Au Uianga a te Aronga Tatau

I muri ake i te Vaipuke, kua tuku atu a Noa i tetai kukupa mei te araka tei oki mai ma tetai “rau olive.” Iea ngai te kiteaia anga e te kukupa te rau?

Te akakite maira te Pipiria e “e ririnui maata roa maira oki te vai ki rungao i te enua nei; ngaromia iora te au maunga teitei ravarai i raro ake i te rangi katoa nei.” (Genese 7:19) I te roroma anga o te vaipuke, e toru atianga kua tuku atu a Noa i te kukupa e takitai taime i te epetoma. Te rua o te taime, kua oki mai te kukupa ma tetai “rau olive paoia tei te vaa: kite akerā Noa e, kua iti te vai ki runga i te enua ra.”​—Genese 8:8-11.

E tika, i teianei kare e rauka i te kite e eaa te roa i te tuatau i puke ei tetai tuanga o te enua, no te mea kare e ekoko anga e kua tauiia te enua e te Tiruvi. Noatu rai, penei te tika ra e kua roa rai te tapoki angaia te maataanga o te au ngai e te vai ka mate atu ei te au tumu rakau e manganui. Inara, i te akara anga te vai ra rai te maroiroi o etai, i rauka ai te au rara ou kia kao akaou mai i te roroma anga o te vai.

No runga i te tumu orive, kua karanga mai The New Bible Dictionary: “Me tipuia ki raro, ka tuputupu mai te au uri ke mei te aka, i reira ka taeria ki te rima te maataanga i te au tumu ou me tupu mai. Tei matauia mei teia katoa te tumu orive te aere ra ka mate i te kao anga mai.” Mei te mea ra e “kare to te reira maroiroi e rauka i te takore,” i karanga ai The New Schaff-Herzog Encyclopedia of Religious Knowledge. Kare e tangata i teia tuatau e kite i te au tumu, mei te vaitoanga miti e te vaitoanga reva, o te vaipuke. No reira, kare e rauka ia tatou i te akapapu i to ratou tupuanga tamou ki runga i te au tumu orive e te rau rakau ke atu.

Inara, kare te tumu orive taetaevao e ora i te tuatau anu, mei tei kiteaia ra ki runga i te au maunga teitei rava. Tei matauia e tupu ana te reira i te au ngai i raro ake i te 3,000 tapuae, e te avereti vaitoanga reva tei runga ake i te 10 tikiri Celsius. “No reira,” i karanga ai te puka The Flood Reconsidered, “kua rauka ia Noa i te kite mei te rau ou aakiia e te tae ra te vai mei te au o i raro.” I te tuku atu anga a Noa i te kukupa e tai epetoma i muri ake, kare i oki mai ana, e akakiteanga e e maata ia te au ua rakau e tupu ra e te au ngai akaangaroianga tau no te kukupa.​—Genese 8:12.