To Iehova Tu Maata e Kitea Koreia Kia Kimi
To Iehova Tu Maata e Kitea Koreia Kia Kimi
“E maata oki a Iehova e kia akapaapaa maataia. E tona ra tu maata e kitea koreia kia kimi.”—SALAMO 145:3, NW.
1, 2. Mei teaa ra to Davida tu, e i akapeea tana akamanako anga iaia uaorai i te pirianga atu ki te Atua?
KO TE tangata tata o Salamo 145 koia tetai o te au tangata rongonui roa atu o te tuatua enua. Iaia e tamaiti ua ra, kua aro atu aia i tetai tuputupua tei rakeiia i te taonga tamaki e kua ta iaia. E ei ariki tumutoa, kua autu teia tangata tata taramo ki rungao i te au enemi e manganui. Ko tona ingoa ko Davida, e koia te rua o te ariki o Iseraela i taito. Kua vai rai to Davida rongo i muri ake i tona matenga, no reira e tae ua mai ki teia tuatau e mirioni ua atu tei kite i tetai apinga no runga iaia.
2 Noatu ta Davida au angaanga meitaki i akatupu, e tu manako akaaka ra tona iaia uaorai. No runga ia Iehova, kua imene aia: “Kia akara au i to au rangi i te angaanga a to maikao-rima na; te marama e te au etu taau i anga ra; Eaa te tangata nei, i manako mai ei koe iaia? e ta te tangata nei tamaiti, i akono mai ei koe iaia?” (Salamo 8: 3, 4) Kare aia i manako maata iaia uaorai e e maata, kua tuku ra a Davida i te akaoraangaia mei tona au enemi pouroa kia Iehova e kua tuatua no runga i te Atua: “Kua oronga katoa mai koe kiaku i te paruru ora naau: e na toou maru i maataʼi au.” (2 Samuela 22:1, 2, 36) Te akakite maira a Iehova i te tu akaaka i te akaari anga i te aroa ki te aronga ara, e kua ariki rekareka a Davida i to te Atua aroa ua.
‘E Akateitei Au i te Atua i te Ariki’
3. (a) Eaa ta Davida akaraanga no to Iseraela taoonga ariki? (e) Mei teaa te maata o to Davida anoano kia akapaapaa ia Iehova?
3 Noatu oki e ko Davida ta te Atua ariki akamanaia, kua akara ra aia ia Iehova e ko te Ariki tika tikai o Iseraela. I tuatua ai a Davida: “Tei ia koe [“te Patireia,” NW] e Iehova, e ko koe tei teitei ei upoko i te au mea katoa nei.”(1 Paraleipomeno 29:11) E mei teaa ra to Davida ariki rekareka i te Atua ei Tutara! “Ka akateitei au ia koe, e taku Atua e te Ariki,” i imene ei aia, “E ka akameitaki au i toou na ingoa e tuatau, e e mutu kore ua atu. I te ra katoa ra e akameitaki au ia koe. E ka akapaapaa rai au i toou na ingoa e tuatau, e e mutu kore ua atu.” (Salamo 145: 1, 2) Ko to Davida anoano ia kia akapaapaa i te Atua ko Iehova i te ra katoa e mutu kore ua atu.
4. Te akakite pu ra te Salamo 145 i teea akaapaanga pikikaa?
4 E pauanga ririnui tikai te Salamo 145 ki ta Satani akaapaanga e e tutara noinoi te Atua ko tei karapii i te tu rangatira mei tana au mea i anga. (Genese 3:1-5) Te akakite pu katoa ra teia taramo i ta Satani pikikaa e ko te aronga e akarongo ra i te Atua te rave ua ra no ta ratou ka rauka mei te reira, kare ra no te mea e te inangaro ra ratou i te Atua. (Iobu 1:9-11; 2:4, 5) Mei ia Davida rai, te oronga nei te au Kerititiano mou i teia tuatau i tetai pauanga ki te akaapaanga pikikaa a te Tiaporo. Te akaperepere ra ratou i to ratou manakonakoanga no te oraanga mutukore i raro ake i te tutaraanga Patireia no te mea te anoano ra ratou i te akapaapaa ia Iehova e tuatau ua atu. E mirioni ua atu, tei akamata ke ana i te taangaanga i te akarongo i roto i te atinga oko o Iesu e na te tavini anga ia Iehova ma te akarongo no te aroa ei aronga akamori akatapuia, tei papetitoia.—Roma 5:8; 1 Ioane 5:3.
5, 6. Eaa te au tuatau e vai ra i te akameitaki e te akapaapaa ia Iehova?
5 E akamanako ua ana i te maata o to tatou au tuatau i te akameitaki e kia akapaapaa ia Iehova ei au tavini nona. Ka rauka ia tatou i te rave na roto i te pure me akatukia oonuia tatou e tetai apinga ta tatou i tatau i roto i tana Tuatua, i te Pipiria. Te arikianga rekareka e te akameitakianga maata ka rauka kia akakiteia me akakeuia tatou e ta te Atua mataara no te akono anga i tona iti tangata me kore me reka tikai tatou i tetai tuanga umere o tana au mea i anga. Ka akameitaki katoa tatou i te Atua ko Iehova me uriuri tatou i tona au akakoroanga ma te au oa akarongo i ko i te au uipaanga Kerititiano me kore i te taime o te au pukapukaanga ngaro. Ko te tika, pouroa te au “angaanga meitaki” tei raveia i roto i te au akakoroanga no to te Atua Patireia ka apai mai i te akapaapaaanga kia Iehova.—Mataio 5:16.
6 Ko te au akaraanga i oti ua akenei o taua au angaanga meitaki ra ka kapiti mai i te patuanga o te au ngai akamorianga e manganui a to Iehova iti tangata i roto i te au enua putaua. E manganui to teia i raveia ma te tauturu i te pae moni a te au oa akarongo i te au enua ke. Tetai au Kerititiano kua oronga i te tauturu na te aere ua anga ki taua au ngai ra kia piri atu ki roto i te patuanga o te au Are Uipaanga Patireia. E ko te mea puapinga roa atu o te au angaanga meitaki pouroa koia oki ko te akapaapaa ia Iehova na te tutu anga i te tuatua meitaki o tona Patireia. (Mataio 24:14) Mei ta te au irava o muri mai i roto i te Salamo 145 e akaari maira, kua ariki rekareka tikai a Davida i ta te Atua tutaraanga e kua akateitei i Tona patireia. (Salamo 145:11, 12, NW) Kua aiteite ainei taau arikianga rekareka no ta te Atua mataara aroa o te tutara anga? E te tuatua putuputu ra ainei koe ki etai ke atu no runga i tona Patireia?
Au Akaraanga o to te Atua Tu Maata
7. Oronga mai i tetai tumu maata no te akapaapaa ia Iehova.
7 Te oronga maira te Salamo 145:3 i tetai tumu maata no te akapaapaa ia Iehova. Kua imene a Davida: “E maata oki a Iehova e kia akapaapaa maataia. E tona ra tu maata e kitea koreia kia kimi.” (NW) Ko to Iehova tu maata kare i takotingaia. Kare te reira e kitea puia kia kimi, kia marama puia, me kore kia vaitoia e te tangata. Inara ka puapinga tikai ra tatou i teianei mei te akamanako anga i te au akaraanga o to Iehova tu maata kare e kitea kia kimi.
8. Eaa ta te ao e pini ua ake e akakite maira no to Iehova tu maata e te mana?
8 E tamata i te akamaara i tetai atianga i toou takake anga atu mei te au mori marama o te oire maata e kua akara atu ki runga i te rangi i tetai po kare takiri e tiao. Kare aina koe i umere ana i te manganui o te au etu e kitea atura i roto i te poiri kerekere o te mareva? Kare aina koe i akakeuia ana kia akapaapaa ia Iehova no tona tu maata i te anga mai anga i taua au apinga pouroa ra o te rangi? Inara, ko taau i kite, mari ko tetai manga tuanga iti ua o te numero o te au etu i roto i te tarava tei riro te enua nei ei tuanga. Kapiti katoa atu, mei tei tamanakoia kua tere atu i te anere pirioni au tarava e vaira, e toru ua rai te ka kiteaia atu ma te kore te tauturu a te teretikopu. E tika rava e, ko te au etu tei kore e rauka kia tareia e te au tarava tei akatumu i te ao maata e pini ua ake e akakiteanga ki to Iehova mana ririnui i te anga e te tu maata kitea koreia kia kimi.—Isaia 40:26.
9, 10. (a) Eaa te au tuanga o to Iehova tu maata tei akakiteia i roto i te pirianga kia Iesu Karaiti? (e) Akapeea te tuakaouanga o Iesu i te akakeu anga i to tatou akarongo?
9 Akamanako ana ra i tetai au tuanga ke atu o to Iehova tu maata—ko tei piri mai a Iesu Karaiti ki roto. To te Atua tu maata kua akaariia mai i roto i te anga anga i tana Tamaiti e te taangaanga anga iaia no te au tuatau roa ei “pu rave angaanga” Nana. (Maseli 8:22-31, NW) Kua kiteaia te tu maata o to Iehova aroa i tona oronga anga mai i tana Tamaiti anau tai ei atinga oko no te tangata nei. (Mataio 20:28; Ioane 3:16; 1 Ioane 2:1, 2) E tei mamao roa atu i to te tangata nei marama koia oki ko te kopapa vaerua kaka e te mate kore ta Iehova i akapapa no Iesu i tona tuakaouanga.—1 Petero 3:18.
10 Ko to Iesu tuakaouanga kua kapiti mai i te au tuanga umere e manganui o to Iehova tu maata kitea koreia kia kimi. Kare e ekoko e kua akaoki akaou mai te Atua i to Iesu manako no runga i te angaanga tei kapitiia atu ki roto i te angaia anga te au apinga tei akaraia e tei kore e akaraia. (Kolosa 1:15, 16) Ko teia ka o mai te au mea ora vaerua, te ao e pini ua ake, te enua mou, e te au tu oraanga kopapa katoatoa takapini i to tatou ao katoa nei. Kapiti atu ki te akaoki akaou anga mai i te kite o tana Tamaiti no te tuatua enua katoa o te oraanga i te rangi e te enua tei kiteaia i te tuatau o te oraanga o te Tamaiti i mua atu, kua kapiti atu a Iehova i ta Iesu i kite ei tangata apa kore. Ae, kua kiteaia to Iehova tu maata kitea koreia kia kimi i roto i to Iesu tuakaouanga. Tetai katoa, ko tera raveanga maata e akapapuanga ia e ka rauka te tuakaouanga no etai ke atu. Ka tau te reira ei akaketaketa i to tatou akarongo e ka rauka i te Atua i te akaora akaou mai i te mirioni ua atu o te au tangata mate tana i tamou ki tona manako apa kore.—Ioane 5:28, 29; Anga. 17:31.
Au Angaanga Umere e te Au Ravenga Ririnui
11. Eaa ta Iehova angaanga maata i akamataia i te Penetekote 33 M.T N.?
11 Mei te tuakaouanga mai o Iesu, e manganui ta Iehova au angaanga maata ke atu e te umere i rave. (Salamo 40:5) I te Penetekote 33 M.T.N., kua anga a Iehova i tetai enua ou, ko “te Iseraela o te Atua,” tei akamataia ki te au pipi a Karaiti tei akatainuia ki te vaerua tapu. (Galatia 6:16) Na roto i tetai mataara ririnui, kua akamaataia atu teia enua ou i te pae vaerua na roto i te ao katoa tei kiteia i taua taime ra. Noatu te tu apoteiti tei arataki atu ki te akatupuanga mai o Kerititome i muri ake i te matenga o ta Iesu au apotetoro, kua rave mou atu rai a Iehova i te au angaanga umere i te akapapu i te akatupuanga o tona akakoroanga.
12. Ko te tika e ka rauka te Pipiria i roto i te au reo tumu pouroa i runga nei i te enua e akakiteanga te reira no teaa?
12 Ei akaraanga, kua akaoraia mai te papaanga o te Pipiria e i te openga kua uriia ki roto i te au reo tumu i runga nei i te enua i teia tuatau. Te urianga o te Pipiria e putuputu ana i te raveia i raro ake i te au turanga ngata e i raro ake i te tamatakuanga o te mate mei to Satani au rima rave. Kia papu e, kare te urianga o te Pipiria tei tere atu i te 2,000 reo e rauka naringa teia e kare i te anoano no te Atua ko Iehova, tei kitea koreia tona tu maata kia kimi!
13. Mei te 1914 mai, akapeea to Iehova tu maata i te akaari angaia mai i roto i te pirianga ki tona au akakoroanga Patireia?
13 Kua akaariia mai ana to Iehova tu maata i roto i te pirianga ki tona au akakoroanga Patireia. Ei akatauanga, i te mataiti 1914, kua tuku aia i tana Tamaiti, ko Iesu Karaiti, ei Ariki i te rangi. I muri poto ua ake, kua rave a Iesu i tei anoanoia kia Satani e tana au temoni. Kua uriia atu ratou ki vao mei te rangi e kua akanooia ki te tuanga o te enua, i reira ratou tiaki ei i to ratou uriangaia ki roto i te vaarua takere kore. (Apokalupo 12:9-12; 20:1-3) Mei reira mai, kua maata roa atu te takinokino ta te au pipi akatainuia a Iesu i kite. Inara, kua akono a Iehova ia ratou i roto i teia tuatau o to Karaiti parutia kitea koreia.—Mataio 24:3, NW; Revelation 12:17.
14. Eaa te au angaanga umere ta Iehova i rave i te 1919, e eaa ta teia i akatupu?
14 I te mataiti 1919, kua rave a Iehova i tetai angaanga umere ke atu tei akatutu mai i tona tu maata. Ta Iesu au pipi akatainuia, tei akamoraro roaia ana ki te turanga angaanga kore i te pae vaerua, kua akaoraora akaouia. (Apokalupo 11:3-11) I te au mataiti mei reira mai, kua tutu maroiroi te aronga akatainuia i te tuatua meitaki o te Patireia tei akanooia i te rangi. Ko etai atu aronga akatainuia kua akaputuputuia kia akatae i te numero o te 144,000. (Apokalupo 14:1-3) E na roto i te au pipi akatainuia a Karaiti, kua akanoo a Iehova i te tango o “te enua ou,” e taiate tangata tuatua tika. (Apokalupo 21:1) Inara eaa te ka tupu ki te “enua ou” i muri ake i te aere pouroa anga te aronga tiratiratu akatainuia ki runga i te rangi?
15. Eaa te angaanga ta te au Kerititiano akatainuia i akamata, e eaa te au mea tei tupu?
15 I te 1935, tei roto i nga itiu o Aukute 1 e Aukute 15 o teia tianara te nga atikara maata no runga i te “aronga maata rava,” tei taikuia i roto ia Apokalupo pene 7. Kua akamata te au Kerititiano akatainuia i te kimi maroiroi e i te apai ki roto i to ratou akaputuputuanga i teia au oa akamori mei te au pa enua, te au kopu, te au iti tangata, e te au reo. Ko teia “aronga maata rava” nei ka ora atu mei te “mate maata” e vaitata maira, ma te tikaanga no te oraanga e tuatau ua atu i roto i te Parataito ei au mema tinamou no te “enua ou.” (Apokalupo 7:9-14) No te angaanga tutu aere i te Patireia e te akariro i te tangata ei au pipi, tei akamataia e te au Kerititiano akatainuia, i teianei kua tere atu i te ono mirioni tangata tei rauka te manakonakoanga no te oraanga mutukore i roto i te pararaito i te enua nei. Koai te ka tau kia rauka te akameitakianga no taua tupuanga maata ra i roto i te aro o te patoianga mei ia Satani e tona ao kino? (1 Ioane 5:19) Ko Iehova ua te ka rauka i te akatupu katoatoa i teia, na te taangaanga anga i tona vaerua tapu.—Isaia 60:22; Zekaria 4:6.
To Iehova Mekameka Kaka e te Ngateitei
16. No teaa te tangata i kore ei e rauka kia kite tikai i ‘te mekameka kaka o to Iehova ngateitei’?
16 Noatu eaa to ratou tu, ko te au “ravenga ririnui” e te au “angaanga umere” a Iehova kare rava e akangaropoinaia. Kua tata a Davida: “Ka akameitaki tera uki e tera uki i taau ra au angaanga. E i taau ra au ravenga ririnui ka akakite oki ratou. Te mekameka kaka o toou ra ngateitei E taau ra au angaanga umere ko toku ia manakoanga. E ka tuatua oki ratou i taau uaorai au ravenga mataku; E ka akakite oki au i toou ra tu maata.” (Salamo 145:4-6, NW) Inara, eaa te maata o ta Davida i kite no runga i te mekameka kaka o Iehova, ina ‘e vaerua te Atua’ e no reira kare e kiteaia e te mata tangata?—Ioane 1:18; 4:24.
17, 18. I akapeea ra i tupu ei to Davida arikianga rekareka no ‘te mekameka kaka o to Iehova ngateitei’?
17 Noatu oki e kare aia e kite atu ana i te Atua, te vaira ra te au mataara no Davida kia akatupu atu i te arikianga rekareka no to Iehova ngateitei. Ei akatauanga, kua rauka iaia i te tatau i te rekoti o te Tuatua Tapu no ta te Atua au ravenga ririnui, mei te akapouanga rai o tetai ao kino na roto i te vaipuke takapini i te ao katoa. Penei, kua kite a Davida e i akapeea te au atua pikikaa o Aiphiti i te taakama angaia i te akaora anga mai te Atua i to Iseraela mei te tuikaaanga i Aiphiti. Kua riro taua au tupuanga ra ei akakiteanga i to Iehova ngateitei e te tu maata.
18 Kare e ekoko kua tupu to Davida arikianga rekareka no to te Atua ngateitei kare ra e na te tatau ua anga i te au Tuatua Tapu mari katoa ra na te manakonako anga no runga ia ratou. Ei akatauanga, penei i manakonako ana aia no runga i tei tupu i te oronga anga a Iehova i te Ture ki te ngati Iseraela. Kua aruru te mangungu, raparapa te uira, teimaa te tiao, e te tangi maata o te pu. Ngaueue te Maunga i Sinai e kua auai. Te akaputuputu anga ki raro i te tumu o te maunga, kua rongo katoa to Iseraela “i nga tuatua okotai ngauru ra” mei roto i te ai e te tiao ia Iehova i tuatua atu ei kia ratou na roto i tetai angera komono. (Deuteronomi 4:32-36; 5:22-24; 10:4; Exodo 19:16-20; Anga. 7:38, 53) Mei teaa ra te au tu akakiteanga o to Iehova mekameka! Te aronga inangaro i te Tuatua a te Atua ko tei manakonako no runga i teia au tataanga kare atu ei mari ra ka akakeuia e ‘te mekameka kaka o to Iehova ngateitei.’ I teia tuatau, ra oki, kua rauka ia tatou te katoaanga o te Pipiria, tei roto te au orama kaka tuke tuke tei akarekareka ia tatou i to Iehova tu maata.—Ezekiela 1:26-28; Daniela 7:9, 10; Apokalupo, pene 4.
19. Eaa te ka akamaata atu i to tatou arikianga rekareka no to Iehova ngateitei?
19 Tetai mataara ke atu i akakeuia ai a Davida ki to te Atua ngateitei koia oki na te apii anga i te au ture ta te Atua i oronga ki to Iseraela. (Deuteronomi 17:18-20; Salamo 19:7-11) Kua riro te akarongo ki ta Iehova au ture i te akangateitei i te enua o Iseraela e te akataka ke i te reira mei te katoatoa o te au iti tangata ke atu. (Deuteronomi 4:6-8) Mei tei tika ki ta Davida tuatua, na te tatau putuputu i te au Tuatua Tapu, te manakonako anga oonu no runga ia ratou, e te apii maroiroi e akamaata atu i to tatou arikianga rekareka no to Iehova ngateitei.
Aue te Maata o to te Atua Au Tu Akono Tau!
20, 21. (a) Te akateitei ra te Salamo 145:7-9 i to Iehova tu maata i roto i te pirianga ki teea au tu? (e) Eaa ta te au tu o te Atua tei taikuia i konei ka akatupu ki runga i te aronga tei inangaro iaia?
20 Mei ta tatou i kite mai ana, te oronga maira te au irava mua e ono o Salamo 145:1-6 i te au tumuanga tau no te akapaapaa ia Iehova no te au apinga tei akapiriia atu ki tona tu maata kitea koreia kia kimi. Te au Sal 145 irava 7 ki te 9 te akateitei ra i to te Atua tu maata na te tuatua anga i tona au tu akono tau. Kua imene a Davida: “E rekareka oki ratou i te tuatua i te maata o toou na tu maata. E [no] taau na tuatua tika ka maeva oki ratou i te rekareka. E aroa ua to Iehova e te tangi, Kare e riri vave e te maata o te aroa takinga meitaki. E meitaki oki to Iehova ki te tangata katoa, E tona ra aroa ua tei runga i tana ra au angaanga katoa.”
21 I konei kua na mua a Davida i te akakite i to Iehova tu meitaki e te tu tuatua tika—e au tu akaaoangaia oki e Satani te Tiaporo. Eaa ta teia au tu nei ka akatupu ki runga i te katoatoa rava tei inangaro i te Atua e tei kauraro ki tana tutaraanga? Ae, ko to Iehova tu meitaki e tona mataara tuatua tika o te tutaraanga ka apai mai i te rekareka ki tona aronga akamori e kare e rauka ia ratou i te tapu i te maringiringi anga o tona akapaapaaanga. Tetai katoa, ko to Iehova tu meitaki te ooraia maira ‘ki te katoatoa.’ Te irinakiia nei e, ka riro teia ei tauturu i te manganui atu kia tataraara e kia riro mai ei aronga akamori no te Atua mou i mua ake ka rokoia mai ei.—Anga.14:15-17.
22. Akapeea ta Iehova akono anga i tona au tavini?
22 Kua ariki rekareka katoa a Davida i te au tu ta te Atua uaorai i akakite i Tona ‘pati anga na mua ia [Mose] e kua akakite maira: ‘e Iehova, e Iehova, e Atua akaaroa e te aroa ua, kare e riri vave e te ki i te aroa takinga meitaki e te tuatua mou.’’ (Exodo 34:6, NW) No reira, kua rauka ia Davida kia akakite e: “E aroa ua to Iehova e te tangi, Kare e riri vave e te maata o te aroa takinga-meitaki.” Noatu oki a Iehova e e maata e e kitea koreia kia kimi, e akangateitei ana aia i tona au tavini tangata na te akono takinga meitaki anga ia ratou. Kua ki aia i te aroa ua, te puareinga i te akakore i te ara a te aronga ara tei tataraara kia tau ki to Iesu atinga oko. E akakoromaki katoa to Iehova kare e riri vave, i te mea te oronga maira aia i te tuatau ki tona au tavini kia autu ki rungao i te au tu paruparu te ka riro ei arai ia ratou mei te ao ou o te tu tuatua tika.—2 Petero 3:9, 13, 14.
23. Eaa te tu akaperepereia ta tatou ka akamanako i roto i te atikara ka aru mai?
23 Te akateitei a Davida i to te Atua takinga meitaki, me kore aroa tiratiratu. Ko te tika, te akaari maira te toenga o Salamo 145 e akapeea ta Iehova akatutu anga i teia tu nei e akapeea tona au tavini tiratiratu i te ariu anga atu ki tona aroa takinga meitaki. Ka uriuriia teia au mea nei i roto i te atikara ka aru mai.
Akapeea Koe Me Pau?
• Eaa ua ai te au tuatau e vai nei no te akapaapaa ia Iehova “i te ra katoa”?
• Eaa te au akaraanga e akaari maira e ko to Iehova tu maata e kitea koreia kia kimi?
• Akapeea tatou i te tupu anga i roto i te arikianga rekareka no to Iehova ngateitei kaka?
[Au Uianga Apii]
[Tutu i te kapi 10]
Te au tarava etu o te ao e pini ua ake te akakite ra i to Iehova tu maata
[Akameitakianga no te Tutu i te kapi 10]
Courtesy of Anglo-Australian Observatory, photograph by David Malin
[Tutu i te kapi 12]
I akapeea ra to Iehova tu maata i te akaari angaia i roto i te pirianga kia Iesu Karaiti?
[Tutu i te kapi 13]
I te rauka anga te Ture i to Iseraela i te Maunga i Sinai, kua kite ratou i te akapapuanga no to Iehova ngateitei kaka