Pumaana no Tei Mamae Ra

ME MAMAE te au tane e te au vaine tiratiratu i te tuatau i topa i te takinga kino anga, kua pure akatenga atu ratou ki te Atua no te arataki anga. Inara, kua rave katoa ratou i te arataki ke atu i te takinga kino, na te manako taangaanga anga i te kimi ravenga kia oro ke atu mei te aronga taomi anga. Ei akaraanga, na te irinaki anga ki runga ia Iehova kapiti atu ma tana tauta anga uaorai i rauka ai ia Davida i te akakoromaki i tona tumatetenga. Akapeea tatou i teia tuatau?

Me aro atu tatou i te mamae anga, penei paa ka manako atu koe i te kimi ravenga kia rapakau i toou manamanata. Ei akatauanga, me kite koe ia koe uaorai e kare e angaanga, kare ainei koe e tauta ua atu i te kimi i tetai angaanga tau te ka tauturu ia koe e toou ngutuare tangata? (1 Timoteo 5:8) Me kore te mamae ra ainei koe i tetai maki i te pae kopapa, kare ainei koe e kimi atu i tetai tauturu kia rapakauia? E mea umere tikai e ko Iesu, tei rauka te mana no ko mai i te Atua kia rapakau i te au tu maki ravarai, i te akakite anga e ‘no te aronga maki te taunga.’ (Mataio 9:12) Inara, penei kare toou au tumatetenga e rauka i te akakoreia; penei ka akakoromaki ua atu rai koe i te reira no tetai tuatau.

Eaa ka kore ei e apai atu i te manamanata ki te Atua ko Iehova na roto i te pure? Ei akatauanga, me kimi i te ngai angaanga, na te irinaki anga ki runga i te Atua na roto i te pure ka tauturu ia tatou kia kopae i tetai ua atu timataanga kia ariki i te angaanga tei patoi ra i te au kaveinga Pipiria. Ka kopae katoa tatou i te ‘taka ke angaia i te akarongo nei’ no te noinoi e te anoano maata i te moni. (1 Timoteo 6:10) E tikai, me raveia tetai au ikianga puapinga maata no runga i te ngai angaanga me kore no te ngutuare tangata me kare ra no te au manako oraanga kopapa, ka rauka ia tatou i te aru i ta Davida ako anga e: “E tuku koe i taau apainga kia Iehova ra, e nana koe e tauturu mai; kare rava aia e vaoo ua atu i te tangata tuatua-tika kia akangaueueia ra.”​—Salamo 55:22.

Ka tauturu katoa te pure akatenga ia tatou kia akono i to tatou parani anga manako kia kore to tatou mamae e taomi takiri ia tatou. Ei Kerititiano tikai, kua tata te apotetoro ko Paulo: “E akakite ua ra ki te Atua i to kotou anoano i te au mea katoa ra i te pure, e te pati anga atu ma te akameitaki.” Na roto i teea mataara e rauka ai i te pure ngakau tae i te akapumaana mai ia  tatou? “E na te au o te Atua, ko tei maata ua atu i te kite tangata, e akamaroiroi mai i to kotou ngakau e to kotou manako i te Mesia nei ia Iesu.” (Philipi 4:6, 7) Te au o te Atua e “maata ua atu i te kite tangata.” No reira, ka rauka i te reira i te akatinamou ia tatou me akateiaa ia tatou e te au manako ngakau apiapi. Na te reira e ‘akamaroiroi i to tatou ngakau e to tatou manako,’ i te tauturu anga i reira ia tatou kia kopae i te ariuanga atu ma te kino e te pakari kore, te ka akamaata atu i to tatou mamae.

Ka rauka i te pure i te akatupu i te tuke e akapeea te turanga i te tupu anga mai. Te riro mai anga te apotetoro ko Paulo ei mouauri i Roma, kua pati akaaka atu aia ki te au taeake Kerititiano kia pure nona ra. Eaa ra a Paulo i rave ei i teia pati anga? “I maata uaʼi taku tuatua ia kotou e, e akapera,” i tata mai ei aia kia ratou, “kia akaoki vaveia ra au ia kotou na.” (Ebera 13:19) I tetai atu au tuatua, kua kite a Paulo e na roto i te au pure tamou a tona au taeake irinaki penei e tuke tetai ka tupu e aea aia e tukunaia ai kia aere.​—Philemona 22.

Ka taui ainei te pure i te tupu anga o toou mamae? Penei paa. Inara, ka tau tatou kia kite, e kare a Iehova e pau ua mai rai i ta tatou au pure na roto i te tu ta tatou ka tapapa atu. E maata ua atu te taime i to Paulo pure anga no runga i tona ‘tara i roto i te kopapa,’ penei e manamanata no te kopapa. Inara, kare i akakoreia atu te mamae, kua akakite te Atua kia Paulo e: “Toku nei aroa ua, oti ra ua ïa taau: ei te apikepike e taka meitaki ravaʼi toku maroiroi.”​—2 Korinetia 12:7-9.

E, no reira, kare to tatou mamae e viviki i te ngaro ke atu. Inara, tei ia tatou te tuatau no te akapapu i to tatou irinaki anga ki rungao i to tatou Metua i te rangi ra. (Iakobo 1:2-4) Kia papu e noatu e kare te Atua ko Iehova e akakore i te mamae, ka rauka iaia i te ‘akatupu i te akapuanga i taua timataanga ra, kia tika ia [tatou] kia akakoromaki.’ (1 Korinetia 10:13) E mea tau kia maara e kua kapikiia a Iehova ko ‘te Atua nona anake te pumaana; ko tei akapumaana mai ia tatou i to tatou au mate katoa nei.’ (2 Korinetia 1:3, 4) Ka rauka i te Atua i te oronga mai kia tatou i tei anoanoia ra e tatou kia akakoromaki, e tei ia tatou te manakonako anga no te ora mutu kore.

Kua taputou mai te Tuatua a te Atua, te Pipiria, e na Iehova “e orei i te roi-mata katoatoa; e e kore rava te mate, e te aue, e te mii; e te mamae oki, e kore katoa ïa.” (Apokalupo 21:3, 4) E tangi anga umere roa ainei tetai ao kare e mamae? Penei e tangi anga umereia me kua matau koe i te noo ma te mamae. Noatu rai, te rangatira mei te mataku e te tumatetenga ko ta te Atua ia i taputou mai, e ka tupu tikai tana akakoroanga.​—Isaia 55:10, 11.

[Au Tutu i te kapi 9]

Mei te taitaia ki te akamaru anga