“Kukumi Ua Ïa i te Kumikumi Anga Meitaki Ra i te Akarongo”

KA RAUKA ainei ia koe i te akamanako no runga i tetai vaeau i roto i te tuatau tamaki anga kare e mataora ana i te ikuikuia anga e: “E oki koe ki te kainga e kia akapou i tetai tuatau ma taau vaine e te ngutuare tangata”?

Kua rauka taua akauenga ra i tetai vaeau i te tuatau o te Ariki ko Davida o Iseraela. Kua kapikiia atu a Uria ngati Heta e te ariki uaorai e kua akamaroiroiia atu kia oki ki te kainga. Inara, kare a Uria e inangaro i te oki ki tona kainga. I te uiia atu anga no te tuke i te tona ra manako, kua pau atura a Uria e te vai ua ra te aruna o te koreromotu, te akatutu maira i to te Atua vai anga, e te vaeau o Iseraela tei runga i te ngai tamaki anga. “E ka tae ainei oki au,” i ui ei aia, “ki roto i toku are e kaikai e inu oki, ka moe ei ki taku vaine?” Kia Uria, e mea tau kore teia i taua tuatau ngata ra.​—2 Samuela 11:8-11.

Kua akatupu mai to Uria tu akono i te au uianga puapinga maata, no te mea te noo katoa nei tatou i roto i tetai tuatau no te tamaki. Te raveia nei tetai tamaki kare i aite ki tetai ua atu ta te au pa enua o te ao e tamaki ana. Te akariro ra te reira i nga tamaki e rua o teianei ao ei akaraanga puapinga kore ua me akaaiteia atu, e te piri nei koe ki roto i teia tamaki. E maata atu te tumatetenga, e pakari atu te enemi. I roto i teia tamaki, kare te au pupui e pupuiia, kare te au pomu e titiriia, inara te ririnui ra rai te ravenga kikite no te tamaki.

I mua ake ka rave ei i te au apinga tamaki, e mea tau kia kite koe e me te tika ra i te tu akono tau kia rave te  reira e eaa toou akakoroanga no te tamaki anga. E puapinga ainei te tamaki anga? Te akakoroanga no teia tamaki takake kua akatakaia mai e te apotetoro ko Paulo i roto i tana reta kia Timoteo: “Kukumi ua ïa i te kumikumi anga meitaki ra i te akarongo.” Ae, i roto i teia tamaki anga e mea tau kia paruru atu koe, kare i te punanga, mari ra “i te akarongo”​—ko te katoaanga ia o te tuatua mou Kerititiano tei akaariia mai i roto i te Pipiria. Te taka meitaki ra, e e mea tau kia irinaki pu tikai koe “i te akarongo” kia kukumi atu no te reira e kia autu atu.​—1 Timoteo 6:12.

Te aruaru ra tetai tumu toa pakari kia kite i tona enemi. I roto i teia tamaki, e maata ua atu te au mataiti ta te enemi i kite i roto i te ravenga kikite o te tamaki, ma te au apinga maata e te apinga tamaki tei rauka iaia. E ririnui atu aia i te tangata. E kino aia, e takinga kino, e te tau kore; ko Satani aia. (1 Petero 5:8) E puapinga kore ua te au apinga tamaki i te pae kopapa pera katoa te kikite e te akavareanga a te tangata i runga ake i teia enemi. (2 Korinetia 10:4) Eaa taau ka taangaanga kia tamaki i teia tamaki anga?

Te apinga tamaki maata roa atu koia oki “te koke o te vaerua, koia oki, te tuatua na te Atua.” (Ephesia 6:17, NW) Kua akaari te apotetoro ko Paulo e mei teaa te meitaki o te reira: “E mea ora oki te tuatua a te Atua, e te ririnui, e kokoi maata oki to te reira i to te koke matarua ra, e te koputa mama takiri anga oki e taka ke ua atu te vaerua e te ngakau, e te paunga e te uo ivi ra; e te akara matariki oki i te manako e te vananga o te ngakau ra.” (Ebera 4:12) Ko tetai apinga tamaki koi tikai, e te tau tikai, ka rauka i te reira i te koputa i roto i te au manako e te au akakeu anga i roto roa o tetai tangata tataki tai e mea papu tikai e kia taangaangaia ma te karape e te mako.

Penei kua kite koe e ka rauka i tetai tangata vaeau te au apinga tamaki tere ki mua, inara e puapinga kore ua taua au apinga tamaki me kua ngere i tona au vaeau te karape kia taangaanga i te reira. Ka inangaro katoa rai koe i te ikuikuanga kia taangaanga meitaki i taau koke. Ma te mataora, te orongaia maira kia koe te tereni anga e te aronga tamaki kite roa atu. Kua kapiki a Iesu i teia aronga kite roa atu i te tamaki ra ko te “tavini akono meitaki e te pakari,” i te oronga anga i te apainga no te tua anga i te kai i te pae vaerua i te ora mou, me kore te ikuikuanga, no tana au pipi. (Mataio 24:45) Ka kite koe i teia pupu tavini na te akara anga i ta te reira apiianga maroiroi e te au akamatakite anga tau no te au ravenga a te enemi. Te tou ra te akapapu anga ki te au mema akatainuia e te vaerua no te putuputuanga Kerititiano o te Au Kite o Iehova.​—Apokalupo 14:1.

E maata ua atu ta teia pupu tavini i rave ana i te ikuiku ua anga. Kua akaari mai te reira i te tu o te apotetoro ko Paulo, tei tata ki te putuputuanga i Tesalonia e: “I maru ua ra matou i rotopu ia kotou: mei te metua i matuapuru i tana tamariki; Koia katoa matou, no te maata o to matou aroa ia kotou, kua tika rava ia matou i te oronga atu i te evangelia a te Atua ia kotou na, e auraka oki i te reira anake, ko matou katoa uaorai oki, no te mea kua riro kotou ei akaperepere na matou.” (1 Tesalonia 2:7, 8) Tei runga ua i te vaeau Kerititiano tataki tai kia taangaanga i te tereni anga aroa i orongaia mai.

Te Rakei Katoa

Ko tetai rakei katoa tei akatutuia mai kua orongaia mai ei paruruanga noou. Ka kite koe i tetai papaanga no teia rakei katoa ia Ephesia 6:13-18, NW. Kare tetai vaeau matakite e tomo atu ki vao me kua ngaro etai o tona rakei pae vaerua me kore te umuumuia ra no te ripea.

Te inangaro ra tetai Kerititiano i tona rakei paruru katoatoa, inara e puapinga maata atu tikai te paruru o te akarongo. No reira a Paulo i tata mai ei e: “E aao i te paruru maatamaata o te akarongo, e rauka ai ia kotou i te apuku i te au tao ai ravarai a tei kino ra.”​—Ephesia 6:16, NW.

Te paruru maatamaata, ka arai i te katoa anga o te kopapa, te akatutu maira i te tu o te akarongo. E mea tau kia ketaketa toou akarongo ki roto i ta Iehova aratakianga, i te ariki anga ma te ekoko kore anga e ka tupu mai tana au taputou katoatoa ma te tika. Kia manako katoa rai koe mei te mea rai e kua  akatupu takereia mai taua au taputou. Auraka e ekoko no tetai manga tuatau e kare e roa atu ana ka takoreia te akatereanga katoa o teianei ao o Satani, e ka tauiia te enua ki roto i tetai parataito, e ko te au tangata tei vai tiratiratu ki te Atua ra ka akaokiia mai ma te tiama.​—Isaia 33:24; 35:1, 2; Apokalupo 19:17-21.

Inara, i roto i teia tamaki anga tuke maata roa atu i teia taime nei, te anoano maata ra koe i tetai apinga ke​—ko tetai oa. I te tuatau tamaki anga, kua akapupuia te au pirianga vaitata o te au oa ei aronga taeake tamaki te oronga ra i te akamaroiroianga e te paruruanga tau, i tetai au taime i te akaora anga i tetai e tetai mei te mate ra. Noatu e puapinga tikai te au oa, kia ora mai i teia tamaki anga, te anoano ra koe i te pirianga oa kare i tetai ke mari ra ia Iehova uaorai. No reira a Paulo i taopenga mai ei i tana papaanga o tei riro mai ko te rakei katoa ma teia au tuatua e: “Ma te au tu pure ravarai e te pati akaaka anga e rave ua rai kotou i te pure i te au atianga ravarai i te vaerua.”​—Ephesia 6:18, NW.

E mea reka na tatou kia piri atu ki tetai oa vaitata. Ka kimi tatou i te taokotai atu kiaia. Na te tuatua putuputu anga kia Iehova na roto i te pure, ka riro mai aia e tika tikai kia tatou, e e oa irinaki anga tau. Te akamaroiroi maira te pipi ko Iakobo ia tatou e: “E akavaitata atu ki te Atua, e nana e akavaitata mai kia kotou na.”​—Iakobo 4:8.

Au Ravenga a te Enemi

Te akakoromaki anga i teia ao nei te aite ra rai i tetai taime mei te aaere anga na roto i tetai ngai kua tanuia ki te au maina enua. Ka tupu mai te ta anga mei tetai ua atu ngai, e te tauta ra te enemi i te opu poitirere ua ia koe. Inara, kia papu e, kua oronga katoatoa mai a Iehova i te paruruanga ta tatou e anoano ra.​—1 Korinetia 10:13.

Penei ka tauta pakari te enemi i te ta mai na te tamaki mai anga i te au tuatua mou Pipiria e puapinga angaia ki toou akarongo. Penei ka taangaanga te au apoteiti i te au tuatua taparu, akareka anga, e te manako anga taruri ke i te tauta anga kia ruti koe. Inara kare te apoteiti e manako mai ana i toou oraanga kia meitaki. Te karanga ra a Maseli 11:9 e: “Na te vaa o te tangata pikikaa e mate ïa te tangata tupu nona: te ora nei ra te aronga tuatua-tika ra i te kite.”

E mea tarevakeia i te manako anga e te anoanoia ra koe kia akarongo atu ki te au apoteiti me kore kia tatau i ta ratou au tata anga kia patoi atu i ta ratou au taumaroanga. Ka rauka i ta ratou manako anga taruri ke, poitini ra i te akatupu i te kino i te pae vaerua e ka rauka i te akakino i toou akarongo mei te maki kakai akatotoa viviki ra. (2 Timoteo 2:16, 17) Kareka ra, kia aru atu i ta te Atua pau anga ki te au apoteiti. Te karanga ra a Iobu no Iehova e: “Kare oki te pikikaa e tae ki mua i tona aroaro.”​—Iobu 13:16.

Penei ka tauta te enemi i tetai ravenga tuke, ko tetai te aravei atura i tetai autu anga kotingaia. Me ka rauka tetai vaeau i te akavareia kia topa mei te pupu i te aruaru anga i te tu akanavenave e te akono tau, ka akatupu teia i te marikonga kore.

Te tamataora anga o teianei ao, mei te au teata tau kore e te au akaariari anga tivi e te au imene, e maunu meitakiia. Te karanga ra etai e ka rauka ia ratou i te akarakara i te au teata tau kore e te tatau i te au puka tau kore e kare ratou e akakeuia. Kua akakite papu mai tetai tangata tei akarakara putuputu ana i te au teata ravenga ainga rave uaia e: “Kare e ngaropoina ia koe taua au akaariarianga, te maata atu taau e manako ra no runga i te reira ka kite koe ia koe uaorai i te inangaro anga i te  rave i taau i kite ana . . . Te akariro ra te teata kia manako koe e te ngere tikai ra koe i tetai apinga.” E puapinga ainei e kia tuku atu i te oraanga kia tamamaeia mai e teia ta anga kikite ra?

Ko tetai tao i roto i te apinga tamaki a te enemi koia oki te akavare anga no te noinoi anga i te apinga materia. Penei ka riro ei mea ngata kia kiteaia te kino no te mea te anoano katoatoa ra tatou i te au apinga i te pae materia. Te inangaro ra tatou i tetai kainga, te kai, e te kakau, e kare e tarevake kia rauka mai te au apinga manea. Te vai ra te kino i roto i ta tetai e manako ra. Penei ka riro mai te moni ei mea puapinga maata atu i te au tumu i te pae vaerua. Ka riro mai tatou ei aronga noinoi moni. E mea meitaki i reira kia akamaara ia tatou uaorai i te au kotingaanga o te apinganui. E tuatau poto uaia, kareka ra te au apinganui i te pae vaerua ka vai ua e tuatau ua atu.​—Mataio 6:19, 20.

Me e meangiti mai te irinaki anga o tetai vaeau, kua meangiti mai te puapinga no te autu anga. “Kia potopoto to aʼo i te rā i eke ei ra, kua iti roa toou maroiroi.” (Maseli 24:10) Ko te akamaroiroi kore tetai apinga tamaki ta Satani e taangaanga meitaki ra. Na te aao anga “ma te manako ora ei pare” e tauturu ia koe kia tamaki atu i te akamaroiroi kore. (1 Tesalonia 5:8) E tauta kia akono ketaketa i toou manakonako anga mei to Aberahama rai. I te patiia anga kia oronga i tana tamaiti okotai ra, ko Isaaka, ei atinga, kare a Aberahama i taroaroa ana. Kua irinaki aia e ka akatupu te Atua i Tana taputou kia akameitakiia te pa enua ravarai na roto i tana uanga e ka rauka i te Atua i te akatu mai ia Isaaka mei te mate mai me te anoanoia ra e rauka ai i te akatupu i taua taputou ra.​—Ebera 11:17-19.

Auraka e Tuku i te Tamaki

Ko etai tei tamaki mataku kore ana no tetai tuatau roa penei kua akaroiroi e no reira kare e tamaki ana ma taua tu maroiroi ra. Te akaraanga o Uria, tei taikuia i mua akenei o teia atikara nei, te tauturu maira i te katoatoa te piri atura ki roto i te tamaki kia tamou ua atu i te manako tau. E manganui to tatou au taeake tumu toa Kerititiano te akakoromaki ra i te au akangere anga, te vai ua ra i roto i te au kino, me kore te mamae ra i te anu e te onge. Mei ia Uria rai, kare tatou e inangaro i te manako no runga i te au mea mareka anga ta tatou e reka ra i teianei me kore kare e tuku ua ki tetai inangaro kia arataki atu i tetai oraanga ngoie ua. Te inangaro ra tatou kia vai ua ma to Iehova vaeau i te ao katoa o te aronga tamaki tiratiratu e kia rave ua atu i te tamaki anga e rauka ua atu ei ia tatou te rekareka no te au akameitaki anga umere te vai ra no tatou.​—Ebera 10:32-34.

E kino tikai te reira me tuku tatou i te paruru anga ki raro, penei ua ake i te manako anga e te vai mamao ua ra rai te tamaki anga openga ki te tuatau i mua. Te akaari maira te akaraanga o te Ariki ko Davida i te kino. No tetai ua atu tumu kare aia i noo atu ana ki tona pupu vaeau i roto i te tamaki anga. Tei tupu, kua rave a Davida i te ara kino tei akatupu i te taitaia kiaia e te mamae anga no te toenga o tona oraanga.​—2 Samuela 12:10-14.

 E mea puapinga ainei kia piri atu ki roto i teia tamaki, i te aro atu anga i te tu ngata o te tamaki, i te akakoromaki anga i te aviri anga, e te akaruke anga i te au navenave ekoko anga o teianei ao? Te aronga te rave ua atura i te tamaki anga ma te autu anga te ariki ra e ko ta teianei ao e oronga maira e akara anga maneaia, mei tetai apinga kanapanapa rai, inara me akara vaitata atu ra, e mea puapinga kore ua. (Philipi 3:8) Tei runga ravao, ko tei maata atu te akatupu ra taua au akanavenave anga i te mamae e te akamaroiroi kore.

Te Kerititiano i roto i teia tamaki i te pae vaerua te rekareka ra i te pirianga oa vaitata ma te au oa tika tikai, i tetai akava ngakau ma, e tetai manakonako anga umere. Te akara nei te au Kerititiano akatainuia ma te vaerua ki mua ki te oraanga mate kore i te rangi ma Iesu Karaiti. (1 Korinetia 15:54) Te maata anga o te aronga tamaki Kerititiano te manakonako ra no tetai oraanga tangata tiama i roto i tetai parataito i te enua. Papu e ko taua au re anga e puapinga i tetai ua atu re anga. E kare mei te au tamaki a teianei ao, te tupu anga no tatou i roto i teia tamaki anga ka akapapuia mai me ka vai tiratiratu ua rai tatou. (Ebera 11:1) Inara, te ka tupu mai no teia akatereanga i raro ake i ta Satani akatere anga, e akapouanga katoa.​—2 Petero 3:10.

Ia koe e rave ua atura i teia tamaki anga, kia maara i te au tuatua a Iesu e: “Ka akamaroiroi ra, kua riro te re o teianei ao iaku.” (Ioane 16:33) Kua re aia na te vai tiratiratu ma te tamou e te maroiroi i raro ake i te timata anga. Ka rauka ia tatou i te rave i te reira.

[Tataanga i te kapi 27]

Kare te au pupui e pupuiia, kare te au pomu e titiriia, inara te ririnui ra rai te ravenga kikite no te tamaki

[Tataanga i te kapi 30]

Te tupu anga no tatou i roto i teia tamaki anga ka akapapuia mai me ka vai tiratiratu ua rai tatou

[Tutu i te kapi 26]

Ka tauturu te pare o te ora kia tamaki ua atu tatou i te akamaroiroi kore anga

E taangaanga i te rakei maatamaata o te akarongo kia kape i te “au tao ai” a Satani

[Tutu i te kapi 28]

“E akavaitata atu ki te Atua, e nana e akavaitata mai kia kotou na”

[Tutu i te kapi 29]

Ka tau kia rauka ia tatou te akarongo i roto i te akatupu anga o ta te Atua ra au taputou