Akapeea Koe me Akamerengo i Toou Au Anoano Pae Vaerua

“I TE ngauru mataiti i topa, kua tere atu i te 300 upoko tuatua no runga i te turanga pae vaerua i te ngai angaanga​—mei te Jesus CEO ki The Tao of Leadership​—kua akakiia te au are toa oko puka,” i na te U.S.News & World Report. Ko teia turanga nei e akamanako anga ua no te tika anga e i roto i te au enua puapinga i te pae materia e manganui, te tupu ra tetai inangaro anga no te aratakianga pae vaerua i roto i te oraanga. I te tuatua anga no runga i teia, te akara ra te tianara pitiniti i te Training & Development e: “I te tuatau te arataki ra te apinga i tetai tu ravarai o to tatou oraanga, te kimi nei tatou i te aiteanga oonu, te akakoroanga, e no te maata ua atu o te akamerengo anga uaorai.”

Ka kitea e koe kiea, i reira, i te arataki anga akamerengo anga pae vaerua? I te tuatau i topa, kua akara te au tangata ki te akonoanga tei  akanooia ei tauturu ia ratou kia kitea te “aite anga oonu roa atu” e te “akakoroanga” i roto i te oraanga. I teia tuatau, e manganui kua akaruke ratou i te akonoanga akaaereia. Ko tetai tareanga no te 90 manitia i te ngai teitei e te au pu maata kua kitea mai e te “akatuke pakari ra te au tangata i to rotopu i te akonoanga e te turanga pae vaerua,” i karanga mai ei te Training & Development. Te aronga i roto i te tareanga te manako ra i te akonoanga ei “akakoromaki anga kore e te akatakake anga,” kareka ra te turanga pae vaerua kua kitea mai e ei “kapiti anga atea e e pini ua ake i te ao katoa.”

E manganui te au mapu i roto i te au taiate angaanga, mei ia Autireria, Nu Tireni, Peritane, e i Europa, te kite katoa ra i te tukeanga i rotopu i te akonoanga e te turanga pae vaerua. Kua akakite mai te Poropeta ko Ruth Webber, i te tata anga i roto i te Youth Studies Australia, e: “Te maata anga o te au mapu te irinaki ra i te Atua, me kare i roto i tetai mana ririnui inara kare i manako ana e e puapinga maata te ekaretia me kare i te tauturu anga i te akakite anga i to ratou turanga pae vaerua.”

Te Akatupu ra te Akonoanga Mou i te Turanga Pae Vaerua

Ko teia manako anga ekoko no te akonoanga te marama uaia ra. E manganui te au akaaerenga akonoanga kua piri oonu atu ki roto i te ravenga poritiki e te pikikaa akono tau e kua ki i te toto apa kore o te aronga tei mate i roto i te maata anga o te au tamaki akonoanga. Inara, ia ratou e kopae ke ra i te au akaaerenga akonoanga tei taviiviiia e te pikikaa e te akavareanga, kua rave etai i te tarevake i te kopae ke katoa anga i te Pipiria, ta ratou i manako ana e te akatika ra i taua au angaanga ra.

Te tika anga, te akaapa ra te Pipiria i te pikikaa e te kino. Kua karanga a Iesu ki te au arataki akonoanga i tona tuatau e: “Aue kotou, e te au tata tuatua, e te Pharisea e, e aronga pikikaa! te arite nei kotou i te tanumanga akateateaia nei, tei akaieie i vao ake, ko roto ra, kua ki ïa i te ivi turuma e te au mea viivii katoa. Koia katoa kotou na, mei te aronga tuatua-tika kotou i vao ake i ta te tangata nei akara anga, ko roto ra, te ki nei ïa i te pikikaa e te kino.”​—Mataio 23:27, 28.

Tei runga ravao, te akamaroiroi ra te Pipiria i te au Kerititiano kia vai neutara ua i roto i te au ravenga poritiki katoatoa. Kare i raurau ana i te aronga irinaki kia ta i tetai e tetai, te akakite maira te reira e kia puareinga ua ratou i te mate no tetai e tetai. (Ioane 15:12, 13; 18:36; 1 Ioane 3:10-12) Kare e “akakoromaki anga kore e te akatakake anga,” ko te akonoanga mou, tei akatumuia ki runga i te Pipiria, e “kapiti anga atea.” Te karanga ra te apotetoro ko Petero e: “Kare te Atua e akono i te tu o te tangata: Ko te mataku ra iaia, e ko te rave i te tuatua-tika, i te pa enua ravarai, ko tei kiteia mai ïa e ia.”​—Angaanga 10:34, 35.

Te Pipiria​—Ei Arataki Irinakiia ki te Oraanga Pae Vaerua

Te akakite maira te Pipiria kia tatou e kua angaia te au tangata i roto i te tu o te Atua. (Genese 1:26, 27) Kare te aite anga o teia e te aite ra te au tangata ki te Atua na roto i tetai tu kopapa, te aite anga o te reira e kua rauka i te au tangata te kite kia akaata atu i te tu peretana o te Atua, te kapiti mai anga i te maata anga o te au mea pae vaerua, me kore i te turanga pae vaerua.

I te mea e ko te reira te tu, e mea tau i reira i te irinaki e ka oronga katoa mai te Atua kia tatou i te ravenga kia akamerengo i to tatou au anoano pae vaerua, pera katoa te arataki anga tau ka rauka ia tatou i te akataka i rotopu i te mea puapinga e i te mea te ka akakino mai ia tatou i te pae vaerua. Mei ta te Atua rai anga mai anga i to tatou au kopapa ma tetai akaaere anga kopapa akapapa meitakiia, te akakore ra i te maki e te tauturu anga kia ora ua atu tatou, kua akapapa katoa mai aia ia tatou ma tetai akava ngakau, me kare i tetai reo i roto roa, e tauturu mai ei ia tatou i te rave i te au iki anga tika e te kopae ke anga i te au angaanga te akakino ra i to te pae kopapa e to te pae vaerua. (Roma 2:14, 15) Mei ta tatou i kite, e rauka ai i to tatou akaaere anga kopapa i te angaanga, e mea tau kia akamatutu meitakiia. Ma te reira rai, e riro ei to tatou akava ngakau kia taangaangaia, te anoanoia ra tatou kia angai i te reira ma te kai meitaki i te pae vaerua.

I te akataka anga mai i te tu o te kai te akaora ra ia tatou i te pae vaerua, kua karanga a Iesu e: “Kia noo te tangata ra, kare ki runga i te varaoa anake ua, mari ra ki runga i te au tuatua ravarai te aere maira no roto mai i te vaa o Iehova.” (Mataio 4:4, NW) Te au tuatua a Iehova kua tataia i roto i tana Tuatua, te Pipiria, e ko te reira e “mea meitaki ei apiianga, ei akoanga, ei akakiteanga apa.”  (2 Timoteo 3:16) No reira, tei runga ia tatou i te tuku i te tauta anga pakari kia tamou i taua akamatutu anga i te pae vaerua. Te maata i te reira i to tatou kite anga i te Pipiria e te tauta anga kia akono i ta te reira au kaveinga i roto i to tatou oraanga, te maata o te reira e puapingaia ai tatou i te pae vaerua e i te pae kopapa.​—Isaia 48:17, 18.

Tau Ainei te Reira Tauta Anga?

E tika, ka anoanoia te taime kia akamako mai i to tatou oraanga pae vaerua na te apiianga i te Pipiria; e i te akaraanga, i tetai taime ra, e apinga kare e rava ana. Inara te tau ra te au tutakianga no te tauta anga! E akarongo mai ki etai aronga tei angaanga putuputu ana i te akamarama mai anga e eaa ra i anoanoia ai te taime kia akonoia to ratou oraanga pae vaerua ei mea puapinga maata kia ratou.

Ko Marina, e taote vairakau, te karanga ra e: “Kare au i manako roa ana i toku turanga pae vaerua e tae ua atu i te akamata anga au i te angaanga i roto i tetai are maki e kua akamata i te manako oonu tikai i te mamae o tetai ke. Kua kite mai au i reira e kia akatika au e kia akamerengoia toku anoano pae vaerua me te inangaro ra au i te tu mareka anga e te maru, i te mea e te oraanga i te au ra e te umuumuia anga no te akono anga i te au manamanata o te au tangata ra ka riro mai ei mea maata na tetai ua atu tangata i roto i taku angaanga.

“Te apii nei au i teianei i te Pipiria ma te Au Kite o Iehova. Te tauturu nei teia apii iaku kia akara matatio i taku au angaanga e te au manako na roto i tetai tu meitaki e te tereni anga i te au akakoroanga o toku manako kia papu tikai, kia rauka iaku i te tamou ma te tau i toku oraanga. Te kite nei au i te merengo anga maata roa atu i roto i taku angaanga. Inara na taku apii Pipiria i akamako mai i toku oraanga i te pae manako, i te tauturu anga iaku kia akatere i te au manako papu kore, i te akameangiti mai anga i te taitaia, e kia akakoromaki maata roa atu e kia aroa atu i te tangata. Na te taangaanga anga i te au kaveinga Pipiria i tauturu katoa mai kia puapingaia toku akaipoipo. Te mea puapinga maata roa atu, kua kitea mai e au ia Iehova e kia kite mai, i roto i tetai tuanga meangiti, te aereanga arairai kore o tona vaerua, tei oronga mai ki toku oraanga nei te aiteanga maata roa atu.”

Ko Nicholas, e tangata parani anga are, te karanga ra e: “I mua ake ka apii ei i te Pipiria ma te Au Kite o Iehova, kare oku au manako pae vaerua. Toku akakoroanga anake ra i roto i te oraanga koia oki kia autu i roto i te angaanga taku i iki ana. Kua apii mai taku apii Pipiria iaku e e maata atu i tei te oraanga e te rave anga i to Iehova ra anoano te apai maira i te mataora mou e te mutu kore.

“Te oronga maira taku angaanga iaku i tetai manako merengo anga, inara na te Pipiria ra i apii mai iaku i te puapinga maata roa atu no te akono anga i te oraanga ngoie na te akaraanga ki runga i te au mea vaerua. Na te rave anga i te reira, kua kopae maata maua ko taku vaine i te taitaia ta te oraanga pae kopapa e apai maira. Kua rauka katoa ia maua i te au oa tika tikai e manganui na roto i ta maua taokotai anga ma taua aronga te aite ra te akaraanga vaerua i roto i te oraanga.”

Ko Vincent, e roia, te karanga ra e: “Te oronga maira tetai angaanga i tetai tuanga no te akamerengoanga. Inara, kua kitea e au e e maata ua atu tei anoanoia ra kia rauka te mataora e te mareka anga. I mua ake ka kite mai ei i te apiianga a te Pipiria no runga i  te tumu manako ra, kua maara iaku i te kite viviki anga i te puapinga kore ua o te oraanga​—kua anauia mai, kua maata mai, kua akaipoipo, te rave anga i tetai angaanga kia oronga i tei anoanoia i te pae materia kia utuutu mai i ta tetai tamariki ra, te tereni anga ia ratou kia aru i taua aerenga oraanga rai, e i te openga iora te ruaine anga e te mate anga.

“No muri ua ake i te apiianga i te Pipiria ma te Au Kite o Iehova i rauka ai iaku te au pauanga merengoanga ki taku au uianga no runga i te akakoroanga o te oraanga. Kua tauturu mai taku apii Pipiria kia akara au ia Iehova ei peretana e kia akatupu i tetai aroa ma te oonu ra kiaia. Kua oronga mai teia i te tumu anga kia akono au i tetai akaraanga oraanga vaerua iaku e tauta ra i te akono i toku oraanga kia rotai ki taku i kite e ko tona ia akakoroanga. I teianei, tei ia maua ko taku vaine te merengoanga i te kite anga e te taangaanga maata nei maua i to maua oraanga na roto i te mataara puapinga maata roa atu te rauka maira.”

Ka rauka katoa ia koe tetai manako no te akakoroanga e te aiteanga i roto i te oraanga na te apiianga i te Pipiria. Te mataora ra te Au Kite o Iehova i te tauturu ia koe. Mei ia Marina, Nicholas, e Vincent rai, ka rauka ia koe te merengo anga te aere maira no te apiianga no runga ia Iehova e tana au akakoroanga no te au tangata noa nei e noou ra ei tangata tataki tai. Kare ua e ka rauka ia koe i te rekareka i te akatupu anga i toou au anoano pae vaerua i teianei mari ra ka rauka katoa ia koe te manakonako anga no te oraanga mutu kore ma te rekareka i roto i te oraanga pae kopapa tiama​—e manakonako anga te rauka anake ua ra i te aronga “tei manako i to ratou anoano i te pae vaerua.”​—Mataio 5:3.

Okotai mataara kia akatupu i to tatou turanga pae vaerua koia oki na roto i te pure. Kua rave a Iesu i te tuatau i te apii i tana au pipi e akapeea me pure, i te oronga anga kia ratou i tei matauia i te kapikiia e ko te Pure a te Atu. Eaa te aite anga ta te pure ka rave noou i teia tuatau? Akapeea koe e puapingaia ai mei te reira? Ka kite koe i te au pauanga i roto i nga atikara e rua te aru mai nei.

[Au Tutu i te kapi 6]

Marina

[Au Tutu i te kapi 7]

Nicholas

[Au Tutu i te kapi 7]

Vincent