Ka Rauka ia Koe te Akono i te Tu Papu Kore

“PAPU tikai!” “Mea papu!” “Kua papu!” Kare e ekoko e maata te taime i akarongo ana koe i taua au tuatua ra. Inara, i te au ra o to tatou oraanga, kare i maata te ka papu ia tatou. No te taka kore i te ka tupu i te oraanga e putuputu ana tatou i te umere e me e apinga ainei tetai ka rauka ia tatou kia papu tikai. I te akara anga mei te mea rai e e tuanga te ekoko e te tu papu kore no te oraanga.

Te marama ua ra e, te anoano ra te maataanga o te tangata i te tu tinamou e te mataora no ratou uaorai e to ratou ngutuare tangata. Te angaanga pakari ra ratou kia rauka mai te au apinga ta ratou i irinaki e ka akamataora e ka akatinamou ia ratou​—te maataanga ko te moni e te au apinga o te kopapa. Inara, ka rauka ua i tetai ngaruerueanga enua, tetai uriia, tetai tumatetenga, me kore te ta ua i te takore viviki ua i taua au apinga ra. Ka riro te au maki kino, te tataraanga akaipoipo, me kare ra te kore anga e ngai angaanga i te tieni viviki rava i te au oraanga. E tika, penei kare paa taua au apinga ra e tupu tikai kia koe. Kareka ra, ko te kite ua anga e ka rauka ua tetai apinga kino kia tupu a tetai ua atu taime e manako manamanata tikai e te taitaia. Inara kare ko te reira ua.

Ko te tu papu kore te aiteite ra ki te ekoko, e te akataka ra tetai tikitinari i te “ekoko” ei “tu papu kore no te irinakianga me kore no te manako te tamanamanata putuputu ra ki te tukuanga tika.” Tetai katoa, i na te puka Managing Your Mind ei, ko te “tu papu kore no runga i tetai apinga puapinga koia oki tetai tumu maata no te apiapi e te manako manamanata.” Ko te ekoko kare i akatikatikaia ka arataki atu ki te apiapi, te mareka kore, e te riri. Ae, ko te manako manamanata no runga paa i te ka tupu me kore i te kare paa e tupu ka takino i to tatou oraanga manako e te oraanga kopapa.

I te openga, te aere roa ra tetai papaki ki tetai tua takiri. Kua aite rai ratou ki te mapu no Paratiri tei karanga e: “Eaa ka manata ai no runga i te ka tupu? Ko teia ra rai teia ra, e ko apopo rai apopo.” Taua tu manako kino ra e “e kai tatou, e e inu oki” ka arataki anake rai ki te mareka kore, te taitaia, e i te openga iora ki te mate. (1 Korinetia 15:32) E meitaki roa atu no tatou kia ariu atu ki Tei Anga mai, ko te Atua ko Iehova, koia oki, ta te Pipiria i karanga e, “kare oki e tu ke anga e ngai mea ngiti ua ake.” (Iakobo 1:17) Me makitoro marie tatou i ta te Atua Tuatua, te Pipiria, ka kite tatou no runga i te ako tau e te aratakianga e ka akapeea tatou i te akono anga i te au tu papu kore o te oraanga. Ka tauturu katoa te reira ia tatou kia marama e eaa ra i maata roa ai te tu papu kore.

Tumu no te Tu Papu Kore

Te oronga maira te au Tuatua Tapu i te au manako tika tikai no te oraanga e te tauturu ia tatou kia tatanu i te tu tau tikai no te tu papu kore e kia taui. Noatu oki e penei te oronga maira te au pirianga  ngutuare tangata, te turanga teitei i roto i te taiate, te kite, te oraanga kopapa meitaki, e te vai atura i tetai tuanga o te tu tinamou, te akaari maira ra te Pipiria e auraka tatou kia manako e ka vai ua atu rai teia au apinga nei me kore kia manako i te arataki i tetai oraanga mareka ua. Kua tuatua te Ariki pakari ko Solomona e: “Kare tei te vaevae viviki te emo e emo ei, e kare tei te maroiroi e riro ei te re, e kare tei te aronga pakari te kai, e kare tei te aronga kite meitaki te apinga, e kare tei te karape te kiteaia mai.” No teaa ra? “E tuatau ra, e te manuia ua, to te tangata katoa ra.” No reira, kua akamatakite mai a Solomona e: “Mei te ika i rauka ki roto i te kupenga kino ra, e te manu kia rauka i te ereere ra, ko to te tamariki a te tangata ïa mou anga i te ereere i te tuatau kino ra, me rokoia putia uaia mai ratou.”​—Koheleta 9:11, 12.

Kua tuatua katoa a Iesu Karaiti no runga i tetai tuatau o te apiapianga kino e te tu papu kore te ka tae mai ki rungao i tetai uki tangata katoa. Na roto i te reo taka meitaki ua, kua akakite aia e: “E akairo to roto i te rā, e to roto i te marama, e to roto i te au etu; e te mate anga o te pa enua o te ao nei i te tumatetenga; te tai e te kare i te aruru anga; E te taravai anga o te ngakau tangata i te mataku, e te manako ua anga i taua au mea ra i te vaitata anga mai i te ao nei; ka riro oki te au mea mana o te rangi ra i te ruruia.” I reira, kua tou atu a Iesu ki tetai apinga ei akamaroiroi i te au tangata ngakau tika i teia tuatau nei: “Kia akara kotou i taua au mea nei i te tupu anga, kua vaitata ïa te basileia o te Atua, kia kite oki kotou.” (Luka 21:25, 26, 31) Mei koia rai, i to te mataku ua atu i tetai tuatau papu kore ki mua, e akarongo to tatou i roto i te Atua ei tauturu ia tatou kia kite mamao atu mei te tu papu kore ki tetai ao umeremere, tinamou ki mua.

‘Rauka Pu Anga te Akapapuanga no te Manakonakoanga’

Noatu e kare tatou e taka papu ana no runga i te au apinga ravarai ka rongo tatou, ka tatau, me kore ka kite, e tumuanga tau ra to tatou kia irinaki ki roto i Tei Anga mai. Kare aia e ko Tei Teitei Rava anake mari katoa ra ko tetai Metua e manako oonu maira no tana au tamariki i te enua nei. No runga i tana uaorai tuatua, kua akakite te Atua e: “Kare e oki puapinga kore ua mai kiaku nei, e tupu ra tei akakoroia e au ra; e manuia oki te mea i akaue atu ei au ra.”​—Isaia 55:11.

Kua apii a Iesu Karaiti i te tuatua mou mei ko mai i te Atua, e te manganui tei akarongo kiaia kua ariki i te reira ma te irinaki e te papuanga tikai. Ei akaraanga, kua akakite tetai pupu aronga ngakau tika no Samaria ki te vaine mua tei akarongo kia Iesu e: “Kare no te tuatua aau i tuatua maira, i akarongo atu ei matou: kite ua akenei matou iaia uaorai, kua kite atura matou e, ko te ora mou teia o to te ao, ko te Mesia.” (Ioane 4:42) Mei koia katoa i teia tuatau, noatu te noo nei i roto i te au taime o te tu tinamou kore, kare tatou e taka kore ana no runga i ta tatou e irinaki ra.

No runga i te irinakianga akonoanga, e maata te manako ra e i to te tauta atu anga kia marama, ka tau ua kia irinaki tatou. Kareka ra, te tangata tata Pipiria a Luka, kare i ariki i taua manako ra. Kua rave aia i te kimikimianga e kua oronga i te akakiteanga tika tikai kia rauka i reira i etai ke kia ‘kite pu i te papuanga tikai o te au mea ravarai’ tana i tata. (Luka 1:4, NW) Penei te manamanata ra te ngutuare tangata e te au taeake kare e ariki ana i to tatou irinakianga ko te takinoia e ko te mareka kore tatou i te openga, e mea puapinga i reira kia rauka ia tatou i te paruru atu i to tatou akarongo. (1 Petero 3:15) Na te kite tika tikai anake i te tumu no ta tatou e irinaki ra e tauturu i etai ke kia irinaki ki roto te Atua. Te akataka maira te Pipiria ia Iehova na roto i teia au tuatua nei: “Ko te Mato aia ko tei tika rava tana angaanga ra; ko tei tau katoa tona au aerenga; e Atua tuatua-mou, e te kino kore ra, e tuatua-tika tana, e te tiratiratu!”​—Deuteronomi 32:4.

E akamanako ana i tera tuatua openga: “E tuatua-tika tana, e te tiratiratu.” Eaa ta tatou akapapuanga kia taka papu tikai i teia? Kua irinaki pu  tikai te apotetoro ko Petero i tera tika. Kua akakite aia ki tetai opita Roma e tona ngutuare tangata e: “Kua kite mou atura au e, kare te Atua e akono i te tu o te tangata: Ko te mataku ra iaia, e ko te rave i te tuatua-tika, i te pa enua ravarai, ko tei kiteia mai ïa e ia.” (Angaanga 10:34, 35) Kua tuatua a Petero i teia au tuatua nei no te mea koi kite ua akera aia e akapeea to te Atua uaorai rima i te arataki anga i te au mea ravarai no tetai ngutuare tangata Kenitara, ko tei manakoia i mua ana e e viivii e kare e tau, kia riro mai ei mea tau Kiaia. Mei ia Petero rai, ka rauka katoa ia tatou i te irinaki i to te Atua tu papakitai kore e te tu tuatua tika me kite mata tatou uaorai i te “aronga maata” o te tangata​—e ono mirioni te maata​—mei tei tere atu i te 230 enua takapini i te ao katoa tei akaruke i to ratou tu oraanga i mua ana e te aaere nei na roto i te arataa o te tuatua tika.​—Apokalupo 7:9; Isaia 2:2-4.

Ei au Kerititiano mou, ka inangaro tatou kia riro mai, kare ei aronga maroiroi puapinga kore ua me kore ei aronga marokiakia, mari ra ei aronga akaaka e te tau tikai. Inara, kare tatou e taka kore ana no runga i ta tatou e irinaki e eaa ta tatou ka tapapa atu no te tuatau ki mua. Ki te au Kerititiano o te anere mataiti mua, kua tata atu te apotetoro ko Paulo e: “Te inangaro nei matou kia akakite tamou marie rai kotou katoa i taua maroiroi ra, kia rauka te irinaki kite pu tikai [“o te manakonakoanga,” NW] e tae ua atu ki te openga.” (Ebera 6:11) Mei koia rai, te tuatua meitaki o te Pipiria kua apai mai i “te irinaki pu tikai [“o te manakonakoanga,” NW].” Ko tera manakonakoanga, tei akatumu pakariia ki runga i ta te Atua Tuatua, “kare oki te tatari e taakama mai,” mei ta Paulo katoa i akamarama mai.​—Roma 5:5.

Maata atu, kua irinaki pu tikai tatou e na te apii anga i etai ke ki te tuatua meitaki mei roto i te Pipiria ka riro i te apai mai i te tu tinamou e te tu papu tikai i te pae vaerua, e te pae manako e te pae kopapa katoa atu. Ka kapiti atu tatou kia Paulo i te karanga anga e: “Ta matou evangelia i tae tuatua vaa ua atu ia kotou na, ma te mana katoa ra, e ma te vaerua tapu, e ma te kite pu tikai.”​—1 Tesalonia 1:5.

Au Akameitakianga i Teianei o te Tu Tinamou i te Pae Vaerua

Noatu oki e kare e rauka ia tatou kia tapapa atu i te tu tinamou katoa i roto te oraanga i teia tuatau, te vai ra rai tetai au apinga te ka rauka ia tatou i te rave te ka tauturu ia tatou kia arataki i tetai oraanga mou e te tinamou. Ei akaraanga, ko te kapitianga putuputu ma te putuputuanga Kerititiano i te au uipaanga ka akatupu i te tu ngaueue kore no te mea i reira te apiiia ra tatou i te au kaveinga tika e te tau e te au tu puapinga. Kua tata a Paulo e: “E ako atu i te aronga apinga maata i teianei ao, eiaa ei ngakau teitei, eiaa oki e irinaki i te apinga maata mou kore, ei te Atua ora ra, ko tei oronga ua mai i te au mea katoa nei ei rave anga na tatou.” (1 Timoteo 6:17) Na te apii anga kia tuku i to ratou irinakianga ki roto ia Iehova e kare ki roto i te au apinga kopapa ua nei me kore i te au mea e navenave ei ra, e maata tei rauka i te takore atu i to ratou uaorai au apiapianga e te au tu ngata ta ratou i kite ana i mua ana.​—Mataio 6:19-21.

I roto i te putuputuanga, te rekareka katoa nei tatou i te akataeakeanga pumaana, te oronga maira i te tauturu e te turuturuanga na te au mataara e manganui. I tetai taime i roto i tana angaanga orometua, kua kite te apotetoro ko Paulo e tona au taeake i te “romia uaia” anga e “kare rava [ratou] i manako e e ora.” Noea te ngai i kitea ai e Paulo te turuturuanga e te maru? E tika oki e, kare roa tona irinakianga i roto i te Atua i ngaueue ana. Noatu rai, kua akamaroiroi e kua akapumaanaia aia e te au oa Kerititiano tei tauturu mai iaia. (2 Korinetia 1:8, 9; 7:5-7) I teia tuatau nei me tupu te au tumatetenga natura me kore me tupu te au kino taitaia ke atu, ko to tatou au taeake Kerititiano ua rai te tae mua ana i te oronga tauturu tei anoanoia i te pae o te apinga e te pae vaerua ki te au oa Kerititiano e pera katoa ki etai ke atu tei anoano ra.

Tetai mataara katoa no te tauturu i te akono atu i te au tu papu kore o te oraanga koia oki ko te pure. Ka rauka ua rai ia tatou i te anga ki to tatou Metua aroa i te rangi me topa tatou ki raro i te taomianga kare i manakoia ana. “E akapuanga oki a Iehova no te aronga i takinga-kinoia, e akapuanga i te tuatau tumatetenga.” (Salamo 9:9) Penei kare e rauka i te au metua tangata ua nei  i te paruru i ta ratou tamariki. Inara, te inangaro ua ra te Atua i te tauturu ia tatou i te akono i to tatou au tu mataku e te au manako papu kore. Na te titiri anga i to tatou au apiapianga ki rungao ia Iehova na roto i te pure, ka papu ia tatou e ka rauka iaia kia “maata ua atu tana kia rave i te au mea katoa ta tatou e pati nei, e ta tatou e manako nei.”​—Ephesia 3:20.

Te anga putuputu ra ainei koe ki te Atua na roto i te pure? Te irinaki ra ainei koe e te rongoia maira taau au pure e te Atua? “Kua akakite mai toku mama kiaku e e mea tau kia pure au ki te Atua,” i karanga ai tetai tamaine mapu ou i São Paulo. “Kareka ra kua ui au kiaku uaorai e: ‘Eaa ra ka tuatua atu ei ki tetai kare ua au i kite?’ Inara, kua riro te Maseli 18:10 ei tauturu iaku kia marama e ka anoano tatou i te tauturu a te Atua e ka anoanoia tatou kia tuatua kiaia na roto i te pure.” Te karanga ra te irava e: “Te ingoa o Iehova ra, e punanga ketaketa ïa: te oro nei te aronga tuatua-tika ki reira, e kua ora iora.” Ka akapeea, tikai i reira e rauka ai ia tatou i te akatupu i te irinaki e te irinakianga ki roto ia Iehova me kare tatou e akariro i te tuatua atu anga kiaia ei tu matauia? Kia rekareka i te akameitakianga o te tu tinamou i te pae vaerua, ka anoanoia tatou kia akariro i te pure ngakau tae i te ra ravarai ei tu matauia. Kua tuatua a Iesu e: “E tenana, e ara kotou, e tamou tikai i te pure, kia tau ia kotou te ora i teianei au mea katoa e vaitata mai nei, e kia tu kotou ki mua i te aroaro o te Tamaiti a te tangata.”​—Luka 21:36.

No runga i tetai apinga ke atu te ka papu ia tatou koia oki ko to tatou manakonakoanga i roto i to te Atua Patireia. Akara ana i te au tuatua a Daniela 2:44: “E akatupu ei te Atua no te rangi i tetai basileia, te ka kore rava e akakoreia e tuatau ua atu: kare oki taua basileia ra e riro i etai ke, e riro na te reira e akapueurikiriki e e akapou i taua au basileia katoa ra, e ka vai rai te reira e tuatau ua atu.” E ketaketa tikai tera manakonakoanga e ko tetai apinga tera te ka papu tikai ia tatou. E putuputu ua ana rai ta te tangata au koreromotu i te poka, ka rauka ra ia tatou i te irinaki ua rai ki roto i ta Iehova tuatua. Kare mei te tu e kare e rauka kia irinakiia, ko te Atua mei te papa toka maatamaata rai te ka rauka ia tatou kia urunga ki runga. Ka tau kia manako ngakau tatou mei ia Davida rai, ko tei tuatua e: “Ko te Atua o toku mato, koia taku ka irinaki atu: taku paruru, e te tara o toku ora, toku are teitei, e toku pinanga, toku ora: te akaora nei koe iaku i te tangata-kino.”​—2 Samuela 22:3.

Kua akakite akaou mai te puka Managing Your Mind ko tei taikuia i mua ake e: “Te maata atu o tetai i te manako no runga i te au apinga kino penei te ka tupu, ko te maata atu ia i te akara anga e e tika tikai te reira, e ko te ngata roa atu rai ia i te kite e ka akapeea te akono atu anga ratou.” No reira, eaa ra ka akatika ai ia tatou uaorai kia akateimaaia e te au apiapianga e te au ekoko o teianei ao? Kareka ra, e mono i te au tu papu kore o teia ao ki te au tu papu ta te Atua e oronga ua mai nei. Na te mou tikai anga ki to tatou akarongo i roto i te au taputouanga poka kore a Iehova, ka rauka ia tatou te akapapuanga e: “Te tuatua maira oki te tuatua i tataia ra e, “Ko tei akarongo iaia ra, kare anake ïa e akama.”​—Roma 10:11.

[Tataanga i te kapi 29]

Te akapapu maira ta te Atua Tuatua i te au akameitakianga no te tangata ravarai

[Tataanga i te kapi 30]

“Ko tei akarongo iaia ra, kare ïa e akama”

[Tutu i te kapi 31]

Te apai mai nei te tuatua meitaki o te Patireia i te tu tinamou no te tangata