paulo ki tetai pupu tangata Atene no runga i te ‘Atua kare i noo i roto i te nao i angaia e te rima tangata nei.’ (Angaanga 17:23, 24) Penei no te tu ngateitei o to Atena au iero me kare te mekameka o tona au itoro kua riro aia ei mea akaieie atu ki tetai papaki e akarongo ra kia Paulo kare ra ki tetai Atua akara koreia kare ratou i kite. Inara, mei ta Paulo i tou maira, kare e tau kia manakoia e ko Tei Anga i te au tangata ravarai kua ‘aite i te auro, e te ario, e te toka, i taraiia e te . . . tangata nei.’​—Angaanga 17:29.

Te au atua tane e te au atua vaine mei ia Atena​—tei runga ua to ratou kaka i te au iero e te au tiki​—kua aere mai e kua ngaro ke atu. Kua ngaro te tiki o Atena mei te Patenona i te 5 anere mataiti T.N., e ko te toetoenga ua o tona au iero te vai ua nei rai. Koai i teia tuatau te akara ra kia Atena no te pakari e te aratakianga?

Mei teaa tikai te tuke kia Iehova, “te Atua mate kore” ko tei kore e tangata i kite mata ana. (Roma16:26; 1 Ioane 4:12) Kua tata te au tamariki tamaroa a Kora: “Ko te Atua nei rai oki to tatou Atua e tuatau e tuatau ua atu: e arataki rai oki aia ia tatou.” (Salamo 48:14) Ko tetai mataara e rauka ai te rekarekaanga i ta te Atua ko Iehova ra aratakianga, na te apiianga i tana Tuatua, te Pipiria, e kia akono i te au akoanga i roto i to tatou oraanga.