Akapeea Tatou i te Akaarianga i To Tatou Aroa no te Atua

I TE tatanu anga i te aroa no te Atua kare i te angaanga kite ua. Mei tei kiteaia e to te Atua ra au tavini takapini i te ao, e tupu mai ana te aroa mou no te Atua i te kite mai anga e tetai i to te Atua ra tu meitaki, e kua akaketaketa maata atu ia i te matau mai anga e tetai i ta te Atua e inangaro ra, tana e rikarika ana, e eaa tana e reka ana e tana au umuumuanga.

Ma te inangaro tikai, kua oronga mai a Iehova i tana Tuatua, te Pipiria, e kua akakite mai aia iaia uaorai. Mei reira mai, kua kite tatou e akapeea a Iehova i te akonoanga i te au turanga tuketuke. Ma te marekaanga maata tikai kia tatou me tae mai ana tetai reta mei tetai o to tatou e akaperepere ra, te apai katoa maira te Pipiria kia tatou i te marekaanga ia tatou e akara atura i te au tu ou o to Iehova ra tu peretana tei akakiteia mai.

Inara, mei ta tatou e kite ana i tetai taime i ta tatou angaanga orometua papuriki, kare te apiianga i te Atua e akakeu ua ana i tetai tangata i te aroa atu iaia. Kua tuatua atu a Iesu ki tetai au ngati Iuda ariki kore ua i tona tuatau: “Ka kimi marie i te au tuatua i tataia ra; no te mea, te manako ra kotou ka rauka te ora mutu kore i reira: . . . Kua kite ra au ia kotou e, kare rava o kotou anoano i te Atua i roto ia kotou na.” (Ioane 5:39, 42) Kua akapou tetai papaki i te au mataiti ki te apiianga no runga i ta Iehova ra au angaanga aroa inara e iti ua to ratou aroa nona ra. No teaa ra? Kua ngere ratou i te akamanako i te au tumu anga o ta ratou i tamou mai. Ei tukeanga, e mirioni ua atu te au tangata ngakau tae ta tatou i apii ana i te Pipiria kua kite mai e te tupu ua atura to ratou aroa no te Atua. No teaa ra? No te mea, mei ta tatou uaorai i rave ana, kua aru ratou i te akaraanga o Asapha. Na teea mataara?

Akamanako Oonu Anga ma te Ariki Anga Tikai

Kua titau tamou a Asapha kia tatanu i te aroa no Iehova i roto i tona ngakau. Kua tata aia: “Te koreromoko nei au ki toku ngakau; . . . E  akamaara ana au i te angaanga a Iehova: ka akamaara rai au i taau ra angaanga taka ke i taito ra. Ka akamaaraara rai au i taau ra au angaanga katoa, ka tuatua rai au i taau i rave ra.” (Salamo 77:6, 11, 12) Ka tupu te aroa no te Atua i roto i te ngakau o etai tei akamanako i to Iehova ra arataa mei ta te tata taramo rai.

Kapiti mai, ko te akamanakoanga i te au tupuanga tei marekaia e tatou i te tavinianga ia Iehova e akaketaketa angaia i to tatou pirianga kiaia. Kua karanga mai a Paulo e e “oa rave angaanga,” oki tatou no te Atua e te pirianga oa te ka tupu mai i rotopu i te au oa rave angaanga e mea takake tikai ia. (1 Korinetia 3:9) Me akaari tatou i to tatou aroa no Iehova, te manako meitaki maira aia i te reira, e te akamareka ra i tona ngakau. (Maseli 27:11) E no reira, me pati tatou i ta Iehova ra tauturu, e kua arataki aia ia tatou i roto i tetai manamanata, kua kite tatou e te vai ra aia kia tatou, e kua akaoonuia to tatou aroa nona ra.

E tupu mai ana te pirianga oa i rotopu i nga tangata e rua ia raua e akaari ra i to ratou au manako ngakau mei tetai ki tetai. Mei te reira katoa, me akakite tatou kia Iehova e eaa tatou i akono ei iaia, kua akaketaketaia to tatou aroa nona ra. Ka kite tatou uaorai i te akamanakoanga i ta Iesu ra au tuatua e e: “Akaperepere atu koe i toou Atua ia Iehova ma to ngakau katoa e ma to meta katoa e ma to manako katoa e ma to ririnui katoa.” (Mareko 12:30, NW) Eaa ta tatou ka rave i te akapapu anga e ka rave tamou ua atu rai tatou i te aroa atu anga ia Iehova ma to tatou ngakau katoa, to tatou meta katoa, to tatou manako katoa, e to tatou ririnui katoa?

Aroa ia Iehova ma to Ngakau Katoa

E taiku ana te au Tuatua Tapu i te ngakau akatutuia e ko te tangata ia i roto roa​—to tatou au inangaro, te au tu, e te au manako ngakau. E no reira i te aroa anga ia Iehova ma to tatou ngakau katoa e maata atu ia i tetai au apinga ke atu, te inangaro ra tatou i te akamareka i te Atua. (Salamo 86:11) Te akaari ra tatou i teia aroa na te akonoanga i to tatou tu tangata kia tau kiaia ra. Te tauta ra tatou i te aru i te Atua na te ‘rikarika anga i te kino; kia kapiti atu ki te meitaki.’​—Roma 12:9.

Kua tukiia to tatou aroa no te Atua e to tatou au manako ngakau no runga i te au mea ravarai. Ei akaraanga, penei kua kite mai tatou i tetai akaaoanga me kare i te akapouanga o to tatou manako ki ta tatou angaanga, inara tei reira ainei to tatou ngakau? Kare. I te mea e te aroa ra tatou ia Iehova ma to tatou ngakau katoa, e au orometua tatou na mua no te Atua. Pera katoa, te inangaro ra tatou i te akamareka i to tatou nga metua, to tatou tokorua akaipoipo, e to tatou pu angaanga, inara te akapapu ra tatou i to tatou aroa ngakau katoa no Iehova na te kimi maata atu anga i te akamareka iaia. No te mea, te tau ra aia i te ngai mua o to tatou ngakau.​—Mataio 6:24; 10:37.

Aroa ia Iehova ma to Meta Katoa

I roto i te au Tuatua Tapu te taiku tumuia ra te tuatua “meta” ki to tatou tu tangata katoa e pera rai ki  to tatou uaorai oraanga. E no reira kia aroa ia Iehova ma to tatou meta katoa ko te aiteanga e kia taangaanga tatou i to tatou oraanga i te akapaapaa iaia e i te akapapu i to tatou aroa nona ra.

E tika oki, penei e au inangaro ke atu to tatou i roto i te oraanga, mei te apii anga i tetai angaanga, akaaere anga i tetai pitiniti, me kare i te utuutuanga i te pamiri. Inara i taua taime rai, kia akapapu tatou i to tatou aroa ma te meta katoa no Iehova na te rave anga i te au apinga na tana mataara e i te akanooanga i roto i to tatou oraanga te au apinga ke atu i tona ngai tau, e i reira i te “kimianga i te patireia na mua e te tuatua tika nona ra.” (Mataio 6:33, NW) Ko te akamorianga ma te meta katoa te aiteanga katoa ia e kia maroiroi. Te akaari ra tatou kia Iehova e te aroa ra tatou iaia na te tutu maroiroi anga i te karere Patireia, oronga anga i te au tuatua akamaroiroi i te au uipaanga, me kare i te tauturuanga i to tatou au taeake e te au tuaine Kerititiano. I te au apinga katoa, e rave tamou ua atu tatou “i te akono anga i to te Atua ra inangaro ma te tae o te ngakau.”​—Ephesia 6:6.

Kua akaari mai a Iesu i te aroa ma te meta katoa no te Atua na te akarukeanga iaia uaorai. Kua tuku aia i to te Atua anoano ko te apinga mua e tona uaorai umuumuanga ko te rua ia. Kua pati mai a Iesu ia tatou kia aru i tana akaraanga. Kua karanga aia: “E akaruke aia iaia uaorai e ka apai ei i tona rakau tamamae e ka aru tamou mai ei iaku.” (Mataio16:24, 25, NW) Kia akaruke ia tatou uaorai ko te aiteanga ia e kia rave i te akatapuanga. Ko te aiteanga e no to tatou aka inangaro i te Atua e kua oake tatou i to tatou uaorai oraanga kiaia, mei tetai tangata Iseraela rai i te tuatau Pipiria i te aroa anga i tona pu e no te maata o te reira kua akariro aia iaia uaorai ei tavini tamou kiaia. (Deuteronomi 15:16, 17) Te akatapuanga i to tatou oraanga kia Iehova te oronga maira te akapapuanga pu tikai e te aroa ra tatou iaia.

Aroa ia Iehova ma to Manako Katoa

Kia aroa atu ia Iehova ma to manako katoa e ko te aiteanga ia kia tauta tatou ma te umuumuanga i te marama i to Iehova ra tu peretana, te au akakoroanga, e te au umuumuanga. (Ioane 17:3; Angaanga 17:11) Te akakite ra tatou i to tatou aroa no Iehova na te taangaanga katoa anga i to tatou au tu kite i te tauturuanga i tetai ke kia aroa katoa atu ia Iehova e na te akameitaki atu anga i ta tatou apii marie anga. “Ka tatua na i te taukupu o to kotou ngakau,” i raurau mai ei te apotetoro ko Petero. (1 Petero 1:13) Pera katoa, kia tauta pakari tatou i te akaarianga i te inangaro ki tetai ke, ki te au taeake tavini tikai o te Atua. Te kite ra tatou i to ratou au turanga e te akara ra me ka tau te akameitakianga me kare me te umuumuia ra te akapumaanaanga.

Te akaari ra tatou i to tatou aroa no Iehova ma te manako katoa na te kauraroanga kiaia i te pae manako. Ka tauta tatou i te akara i te au apinga ma tana manakoanga, kia akamaara iaia me rave tatou i te au ikianga, e kia irinaki e e meitaki rai tana ra arataa. (Maseli 3:5, 6; Isaia 55:9; Philipi 2:3-7) Inara ia tatou e akaari tamou ua atura i to tatou aroa no te Atua, akapeea tatou i te taangaanga anga i to tatou maroiroi?

Aroa ia Iehova ma to Maroiroi Katoa

E manganui te au mapu i roto i te putuputuanga Kerititiano te taangaanga ra i to ratou maroiroi i te akapaapaaanga ia Iehova. (Maseli 20:29; Koheleta 12:1) Ko tetai mataara e akaari ra te mapu Kerititiano e manganui i to ratou aroa no Iehova ma to ratou maroiroi katoa e na te piri atu anga ki roto i te tavinianga painia, ko te angaanga orometua tamou. E manganui te au mama e piri ana ki roto i teia angaanga orometua e tei te apii ta ratou tamariki. Te aronga pakari tiratiratu tei rave i te atoroanga kapiti katoa mai ko te akonoanga i to ratou uaorai oraanga pamiri te akaari maira e te aroa ra ratou ia Iehova ma to ratou maroiroi katoa. (2 Korinetia 12:15) Te oronga ra a Iehova i te mana ki te aronga tei manakonako i roto iaia, e rauka ai ia ratou i te akaari i to ratou aroa i te akapaapaaanga iaia, na te taangaanga anga i te maata o to ratou maroiroi.​—Isaia 40:29; Ebera 6:11, 12.

Ka tupu te aroa me tatanu meitakiia. E teianei, kia rave tamou ua atu tatou i te tuku taime kia akamanako oonu atu. Te maara ra ia tatou i ta Iehova i rave no tatou e eaa aia i tau ei i ta tatou akamorianga. Ei uanga apa kore na Adamu, kare e rauka ia tatou te tu tau e “ko ta te Atua ïa i vaio no te aronga i inangaro iaia ra,” inara ka rauka ia tatou i te akaari e te aroa ra tatou ia Iehova ma to tatou tu katoa. Kia rave ua atu rai tatou i te reira!​—1 Korinetia 2:9.

[Tutu i te kapi 20]

Te akaari ra tatou i te aroa no te Atua na roto i te au angaanga