Au Uianga a te Aronga Tatau

I te mea e kare o te Ngati Levi kainga i roto ia Iseraela taito, i akapeea i reira a Hanameela e ngati Levi i te oko anga i te koro ki tona katini ko Ieremia, tei kiteaia i roto ia Ieremia 32:7?

I teia tu nei o te ngati Levi, kua tuatua maira a Iehova kia Aarona: “Auraka toou ei kainga i roto i to ratou enua, auraka toou ei tuanga i roto ia ratou [Iseraela] ra.” (Numero 18:20) Kareka ra, kua tukuia atu ki te ngati Levi e 48 oire pera katoa to ratou au kainga i vao mai, tei akatotoaia atu na roto i te Enua Taputouia. To Ieremia oire i noo ei ko Anatota, tetai ia o te au oire tei tukuia ki “te tamariki a Aarona taunga.”​—Iosua 21:13-19; Numero 35:1-8; 1 Paraleipomeno 6:54, 60.

Ia Levitiku 25:32-34, (NW) ka kite tatou i ta Iehova ikuikuanga takake i oronga ei akaaere i “te tikaanga kia oko akaou mai” i te enua o te au Ngati Levi. Te papu ra e, e tikaanga to te au ngutuare tangata tataki tai o te Ngati Levi no runga i te kainga tei rauka mai, te taangaanga anga, e te tuaanga o te au tuanga takake. I reira ka tau kia piri atu te okoanga e te oko akaou mai anga o te enua. * I roto i te au tu e manganui, e tikaanga to te Ngati Levi e te taangaanga ra i te enua na te au mataara tei aiteite ki ta te au Iseraela rai o tetai atu au kopu.

Penei, te tikaanga ki teia au enua o te Ngati Levi kua patiia mai na roto i te tuanga kainga kopu tangata. Inara, ko “te tikaanga kia oko akaou mai,” kua akatikaia te au okoanga ki rotopu i te Ngati Levi ua. (NW) Pera katoa, tei manakoia ko te oko e te oko akaou anga mai o te enua ka tau ua te reira ki te kainga i roto i te au oire, i te mea ko “te koro o te enua no to ratou au oire,” kare ia e oko ia no te mea “e apinga ia na ratou e tuatau uatu.”​—Levitiku 25:32, 34, NW.

No reira ko te koro ta Ieremia i oko akaou mai mei ia Hanameela te taka ua ra e kua na roto i te tu te ka patiia atu na roto i te oko akaouanga. Penei tei roto teia i te kotinga o te oire. Kua akapapu tikai a Iehova e ko “te koro” tei uiia no Hanameela te reira e tei ia Ieremia “te tikaanga kia oko akaou mai.” (Ieremia 32:6, 7, NW) Kua taangaanga a Iehova i teia okoanga ei akatutuanga no te akaketaketa anga i tana i taputou e ka oki akaou to Iseraela ka rave akaou mai i to ratou tuanga o te enua i muri ake i te tuatau i tuikaa ai i roto ia Babulonia.​—Ieremia 32:13-15.

Kare e akakiteanga e ko te rauka anga to Hanameela enua i Anatota kua na roto i te tu taukore. Kare rava e akaari anga e kua takino aia i ta Iehova ture i tona patianga ia Ieremia kia oko i teia koro i roto ia Anatota me kore kua taangaanga taukore a Ieremia i tona tikaanga i te oko akaou mai i te oko anga te koro.​—Ieremia 32:8-15.

[Tataanga Rikiriki i Raro]