Eaa ra te Au Kite o Iehova e Atoro Tamou ua atu Rai ia Koe?

I TE ao katoa nei, kua kite meitakiia te tu aruaruanga ta te Au Kite o Iehova e rave ra i ta ratou angaanga orometua mei tera are ki tera are. E umere ua ana tetai papaki e eaa ra te Au Kite o Iehova e atoro tamou ua atu rai ia ratou, mei te mea rai e kare oki ratou i akaari i mua ana i tetai ua atu inangaro ki te karere a te au Kite. E rua nga reta mei Rutia mai ka tauturu i te akataka mai i te tumu.

“Kia tuatuaia te tika,” kua akakite mai a Masha, e tamaine no Khabarovsk e 19 ona mataiti, “I te taime mua, e kopae ua ana au i te Au Kite o Iehova mei te maki mate rai.” Inara, i muri ake i te tatauanga i nga kopi o te makatini tei neneiia e te Au Kite, kua taui aia i tona manako. “Pouroa te reira e marekaanga tikai e te akamaramaanga,” i tata ei a Masha, “inara tei puapinga maata rava atu, ko te au akakite anga i roto i te makatini ka akakeu ia koe i te akara tuke ake rai i teianei ao. Kua akamata marie mai au i te marama e eaa te akakoroanga o te oraanga tangata.”

Mei te oire maata o Ussuriysk, tetai 50 maire i te tokerau o Vladivostok, kua tata a Svetlana: “Koi akamata ua akenei au i te tatau i Te Punanga Tiaki e te Awake! Te umuumu maataia nei tikai teia nga makatini i to tatou nei tuatau. E rekareka pouroa ana au i te au atikara. E mea umere tikai, e te puapinga, e te akamaramaanga. Kia akameitakiia kotou! E aka akameitakianga tikai kia kotou i te vai anga i teianei ao e no te raveanga i tetai angaanga takinga meitaki e te umuumuia.

Te Au Kite o Iehova e takapini i te ao katoa te manako pakari ra i te uianga akakeu manakoanga a te apotetoro ko Paulo: “E eaa oki [te tangata] e kite ei i te akakite kore?” (Roma 10:14) Kore koe e oake i etai nga miniti i te akarongo atu me atoro akaou mai tetai Kite ia koe? Penei ka rekareka katoa koe i te karere pumaana tei kiteaia i roto i te Tuatua Tapu a te Atua, te Pipiria.