Ka Rauka Ainei te Akarongo i te Rapakau i Tei Makiia?

ME MAKIIA ana, ka kimi tatou i te akamaruanga e te rapakauanga. Penei, kua kite mai koe mei te Pipiria e e putuputu te taime ia Iesu Karaiti i te rapakauanga i te au tu maki ua, apai anga mai i te akamaruanga ki te aronga maki e manganui. I akapeea ai taua au rapakauanga i te tupuanga mai? Na te “mana maata o te Atua,” i karanga ai te Pipiria. (Luka 9:42, 43; Angaanga 19:11, 12) No reira, na te vaerua tapu mei te Atua ra i akakoro i te rapakauanga, kare oki e ko te akarongo ua o te tangata. (Angaanga 28:7-9) No reira oki te tumu i kore ei a Iesu i umuumu ei i te au tangata maki kia akakite i to ratou akarongo ki roto iaia e rauka ai ia ratou kia rapakauia.

Penei ka umere koe: ‘E apinga taito ainei te au rapakauanga temeio, me kare ka tupu akaou ainei te tu rapakauanga tei raveia ana e Iesu ra? Eaa te manakonako anga no te aronga te mamae ra mei tetai maki mamae kino me kore kare e rauka kia rapakauia?’

Te akataka maira te Pipiria e i to te Atua ao ou ma te tuatua tika, ka rauka akaou te mana maata o te Atua i te akatupu i te tu rapakauanga temeio tei raveia ana e Iesu i tona taime i te enua nei. Ka mataora te Au Kite o Iehova i roto i toou ngai i te akaari atu kia koe e akapeea e aea te Atua e akatupu ei i tei kore i rauka ana i te aronga akaora akarongo i te rave​—te akakore anga i te au maki, pera katoa te mate. Ae, na te Atua “e akakore rava i te mate e tautau ua atu.”​—Isaia 25:8.