Te Au Taputou ka Rauka ia Koe i te Irinaki

KUA kite rai te peroveta a te Atua ko Mika e te maata anga o te taime kua riro te au taputou kare e tau kia irinakiia. I tona tuatau, kare katoa rai te au oa vaitata e irinaki uaia ana kia akono i ta ratou tuatua. No reira a Mika i akamatakite mai ei e: “Auraka kotou e akarongo ua atu ki te oa, auraka e irinaki ki te oa tumanava; e tiaki marie i te ngutupa o to vaa ki tei moe ki roto i to keke ra.”​—Mika 7:5.

Kua akatika ainei a Mika i teia turanga mii nei kia akariro iaia kia ekoko no runga i te au taputou pouroa? Kare! Kua akakite mai aia i te irinaki ki katoa anga i roto i te au taputou ta tona Atua ra, ko Iehova i maani. “E akara ra au ia Iehova,” i tata ei a Mika, “e tapapa au i te Atua o toku nei ora; e akarongo mai taku Atua iaku nei.”​—Mika 7:7.

Eaa ra i rauka ai ia Mika taua irinaki anga ra? No te mea kua kite aia e e akono ua ana rai a Iehova i tana tuatua. Te au mea pouroa ta te Atua i taputou ki te ai metua o Mika kua ope rava akera i te tupu. (Mika 7:20) To Iehova tu tiratiratu i te tuatau i topa kua orongaia kia Mika te au tumu  ravarai kia irinaki e ka akono Aia i Tana tuatua i te tuatau ki mua.

‘Kare Rava Tetai o te Tuatua . . . i Poka’

Kua kite a Mika, ei akaraanga, e kua akaora mai a Iehova i to Iseraela mei te tuikaa i Aiphiti ra. (Mika 7:15) Ko Iosua, tei kite i taua akaoraanga, kua akamaroiroi i tona au oa Iseraela kia akarongo ki te au taputou katoatoa a te Atua. No runga i teea tumu? “Kua kite oki kotou ravarai i roto i to kotou ngakau, e i roto i to kotou katoa au vaerua,” ta Iosua i akamaara atu kia ratou, “e kare rava tetai o te au mea meitaki ta to kotou Atua ta Iehova i tuatua mai ia kotou i poka; kua ope rava i te tupu ia kotou, kare rava tetai o te reira i toe.”​—Iosua 23:14.

Kua kite meitaki te au Iseraela e kua rave a Iehova i te au mea umere no ratou. Kua akatupu aia i tana taputou ki to ratou ai metua ko Aberahama tei mataku i te Atua e ka riro mai tona uanga mei te au etu te maata e ka noo iora i te enua ia Kanaana. Kua akakite katoa a Iehova kia Aberahama e ka mamae i te takinga kino tana uanga e 400 mataiti inara ka oki akaou atu ki Kanaana i te “a o te uki.” Kua tupu katoatoa mai teia.​—Genese 15:5-16; Exodo 3:6-8.

Kua ariki meitakiia mai te au Iseraela i Aiphiti i te au tuatau o Iosepha te tamaiti a Iakoba. I muri maira kua tuku atu te au tangata Aiphiti ia ratou ki roto i te angaanga tuikaa kino, inara tei tika ki ta te Atua taputou, i roto i te tuatau o te a o te uki ra mei te tuatau i tomo atu ei ratou ki Aiphiti, kua akarangatiraia mai teia uanga a Aberahama mei te tuikaa anga Aiphiti. *

Kua tere atu i tera mai 40 mataiti, e akapapu anga ke ta te au Iseraela e kua akono ua rai a Iehova i tana au taputou. I te tuku mai anga te ngati Amaleka i te tamaki tika kore ki runga i to Iseraela, kua tamaki te Atua no tona iti tangata e kua paruru ia ratou. Kua akamerengo aia i to ratou au anoano katoatoa i te pae materia i te tuatau o to ratou 40 mataiti i te aere anga na roto i te metepara e i te openga iora kua noo ratou i roto i te Enua Taputouia. Ia Iosua e akamaara akaou ra i te tuatua enua no ta Iehova i rave ki teia uanga a Aberahama, kua rauka iaia i te karanga ma te irinaki anga e: “Kare rava tetai mea meitaki ta Iehova i tuatua mai ki te ngutuare o Iseraela i poka: ope rava akera i te tupu.”​—Iosua 21:45.

Akatupu Anga i te Irinaki ki Roto i te Au Taputou a te Atua

Akapeea e rauka ai ia koe i te akatupu i te akarongo ki roto i te au taputou a Iehova, mei ta Mika raua ko Iosua i rave ana? I na, akapeea koe i te akatupu anga i te irinaki ki roto i tetai ke? Ka rauka ia koe kia maata atu toou kite no runga ia ratou. Ei akatauanga, penei ka kite koe e ka irinakiia ratou na te akara anga e kua tauta ratou i te akatupu tiratiratu i ta ratou au taputou katoatoa. E tupu ua atu toou kite no taua au tangata, ka akatupu marie koe i te irinaki i roto ia ratou. Ka rauka ia koe i te rave i te reira me tae mai ki te akatupu anga i te akarongo ki roto i te au taputou a te Atua.

E tai mataara ka rauka ia koe i te rave i teia na te akamanako anga ki runga i te au mea angaia e te au ture ta te reira e akatere ra. Kua tuku te au taineti i to ratou irinaki anga ki roto i teia au ture, mei tei akatere i te tu o tetai teera okotai o te tangata i te takake anga e te akamaata anga kia akatupu e tirioni ua atu te au teera te maani anga i toou kopapa. Ko te tika, te au ture te akatere ra i te tu o te apinga e te ririnui i roto i te ao katoa e pini ua ake e mea tau na tei Maani Ture  kia irinaki katoaia tei akanooia. Papu e ka rauka ia koe i te irinaki i tana au taputou, mei taau rai e irinaki ra i roto i te au ture tei akatere i tana au mea i angaia.​—Salamo 139:14-16; Isaia 40:26; Ebera 3:4.

Na roto i te peroveta ko Isaia, e tangata no te tuatau o Mika, kua taangaanga a Iehova i te ravenga putuputu o te au reva e te aerenga umere o te vai kia akatutu i te tu irinaki anga o tana tuatua. I te mataiti tataki tai kua ua mai. Kua tamauu te reira i te one e te maani ra te reira kia rauka i te au tangata i te ruru i ta ratou ua e te kokoti i te au kai. No runga i teia, kua karanga a Iehova e: “Mei te ua e topa nei, e mei te kiona, no runga mai i te rangi ra, e kare i oki akaou ki reira, kua tamauu ra i te enua, e kua akatupu ra, e kua akauua mai oki i tana, i raukaʼi oki te ua i te aronga e ruru, e te kai i te aronga e kai ra: Koia katoa taku tuatua no roto i toku nei vaa; kare e oki puapinga kore ua mai kiaku nei, e tupu ra tei akakoroia e au ra; e manuia oki te mea i akaue atu ei au ra.”​—Isaia 55:10, 11.

Au Taputou Papu no te Parataito

Te akara matatio anga i te au mea i angaia ka rauka i te akatupu i te irinaki anga ki roto i Tei Anga ra, inara e maata ua atu te apinga te anoanoia ra me te inangaro ra koe i te kite no runga i te au taputou te riro ra ei tuanga no te “tuatua no roto i [tona] nei vaa.” Kia kite no runga i teia au taputou kia rauka ia koe i te tuku i toou irinaki anga ki roto ia ratou, te anoanoia ra koe kia akara matatio i te tataanga akauru anga Tuatua Tapu tu-Atua no ta te Atua akakoroanga no te enua e tana au ravenga ma te au tangata.​—2 Timoteo 3:14-17.

E irinaki anga to te peroveta ko Mika ki roto i ta Iehova au taputou. E maata ua atu tei rauka mai ia koe no te tataanga akauruia a te Atua kare i rauka ana ia Mika. Ia koe e tatau ra i te Pipiria e te manako anga no runga i te reira, ka rauka katoa ia koe i te akatupu i te akarongo ki roto i te akatupuanga o ta te Atua au taputou. Ko teia au taputou kare anake e piri maira ki te uanga kopapa o Aberahama mari ra ki te au tangata katoatoa. Kua taputou a Iehova ki teia pateriareka mataku i te Atua e: “E ka akameitaki te pa enua katoa o te ao nei i toou ra uanga; ko koe i akarongo mai i toku reo nei.” (Genese 22:18) Te tuanga maata o te “uanga,” me kare te anaunga, o Aberahama koia oki ko te Mesia, ko Iesu Karaiti.​—Galatia 3:16.

Na roto ia Iesu Karaiti, ka akapapu mai a Iehova i te reira e ka maringi ua mai te au akameitaki anga ki te au tangata te akarongo ra. E eaa ta te Atua i taputou mai te ka raveia i to tatou tuatau nei? Te pau maira a Mika 4:1, 2 na teia au tuatua i totouia mai e: “E riro kia tae ki te au rā openga ra, e akatinamouiaʼi te maunga ra o te are o Iehova ki runga i te take o te au maunga ra, e ka akateiteiia ïa ki rungao i te au tuaivi ra, e ka uipa mai te au tangata ki reira. E manganui te enua e aere, ma te tuatua e, Aere mai, ka aere tatou ki runga i te maunga o Iehova, e ki te are o te Atua o Iakoba, e nana e apii mai ia tatou i tona au aerenga; e ka aere tatou na tona ra au arataa.”

Te aronga tei apiiia no runga i te au arataa o Iehova ka “tupaki ratou i ta ratou au koke ei auri arote, e ta ratou au korare ei tipi tope ïa.” Ka ngaro ke atu tetai ua atu au tu mei te tamaki rai. Kare e roa atu ka akakiia te enua e te au tangata tuatua tika, e kare tetai ua atu tangata e tamataku mai ia ratou. (Mika 4:3, 4) Ae, te taputou maira te Tuatua a te Atua e i raro ake i te tutara anga Patireia i roto i nga rima o Iesu Karaiti, ka takore a Iehova mei te enua nei i te aronga taomi anga katoatoa.​—Isaia 11:6-9; Daniela 2:44; Apokalupo 11:18.

Te aronga katoa tei mamae e tei mate no te meameaau a te tangata i te patoi anga i te anoano o te Atua ra ka akatuakaouia mai ma te manakonako anga i te noo ki runga i te enua e tuatau ua atu. (Ioane 5:28, 29) Ko Satani e tana au  temoni, tei akatupu i te ravenga kino, ka ngaro ke atu mei te enua, e te au tupuanga no ta Adamu ara ka takoreia na roto i te atinga oko o Iesu. (Mataio 20:28; Roma 3:23, 24; 5:12; 6:23; Apokalupo 20:1-3) E eaa te turanga no te au tangata tei akarongo ra? Eaa oki, ka akameitakiia ratou ma te ora mutu kore i te oraanga kopapa tiama i runga i te enua parataito!​—Salamo 37:10, 11; Luka 23:43; Apokalupo 21:3-5.

E au taputou umere tikai teia! Inara ka irinaki ainei koe i te reira? E tikai ka rauka ia koe. Kare teianei au taputou e na te au tangata penei e au akakoroanga meitakiia inara te ngere ra i te mana i te akatupu i te reira. E au taputou te reira na te Atua Mana Katoatoa, kare rava e pikikaa ana e ‘kare i akaroaroa i tana i tuatua maira.’ (2 Petero 3:9; Ebera 6:13-18) Ka rauka ia koe te irinaki ki katoa ki roto i te au taputou katoatoa te vaira i roto i te Pipiria, no te mea to ratou Tumu koia oki ko ‘Iehova, te Atua tuatua-mou.’​—Salamo 31:5.

[Tataanga Rikiriki i Raro]

[Tataanga i te kapi 6]

“E kare rava tetai o te au mea meitaki ta to kotou Atua ta Iehova i tuatua mai ia kotou i poka.”​—IOSUA 23:14

[Au Tutu i te kapi 4, 5]

Kua akono a Iehova i tana au taputou ki to Iseraela i te Tai Muramura e i roto i te metepara

[Au Tutu i te kapi 7]

Kua akatupu a Iehova i tana taputou kia Aberahama. Ko tana Uanga, ko Iesu Karaiti, ka apai mai i te au akameitaki anga ki te au tangata