Te Oronga Maira a Iehova i Ta Tatou e Anoano ra i tea Au ra Katoa

“Auraka oki e noo ma te apiapi . . . kua kite na to kotou Metua e, kia rauka taua au mea ra ia kotou e tikaʼi.”​—LUKA 12:29, 30.

1. Akapeea a Iehova i te oronga anga no te au manu i angaia ra?

I AKARA ana ainei koe i tetai manu rikiriki me kore i tetai ua atu manu i te paopao aere anga i te akara anga e e one ua rai? Penei i manako ana koe e eaa te ka kiteia mai kia kai na te paopao aere anga i te one. I roto i tana Tuatua i te Maunga, kua akaari mai a Iesu e ka rauka ia tatou i te rave mai i tetai apiianga mei ta Iehova tu angai anga i te au manu. Kua tuatua aia e: “Ka akara na i te au manu o te reva nei: kare ratou i tanu, kare oki i kokoti, kare oki o ratou are kai; na to kotou Metua i te ao ra i angai ia ratou. Kare aina e meitaki maata to kotou i to ratou?” (Mataio 6:26) I roto i te au tu umere, kua oronga mai a Iehova i te kai no tana au mea ora katoatoa.​—Salamo 104:14, 21; 147:9.

2, 3. Eaa te au apiianga pae vaerua ka rauka ia tatou i te rave mai mei te tika anga e kua apii mai a Iesu ia tatou kia pure tatou no te kai i te au ra katoa?

² Eaa, i reira, a Iesu i kapiti mai ei ki roto i tana pure akaraanga i te pati anga e: “O mai i te kai e tau ia matou i teianei rā”? (Mataio 6:11) Ka rauka mai te au apiianga oonu i te pae vaerua mei roto mai i teia pati anga mama ua. Te mea mua, te akamaara maira te reira kia tatou e ko Iehova te Oronga Maata. (Salamo 145:15, 16) Te rauka ra i te au tangata i te tanutanu e te akaau, inara na te Atua anake e akatupu i te au mea, i te pae vaerua e i te pae kopapa. (1 Korinetia 3:7) Ta tatou e kai ra e te inu ra e apinga orongaia mai e te Atua. (Angaanga 14:17) Te pati anga kiaia kia oronga mai kia tatou i ta tatou e anoano ra i te au ra katoa te akaari ra kiaia e kare tatou e manako kore ana i taua au apinga ra. E tika, kare taua pati anga e akamama mai i ta tatou apainga kia angaanga me te rauka ra ia tatou i te rave i te reira.​—Ephesia 4:28; 2 Tesalonia 3:10.

³ Te rua, te pati anga tatou i te ‘kai i teianei rā’ te akakite ra e kare tatou e apiapi maata tikai i te tuatau ki mua. Kua akakite katoa a Iesu e: “Auraka kotou e apiapi ua, ka na ko ei ra, Eaa ua ta matou kia kai? e, Eaa oki ta matou kia inu? e, Eaa to matou kakau kia kakau? (Te kimi ra oki te au etene i taua au mea katoa ra:) kua kite oki to kotou Metua i te ao ra e, kia rauka taua au mea katoa ra ia kotou e tikaʼi. E na mua ra kotou i te kimi i te basileia o te Atua, e te tuatua-tika nana ra; e kapiti katoaia mai taua au mea katoa ra ia kotou. E teianei, auraka e apiapi i to apopo ra; na apopo e apiapi i tana uaorai.” (Mataio 6:31-34) Te pure no te ‘kai i teianei rā’ te akanoo maira i te akaraanga no te akono anga i te au oraanga mama ua no te “akono i te Atua e te mareka ua ra.”​—1 Timoteo 6:6-8.

Kai Pae Vaerua i te Au Ra Katoa

4. Eaa te au tupuanga i roto i te oraanga o Iesu e te au Iseraela e akakite maata maira i te puapinga no te akono anga i te kai pae vaerua?

⁴ Ta tatou pure no te kai i te au ra katoa te akamaara katoa maira ia tatou i ta tatou e anoano ra no te kai pae vaerua i te au ra katoa. Noatu e kua pongi tikai i muri ake i tetai akakore anga kai, kua patoi a Iesu i ta Satani timataanga kia taui i te au toka ki roto i te kai, i te na ko anga e: “Kua tataia, ‘Kare o te kai anake ra te mea e oraʼi te tangata nei, ko te au mea katoa ra no roto mai i te vaa o te Atua ra.’” (Mataio 4:4) I konei ra kua  taiku mai a Iesu i te peroveta ko Mose, tei akakite ki to Iseraela e: “Kua taakaaka oki [a Iehova] ia koe, kua vaoo ua ia koe kia pongi ua ana, e kua angai aia ia koe ki te māna kitea koreia e koe ra, kare katoa toou ai metua i kite: ei akakite ia koe e kare o te areto anake ra te mea e oraʼi te tangata nei, ko te au mea katoa ra no roto mai i te vaa o Iehova ra, e ora te tangata i te reira.” (Deuteronomi 8:3) Te tu i oronga mai ei a Iehova i te mana ki to Iseraela kare anake ma te kai i te pae kopapa mari katoa ra ma te au apiianga i te pae vaerua. Ko tetai tumu, “ka koi ei [ratou] i te ka rava i taua rā ra.” Me kua maata atu ta ratou i koi mai i tei rava ua no te reira ra, kua akamata te toenga i te aunga e te tungaia. (Exodo 16:4, 20) Inara, kare teia i tupu ana i te ra ono to ratou koi anga e rua tuanga kia rava no te au ra katoa kia akamerengo i to ratou au anoano i te ra Tapati ra. (Exodo 16:5, 23, 24) No reira te akamaara pakari maira te mana kia ratou e kia akarongo ratou e te vaira to ratou au oraanga kare anake ra i runga i te kai mari ra i “te au mea katoa ra no roto mai i te vaa o Iehova ra.”

5. Akapeea a Iehova i te oronga anga mai kia tatou i te kai pae vaerua i te au ra katoa?

⁵ Te anoano katoaia ra tatou kia kai i te kai pae vaerua i te au ra katoa tei orongaia mai e Iehova na roto i tana Tamaiti. No teia akakoroanga, kua iki a Iesu i tetai “tavini akono meitaki e te pakari” kia oronga i te “kai i te tuatau tau” no te ngutuare o te akarongo ra. (Mataio 24:45, NW) Kare taua pupu tavini akono meitaki i oronga ua mai i te au apinga maata no te kai pae vaerua na roto i te tu o te au puka tauturu Pipiria mari ra kua akamaroiroi katoa mai ia tatou kia tatau i te Pipiria i te au ra katoa. (Iosua 1:8; Salamo 1:1-3) Mei ia Iesu rai, ka rauka katoa ia tatou i te akamaroiroi anga i te pae vaerua na te tauta pakari anga i te au ra katoa kia apii e kia rave i to Iehova ra anoano.​—Ioane 4:34.

Akakore Anga i te Au Ara

6. Eaa te au kaiou ta tatou ka pati kia akakoreia mai te ara, e i runga i teea au turanga e akakore puareinga ua mai ei a Iehova i te reira?

⁶ Te pati anga te aru maira i roto i te pure akaraanga koia oki: “E akakore mai i ta matou ara, mei ia matou i akakore i ta tei ara ia matou nei.” (Mataio 6:12) Kare a Iesu e tuatua ra i konei no runga i te au kaiou moni. I roto i tona manako ko te akakore anga i ta tatou au ara. I roto i ta Luka tataanga no te pure akaraanga, te karanga ra teia pati anga e: “E akakore mai i ta matou ara; te akakore nei oki matou i ta tei ara katoa ia matou nei.” (Luka 11:4) No reira, me ara tatou, mei te mea rai e kua akatupu tatou i tetai kaiou kia Iehova. Inara kua papa to tatou Metua aroa i te ‘tapara,’ me kore kia akakore, i taua kaiou me tataraara tikai tatou, “e ariu mai,” e te pati anga kiaia kia akakore mai i te ara no runga i te tumu anga o te akarongo i roto i te atinga oko o Karaiti.​—Angaanga 3:19; 10:43; 1 Timoteo 2:5, 6.

7. Eaa ra tatou ka tau ei kia pure kia akakoreia mai te ara i te au ra ravarai?

⁷ I tetai atu turanga ke, te ara nei tatou me aere ke tatou mei ta Iehova au turanga no te tuatua tika. Na roto i te ara akatuangaia mai, kua ara tatou katoatoa i roto i te tuatua, te angaanga, e te manako me kore kua akaruke tatou i te rave i ta tatou ka rave. (Koheleta 7:20; Roma 3:23; Iakobo 3:2; 4:17) No reira, noatu e te manako ra tatou e kua ara i tetai ra me kore ra, te anoanoia ra tatou kia kapiti mai ki roto i ta tatou au pure i te au ra katoa tetai patianga no te akakore anga i tatou au ara.​—Salamo 19:12; 40:12.

8. Eaa ta te pure no te akakoreanga i te ara ka akatupu mai kia rave tatou, e eaa te tupu anga puapinga?

⁸ Te pure no te akakoreanga i te ara e mea tau kia aru i te akara matatio uaorai ma te tiratiratu, te tataraara anga, e te aakianga, tei akatumuia ki runga i te akarongo i roto i te mana okoia o to Karaiti toto akamaringiia. (1 Ioane 1:7-9) Kia akapapu i te tika anga tikai i ta tatou pure, e mea tau kia turu tatou i ta tatou pati anga no te akakoreanga i te ara na roto i te “akono i te tuatua e tau ei i te tataraara ra.” (Angaanga 26:20) Ka rauka ia tatou i reira te akarongo i te tu papa anga o Iehova ra no te akakore mai i ta tatou au ara. (Salamo 86:5; 103:8-14) Tei tupu mai ko te au o te manako kare e akaaiteia, “te au o te Atua, ko tei maata ua atu i te kite tangata,” kua riro mai “e akamaroiroi mai i to [tatou] ngakau e to [tatou] manako i te Mesia nei ia Iesu.” (Philipi 4:7) Inara e maata ua atu ta Iesu pure akaraanga  e apii maira kia tatou e eaa ta tatou ka rave kia rauka i te akakoreia mai ta tatou au ara.

Kia Akakoreia Mai te Ara, e Akakore Rai Tatou i te Ara

9, 10. (a) Eaa te tuatua ta Iesu i kapiti atu ki te pure akaraanga, e eaa ta teia i akaketaketa mai? (e) Akapeea a Iesu i te akatutu mai anga i to tatou anoano kia akakoreia te ara?

⁹ Ma te umere, te pati anga kia “akakore mai i ta matou ara, mei ia matou i akakore i ta tei ara ia matou nei,” e tuanga anakeia no te pure akaraanga ta Iesu i tuatua mai. I muri ake i te taopenga anga i te pure, kua tuatua mai aia e: “Kia akakore oki kotou i ta etai ke ra ara, e akakore katoa to kotou Metua i te ao ra i ta kotou; Kia kore ra kotou e akakore i ta etai ke ra ara, kare katoa oki to kotou Metua i te ao ra e akakore mai i ta kotou ara.” (Mataio 6:14, 15) No reira, kua akataka meitaki tikai mai a Iesu e kia akakoreia mai ta tatou ara e Iehova te vaira ia ki runga i to tatou puareinga ua anga i te akakore atu i te ara a tetai ke.​—Mareko 11:25.

¹⁰ I tetai atu atianga ke, kua oronga a Iesu i tetai akatutuanga i te akaari anga i te anoano no tatou kia akakore i te ara me te tapapa ra tatou kia akakore mai a Iehova i ta tatou ara. Kua akakite mai aia no tetai ariki tei akakore oronga ua mai i tetai kaiou maata ta te tavini i akatupu ana. I muri mai kua akautunga pakari tikai te ariki i teia tangata nei i tona patoi anga i te akakore i te kaiou meangiti roa a tetai taeake tavini. Kua taopenga a Iesu i tana akatutuanga i te na ko anga e: “E akapera katoa mai taku Metua i te ao ra ia kotou katoa, kia kore kotou e akakore ma te ngakau katoa i te apa a tona taeake.” (Mataio 18:23-35) Te taka meitaki ra te apiianga: Te kaiou no te ara ta Iehova i akakore mai mei ia tatou tataki tai nei e maata roa atu ia i te ara ta tetai ua atu i rave kia tatou. Pera katoa, te akakore maira a Iehova i ta tatou ara i te au ra katoa. Papu tikai, i reira, e ka rauka ia tatou i te akakore atu i te apa i tetai atianga a tetai ke e rave ra kia tatou.

11. Eaa te ako anga ta te apotetoro ko Paulo i oronga mai kia aru tatou me te tapapa ra tatou e kia akakore mai a Iehova i ta tatou ara, e eaa te au tupu anga meitaki?

¹¹ Kua tata te apotetoro ko Paulo: “Kia takinga-meitaki kotou ia kotou uaorai, ma te ngakau maru aroa ua ra, ma te akakore oki i te ara tetai e tetai, mei ta te Atua i akakore mai i ta kotou i te Mesia ra..” (Ephesia 4:32) Te akariro ra  te akakoreanga i te ara i te au i rotopu i te au Kerititiano. Kua raurau katoa a Paulo e: “Ka akangakau aroa ua e te takinga-meitaki, te akaaka, te maru, te akakoromaki maata, mei te aronga tapu e te akaperepereia, e te ikiia e te Atua ra: E tauturu atu tetai ki tetai, e akakore tetai i ta tetai ara, e tapepeanga ta tetai ki tetai ra; mei te Mesia i akakore i ta kotou na, e akapera katoa kotou. E ei runga ravao i taua au mea katoa nei e kakau na i te aroa, ko taua tatua apa kore ua ra ïa.” (Kolosa 3:12-14) Pouroa teia kua akatakaia mai i roto i te pure ta Iesu i apii mai kia tatou: “E akakore mai i ta matou ara, mei ia matou i akakore i ta tei ara ia matou nei.”

Paruruanga i Raro Ake i te Timataanga

12, 13. (a) Eaa ra kare e ko te reira te aite anga o te pati anga te aru maira tei raveia i roto i te pure akaraanga? (e) Koai te Timata maata, e eaa te aite anga o ta tatou pure e auraka e akarukeia kia timataia mai?

¹² Te patianga te aru maira i roto i te pure akaraanga a Iesu koia oki: “Auraka e akaruke ia matou kia timataia mai.” (Mataio 6:13) Ko ta Iesu aite anga ainei e kia pati tatou kia Iehova e auraka e timataia mai tatou? Kare ko te reira te aiteanga, no te mea kua akauruia te pipi ko Iakobo kia tata e: “Eiaa rava e tangata pikikaaia e karanga e, Kua pikikaaia au e te Atua: kare rava te Atua e vavare i te kino, kare rava oki aia e pikikaa i te tangata.” (Iakobo 1:13) Pera katoa, kua tata te tata taramo e: “Naringa koe, e Iehova, e akairo ana i te au ara nei, e te Atu, koai te ka mou?” (Salamo 130:3) Kare a Iehova i akara mai i to tatou tarevake katoatoa, e kare katoa aia e timata i te akaturori ia tatou. No reira, eaa te aite anga o teia tuanga o te pure akaraanga?

¹³ Ko tei timata i te akaturori ia tatou, i te akatupu kia topa atu tatou ki roto i te au ravenga pakari, e kia akapou ia tatou koia oki ko Satani te Tiaporo. (Ephesia 6:11) Koia te Timata maata. (1 Tesalonia 3:5) Na te pure anga e auraka kia timataia, te pati ra tatou kia Iehova e auraka e tuku ia tatou kia topa me tei raro ake tatou i te timataanga. Te pati nei tatou kiaia kia tauturu mai ia tatou kia kore e ‘rauka mai ta Satani ngai,’ kia kore e tuku ua atu ki te au timataanga. (2 Korinetia 2:11) Ta tatou pure koia oki kia vai ua rai tatou i roto “i te tapoki o Tei Teitei ra,” te rauka anga mai te paruruanga pae vaerua tei orongaia ki te aronga tei kite i to Iehova tu ngateitei i roto i te au mea katoatoa ta ratou e rave ra.​—Salamo 91:1-3.

14. I akapeea te apotetoro ko Paulo i te akapapu mai anga kia tatou e kare a Iehova e akaruke ia tatou me ka akara atu tatou Kiaia me tei raro ake tatou i te timataanga?

¹⁴ Ka papu ia tatou e me ko te reira to tatou inangaro tikai, tei akakiteia i roto i ta tatou au pure e i roto i ta tatou au angaanga, kare rava a Iehova e akaruke ia tatou. Kua akapapu mai te apotetoro ko Paulo kia tatou e: “Kare kotou i rokoia e te timataanga, mari ra mei ta te tangata nei rai: e tuatua-mou ra ta te Atua, e kare aia e vaoo ia kotou kia timataia, mari ra ko te tika ia kotou kia akakoromaki ra; e akatupu katoa aia i te akapuanga i taua timataanga ra, kia tika ia kotou kia akakoromaki.”​—1 Korinetia 10:13.

“E Akaora ra ia Matou i te Kino”

15. Eaa ra i puapinga maata roa ai kia pure kia akaoraia mai mei te kino ra?

¹⁵ Kia tau ki te au tataanga irinaki maataia o te au Tuatua Tapu Ereni Kerititiano, kua ope ta Iesu pure akaraanga ma te au tuatua e: “E akaora ra ia matou i te kino.” * (Mataio 6:13) Te anoano maataia ra te paruruanga mei te Tiaporo i teia tuatau openga. Te rave nei a Satani e tana au temoni i te tamaki i te toenga tei akatainuia, “ko tei akono i te au akauenga a te Atua ra, i tei mou marie i te tuatua-akakite a Iesu Mesia ra,” e to ratou au oa o te “aronga maata rava.” (Apokalupo 7:9; 12:9, 17) Kua ako mai te apotetoro ko Petero i te au Kerititiano: “E akono meitaki, e matakite, te aaere nei oki to kotou enemi ko te diabolo, mei te liona ngunguru ra, i te kimi anga i te tangata e pou iaia: Ko tei patoi atu ïa ma te akarongo turori kore.” (1 Petero 5:8, 9) Te inangaro ra a Satani i te tapu i ta tatou angaanga akakitekite anga, e  na roto i tana au rima rave i runga i te enua nei​—noatu i te pae akonoanga, okooko anga, me kore te poritiki​—te tauta ra aia i te tamataku ia tatou. Inara, me e tu ngaueue kore to tatou, ka akaora mai a Iehova ia tatou. Kua tata te pipi ko Iakobo e: “E tenana e kauraro atu kotou i te Atua. E patoi atu i te diabolo, e nana e rere ke atu.”​—Iakobo 4:7.

16. Eaa te au ravenga tei rauka ia Iehova ei taangaanga anga nana i te tauturu anga i tona au tavini tei raro ake i te timata anga?

¹⁶ Kua akatika a Iehova i tana Tamaiti kia timataia. Inara i muri ake i to Iesu patoi anga i te Tiaporo, te taangaanga anga i te Tuatua a te Atua ei paruruanga, kua tono mai a Iehova i te au angera kia akamaroiroi iaia. (Mataio 4:1-11) Mei te reira katoa, te taangaanga ra a Iehova i tana au angera i te tauturu ia tatou me pure tatou ma te akarongo e te akariro anga iaia ei akapuanga no tatou. (Salamo 34:7; 91:9-11) Kua tata te apotetoro ko Petero e: “Kua kite [“a Iehova,” NW] i te akaora i te aronga akono i te Atua i roto i te timataanga ra, e te tāpu i te aronga tuatua-tika kore e, kia tae ki te rā akava anga, kia mate.”​—2 Petero 2:9.

Te Vaitata Maira te Akaora Anga Maata

17. Na te oronga anga mai i te pure akaraanga, akapeea a Iesu i te tuku anga i te au mea i to ratou ngai tau?

¹⁷ I roto i te pure akaraanga, kua tuku a Iesu i te au mea i to ratou ngai tau. To tatou manako maata kia akatapuia to Iehova ingoa tapu e te maata. I te mea e ko te Patireia o te Mesia tetai apinga no te akatupu anga i teia, ka pure tatou no te Patireia kia tae mai kia takore atu i te au patireia apa katoatoa a te tangata nei, me kore i te au kavamani, e kia akapapu mai e kia raveia to te Atua ra anoano i to te rangi ra pera katoa i runga i te enua nei. Te vaira to tatou manakonako no te ora mutu kore i runga i te enua parataito ki runga i te akatapu anga i to Iehova ingoa e te kiteanga i roto i te ao katoa e pini ua ake i tona tu ngateitei no te tuatua tika ra. I muri ake i te pure anga no teia au mea puapinga maata ra, ka rauka ia tatou i te pure i ta tatou e anoano ra i te au ra katoa, te akakore anga i ta tatou au ara, e kia akaoraia mai mei te au timataanga e te au angaanga kikite o te kino, a Satani te Tiaporo.

18, 19. Akapeea ta Iesu pure akaraanga i te tauturu mai anga ia tatou kia vai matakite e kia akariro i to tatou manakonako anga kia “maroiroi, e tae ua atu ki te openga ra”?

¹⁸ Te vaitata maira to tatou akaora ki katoa mei te kino e tana akatereanga o te au mea kino. Kua kite meitaki a Satani e “e manga tuatau poto ua” tona e toe nei i te tuku mai anga i tona “riri maata” ki runga i te enua nei, ki runga tikai i te au tavini tiratiratu o Iehova. (Apokalupo 12:12, 17) I roto i te akairo kapitiia no “te openga o te akatereanga o te au mea nei,” kua totou mai a Iesu i te au tupu anga mataora, ko etai ra te vaira rai i mua ia tatou. (Mataio 24:3, 29-31, NW) Ia tatou e kite ra i te tupu mai anga teia, ka marama atu to tatou manakonako anga no te akaora anga. Kua akakite a Iesu e: “E kua tupu anake teianei au mea, e nānā to kotou mata ki runga, e akateitei to kotou mimiti; te vaitata maira oki to kotou ora.”​—Luka 21:25-28.

¹⁹ Te pure akaraanga tano tikai ta Iesu i oake ki tana au pipi te oronga maira kia tatou i tetai arataki anga tau e eaa te ka kapitiia mai i roto i ta tatou au pure i te vaitata anga te openga. Kia vai irinaki rai tatou e kia tae ua atu ki te openga, ka rave ua rai a Iehova i te oronga mai kia tatou i ta tatou e anoano ra i te au ra katoa, to te vaerua e te materia. Ka rauka i ta tatou pureanga tu matakite i te tauturu ia tatou kia “tamou marie rai tatou i to tatou irinaki mua ra ma te maroiroi, e tae ua atu ki te openga ra.”​—Ebera 3:14; 1 Petero 4:7.

[Tataanga Rikiriki i Raro]

Na te Akamanako Akaou Anga

• Eaa ra te au mea te akatakaia maira me pati tatou i te ‘kai i teianei rā’?

• E akamarama mai i te pure e “e akakore mai i ta matou ara, mei ia matou i akakore i ta tei ara ia matou nei.”

• Eaa te aite anga me pati tatou kia Iehova e auraka e akaruke kia timataia tatou?

• Eaa ra tatou ka anoano ei kia pure e “e akaora ra ia matou i te kino”?

[Au Uianga Apii]

[Au Tutu i te kapi 15]

E mea tau kia akakore tatou i ta tetai ke ara me ka akakoreia mai ta tatou ara

[Akameitakianga no te Tutu i te kapi 13]

Lydekker